left
Safe Home
Safe Home
Safe Home

Friday, Jan 30th

| English Version | dapnews: 012 571 704, 097 9999 883, email: lim.cheavutha@gmail.com

You are here:
 

ជនជាតិកូរ៉េ ២រូប ប្ដេជ្ញា​ចិត្ត​ជួយ​កីឡា​សូហ្វតិន្នីស​កម្ពុជា រហូត​ដល់​ស្លាប់

E-mail Print PDF

ភ្នំពេញ៖ សហព័ន្ធកីឡាសូហ្វតិន្នីសកម្ពុជា នៅព្រឹកថ្ងៃទី៣០ មករានេះ បានប្រកាសតែងតាំងជនជាតិកូរ៉េ ២រូប ធ្វើជាគ្រូបង្វឹកកីឡាសូហ្វតិន្នីស និងកីឡាវាយកូនបាល់របស់ក្រសួងមហាផ្ទៃ ដើម្បីជួយបណ្ដុះបណ្ដាលកីឡាករ-កីឡាការិនីកម្ពុជាឲ្យមានការរីកចម្រើន ខណៈគ្រូបង្វឹក ជនជាតិកូរ៉េទាំង ២រូបនោះ បានប្ដេជ្ញាចិត្តជួយកីឡាសូហ្វតិន្នីសកម្ពុជា រហូតដល់ស្លាប់ ។

គ្រូបង្វឹកជនកូរ៉េ ដែលត្រូវបានថ្នាក់ដឹកនាំសមាគមកីឡាក្រសួងមហាផ្ទៃផ្ដល់សេចក្ដីទុកចិត្ត ដើម្បីចូលរួមអភិវឌ្ឍន៍វិស័យកីឡាសូហ្វតិន្នីស និងកីឡាវាយកូនបាល់កម្ពុជានោះ គឺមានលោក Kim Gunjung និងលោក Cha Jeong Joo ។

លោក Kim Gunjung គឺជាអតីតកីឡាករសូហ្វតិន្នីសរបស់កូរ៉េខាងត្បូងតាំងតែពីអាយុ ១២ឆ្នាំមកម្លេះ ហើយក៏ធ្លាប់ចូលរួមប្រកួត ក្នុងព្រឹត្តិការណ៍ អន្ដរជាតិ ជាច្រើនលើកច្រើនសារផងដែរ ដូច្នេះបទពិសោធន៍ ដែលធ្លាប់មានលោក នឹងផ្ទេរមកឲ្យ កីឡាករ-កីឡាការិនី សូហ្វតិន្នីសកម្ពុជា ។
បុរសវ័យ ៦០ឆ្នាំរូបនេះ បានបន្ដថា “កម្ពុជាបច្ចុប្បន្នសម្បូរទៅដោយធនធាន ប៉ុន្ដែនៅខ្វះខាតបច្ចេកទេសនៅឡើយ ដូច្នេះហើយក្នុងនាមខ្ញុំ ជាអ្នកស្នេហាវិស័យកីឡាសូហ្វតិន្នីសនោះ ខ្ញុំនឹងខិតខំបង្ហាត់បង្រៀនកីឡាករ-កីឡាការិនីកម្ពុជាឲ្យមានសមត្ថភាពគ្រប់គ្រាន់ ដើម្បីប្រកួតប្រជែង ជាមួយប្រទេសដទៃ ។ ខ្ញុំសន្យាថា ខ្ញុំនឹងជួយកីឡាសូហ្វតិន្នីសកម្ពុជាឲ្យមានសក្ដានុពលនៅលើឆាកអន្ដរជាតិ រហូតដល់ដង្ហើមចុងក្រោយរបស់ខ្ញុំ” ។

ឯលោក Cha Jeong Joo ក្នុងនាមជាកីឡាករវាយកូនបាល់ដ៏ឆ្នើម លំដាប់លេខ៣ប្រចាំទ្វីបអាស៊ី លោកក៏បានប្ដេជ្ញាចិត្ត ចូលរួមជួយផ្ដល់បទពិសោធន៍ បច្ចេកទេស និងចំណុចពិសេសៗ ជាច្រើន ដើម្បីធ្វើឲ្យសមត្ថភាពរបស់កីឡាករ-កីឡាការិនីសូហ្វតិន្នីសកម្ពុជា និងកីឡាវាយកូនបាល់កម្ពុជា កាន់តែមានសក្ដានុពលនៅលើឆាកអន្ដរជាតិនាពេលអនាគត ។

ក្នុងឱកាសតែងតាំងជនជាតិកូរ៉េខាងលើជាគ្រូបង្វឹកកីឡាសូហ្វតិន្នីស ប្រចាំសមាគមកីឡាក្រសួងមហាផ្ទៃនោះ លោក ជា ប៊ុនហេង អគ្គលេខាធិការ សហព័ន្ធកីឡាសូហ្វតិន្នីសកម្ពុជា ដែលទើបនឹងចាប់បដិសន្ធិកាលពីចុងឆ្នាំ២០១៤នោះ បានលើកឡើងថា នេះគឺជាឱកាសដ៏ល្អប្រសើរបំផុត សម្រាប់កីឡាករ-កីឡាការិនីសូហ្វតិន្នីសកម្ពុជា ដែលត្រូវខិតខំយកចិត្តទុកហ្វឹកហាត់ ដើម្បីត្រៀមចេញទៅប្រកួតក្នុងព្រឹត្តិការណ៍ World Turn Soft Tennis Championship 2015 នៅប្រទេសថៃ នាចុងខែមីនាខាងមុខនេះ ។

លោកបានបញ្ជាក់ថា “លោក Kim Gunjung និងលោក Cha Jeong Joo គឺសុទ្ធតែជាអ្នកមានសមត្ថភាព ។ ខ្ញុំសប្បាយចិត្តណាស់ ដែលពួកគាត់បាន មកជួយសហព័ន្ធកីឡាសូហ្វតិន្នីសកម្ពុជា ដោយស្ម័គ្រចិត្ត ដែលជាហេតុជំរុញឲ្យកីឡាករ-កីឡាការិនីសូហ្វតិន្នីសរបស់យើង កាន់តែមានសេចក្ដីសង្ឃឹម ក្នុងការប្រកួតប្រកួតប្រជែងក្នុងព្រឹត្តិការណ៍ថ្នាក់អន្ដរជាតិនាពេលអនាគត” ៕

និស្សិត IU ម្នាក់ ខ្វះមួយថ្ងៃ បញ្ចប់ឆ្នាំទី៤ ត្រូវរថយន្តដឹកសម្រាម ក្រុមហ៊ុន ស៊ិនទ្រី ជ្រុលបុកពីក្រោយ កិនបាក់ភ្លៅ អាចខ្លាចជាជនពិការ មួយជីវិត

E-mail Print PDF

ភ្នំពេញ ៖ នារីពីរនាក់ ម្នាក់ជានិស្សិតឆ្នាំទី៤ រៀននៅសកលវិទ្យាល័យ IU បានរងរបួសបាក់ភ្លៅម្ខាង និងម្នាក់ រងរបួស ស្រាល ខណៈពួកនាង ជិះម៉ូតូគុបជ្រុង ឌុបគ្នា ចេញពីសាលា ឆ្ពោះមកលំនៅដ្ឋាន ត្រូវរថយន្តដឹកសម្រាម របស់ក្រុម ហ៊ុនស៊ិនទ្រី បើកលឿនជ្រុលបុកពីក្រោយពេញទំហឹង កាលពីវេលាម៉ោង ១១ និង២០នាទីព្រឹក ថ្ងៃទី ៣០ ខែមករា ឆ្នាំ ២០១៥ ស្ថិតនៅខាងត្បូងផ្សារស្ទឹងមានជ័យ ផ្លូវមុនីរ៉េត សង្កាត់ស្ទឹងមានជ័យ ខណ្ឌមានជ័យ ។

សមត្ថកិច្ចបានឲ្យដឹងថា និស្សិតដែលរងរបួសបាក់ភ្លៅ ក្នុងហេតុការណ៍ខាងលើ មានឈ្មោះ អ៊ឹង សុនីតា ភេទស្រី អាយុ ២៥ឆ្នាំ ជានិស្សិតឆ្នាំទី៤ ស្នាក់ភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ និងនារីម្នាក់ រងរបួសស្រាល មិនបានស្គាល់អត្តសញ្ញាណទេ ដោយសារនាងមិនប្រាប់ ។ ចំណែកអ្នកបើកបរថយន្តបង្កក្រោយកើតហេតុ បានចុះរត់ គេចខ្លួនបាត់ស្រមោល ទុករថយន្តចោលត្រង់ចំណុចកើតហេតុ ។ សមត្ថកិច្ចបានបន្តថា មុនពេលមានគ្រោះថ្នាក់នេះ នារីរងគ្រោះទាំងពីរនាក់ បានជិះម៉ូតូម៉ាកគុបជ្រុង ៥០មួយគ្រឿង ពណ៌ទឹកប៊ិច ពាក់ស្លាកលេខភ្នំពេញ 1AF 8953 ធ្វើ ដំណើរចុះពីស្ពានអាកាស ស្ទឹងមានជ័យ ចុះតាមផ្លូវមុនីរ៉េត ទិសដៅពីជើងទៅត្បូង លុះជិះហួសផ្សារស្ទឹងមានជ័យជាង ១០០ ម៉ែត្រ ស្របពេលមានរថយន្តស៊ិនទ្រី ប្រមូលសម្រាមមួយគ្រឿង កំពុងបើកបរពីក្រោយល្បឿនលឿន ហើយ ទំនងចាប់ហ្វ្រាំងមុខមិនស៊ី ក៏ជ្រុលបុកម៉ូតូរបស់នារីរងគ្រោះទាំងពីរពេញទំហឹង បណ្តាលឲ្យម៉ូតូ និងអ្នកឌុប ខ្ទាតមក ខាងស្តាំដៃ រីឯនារីឈ្មោះ អ៊ឹង សុនីតា ជាអ្នកជិះក្រោយ បានធ្លាក់ពីលើកម៉ូតូ ខ្ទាតខាងឆ្វេងដៃ ត្រូវកង់ក្រោយរបស់ រថយន្តស៊ិនទ្រី កិនចំចំហៀងភ្លៅខាងឆ្វេង បាក់ឆ្អឹងខ្ទេច រងរបួសយ៉ាងធ្ងន់ធ្ងរ ។

សមត្ថកិច្ចបានបញ្ជាក់ថា ក្រោយកើតហេតុ ក៏មានរថយន្តសង្គ្រោះបន្ទាន់ មកដឹកយកនារី ដែលរងរបួសធ្ងន់ទៅ សង្គ្រោះនៅមន្ទីរពេទ្យ មិត្តភាពខ្មែរសូវៀត ( រុស្ស៊ី) ភ្លាម ។ ចំណែកអ្នកបើកបររថយន្តបង្ក រួមជាមួយអ្នកដើរប្រមូល សម្រាមដាក់ក្នុងរថយន្ត បាននាំគ្នារត់គេចខ្លួនបាត់អស់តែម្តង ។ ដូច្នេះបន្ទាប់ពីមានករណីចរាចរណ៍នេះ ដើម្បីកុំឲ្យមានការកកស្ទះចរាចរណ៍ សមត្ថកិច្ចមូលដ្ឋាន បានសហការជាមួយនគរបាលជំនាញ ចុះអន្តារាគមន៍ភ្លាមៗ និងវាស់ វែងអូសយករថយន្តបង្ក និងម៉ូតូគុបជ្រុង របស់នារីរងគ្រោះទៅរក្សាទុក នៅការិយាល័យចរាចរផ្លូវគោក រាជធានីភ្នំពេញ រង់ចាំរកដំណោះស្រាយនាពេលក្រោយ ។ សាច់ញាតិរបស់នារីឈ្មោះ អ៊ឹង សុនីតា បានបញ្ជាក់ថា នៅថ្ងៃស្អែកមួយ ថ្ងៃប៉ុណ្ណោះ នាងត្រូវប្រឡងបញ្ចប់ការសិក្សា ឆ្នាំទី៤ហើយ ។ នេះជារឿងដែលគួរឲ្យសោកស្តាយ និងរន្ធត់បំផុត សម្រាប់ក្រុមគ្រួសារ សាច់ញាតិ របស់នារីរងគ្រោះ ៕

តុលាការ ផ្តន្ទាទោស ថៅកែក្រុមហ៊ុន សិប្បកម្មទឹកស៊ីអ៊ីវ យីហោ «BOS» ដាក់គុក១ឆ្នាំ៦ខែ ពីបទ«ចេញសែកស្អុយ១០ម៉ឺនដុល្លារ»

E-mail Print PDF

ភ្នំពេញ ៖ សាលាដំបូង រាជធានីភ្នំពេញ កាលពីសុក្រថ្ងៃទី៣០ ខែមករា ឆ្នាំ២០១៥ បានប្រកាសសាលក្រម ផ្តន្ទាទោស  ជនជាប់ចោទម្នាក់ ឈ្មោះ ពិន វិទូ ភេទប្រុស អាយុ៤៥ឆ្នាំ មានមុខរបរ មុនចាប់ខ្លួន ជាពាណិជ្ជករ និងជាប្រធាន ក្រុមហ៊ុន សិប្បកម្មទឹកស៊ីអ៊ីវយីហោ « BOS» មានទីលំនៅដូចមាន អាស័យដ្ឋានខាងលើនេះ ដាក់ពន្ធនាគារ កំណត់ រយៈពេល១ឆ្នាំ និង៦ខែ និងបង្គាប់ឲ្យ សងប្រាក់ចំនួន១០ម៉ឺនដុល្លារ ឲ្យទៅភាគីដើមចោទ។

លោក កោ វណ្ឌី ចៅក្រមជំនុំជម្រះ នៃសាលាដំបូង រាជធានីភ្នំពេញ បានឲ្យដឹងថា ជនជាប់ចោទ ឈ្មោះ ពិន វិទូ ត្រូវបាន ចោទប្រកាន់ពី តំណាង អយ្យការពីបទ «ចេញមូលប្បទានបត្រ គ្មានសាច់ប្រាក់» និង ត្រូវបានចាប់ខ្លួន កាលពីព្រឹកថ្ងៃទី១៥ ខែសីហា ឆ្នាំ២០១៤ តាមបណ្តឹង របស់ភាគីដើមបណ្តឹង ឈ្មោះ ថាន់ វណ្ណា ភេទប្រុស អាយុ៤៣ ឆ្នាំ មានមុខរបរ ជាពាណិជ្ជករ ជាប់ពាក់ព័ន្ធទៅនឹងការចេញមូលប្បទានប័ត្រចំនួន ២សន្លឹក មានតម្លៃ ចំនួន១០ម៉ឺនដុល្លារ ប៉ុន្តែគ្មានសាច់ប្រាក់  ប្រព្រឹត្ត កាលពីដើម ឆ្នាំ២០១៤៕

តុលាការ ផ្តន្ទាទោសស្រ្តី គ្រូទាយម្នាក់ ១ឆ្នាំ៦ពីបទ «ឆបោកប្រាក់» ជាង៤ម៉ឺនដុល្លារ

E-mail Print PDF

ភ្នំពេញ ៖ លោកចៅក្រម កោ វណ្ឌី អនុប្រធាន និងជាចៅក្រម នៃសាលាដំបូង រាជធានីភ្នំពេញ កាលពីព្រឹក ថ្ងៃទី៣០ ខែមករា ឆ្នាំ២០១៥ បានប្រកាសសាលក្រម ផ្តន្ទាទោស ស្រ្តីគ្រូទាយ ជាប់ចោទម្នាក់ ដាក់ពន្ធនាគារ កំណត់១ឆ្នាំ៦ពីបទ «ឆបោកប្រាក់» ជាង៤ម៉ឺនដុល្លារ និង បង្គាប់ឲ្យសង ប្រាក់ចំនួនជាង៤ម៉ឺនដុល្លារ ផាកពិន័យ ចំនួន៤លានរៀល និងសង ថ្លៃជម្ងឺចិត្ត ចំនួន១៨៣លានរៀលទៀត ឲ្យទៅបុរសរកស៊ី ទិញ-លក់អង្ករម្នាក់ ដែលមានអាស័យដ្ឋាន ស្នាក់នៅ ផ្សារចាក់អង្គ្រែក្រោម ស្ថិតក្នុងសង្កាត់អង្គ្រែក្រោម ខណ្ឌមានជ័យ រាជធានីភ្នំពេញ។

ជនជាប់ចោទរូបនេះមាន ឈ្មោះ ទាង ស្រីមុំ អាយុ៦២ឆ្នាំ មានមុខរបរមុនការចាប់ខ្លួន ជា គ្រូទាយ និងត្រូវបាន ចាប់ខ្លួន កាលពីកំឡុងខែមិថុនា ឆ្នាំ២០១៤ តាមបណ្តឹងរបស់ជនរងគ្រោះ បន្ទាប់ពីបាន ឆបោកអង្ករផ្លាម្លិះ ពីជនរងគ្រោះអស់ចំនួន១១៨៥បាវ តាមតម្លៃ ចំនួនជាង ៤ម៉ឺនដុល្លារ តាមរូបភាពខ្ចីអង្ករ ដើម្បីទៅជួយកុមារកំព្រា ដែលរស់នៅ តាមមណ្ឌលកុមារ កំព្រានានានៅ ក្នុងប្រទេសកម្ពុជា៕

រថយន្តដឹកដី បើកលឿន បុករថយន្តកាមរី ឆ្លាមពីក្រោយខ្ទេច នៅជិតរង្វង់មូលព្រះ នរាយណ៍

E-mail Print PDF

ភ្នំពេញ : គ្រោះថ្នាក់ចរាចរមួយ កើតឡើងដោយសារ រថយន្តដឹកដីបើកបរលឿន ជ្រុលទៅបុក រថយន្តកាមរី ឆ្លាមពីក្រោយពេញទំហឹង បណ្តាលអោយរថយន្តកាមរី ឆ្លាមស្ទុះហក់ផ្លោតទៅគងលើ ដុំថ្មពុះចែកទ្រូងផ្លូវ និងរងការខូចខាតមួយកំណាត់ ក្រោយ ។

ករណីគ្រោះថ្នាក់ចរាចរនេះ កើតឡើង កាលវេលាម៉ោង ១១ព្រឹក ថ្ងៃទី៣០ ខែមករា ឆ្នាំ២០១៥ ស្ថិតនៅលើកំណាត់ផ្លូវជាតិលេខ២ ក្នុងភូមិព្រែកតាឡុង សង្កាត់ចាក់អង្រែក្រោម ពោលគឺនៅជិតរង្វង់ មូលព្រះនរាយណ៍ ព្រំប្រទល់ខេត្តកណ្តាល និងខណ្ឌមានជ័យ ។

មន្ត្រីនគរបាលមូលដ្ឋាន បានអោយដឹងថា អ្នកបើកបររថយន្តកាមរីឆ្លាមឈ្មោះ ទិត្យ ប៊ុនរី ភេទប្រុស អាយុ ២៥ឆ្នាំ ស្នាក់នៅភូមិរបោះអង្កាញ់ សង្កាត់ព្រែកឯង ខណ្ឌច្បារអំពៅ មុខរបរបើករថយន្តក្រុមហ៊ុន ។ ចំណែកអ្នកបើករថយន្តបង្កឈ្មោះ ណាង អាយុ២៥ឆ្នាំ ស្នាក់នៅភូមិព្រែកហូ សង្កាត់-ក្រុងតាខ្មៅ ខេត្តកណ្តាល ។

តាមអ្នកសាក្សីឃើញហេតុការណ៍ បាននិយាយថា មុនពេលកើតហេតុ ឃើញរថយន្តបង្ក និងរថយន្តរងគ្រោះ បើកស្របទិសគ្នា ពីមុខពីក្រោយ ក្នុងទិសដៅ ពីខេត្តកណ្តាលចូលក្រុង ភ្នំពេញ ខណ:មកដល់ចំណុចកើតហេតុ ស្រាប់តែមាន រថយន្តមួយគ្រឿងមិនស្គាល់ ម៉ាក តប់ឆ្វេងឆ្លងផ្លូវពីមុខ រថយន្តរងគ្រោះ ខណ:នោះ រថយន្តរងគ្រោះ ក៏បានជាន់ ហ្វ្រាំងឈប់ ស្រាប់តែរថយន្ត ដឹកដី ដែលកំពុងបើកតាម ក្រោយក៏ជ្រុលបុករថយន្ត កាមរីឆ្លាមពីក្រោយយ៉ាង ពេញទំហឹងតែម្តង បណ្តាលអោយរថយន្តកាមរីឆ្លាម រងការខូចខាតរួញចូលគ្នាមួយកំណាត់ក្រោយទាំងស្រុង ប៉ុន្តែមិនមានអ្នកណាម្នាក់ នៅក្នុងរថយន្តកាមរីឆ្លាមរងគ្រោះ ថ្នាក់នោះទេ ។

ក្រោយកើតហេតុ ភាគីរថយន្តដឹកដី បានចេញមក សម្របសម្រួល សុំដោះ ស្រាយសងសំណងដល់រថយន្តកាមរីឆ្លាមរងគ្រោះ ប៉ុន្តែក្នុងករណីគ្រោះថ្នាក់ ចរាចរនេះ បានបង្កអោយខូច ខាតដល់ដុំថ្ម របស់សាលារាជ ធានីភ្នំពេញនោះ ទើបសមត្ថកិច្ច ចរាចរខណ្ឌមានជ័យ ចុះវាស់វែង និងធ្វើការសម្របសម្រួលបញ្ជូន ទៅការិយាល័យចរាចរផ្លូវ គោករាជធានី ដើម្បីដោះស្រាយបន្ត ៕

ជម្លោះដណ្ដើមដីកេរ ប្អូនប្រុស កាប់បង ស្រី៣កាំបិតផ្គាក់ ស្លាប់ក្នុងថ្លុកឈាម

E-mail Print PDF

-ជនបង្កត្រូវសមត្ថកិច្ចចាប់ខ្លួនរយៈពេល ៤ម៉ោងក្រោយកើតហេតុ

ភ្នំពេញ ៖ អំពើឃាតកម្មដ៏គួរឱ្យរន្ធត់មួយ បានកើតឡើង រវាងជនបង្កជាប្អូនប្រុស និង ជនរងគ្រោះជាបងស្រី ឈ្លោះគ្នារឿងដណ្ដើម ដីភូមិរហូតប្អូនប្រុស ទាញកាំបិតផ្គាប់បងស្រី របស់ខ្លួនចំនួន៣កាំបិត បណ្ដាលឱ្យ ស្លាប់ភ្លាមៗ នៅមុខ កាលពីវេលាម៉ោង៦និង៣០នាទី ល្ងាចថ្ងៃទី២៩ ខែមករា ឆ្នាំ២០១៥ ស្ថិតនៅ ភូមិរនះ សង្កាត់កោះដាច់ ខណ្ឌជ្រោយចង្វារ។ 

ប៉ុន្ដែជនបង្កជាប្អូនប្រុស ក្រោយពីរត់គេចខ្លួន ចូលទៅក្នុងព្រៃ បម្រុងឡើងឆ្លងដទៅត្រើយ ម្ខាង ក៏ត្រូវបាន កម្លាំង នគរបាលនិងប្រជា ការពារភូមិធ្វើការឡោមព័ទ្ធ ហើយឈាន ទៅដល់ការឃាត់ខ្លួន ក្នុងរយៈពេល៤ម៉ោង ក្រោយ ពោលនៅវេលាម៉ោង១០និង៣០នាទី យប់ថ្ងៃដដែលនោះ ។

យោងតាមមន្ដ្រីនគរបាលប៉ុស្ដិ៍សង្កាត់កោះ ដាច់ បានបញ្ជាក់ថា ស្ដ្រីរងគ្រោះឈ្មោះបាន អេងលាង អាយុ៤១ឆ្នាំ មុខរបរជាគ្រូពេទ្យ អង្គការទឹកចិត្ដម្ដាយ មានកូន៥នាក់ក្នុងបន្ទុក រីឯជនដៃដល់ជាប្អូន ប្រុសបង្កើតឈ្មោះបាន វុត្ថា ហៅអានាង អាយុ២១ឆ្នាំ មុខរបរជាកម្មករ សំណង់ដែល មានប្រពន្ធឈ្មោះនី អាយុ១៨ ឆ្នាំ មុខរបរកម្មការិនីកាត់ដេរ និងមានកូនម្នាក់ ក្នុងបន្ទុក ។

អំពើឃាតកម្មរវាងបងប្អូនបង្កើតខាង លើនេះ បានធ្វើឱ្យប្រជាពលរដ្ឋនៅក្នុងភូមិ មានក្ដីរន្ធត់យ៉ាងខ្លាំងនូវទង្វើ ដ៏ព្រៃផ្សៃរបស់ប្អូនប្រុស ដែលហ៊ានយកកាំបិតទៅកាប់បង ស្រីបង្កើត បណ្ដាលឱ្យស្លាប់មុខផ្ទះយ៉ាង អណោចអធម័ ហើយអ្វីដែលគួរឱ្យអាសូរ ទៀតនោះ គឺកូនៗទាំង៥នាក់ ខ្លះនៅតូចនៅ ឡើយ រស់នៅកំព្រាម្ដាយជារៀងរហូត ។

អធិការនគរបាលខណ្ឌជ្រោយចង្វារ លោក ទាម សុត្ថាវុធ បានថ្លែងឱ្យដឹងថា អំពើឃាត កម្មមួយនេះ ផ្ដើមចេញ ពីជម្លោះក្នុងគ្រួសារ ដណ្ដើមដីភូមិរវាងបងស្រីនិងប្អូនប្រុស ហើយ បានកើតឡើងជាយូរណាស់មកហើយ និង តែងតែឈ្លោះគ្នាទៀតផង ។

លោកអធិការ ខណ្ឌជ្រោយចង្វារ បាន បញ្ជាក់ទៀតថា «ជម្លោះក្នុងគ្រួសារ ហើយ ម្ដាយតែងតែស្រវឹង និងមានទំនោស្រឡាញ់ កូនប្រុសជាង ហើយពេលបងស្រីនិយាយណែ នាំប្រដៅ ក៏ទាញកាំបិត កាប់សម្លាប់តែម្ដង»។

មន្ដ្រីនគរបាលព្រហ្មទណ្ឌខណ្ឌជ្រោយចង្វារ បានឱ្យដឹងថា រឿងហេតុនេះ ផ្ដើមចេញពីការ ដណ្ដើមដីកេរភូមិ ព្រោះ ប្លង់កម្មសិទ្ធគឺនៅលើ ឈ្មោះបងស្រី ហើយជនបង្កជាប្អូនប្រុសទំនង មានការព្រួយបារម្ភ ទើបចេះតែឈ្លោះប្រកែក គ្នាយ៉ាងដូច្នេះ ។

មន្ដ្រីនគរបាលរូបនេះ បានលើកឡើង ទៀតថា មុនពេលកើតហេតុជនបង្កដែល មានធ្វើការកម្មករសំណង់ នៅក្នុង រាជធានីភ្នំ ពេញ រួចបានត្រឡប់ទៅផ្ទះកាលពីថ្ងៃទី២៦ ខែមករា ឆ្នាំ២០១៥ លុះដល់ល្ងាចម៉ោងកើត ហេតុ ជនបង្ក បានផឹកត្នោតជូរ៣-៤បំពង់ជា មួយមិត្ដភក្ដិនៅក្បែរផ្ទះ ហើយពេលផឹករួច ក៏ដើរទៅផ្ទះ ស្រាប់តែឃើញ ម្ដាយ ដួល(ទំនង ស្រវឹងខ្លាំង) ក៏ស្ដីឱ្យបងស្រីមិនបើកភ្លើង ដែលនាំឱ្យម្ដាយដួល ។

ក្រោយពីនិយាយ បែបនេះរួច ជនរងគ្រោះនិងជនបង្កបានឈ្លោះ ប្រកែកគ្នារហូតជនបង្កបានរត់ទៅយកកាំបិត កាប់លើបងស្រីអមដោយការឌឺពាក្យរបស់ បងស្រីថា បើអ្ហែងចិត្ដខ្លាំងកាប់អញមក ។

ឮដូច្នេះទន្ទឹមទៅនឹងមានអាការៈស្រវឹងដោយ សារទឹកត្នោតជូរផងនោះ ជនបង្កបានកាប់ ចំនួន៣កាំបិតផ្គាក់ បណ្ដាល ឱ្យចំក្បាលមួយ កាំបិត ចំដៃស្ដាំមួយកាំបិតនិងស្មាស្ដាំមួយ កាំបិត បណ្ដាលឱ្យស្លាប់ភ្លាមៗក្នុងថ្លុកឈាម នៅខាងមុខចម្ងាយ១៥ម៉ែត្រ ។

តាមការបញ្ជាក់ពីមន្ដ្រីនគរបាលរូបនេះ ក្រោយកាប់បងស្រីរបស់ខ្លួនបណ្ដាលឱ្យស្លាប់ រួច ជនបង្កបានរត់ចូល ទៅក្នុងព្រៃប្រុងគេច ខ្លួនតែត្រូវតាមចាប់ពីសំណាក់កម្លាំងសមត្ថ កិច្ចមូលដ្ឋាននិងប្រជាការពារភូមិ រយៈពេល ៤ម៉ោងក្រោយ ។

អធិការនគរបាលខណ្ឌជ្រោយចង្វារ បាន គួរបញ្ជាក់ទៀតថា ក្រោយទទួលបានព័ត៌ មានភ្លាមៗពីប្រជាពលរដ្ឋរួចមក លោកបាន សុំគោលការណ៍ណែនាំភ្លាមៗពីសំណាក់លោក ឧត្ដមសេនីយ៍ស្នងការ និងស្នងការរងទទួល ផែន ព្រហ្មទណ្ឌ ដើម្បីធ្វើការស្រាវជ្រាវរហូត ឃាត់ខ្លួនជនបង្ករូបនេះយកមកផ្ដន្ទាទោស តាមផ្លូវច្បាប់ ។

បច្ចុប្បន្នជនបង្ក កំពុងធ្វើការសួរនាំនិងឃុំ ខ្លួនជាបណ្ដោះអាសន្ននៅអធិការដ្ឋាននគរ បាលខណ្ឌជ្រោយចង្វារ ដើម្បីបញ្ជូនខ្លួនទៅ កាន់សាលាដំបូងរាជធានីភ្នំពេញ វិនិច្ឆ័យ ទោសតាមផ្លូវច្បាប់ ៕

ទស្សនៈនិងមតិ៖ វប្បធម៌សន្ទនា មិនមែនថ្មីដូចលោក សម រង្ស៊ី និទាននោះទេ

E-mail Print PDF

ភ្នំពេញ៖ សម្តីសជាតិមាយាថសពូជរបស់លោក សម រង្ស៊ី ដែលតែងតែលើកឡើងប្រាប់សកម្មជនរបស់ខ្លួន ក៏ដូចជាសាធារណជន អំពី “វប្បធម៌សន្ទនា” ដែលជាវប្បធម៌ថ្មីនោះ គឺច្បាស់ណាស់ថា វាមិនមែនថ្មីស្រឡាងគាស់កេះ ដូចឡាន Toyota Lexus 570នោះទេ។

វប្បធម៌សន្ទនា ដែលលោក សម រង្ស៊ី ឧបត្តិកនោះ បានកើតចេញពីក្នុងកិច្ចព្រមព្រៀងនយោបាយនាថ្ងៃទី២២កក្កដា២០១៤ រវាងគណបក្សប្រជាជនកម្ពុជានិងគណបក្សសង្រ្គោះជាតិ បន្ទាប់ពីគណបក្សសង្រ្គោះជាតិ ដើរដល់ផ្លូវទ័លច្រកទៅមុខមិនរួចថយក្រោយមិនបាន ទើបលើកទង់ជ័យសុំចុះចាញ់គណបក្សប្រជាជនកម្ពុជា ក្រោមរូបភាពបង្កើតវប្បធម៌សន្ទនា។

“វប្បធម៌សន្ទនា” តើខ្មែរទើបតែមានរឺយ៉ាងដូចម្តេច?

ដោយមិនចង់រំលឹកពីប្រវត្តិវែងឆ្ងាយ យើងសូម លើកចាប់ត្រឹមពីការបោះឆ្នោតសាកលឆ្នាំ១៩៩៣។ គ្រានោះ គណបក្សហ៊្វុនស៊ីនប៉ិច ទទួលបាន៥៨កៅអី គណបក្សប្រជាជនកម្ពុជា ទទួលបាន៥១ គណបក្សសេរីនិយមព្រះពុទ្ធសាសនាទទួលបាន១០កៅអី និងគណបក្សម៉ូលីណាកា ទទួលបាន១។ ក្រោយការបោះឆ្នោតមុន ការបង្កើតរាជរដ្ឋាភិបាល មានការចង់បង្កើតតំបន់អប្បគមន៍ ក្រោយមកក៏មានការសម្របសម្រួលខាងនយោបាយ ពីសម្តេចឪ នរោត្តម សីហនុ (ព្រះបរមរតនកោដ្ឋិ) ទើបបង្កើតឱ្យមានរដ្ឋាភិបាលចម្រុះ។ នៅក្នុងអំឡុងពេលនោះ រដ្ឋាភិបាលចម្រុះ ក៏មានភាពរង្គោះរង្គើ ដោយសារគណបក្សទាំងពីរជាដៃគូ គឺគណបក្សហ៊្វុនស៊ីនប៉ិច និងគណបក្សប្រជាជនកម្ពុជា មិនស៊ីសង្វាក់គ្នាក្នុងរបៀបដឹកនាំប្រទេស។ ដោយសារតែបញ្ហានោះហើយ គណបក្សទាំងពីរក៏បង្កើតឱ្យមានការក្រុមការងារសម្របសម្រួល ម្ខាងម្នាក់រៀងៗខ្លួន ជាពិសេសក្រសួងការពារជាតិ (មានលោកទៀ បាញ់ និងលោកទៀ ចំរ៉ាត់) និងក្រសួងមហាផ្ទៃ (លោក ស ខេង និងលោក យូ ហុកគ្រី)។ ក៏ប៉ុន្តែកិច្ចសន្ទនា លើកនោះ ហាក់មិនមានប្រសិទ្ធិភាពនោះទេ ហើយក៏បានឈានទៅដល់ការផ្ទុះអាវុធដាក់គ្នាកណ្តាលទីក្រុងភ្នំពេញឆ្នាំ១៩៩៧ ខែកក្កដា។

រីឯការបោះឆ្នោតអណត្តិទី២ ឆ្នាំ១៩៩៨វិញ ពេលដែលគណបក្សប្រជាជនកម្ពុជា ទទួលបាន៦៤ កៅអី ហ៊្វុនស៊ីនប៉ិច ទទួល៤៣ គណបក្សសមរង្ស៊ី ទទួលបាន១៥កៅអី ក៏កើតមានការការផ្ទុះបាតុកម្មប្រឆាំងលទ្ធផលបោះឆ្នោតផងដែរ ក្រោយមកក៏មានការចរចារសម្របសម្រួលខាងនយោបាយ ដោយមានសម្តេចព្រះបរមរតនកោដ្ឋិ ជាអ្នកសម្របសម្រួលផងដែរ។ ហើយពេលនោះ ក៏មានការចាត់តាំងថ្នាក់ដឹកនាំជាន់ខ្ពស់គណបក្សវិញម្តង ដោយខាងគណបក្សប្រជាជនកម្ពុជា មានលោក សាយ ឈុំ (អគ្គលេខាធិការបក្ស) និងលោក តុល ឡោះ (អគ្គលេខាធិការបក្ស) ដើម្បីពិភាក្សាការងារកាលបើការខ្វែងគំនិតខាងនយោបាយណាមួយកើតឡើង។

សម្រាប់ការបោះឆ្នោតអណត្តិទី៣ ឆ្នាំ២០០៣វិញ មិនមានការធ្វើបាតុកម្មដូចឆ្នាំ១៩៩៣នោះទេ។ ៥វិច្ឆិកា២០០៣ ក៏មានជំនួបកំពូលរវាងគណបក្សធំ៣ដែលមានអសនៈក្នុងរដ្ឋសភា (គណបក្សប្រជាជនកម្ពុជា៧៣ ហ៊្វុនស៊ីនប៉ិច២៦ សមរង្ស៊ី២៤) នៅព្រះបរមរាជវាំង ក្រោមព្រះរាជាធិបតីដ៏ខ្ពង់ខ្ពស់របស់សម្តេចព្រះបរមរតនកោដ្ឋិ។

ក្រោយមកទៀត ការបោះឆ្នោតអណត្តិ ឆ្នាំ២០០៨ គណបក្សប្រជាជនកម្ពុជា ទទួលបានអសនៈ៩០ សមរង្ស៊ី ២៦ សិទ្ធិមនុស្ស៣ ហ៊្វុនស៊ីនប៉ិច២ នរោត្តមរណឫទ្ធិ២។ ក៏មានការខ្វែងគំនិតគ្នាខ្លះដែរ ប៉ុន្តែតិចតួចប៉ុណ្ណោះ ពីព្រោះគណបក្សដទៃទៀត មានសំឡេងតិចជាងគណបក្សប្រជាជនកម្ពុជា ឆ្ងាយណាស់ ដោយគណបក្សសមរង្ស៊ី និងគណបក្សសិទ្ធិមនុស្ស របស់លោកកឹម សុខា នៅពេលចងសម្ព័ន្ធភាព (សម្ព័ន្ធខ្យល់) បានតែមួយដង្ហើមចង្រិត ក៏បែកគ្នាទៅវិញ ដែលពេលនោះ លោក កឹម សុខា ចោទលោក សម រង្ស៊ីថា ក្បត់សម្ព័ន្ធមិត្ត ដោយទៅចូលរួមប្រជុំសភាលើកដំបូងជាមួយគណបក្សប្រជាជនកម្ពុជា។

សម្រាប់ការបោះឆ្នោតអណត្តិទី៥ឯណេះវិញ គណបក្សប្រជាជនកម្ពុជា ស្រុតកៅអីនៅក្នុងសភា ពី៩០មកនៅ៦៨ គណបក្សសង្រ្គោះជាតិទទួលបាន៥៥ ក៏បង្កើតឱ្យមានការធ្វើបាតុកម្មពីសំណាក់គណបក្សសង្រ្គោះជាតិ រហូតធ្វើបាតុកម្មរាល់ថ្ងៃ ដោយមានការបោះតង់ស្នាក់នៅ នាទីលានប្រជាធិបតេយ្យថែមទៀតផង។ អំឡុងពេលដូច “បាយពុះ” ទាំងលោកសមរង្ស៊ី និងលោក កឹម សុខា សុទ្ធតែបង្ហាញភាពក្អេងក្អាង ដូចក្អាត់ក្នុងក្អមរៀងៗខ្លួនទៅកាន់អ្នកនាំគាំទ្រ ក៏ដូចមជ្ឈដ្ឋានជាតិនិងអន្តរជាតិ អំពីការទាមទារឱ្យមានការបោះឆ្នោតឡើងវិញជាដើម។ល។ល។ ប៉ុន្តែទីបំផុតអ្វីៗ ក៏បញ្ចប់ទៅដោយខកបំណងរបស់គណបក្សសង្រ្គោះជាតិ។ ជាលទ្ធផលចុងក្រោយ និងដោយគ្មានជម្រើសណាល្អ ក៏ដូចជាលាក់បាំងបរាជ័យដ៏អាម៉ាស់របស់ខ្លួននោះ លោក សមរង្ស៊ី ពីទីក្រុងប៉ារីស ក៏បានប្រកាសធ្វើការចរចាជាមួយគណបក្សប្រជាជនកម្ពុជា និងឈានទៅដល់កិច្ចព្រមព្រៀងនាថ្ងៃ២២កក្កដា ឆ្នាំ២០១៤ នៅវិមានព្រឹទ្ធសភា។

កិច្ចព្រមព្រៀងនេះហើយដែលលោកសមរង្ស៊ី អះអាងពីវប្បធម៌សន្ទនារវាងខ្មែរនិងខ្មែរ ប៉ុន្តែធាតុពិតវប្បធម៌សន្ទនានេះ កើតមានយូរមកហើយ។ តើលោកសមរង្ស៊ី អាចធានាបានទេ អំពីស្ថិរភាពនយោបាយនៅកម្ពុជា តើលោកសមរង្ស៊ីយកអ្វីមកធានា? ដូច្នេះ សូមលោកសមរង្ស៊ី ឈប់មានអំនួតលើនយោបាយគ្មានយុទ្ធសាស្រ្ត របស់ខ្លួនទៅ៕

វប្បធម៌នៃការប្រើប្រាស់ ទូរស័ព្ទដៃនៅកម្ពុជា

E-mail Print PDF

ដោយៈ William E.Tood ឯកអគ្គរដ្ឋទូតអាម៉េរិកប្រចាំនៅកម្ពុជា

ភ្នំពេញៈ នៅគ្រប់កន្លែងក្នុងប្រទេសកម្ពុជា ដែលខ្ញុំធ្វើដំណើរទៅ ប្រជាជនកម្ពុជាគ្រប់រូប ដែលខ្ញុំជួប ប្រាប់ខ្ញុំថា គេចូលចិត្តទូរស័ព្ទដៃរបស់គេណាស់! តាំងពីខ្ញុំបានមកដល់កាលពីជិត ៣ ឆ្នាំមុន ខ្ញុំបានមើលឃើញដោយការភ្ញាក់ផ្អើល នូវកំណើនយ៉ាងឆាប់រហ័ស នៃការប្រើទូរស័ព្ទដៃ នៅកម្ពុជា។ បើយោងតាមក្រសួងប្រៃសណី និងទូរគមនាគមន៍ ចំនួនអ្នកជាវទូរស័ព្ទដៃ នៅកម្ពុជាមានលើសពី ២០ លាន នៅឆ្នាំ ២០១៣ ដែលមានន័យថា ការជាវនេះមានលើស ចំនួនប្រជាជនកម្ពុជាដល់ទៅ ៥ លាន។

នៅកម្ពុជា វាមិនពិបាកនឹងមានទូរស័ព្ទដៃប្រើទេ ដោយមនុស្សជាង ៩០% ពេលនេះមានទូរស័ព្ទដៃប្រើ។ សព្វថ្ងៃនេះ ទូរស័ព្ទដៃមានតួនាទីធំ នៅក្នុងការកែលំអជីវិតរស់នៅ របស់ប្រជាជន ដោយធ្វើអោយគេ ទទួលបានព័ត៌មាន នៅកន្លែងដែលគ្មានទូរស័ព្ទលើតុ ឬសេវាអ៊ិនធ័រណែត។ លទ្ធផលកែប្រែដែលទូរស័ព្ទដៃ មានទៅលើសង្គមខ្មែរ ត្រូវបានគេឃើញច្បាស់ក្នុង ករណីមួយចំនួនជាឧទាហរណ៍។

មនុស្សកាន់តែច្រើនកំពុងចាប់ផើ្តមទទួលបាន ឯកសារសិក្សាភាសាអង់គ្លេស តាមរយៈទូរស័ព្ទដៃ របស់ពួកគេ។ កសិករដែលរស់នៅក្នុងខេត្តឆ្ងាយៗ ពេលនេះ អាចប្រើទូរស័ព្ទដៃ ដើម្បីធ្វើការហៅចេញ និងទទួលសារស្តីពីតំលៃដំបូង ឬតំលៃស្រូវរបស់គេ។

សិស្សប្រើទូរស័ព្ទដៃទំនើបរបស់គេដើម្បីភ្ជាប់ជាមួយអ្នកដទៃតាមអ៊ិនធ័រណែត និងចូលរួមក្នុងការពិភាក្សាគ្នា តាមអ៊ិនធ័រណែត។ សំរាប់ប្រជាជនកម្ពុជាខ្លះ ការទទួលបានព័ត៌មានតាម ប្រព័ន្ធផ្សព្វផ្សាយតាមអ៊ិនធ័រណែត ក្នុងទូរស័ព្ទ បំពេញបន្ថែម ឬជំនួសប្រព័ន្ធផ្សព្វផ្សាយ ធម្មតាកន្លងមក។ ដូច្នេះ ដូចអ្នកឃើញស្រាប់ហើយ បច្ចេកទេសទូរស័ព្ទដៃអាច លើកកំពស់ជីវិតរស់នៅ របស់ប្រជាជនកម្ពុជា សាមញ្ញបានយ៉ាងច្រើន។

ការកើនឡើងនៃកម្មវិធីក្នុងទូរស័ព្ទដៃទំនើប ធ្វើអោយគេអាចទិញទំនិញ និយាយគ្នាជាលក្ខណៈវីដេអូ រកមើលផ្លូវជាដើម។ កម្មវិធីក្នុងទូរស័ព្ទដៃទំនើប ត្រូវបានរៀបចំឡើងដើម្បីធ្វើ អោយជីវិតរបស់យើង មានភាពងាយស្រួល និងធ្វើការបានលឿន ។ ដោយទូរស័ព្ទដៃទំនើបកាន់តែមាន ការនិយមច្រើនឡើងនៅកម្ពុជា តំរូវការលើអ្នកបង្កើតកម្មវិធីល្អៗ ដែលយល់ដឹងពីទីផ្សា ក៏មានការកើនឡើងផងដែរ។ នៅពេលនេះ មានកម្មវិធីតិចណាស់ ដែលត្រូវបានបង្កើតឡើង សំរាប់សហគមន៍នៅកម្ពុជា។ ហេតុដូច្នេះហើយបានជាសមាជិកនៃបុគ្គលិក ក្នុងស្ថានទូតរបស់ខ្ញុំ បាននិយាយជាមួយនិស្សិត ផ្នែកព័ត៌មានវិទ្យា នៅតាមសាកលវិទ្យាល័យ នានាក្នុងប្រទេសកម្ពុជា ដោយលើកទឹកចិត្តអោយគេ ចូលរួមក្នុងក្រុមអ្នកបង្កើតកម្មវិធី ដែលប្រើក្នុងទូរស័ព្ទដៃ។
បុគ្គលិកស្ថានទូតអាមេរិកលើកទឹកចិត្ត អោយនិស្សិតបង្កើតកម្មវិធី របស់គេក្នុងទូរស័ព្ទដៃ ដើម្បីជួយប្រជាជនកម្ពុជា ក្នុងការទាញយកអត្ថប្រយោជន៍ ពីបច្ចេកទេសទូរស័ព្ទដៃ។

តើអ្នកដឹងដែរទេថា មានកម្មវិធីក្នុងទូរស័ព្ទដៃ សំរាប់គ្រូ និងសិស្សដែលចង់បង្កើនជំនាញ ផ្នែកភាសាអង់គ្លេសរបស់គេដែរឬទេ? គេទាញយកកម្មវិធីតាមទូរស័ព្ទដៃ សំរាប់សិក្សាភាសាអង់គ្លេស ដែលបង្កើតឡើងដោយក្រសួងការ បរទេសសហរដ្ឋអាមេរិក នៅគ្រប់ពេល និងនៅគ្រប់កន្លែង តាមទូរស័ព្ទដៃរបស់គេ។ កម្មវិធីនេះត្រូវនឹងទូរស័ព្ទដៃស្ទើរតែទាំងអស់ ហើយអ្នកប្រើអាចទាញយកសៀវភៅ Audiobook, e-book តន្រ្តី វេចនានុក្រម និងការបកប្រែជាដើម។ បន្ថែមពីលើនេះទៀត យើងជួយដល់ការបង្កើតកម្មវិធីតាមទូរស័ព្ទដៃ តាមរយៈកម្មវិធី បញ្ចូលបច្ចេកទេសថ្មីៗ ដែលឧបត្ថម្ភថវិកាដោយទីភ្នាក់ងារ សហរដ្ឋអាមេរិកសំរាប់ការអភិវឌ្ឍន៍ អន្តរជាតិ និងកន្លែងពិសោធន៍ស្តីពីការបញ្ចូលរបៀបថ្មី ផ្នែកសង្គមនៃកម្មវិធីនេះ ដែលជួយជំរុញការប្រើបច្ចេកទេស ដើម្បីដោះស្រាយបញ្ហាប្រឈមក្នុងការអភិវឌ្ឍរបស់ប្រទេសកម្ពុជា។

ស្ថានទូតអាមេរិករៀបចំវគ្គបណ្តុះបណ្តាល ដើម្បីបញ្ចូលកម្មវិធីថ្មីតាមទូរស័ព្ទដៃ ស្តីពី “ភាសាអង់គ្លេសតាមបែបអាមេរិក” ហើយផ្តល់ការណែនាំជាក់ស្តែងស្តីពីការ ទាញយកកម្មវិធីនេះចូលទៅក្នុងទូរស័ព្ទដៃរបស់អ្នកចូលរួម។ បច្ចេកទេសទូរស័ព្ទដៃក៏អាច ជួយប្រជាជន កម្ពុជាផងដែរក្នុងការដោះស្រាយ បញ្ហាមួយៗដែលគេមាន។ នៅក្នុងផ្នែកសុខភាព បច្ចេកទេសទូរស័ព្ទដៃ ជួយអោយគេរក្សាសុខភាព និងទទួលបានការព្យាបាល និងការថែទាំដែលគេត្រូវការ។ នៅក្នុងការខិតខំនេះ រដ្ឋាភិបាលសហរដ្ឋអាមេរិកបានជួយក្នុងការបង្កើតប្រព័ន្ធឆ្លើយតបជាសំលេងដែលមានលក្ខណៈជាការសន្ទនា (IVR) និងកម្មវិធីតាមទូរស័ព្ទដៃទំនើប ដើម្បីជួយក្នុងការព្យាបាល និងការពារជំងឺអេដស៍ ពង្រីកការប្រើប្រព័ន្ធរំលឹកតាមទូរស័ព្ទដៃ ដែលប្រាប់ពីរោគវិនិច្ឆ័យនៃជំងឺរបេងបានយ៉ាងឆាប់ តាមរយៈសារតាមទូរស័ព្ទដៃ ហើយបង្កើតកម្មវិធីតាមទូរស័ព្ទដៃដើម្បីកែលំអការព្យាបាល និងការការពារជំងឺគ្រុនចាញ់។

តើអ្នកស្ថិតនៅក្នុងចំណោមមនុស្សជាច្រើននៅកម្ពុជា ដែលប្រើប្រាស់ទូរស័ព្ទដៃ ដើម្បីចូលមើលក្នុងអ៊ិនធ័រណែត និងប្រព័ន្ធផ្សព្វផ្សាយសង្គម ដូចជា Facebook ដែរឬទេ? បើស្ថិតអ្នកស្ថិតក្នុងចំណោមនេះ សូមចុច Like លើទំព័រ Facebook របស់ស្ថានទូតអាមេរិក បើអ្នកមិនទាន់ជា Fan នៅឡើយ។ អ្នកនឹងឃើញព័ត៌មានថ្មីៗបំផុតស្តីពីកម្មវិធីរបស់យើង។ តើអ្នកមានទូរស័ព្ទដៃដែរឬទេ? ខ្ញុំចង់ដឹងថាតើបច្ចេកទេសទូរស័ព្ទដៃ ផ្តល់ផលយ៉ាងដូចម្តេចទៅលើ ជីវិតរស់នៅប្រចាំថ្ងៃរបស់អ្នក។

ស្ថានទូតអាម៉េរិក ប្រចាំនៅកម្ពុជា បានលើកឡើងថា ការប្រើប្រាស់ទូរស័ព្ទដៃ បានធ្វើឲ្យជីវភាពរស់នៅ របស់ប្រជាជនកម្ពុជា កើនឡើងជាលំដាប់ និងធ្វើឲ្យពួកគេទទូល បានព័ត៌មានទាន់ ហេតុការណ៍ព្រមទាំង ធ្វើឲ្យកសិករដែលរស់នៅ ក្នុងខេត្តឆ្ងាយៗ ទទួលសារស្តីពីតំលៃស្រូវ របស់គេពួកគេផងដែរ៕

E&M Coffee បើក​សម្ពោធ​សា​ខា​ទី២ ជាផ្លូវការ

E-mail Print PDF

ភ្នំពេញ៖ ដោយមានការគាំទ្រយ៉ាងខ្លំាងពីសំណាក់អតិថិជន ទៅលើរសជាតិរបស់ E&M Coffee ដោយបាននិយាយថា ជាប្រភេទកាហ្វេធម្មជាតិ មិនមានជាតិគីមី ទើប E&M Coffee បើកសម្ពោធសាខាទី២ ដើម្បីបំពេញតម្រូវការអតិថិជន។

នៅល្ងាចថ្ងៃទី២៩ ខែមករា ឆ្នាំ២០១៥ ម្សិលមិញនេះ  E&M Coffee បានបើកសម្ពោធសាខាទី២ នៅអាគារលេខ ៦២ ផ្លូវលេខ៥៧ សង្កាត់បឹងកេងកង១ ភ្នំពេញ ដោយមានការចូលរួមពីអតិថិជនជាច្រើន។

កញ្ញា ហុក ស៊ីវឈីង ម្ចាស់ហាង E&M Coffee បានមានប្រសាសន៍ថា "ដោយសារទទួលបានបទពិសោធន៍ និងជោគជ័យខ្លាំងពីសាខាទី១ ដែលមានទីតាំងនៅជាក់ទី៣ ក្នុងផ្សារទំនើបស៊ីធីម៉ល ទើប E&M Coffee សម្រេចចិត្តបើកសាខាទី២។

ម្ចាស់ហាងម្នាក់នេះ ក៏សង្ឃឹម និងជឿជាក់ថា E&M Coffee នឹងក្លាយជាហាងកាហ្វេដ៏ល្អ និងពេញនិយម ក្នុងចំណោមហាងកាហ្វេជាច្រើនទៀត ដែលកំពុងបម្រើ សេវាកម្មនៅក្នុងទីក្រុងភ្នំពេញ។ ប្រាកដណាស់ភាពជោគជ័យ និង មិនអាចធ្វើទៅរួចនោះទេ បើគ្មានការគាំទ្រ និងការរួមចំណែកពីអតិថិជន។

យុវតីនៃវិទ្យាល័យបឹងកេងម្នាក់បាននិយាយថា នាងមានអារម្មណ៍រីករាយ ព្រោះថាសាខាថ្មីនេះ ផ្ដល់ភាពងាយស្រួលសម្រាប់នាង រួមនឹងមិត្តភក្តី អាចមកញុំា ការ៉េម នៅទីនេះ ជាពិសេសនាងសង្កេតឃើញថា ការតុបតែង មានលក្ខណៈស្តង់ដារ ជាពិសេសតម្លៃសមរម្យ អាចទទួលយកបាន ហើយលើសពីនេះទៅទៀតនោះ E&M Coffee  ក៏មានផ្តល់អាហារប៊ូហ្វេ សម្រាប់ពួកយើង នៅពេលយប់ផងដែរ។

កញ្ញា ហុក ស៊ីវឈីង ក៏ថ្លែងអំណរគុណយ៉ាងជ្រៀលជ្រៅផងដែរ ចំពោះអតិថិជនដែលបានជឿជាក់ និងគំាទ្រ លើគុណភាព នៃ E&M Coffee៕

ក្រុមហ៊ុន Ford បានធ្វើការប្រកាស របាយការណ៍លក់ប្រចាំ​ តំបន់អាស៊ាន ក្នុងឆ្នាំ២០១៤

E-mail Print PDF

បាងកក៖ កាលពីថ្ងៃទី១២ ខែមករា ឆ្នាំ២០១៥  កន្លងទៅនេះ ក្រុមហ៊ុន Ford បានធើ្វការប្រកាស របាយការណ៍ លក់រាយប្រចាំឆ្នាំ២០១៤ នៅតំបន់អាស៊ាន ដែលមានកំនើនជាង ៥%កើនលើសពី របាយការណ៍ក្នុងឆ្នាំចាស់ ដែលមានចំនួនស្មើនឹង ១០០៨២៩គ្រឿង។

យោងទៅតាមរបាយការណ៍លក់ របស់ក្រុមហ៊ុនប្រចាំតំបន់អាស៊ាន បានឲ្យដឹងថាចំនួន នៃការលក់បាន កើនឡើងនៅក្នុងប្រទេស ភីលីពីន វៀតណាម ម៉ាឡេស៊ី កម្ពុជា និងមីយ៉ាន់ម៉ា។ មិនត្រឹមតែប៉ុណ្ណោះ ចំនួនភាគហ៊ុននៅក្នុង ទីផ្សារនៅក្នុងប្រទេសថៃ ក៏មានការកើនឡើង គួរឲ្យកត់សម្គាល់ ដោយសារការ ធ្លាក់ចុះនៃឧស្សាហកម្មក្នុងស្រុក។

បើតាមប្រសាសន៍ របស់លោក Matt Bradeley ប្រធានក្រុមហ៊ុន Ford ប្រចាំតំបន់អាស៊ានបានឲ្យដឹងថា ការកើនឡើងនៃការលក់រថយន្តនៅក្នុងតំបន់ អាស៊ានដែលរួមបញ្ចូល នូវការពង្រីកបន្ថែមនូវមជ្ឈមណ្ឌលតាំងលក់រថយន្ត ក៏ដូចជាការជ្រើសរើស បន្ថែមនូវបុគ្គលិកលក់ ធ្វើឲ្យយើងអាចមាន លទ្ធភាពគ្រប់គ្រាន់ ដើម្បីបំពេញនូវតម្រូវការ របស់អតិថិជន ក្នុងគោលបំណងពង្រឹងបន្ថែម នូវកេរ្ត៍ឈ្មោះនៃប្រភេទ រថយន្តលំដាប់ថ្នាក់ពិភពលោកនេះ។

គួរកត់សម្គាល់ផងដែរថា ក្នុងចំណោមប្រភេទរថយន្ត Ford ទាំងអស់ រថយន្ត Ford Ranger ដែលផលិតនៅប្រទេសថៃ ត្រូវបានគេទទួលស្គាល់ ថាជាប្រភេទរថយន្ត ដែលលក់ដាច់ជាងគេ នៅក្នុងឆ្នាំ២០១៤ នៅលើទីផ្សារប្រចាំតំបន់អាស៊ាន ដែលរួមមានប្រទេស ភីលីពីន វៀតណាម កម្ពុជា មីយ៉ាន់ម៉ា និង ម៉ាឡេស៊ី។

ការលក់រថយន្ត Ranger នៅក្នុងតំបន់អាស៊ាន មានកំណើនចំនួន ១០% ស្មើទៅនឹងចំនួន ៥០១៩០គ្រឿង បើប្រៀបធៀបទៅនឹងតួលេខការលក់នៅក្នុងឆ្នាំមុន។

លោក Bradeley បានបន្ថែមទៀតថា អានុភាពដ៏អស្ចារ្យ និងសមត្ថភាពដែលអាច បម្រើបាននូវគ្រប់ តម្រូវការនៃការប្រើប្រាស់ របស់រថយន្តប្រភេទ Pickup នេះនៅតែបន្តទាក់ទាញ ដល់អតិថិជនក្នុង ការជាវយកទៅប្រើប្រាស់ ទូទាំងតំបន់អាស៊ាន។ នៅក្នុងឆ្នាំ២០១៤Ford បានធ្វើការសម្ពោធ ការលក់ នូវ រថយន្តប្រភេទថ្មីមួយទៀតគឺរថយន្តម៉ាក EcoSport ជាប្រភេទរថយន្តលក្ខណៈ គ្រួសារសម្រាប់ តម្រូវការ ប្រើប្រាស់ក្នុងទីផ្សារនៅក្នុង តំបន់ អាស៊ាន។ ទន្ទឹមនឹងនេះដែរ EcoSport ដែលរថយន្ត ប្រភេទថ្មី នេះត្រូវបានគេទទួលស្គាល់ ជារថយន្តទីពីរដែល ទទួលការពេញនិយម និងលក់ដាច់ ជាងគេនៅក្នុង ទីផ្សារប្រទេសភីលីពីន វៀតណាម ម៉ាឡេស៊ី ឥណ្ឌូនេស៊ី ក្នុងចំនួន ១៨១៤៩គ្រឿង។

លោក Bradley បានធ្វើការបញ្ជាក់ផងដែរថា ដោយសារកេរ្តិ៍ឈ្មោះនៃរថយន្ត Ecosport នេះ បានធ្វើឲ្យមជ្ឈមណ្ឌល តាំងបង្ហាញរថយន្ត ក៏ដូចជា ម៉ាករថយន្ត Ford កាន់តែមានអតិថិជនស្គាល់ ច្រើនឡើងៗនៅក្នុងតំបន់។

ការកើនឡើងនៃចំនួនភាគហ៊ុន និងរបាយការណ៍នៃការលក់សរុប

ប្រទេសថៃនៅតែបន្តរក្សានូវកេរ្តិ៍ឈ្មោះ ជាប្រទេសដែលមានរថយន្តលក់ដាច់ជាងគេនៅក្នុងតំបន់អាស៊ានដែលមានតួលេខលក់សរុបស្មើនឹង ៣៨០៨៧គ្រឿង។ ទន្ទឹមនឹងការធ្លាក់ចុះនៃទីផ្សារក្នុងស្រុក Ford នៅតែបន្តធ្វើយ៉ាងណាជំរុញនូ វកំនើននៃភាគហ៊ុនរបស់ខ្លួននៅក្នុងឧស្សាហកម្ម ប្រទេសថៃក្នុង ឆ្នាំ២០១៤ ដែលកំនើននោះស្មើទៅនឹង ០.៥% ពោលគឺឈានទៅដល់ ៤.៤%នៃចំណែកភាគហ៊ុនសរុប។

លទ្ធផលនៃការលក់របស់ Ford ត្រូវបានរាយការណ៍បញ្ចប់ នៅជារៀងរាល់ចុងឆ្នាំនីមួយៗ ដែលក្នុង នោះយើងឃើញថា កំនើននៃការលក់រថយន្ត បានកើននៅក្នុងរយៈពេលបីខែជាប់ៗគ្នា ព្រមជាមួយ នឹងតួលេខសរុបនៃ ការលក់រាយនៅក្នុងខែធ្នូ មានចំនួនសរុបនៃការកើន ឡើងស្មើទៅនឹង ២០% គឺ ៣៤៧១គ្រឿង។

ប្រទេសភីលីពីនគឺ ជាប្រទេសដែលមានតួលេខ នៃការលក់ខ្ពស់ជាង គេបន្ទាប់ពីប្រទេសថៃ ដោយយោងទៅលើរបាយកាណ៍លក់ប្រចាំឆ្នាំ ដែលចំនួននៃការលក់បានកើនឡើងរហូតទៅដល់ ៥៣% សើ្មទៅនឹងចំនួន ២០៣៤១គ្រឿង។ គិតមកត្រឹមខែធ្នូ តួលេខនៃការលក់បាន កើនឡើងរហូត ដល់ទៅ ៥៦% ស្មើទៅនឹងចំនួន ១៩០៣ គ្រឿង ដែលតួលេខនៃបង្ហាញឲ្យឃើញពីការកើនឡើងនៃ ការលក់រថយន្តប្រចាំត្រីមាសនៅក្នុងប្រទេសភីលីពីននៅក្នុងឆ្នាំនេះ។

ផ្អែកទៅលើរបាយការណ៍ លក់ប្រចាំឆ្នាំសម្រាប់ប្រទេស វៀតណាមបានបង្ហាញថា តួលេខនៃការលក់ រាយមានកំនើនកើន រហូតទៅដល់ ៧១% ដែលមានចំនួនស្មើទៅនឹង ១៣៩៨៨គ្រឿងរួមជាមួយនឹង របាយការណ៍លក់រាយសរុបនៅក្នុងខែធ្នូបានបញ្ជាក់ថា ការលក់មានកំនើនចំនួន ៦៤% ស្មើនឹងចំនួន ១៦៥០គ្រឿងដែលជាតួលេខលក់ខ្ពស់បំផុតប្រចាំខែ។ នៅក្នុងឆ្នាំនេះ កំនើនឡើងនៃចំនួនភាគហ៊ុន នៅប្រទេសវៀតណាម បានកើនឡើងចំនួន ១.៥% បន្ថែមពីលើតួលេខប្រចាំឆ្នាំមុនចំនួន ៨.៩%។បន្ថែមពីនេះទៀត រថយន្តប្រភេទ Ranger បានលក់ដាច់ជាងគេនៅប្រទេសវៀតណាម ក៏ដូចជា ប្រភេទរថយន្តទេសចរណ៍ម៉ាក Transit ក៏ត្រូវបានលក់ចេញអស់ពីស្តុកផងដែរ។

សម្រាប់ប្រទេសម៉ាឡេស៊ីវិញ Ford បានបង្ហាញឲ្យឃើញពីរបាយការណ៍ នៃការលក់ប្រចាំឆ្នាំ ដែលក្នុងនោះបានបញ្ជាក់ថា ការលក់រាយមានការកើនឡើងរហូតទៅដល់ ៣១%ស្មើទៅនឹងចំនួន ១៣៩៣៨គ្រឿង។ រីឯនៅប្រទេសឥណ្ឌូនេស៊ីវិញ របាយការណ៍បានបង្ហាញថា ការលក់បានកើនឡើង រហូតដល់ជាង ១៤%ដែលមានចំនួនស្មើនឹង ១១៦១៤គ្រឿង។

Ford ក៏នឹងកំពុងវាយលុកទៅលើទីផ្សារនៅក្នុងប្រទេសមីយ៉ាន់ម៉ា កម្ពុជា និងឡាវ ដែលតាមរបាយ ការណ៍នៃការលក់ បានបង្ហាញឲ្យឃើញពីកំនើន កើនឡើងរហូតដល់ទៅ៣១%ស្មើនឹង ២១៦១គ្រឿង រួមបញ្ចូលជាមួយនឹង របាយការណ៍លក់សរុបនៅក្នុង ប្រទេសកម្ពុជានិងមីយ៉ាន់ម៉ា។ Ford ក៏បាន បង្ហាញពីកំនើនការលក់នៅក្នុងប្រទេសសិង្ហបុរីផងដែរ ដែលតួលេខនៃការកើន ឡើងនូវការលក់មាន រហូតដល់ ១៤%។

តាមសម្តីរបស់លោក Bradley បានបញ្ជាក់ថា “យើងនឹងបន្តបង្កើននូវធនធាន ក៏ដូចជាណែនាំនូវ បច្ចេកវិទ្យាចុងក្រោយបង្អស់ នៅក្នុងប្រទេសថៃក៏ដូច ជាតំបន់អាស៊ានទំាងមូល”។ “Ford ប្តេជ្ញាចិត្ត ដើម្បីអភិវឌ្ឍ និងផ្សព្វផ្សាយនូវប្រភេទ រថយន្តដោយបំពាក់ ដោយបច្ចេកវិទ្យាចុងក្រោយ ដែលអាច សន្សំសំចៃប្រេង និងកាត់បន្ថយនូវចំហេះ កាបូនដែលរួមចំណែកក្នុង ការរក្សាបរិស្ថាន និងផ្តល់ជូននូវអតិថិជន នូវជម្រើសនិងអត្ថប្រយោជន៍ដ៏ប្រសើរ”។

សម្រាប់ព័ត៌មានបន្ថែម៖ 012 333 975 / 023 214 214            

ទឺកសម្អុយ នៃការដឹក ជញ្ជូនសំរាម និង កាកសំណល់ ជាកត្តាប្រឈម សម្រាប់វិញ្ញាសារ ទីក្រុងស្អាត និងបង្កគ្រោះថ្នាក់

E-mail Print PDF

សៀមរាប ៖ ទោះបីជាមានការ យកចិត្តទុកដាក់ និងកិច្ចខិតខំប្រឹងប្រែង ដោយផ្ទាល់ និងប្រយោល ពីអាជ្ញាធរដែនដី ស្ថាប័ន អង្គភាព នៅទឹកដីវប្បធម៌ ប្រវត្តិសាស្រ្ត សៀមរាប-អង្គរ នាពេលបច្ចុប្បន្ន យ៉ាងណាក្ដី ក៏បញ្ហាប្រឈមមួយចំនួននៅតែមានផងដែរ ។ ក្នុងនោះ ការទុកដាក់ ការបោះចោល ការវេចខ្ចប់ ការប្រមូល ការដឹកជញ្ជូន ការគ្រប់គ្រង រួមទាំងការត្រួតពិនិត្យ និងការទទួលខុសត្រូវ ចំពោះសំរាម និងកាកសំណល់ នៅមានចន្លោះប្រហោង និងមានភាពកម្សោយនៅឡើយ ព្រមទាំង មានការទិចទៀន រអូរទាំ និងមានការខ្ពើមរអើម ពីសំណាក់ប្រជាពលរដ្ឋ ភ្ញៀវទេសចរណ៍ និងសាធារណជន ជាច្រើនផងដែរ ។

សប្ដាហ៍នេះ មជ្ឈមណ្ឌលព័ត៌មានដើមអម្ពិល សុំលើកយកតែជ្រុងតូចមួយ ក្នុងចំណោមបញ្ហាប្រឈមទាំងឡាយ ដូចជា ការខកខាន ការយឺតយ៉ាវ នៃការប្រមូលសំរាម ហើយនិងការឈប់រថយន្តបណ្ដាយឲ្យស្ទះចរាចរ និងបើកបររថយន្ដដឹកសំរាមមិនបានគោរពសិទ្ធិអ្នកដ៏ទៃ ។ល។ និង ។ល។ ជាដើមនោះ គឺក្នុងការគ្រប់គ្រងសំរាម និងកាកសំណល់ គឺការដឹកជញ្ជូនសំរាម មិនខ្វល់ពីការស្រក់ ហៀរហូរ សម្អុយ នៅតាមដងផ្លូវសាធារណៈ ដែលបង្ករឲ្យមានការជះក្លិន ដល់អ្នកធ្វើដំណើរ និងអ្នករស់នៅតាមដង់ផ្លូវថ្នល់ទាំងនោះ ហើយក្នុងនោះ វាក៏បានបង្ករនូវគ្រោះថ្នាក់ ដល់អ្នកធ្វើដំណើរផងដែរ ដែលខាងអាជ្ញាធរ សមត្ថកិច្ច និងក្រុមហ៊ុនមិនគួរមើលរំលងនោះឡើយ ទន្ទឹមនិងកិច្ចខិតខំប្រឹងប្រែង និងការយកចិត្តទុកដាក់កន្លងមក ។

ជាក់ស្ដែងនៅព្រឹកព្រលឹមថ្ងៃទី៣០ ខែមករា ឆ្នាំ២០១៥នេះ ក៏ដូចជាក្នុងប៉ុន្មានសប្ដាហ៍នេះ មានប្រជាពលរដ្ឋមួយចំនួន ដែលតែងតែបានងើប ពីព្រឹកព្រលឹម ដើម្បីហាត់ប្រាណ នៅតាមដងផ្លួវ និងទីសាធារណៈក្នុងក្រុងសៀមរាប បានមានប្រសាសន៍ឲ្យដឹងថា ការស្រក់ ការជ្រាប ការហៀរហូរ ទឹកសម្អុយនៅតាមកំណាត់ នៃដងផ្លូវថ្នល់មួយចំនួននៅក្នុងក្រុង គឺមានស្ទើរគ្មានលុះថ្ងៃ ដែលបណ្ដាលឲ្យមានការជះក្លិនស្អុយ គួរឲ្យព្រឺសម្បុរ និងធ្វើឲ្យបាត់បង់សោភ័ណ្ឌភាព ប៉ះពាល់ដល់សុខភាព រួមទាំងបណ្ដាលឲ្យមានជាគ្រោះថ្នាក់ដល់អ្នកធ្វើដំណើរផងដែរ ។

ពួកគាត់ទាំងនោះ (ដែលសុំមិនបញ្ចេញឈ្មោះ) បានបន្ដបញ្ជាក់ថា បញ្ហានេះគឺបណ្ដាលមកពីការមិនយកចិត្តទុកដាក់ របស់ក្រុមហ៊ុនប្រមូលសំរាម Gaea និងម្យ៉ាងទៀតគឺបណ្ដាលមកពីការមើលរំលងក្នុងការត្រួតពិនិត្យ និងគ្រប់គ្រងរបស់សមត្ថកិច្ច និងអាជ្ញាធរដែនដី ក្នុងការអប់រំ ផាកពិន័យ ចំពោះ ការមិនយកចិត្តទុកដាក់របស់ក្រុមហ៊ុន និងបុគ្គលិករបស់គេនោះ ។

ពួកគាត់បានបន្ដឲ្យដឹងថា កន្លងមកនេះ ពួកគាត់សុំទទួលស្គាល់ ចំពោះកិច្ចខិតខំប្រឹងប្រែងនិងយកចិត្តទុកដាក់ ចូលរួមរបស់សមត្ថកិច្ច និងអាជ្ញាធរក្រុង/ខេត្តសៀមរាប ក្នុងការរៀបចំគ្រប់គ្រងសំរាម និងកាកសំណល់ សម្អាត អនាម័យ និងសោភ័ណ្ឌភាពនៅក្រុងសៀមរាប ។

ពួកគាត់ ក៏ដូចជាសន្តិសុខឯកជនម្នាក់ បានបញ្ជាក់នៅព្រឹកព្រលឹមថ្ងៃទី៣០ មករា ២០១៥នេះ ថា នៅលើកំណាត់ផ្លូវខាងស្ដាំ ត្រង់ចំណុចខាង មុខសណ្ឋាគារ Grand Hotel ទល់មុខសួនច្បារព្រះរាជដំណាក់ បត់កែងឡើងស្ពានថ្ម ជិតមន្ទីរទេសចរណ៍ចាស់ គ្រាន់តែ៤-៥នាទីសោះ គឺមានអ្នកជិះម៉ូតូ ២គ្រឿងផ្សេងគ្នា ជិះដោយបុរស ២នាក់ បានដួលបោកខ្លួន ទៅនឹងផ្លូវ ដោយសារការរអិល នៅពេលដែលជិះកាត់ តាមទឹកសម្អុយដែលហៀរកំពប់លើផ្លូវនេះ។ ចំណែកឯសន្តិសុខម្នាក់ ដែលកំពុងយាមប្រចាំការនៅសណ្ឋាគារក្បែរនោះ បាននិយាយថា តាំងពីព្រឹកព្រលឹមមក រហូតដល់ម៉ោងប្រមាណជា ៦និង៣០នាទី ព្រឹកនេះ មានម៉ូតូ មិនតិចជាង ៦-៧គ្រឿងទេ ដែលបានរអិលដួលដោយសារតែការហៀរកំពប់ទឹកសម្អុយនេះ ។

លោក សូ ប្លាតុង អភិបាលក្រុងសៀមរាបចប្ចុប្បន្ន ដែលជាបុគ្គលម្នាក់ បាននិងកំពុងចូលរួមយ៉ាងសកម្ម និងជាគំរូ ក្នុងចលនាទីក្រុងស្អាត ហើយដែលលោកកំពុងតែមានមហិច្ឆតាខ្ពស់ ក្នុងការការដណ្ដើមភាពជោគជ័យ សម្រាប់ចំណាត់ថ្នាក់ “ផ្ដារំដួល ៣ទង” នៃទីក្រុងស្អាត រមណីយដ្ឋានស្អាត សេវាល្អ និងដើម្បីលើកកម្ពស់វិស័យទេសចរណ៍ បានមានប្រសាសន៍ ប្រាប់អ្នកយកព័ត៌មានយើងថា លោកបានប្រឹក្សា ណែនាំ និងលើកទឹកចិត្តជាហូរហែរ ដល់ក្រុមហ៊ុនគ្រប់គ្រងនិងប្រមូលសំរាម Gaea ឲ្យពង្រឹងក្នុងការចូលរួម ដោយភាពទទួល ខុសត្រូវខ្ពស់ ចំពោះ ការដឹកជញ្ជូន និងប្រមូលសំរាម ដូចជា តម្រូវឲ្យមានការគ្របសំរាមនៅពេលដឹកជញ្ជូន ត្រូវប្រមូលសំរាមឲ្យអស់ពីកន្លែងទុកដាក់សំរាម មិនឲ្យជ្រុះ និងកំពប់ហៀរហូរទឹកសម្អុយតាមដងផ្លូវ ជាដើមផងដែរ ។

សូមបញ្ជាក់ផងដែរថា លោក ឃឹម ប៊ុនសុង អភិបាលខេត្តសៀមរាប និងលោក ថោង ខុន រដ្ឋមន្ត្រីក្រសួងទេសចរណ៍ បាននិងកំពុងខិតខំយកចិត្ត ទុកដាក់ អប់រំ ណែនាំ លើកទឹកចិត្ត ដល់គ្រប់ស្ថាប័ន អង្គភាព អាជ្ញាធរពាក់ព័ន្ធ គ្រប់ប្រតិបត្តិករទេសចរណ៍ វិស័យឯកជនអង្គការជាតិ-អន្តរជាតិ សម្រាប់ចូមរួមក្នុងចលនា ទីក្រុងស្អាត រមណីយដ្ឋានស្អាត សេវាល្អ និងការលើកកម្ពស់វិស័យទេសចរណ៍ នៅក្រុងវប្បធម៌ប្រវត្តិ សាស្រ្ដសៀមរាប-អង្គរ ។

ថ្នាក់ដឹកនាំទីពីររូបនេះ ក៏បានយកចិត្តទុកដាក់យ៉ាងខ្ពស់ផងដែរ សម្រាប់ការចូលរួមពីគ្រប់ភាគីជាប់ពាក់ព័ន្ធ ក្នុងការអភិវឌ្ឍវិស័យទេសចរណ៍កម្ពុជា ដែលជាទេសចរណ៍ "វប្បធម៌ និង ធម្មជាតិ" ដែលត្រូវបានចាត់ទុកថាជា មាសបៃតង (ទេសចរណ៍បៃតង) និងជាវិស័យដ៏អាទិភាពមួយ ក្នុងចំណោមវិស័យអាទិភាពនានា ក្នុងការចូលរួមអភិវឌ្ឍសេដ្ឋកិច្ច សង្គម និងកាត់បន្ថយភាពក្រីក្រនៅកម្ពុជា តាមរយ:ការបង្កើនការងារ ដល់ប្រជាពលរដ្ឋ បង្កើនចំណូលដល់ជាតិ ។ ហើយត្រូវបានគេផ្ដល់រហស្សនាម ថា "សៀមរាបអង្គរ ទីក្រុងវប្បធម៌ នៃអាស៊ីបូព៌ា" ផងដែរនោះ ៕

Page 4 of 397