ភ្នំពេញ៖ រថយន្តលុច្សស៊ីស មួយគ្រឿង បានក្រឡាប់ផ្ញើជើង នៅតាមផ្លូវ ទំនប់ទួលគោក ក្នុងខណ្ឌទួលគោក នាវេលាម៉ោង ប្រមាណ ១០៖៤០យប់ថ្ងៃទី២១ ខែឧសភា ឆ្នាំ២០១៣នេះ ប៉ុន្តែមិនដឹងថា អ្នកបើករថយន្តមានគ្រោះថ្នាក់ ឫមួយយ៉ាងណានោះទេ។
សេចក្តីរាយការណ៍ ពីកន្លែងកើតហេតុ បានឲ្យដឹងថា ករណីក្រឡាប់ខាងលើនេះ អាចបណ្តាលមកពី អ្នកបើករថយន្តមានអាការៈស្រវឹងខ្លាំងពេក៕
ភ្នំពេញ៖ ចៅក្រមសាលា ដំបូងរាជធានី ភ្នំពេញ លោក ភូ ពៅស៊ុន កាលពីរសៀលថ្ងៃទី២១ ខែឧសភា ឆ្នាំ២០១៣ បានសម្រេច ឃុំខ្លួន អ្នកបើក រថយន្ត ដែលបើកបុក របាំងចែកទ្រូងផ្លូវ ដាក់ពន្ធនាគារ ចំនួន៣ខែ និងត្រូវបង់ការផាកពិន័យ ចំនួន៥០ម៉ឺនរៀល ប៉ុន្តែទោសចំនួន៣ខែ ត្រូវព្យួរ ។
ការសម្រេចដាក់ពន្ធនាគារ និងតម្រូវឲ្យបង់ការផាក ពិន័យខាងលើនេះ បានធ្វើឡើង ក្រោយពីកម្លាំង នគរបាល ចរាចរ ជើងគោក រាជធានីភ្នំពេញ បានបញ្ជូនជននេះ ទៅកាន់តុលាការ កាលពីថ្ងៃទី២០ ខែឧសភា ឆ្នាំ២០១៣ ។
មន្រ្តីសាលាដំបូង រាជធានីភ្នំពេញ បានឲ្យដឹងថា អ្នកបើករថយន្ត បុករបាំងថ្មចែកទ្រូងផ្លូវ បណ្តាលឲ្យរងការ ខូចខាតចំនួន៥កង់ ខាងលើនេះ ត្រូវសម្រេចដាក់ពន្ធនាគារ ចំនួន៣ខែ និងបង់ការផាកពិន័យ ចំនួន៥០ម៉ឺនរៀល ដោយយោងតាម មាត្រា៧៤ និង៧៦ នៃច្បាប់ចរាចរណ៍ ជើងគោក ប៉ុន្តែទោសនេះត្រូវព្យួរ ។
គួរបញ្ជាក់ថា អ្នកបើករថយចៅន្ដ ដែលមាន អាការៈស្រវឹង និងគ្មានប័ណ្ណបើកបរបាន បង្កគ្រោះថ្នាក់ចរាចរ ទៅបុករបាំងថ្មចែក ទ្រូងផ្លូវ បណ្ដាលឱ្យរងការខូចខាតចំនួន ៥ដុំ កាលពីយប់រំលងអាធ្រាត្រ ឈានចូលថ្ងៃទី ១៥ ខែឧសភា ឆ្នាំ ២០១៣ ស្ថិតនៅលើ មហាវិថីព្រះមុនីវង្ស មុខក្រសួងសង្គមកិច្ច សង្កាត់បឹងត្របែក ខណ្ឌចំការមន ត្រូវបាន កម្លាំងនគរបាល ការិយាល័យចរាចរជើង គោក បញ្ជូនខ្លួនទៅកាន់តុលាការចាត់ការ ទៅតាមផ្លូវច្បាប់ ។
នាយរងការិយាល័យ ចរាចរជើងគោក លោក ប៉ែន ឃុន បានឱ្យដឹងថា អ្នកបើក រថយន្ដរូបនេះ ត្រូវបានសមត្ថកិច្ចរបស់ លោក កាលពីថ្ងៃទី២០ ខែឧសភា ឆ្នាំ ២០១៣ សម្រេចបញ្ជូនខ្លួនទៅកាន់តុលា ការ ដោយជាប់ពាក់ព័ន្ធនឹងបទល្មើសចំនួន ៣ គឺបើកបុករបាំងថ្ម បែងចែកទ្រូងផ្លូវ ដែលជាទ្រព្យសម្បត្ដិ សាធារណៈរបស់រដ្ឋ បើកបរមានជាតិស្រវឹង និងបើកបរគ្មាន ប័ណ្ណបើកបរ ។
សូមរំលឹកថា នៅវេលាម៉ោង និងកន្លែង កើតហេតុខាងលើ មានគ្រោះថ្នាក់ចរាចរ បានកើតឡើង ដោយសាររថយន្ដម៉ុងតេរ៉ូ ពណ៌ខៀវ ពាក់ស្លាកលេខភ្នំពេញ 2F-2186 បានទៅបុករបាំងថ្មចែកទ្រូងផ្លូវ រួចហើយ រថយន្ដទៅមុខលែងរួច ទើបសមត្ថកិច្ច ឃាត់បាន ។
មន្ដ្រីនគរបាល ចរាចរជើងគោកបានឱ្យ ដឹងថា អ្នកបើករថយន្ដឈ្មោះ ស៊ុំ ចាន់ សៀត ភេទប្រុស អាយុ ២៧ឆ្នាំ ។
មន្ដ្រី នគរបាលចរាចររូបនេះ បានបន្ដថា មុន ពេលកើតហេតុ អ្នកបើករថយន្ដបានធ្វើ ដំណើរ តាមបណ្ដោយផ្លូវមុនីវង្ស ក្នុងទិស ដៅពីត្បូងទៅជើង លុះដល់ចំណុចកើត ហេតុ បានជ្រុលបុករបាំងថ្មបែងចែកទ្រូង ផ្លូវ បណ្ដាលឱ្យរងការខូចខាតចំនួន ៥ដុំ ។
បើតាមសមត្ថកិច្ច អ្នកបើករថយន្ដរូប នេះ មានអាការៈស្រវឹង និងមានជាតិអាកុល ចំនួន ០.៦២ មីលីក្រាម ក្នុង១លីត្រខ្យល់ ព្រមទាំងគ្មានប័ណ្ណបើកបរផងដែរ ។ មន្ដ្រីនគរបាលចរាចរ បានបន្ដថា ដើម ឆ្នាំ ២០១៣ នេះ អ្នកបើករថយន្ដបង្កគ្រោះ ថ្នាក់ចរាចរ បណ្ដាលឱ្យអ្នកដទៃស្លាប់រង របួស និងបំផ្លិចបំផ្លាញទ្រព្យសម្បត្ដិរបស់រដ្ឋ ជាង ៥០នាក់ ត្រូវបញ្ជូនទៅកាន់តុលាការ ក្នុងនោះសំណុំរឿងជាង ១៥០សំណុំរឿង ហើយភាគច្រើន គ្រោះថ្នាក់ចរាចរទាំងនេះ បណ្ដាលមកពីគ្រឿងស្រវឹង ៕
ព្រះសីហនុ៖ កាលពីយប់ ថ្ងៃទី២១ ខែឧសភា ឆ្នាំ២០១៣ វេលាម៉ោង៧ និង២០នាទី នៅចំណុចចុង ឆ្នេរអូរឈើទាល ស្ថិតក្នុងភូមិ៥ សង្កាត់លេខ៤ ក្រុង-ខេត្តព្រះសីហនុ មានករណីក្រុមចោរ ប្លន់ប្រដាប់ អាវុធពីរនាក់ បានជិះម៉ូតូមួយគ្រឿង មកធ្វើសកម្មភាពប្លន់ម៉ូតូម៉ាកហុងដា សេ១២៥ ស៊េរី២០១២ ឡើង២០១៣ ពីឈ្មោះ វ៉ា មេត្តារុងរ៉ាត់ អាយុ២០ឆ្នាំ មុខរបរជាកម្មករសំណង់ ទៅបាត់ដោយសុវត្ថិភាព ខណៈនៅពេល ដែលជនរងគ្រោះ យកចង្កៀងម៉ាំងសុងឲ្យម្តាយ ដែលជាអ្នកលក់ម្ហូបអាហារ នៅឆ្នេរអូរឈើរទាល ។
សាក្សីនៅកន្លែងកើតហេតុ បាននិយាយប្រាប់ថា ពេលជនរងគ្រោះ មកដល់កន្លែងកើតហេតុ គេឃើញជន សង្ស័យមួយក្រុម មានគ្នាពីរនាក់បានបើក កៀរម៉ូតូជនរងគ្រោះ រួចបញ្ជាឲ្យជនរងគ្រោះ ចុះចេញពីម៉ូតូ ខណៈនោះ ជនរងគ្រោះប្រុងតដៃ ស្រាប់តែគេឃើញ ក្រុមជនសង្ស័យអាមេកាំភ្លើង ជនរងគ្រោះឃើញដូច្នោះ ក៏ចុះចេញ ដោយសំរួល ហើយក៏រត់រកកន្លែងមានសុវត្ថិភាពតែម្តង ។
នៅពេលដែលជនរងគ្រោះចុះចេញពីម៉ូតូ ក្រុមជនសង្ស័យបានឡើងជិះម៉ូតូ នោះហើយក៏បានបើក គេចខ្លួនសំដៅ ទៅខាងបន្ទាយកងរាជ អាវុធហត្ថខេត្ត បាត់ស្រមោលទៅ៕
ជនរងគ្រោះ ជាម្ចាស់ម៉ូតូ
ភ្នំពេញ ៖ ស្រ្តីម្នាក់ ដែលស្លាប់ បាត់បង់ជីវិត ខណៈកំពុងជិះ ឧបករណ៍ លេងកំសាន្ត ហៅថា Twin Twister ស្ថិតនៅក្នុង សួនកំសាន្ត ឌ្រីមលែន មានទីតាំង ស្ថិតខាងមុខ ណាហ្គាវើល សង្កាត់ចតុមុខ ខណ្ឌដូនពេញ កាលពីល្ងាចថ្ងៃទី២១ ខែឧសភា ឆ្នាំ២០១៣ នោះ គឺបណ្តាលមកពីកំហុស ខ្លួនឯងតែម្តង មិនបណ្តាលមកពី បច្ចេកទេស និងការដាច់ធ្លាក់ ឧបករណ៍ដូចសេចក្តីរាយការណ៍ មួយចំនួន និងពីដំបូងឡើយ។
អ្នកចាត់ការទូទៅ នៃសួនកំសាន្ត ឌ្រីមលែន បានឲ្យដឹងថា តាមពិត ស្រ្តីរងគ្រោះ ដែលស្លាប់ពេលកំពុង ឧបករណ៍ជិះកំសាន្តនោះ បានកើតឡើង ដោយសារតែ ជនរងគ្រោះ បានលូនចេញពីខ្សែក្រវ៉ាត់ ដោយខ្លួនឯង ខណៈមិត្តភក្រ័ជនរងគ្រោះ ជួយចាប់តែ ប៉ុន្តែមិនទាន់។
អ្នកចាត់ការទូទៅរូបនេះ បានឲ្យដឹងថា ឧបករណ៍ខាងលើនេះ មានតម្លៃជាង១លាន ដុល្លារឯណោះ ដូច្នេះការរៀបចំ បច្ចេកទេស នៅពេលជិះលេងកំសាន្ត មានការប្រុងប្រយ័ត្ន ខ្លាំងណាស់ ហើយម្យ៉ាងទៀត អ្នកកាន់បច្ចេសទេស នៅប្រចាំកន្លែងលេងនោះ បានប្រកាសថា បើសិនអ្នកដែលមានជំងឺ ខ្សោយបេះដូង ឫអារម្មណ៍ខ្សោយ សូមកុំចូលលេង ពីព្រោះអាចបណ្តាលឲ្យ ប៉ះពាល់ជីវិតដោយ ប្រការណាមួយ។
ជាមួយនឹងគ្រោះថ្នាក់ រហូតបាត់បង់ ជីវិតរបស់ស្រ្តី ខាងលើនេះ បានកើតឡើង ដោយមុនពេល កើតហេតុ ស្រ្តីរងគ្រោះ និងមិត្តភ័ក្រផ្សេងទៀត ក្នុងនោះ មានទាំងជនជាតិបរទេសមួយរូប ផងដែរ ដែលជាបុគ្គលិក នៅអង្គការ បាននាំគ្នាជួល ជិះឧបករណ៍ខាងលើនេះ ដែលមានតម្លៃចំនួន៨០០០រៀល សម្រាប់ការជិះលេងកំសាន្តមួយដង ។ ខណៈដែលស្រ្តីរងគ្រោះ កំពុងជិះ និងឧបករណ៍ កំពុងធ្វើចលនាខ្លាំងៗ ស្រាប់តែស្រ្តីរងគ្រោះ បានលូនចេញពី ខ្សែក្រវ៉ាត់ការពារដោយខ្លួនឯង ហើយធ្លាក់ រងរបួសធ្ងន់តែម្តង និងក្រោយមកបានស្លាប់ ពេលបញ្ជូនទៅកាន់មន្ទីរពេទ្យ កាល់ម៉ែត។
អ្នកចាត់ការទូទៅ រូបនេះ បានបន្តថា សម្រាប់ខ្សែក្រវ៉ាត់ ការពារសុវត្ថិភាព នៅពេលជិះម្តងៗ គឺមានភាពរឹងមាំណាស់ ពោលមិនងាយ ដាច់នោះឡើយ ហើយនៅពេល ឧបករណ៍ឈប់ ប្រហែល៣០វិនាទី ទើបអាចដោះចេញបាន ដូច្នេះជាការការពារ សុវត្ថិភាពខ្ពស់ណាស់ សម្រាប់ភ្ញៀវដែល ចូលទៅជិះកំសាន្តនោះ។
ស្រ្តីរងគ្រោះរូបនេះ មានឈ្មោះ គីម គង្គា ភេទស្រី អាយុ៣៣ឆ្នាំ មានស្រុកកំណើតនៅ ស្រុកស្វាយទាប ខេត្តស្វាយរៀង និងបច្ចុប្បន្នជា បុគ្គលិកនៅអង្គការមួយ មានទីតាំងស្ថិតនៅ ស្រុកកៀនស្វាយ ខេត្តកណ្តាល។ ជាមួយគ្នានេះ អ្នកចាត់ការទូទៅ នៃសួនកំសាន្ត ឌ្រីមលែន សូមធ្វើការអំពាវនាវ ដល់ប្រជាពលរដ្ឋ គ្រប់រូប កុំឲ្យមានការភ័នច្រឡំ ចំពោះព័ត៌មានទាំងនេះ តាមពិតស្រ្តីរងគ្រោះ បានស្លាប់ដោយសារតែ ខ្លួនឯងនោះទេ ពោលមិនបណ្តាលមកពីបច្ចេកទេស ឫការដាច់ធ្លាក់ឧបករណ៍នេះឡើយ៕
ពោធិ៍សាត់៖ កាលពីព្រឹកថ្ងៃទី១៩ ខែឧសភា ឆ្នាំ២០១៣ នៅទីស្នាក់ការ គណបក្សប្រជាជនកម្ពុជា ក្នុងសង្កាត់ ស្វាយអាត់ ក្រុងពោធិ៍សាត់ ខេត្តពោធិ៍សាត់ មានរៀបចំពិធី ប្រកាសទទួលស្គាល់សកម្មជន នៃគណបក្សដទៃ ចំនួន១១៩រូប ដែលបានសម្រេចចិត្ត ចូលមករួមរស់ក្នុងគណបក្សប្រជាជនកម្ពុជា សង្កាត់ស្វាយអាត់ ក្រុងពោធិ៍សាត់ ក្រោមអធិបតីភាព លោក ជិន ប៊ុនស៊ាន សហប្រធានក្រុមការងារ ចុះជួយក្រុងពោធិ៍សាត់ ។
បន្ទាប់ពីលោក សំរិទ្ធិ អេង ប្រធានគណបក្សក្រុងពោធិ៍សាត់ បានអាននូវ សេចក្តីសម្រេចបញ្ចូល សមាជិកថ្មីទាំង ១១៩រូប ដែលក្នុងនោះ៦២រូប មកពីគណបក្សសមរង្ស៊ី ៥៥រូបមកពីគណបក្ស ហ៊្វុនស៊ិនប៉ិច និង២រូបមកពីអតីត គណបក្សនរោត្តមរណឬទ្ធិ។
លោក ហេង សុខគង់ អនុប្រធានក្រុមការងារចុះជួយក្រុងពោធិ៍សាត់ ទទួលបន្ទុកសង្កាត់ស្វាយអាត់ បាន ស្វាគមន៍យ៉ាងកក់ក្តៅ ចំពោះបងប្អូនទាំងអស់ដែលបាន សម្រេចចិត្តត្រូវចូលមករួមរស់ ក្នុងគណបក្សប្រជាជន កម្ពុជា ក្រោមការដឹកនាំរបស់សម្តេចទាំង៣ ដែលបានសង្គ្រោះ ប្រជាជនឲ្យរស់រាន មានជីវិតពីរបប ប្រល័យពូជសាសន៍ ៣ឆ្នាំ ៨ខែ ២០ថ្ងៃ និងជាពិសេសគឺសម្តេចតេជោ ហ៊ុន សែន នាយករដ្ឋមន្ត្រី ដែលបាន នាំមកនូវសុខសន្តិភាពពេញលេញ ជូនប្រទេសជាតិ និងប្រជាជនខ្មែរ ក៏ដូចជាការអភិវឌ្ឍ ឥតឈប់ឈរ ពីមួយថ្ងៃ ទៅមួយថ្ងៃ ។
លោក ហេង សុខគង់ ក៏បានស្នើឲ្យបងប្អូនទាំងអស់ជួយកៀងគ មិត្តភក្តិ ញាតិសន្តាន ជាបន្តទៀត ដើម្បីចូល មករួម រស់ជាមួយអ្នកបានជួយសង្គ្រោះជីវិតយើង អ្នកដែលនៅរួមសុខ រួមទុក្ខ ជាមួយយើងគ្រប់កាលៈទេសៈ និងសូមឲ្យបោះឆ្នោតជូនគណបក្សប្រជាជនកម្ពុជា នៅថ្ងៃទី២៨ ខែកក្កដា ឆ្នាំ២០១៣ ខាមុខនេះឲ្យបានគ្រប់ៗគ្នា ។
ជាកិច្ចបន្ត លោក ជិន ប៊ុនស៊ាន ក៏បានថ្លែងនូវអំណរគុណ និងស្វាគមន៍ចំពោះបងប្អូន ទាំងអស់ ហើយចាប់ពី ពេលនេះ តទៅគ្មានសមាជិកថ្មី និងសមាជិកចាស់អ្វីទេ គឺសុទ្ធតែជាសមាជិក របស់គណបក្សប្រជាជនកម្ពុជា ទាំងអស់គ្នា មានសិទ្ធិស្មើគ្នា ហើយលោក ក៏បានស្នើឲ្យថ្នាក់ដឹកនាំបក្ស តាមមូលដ្ឋាន ទាំងអស់កុំឲ្យ មានការរើសអើង ត្រូវចេះស្រលាញ់គ្នា និងរួបរួមគ្នាដើម្បីកសាងភូមិ-សង្កាត់របស់យើង ។ លោកក៏បានស្នើ ឲ្យប្រជាជនទាំងអស់កុំចាញ់បោកគណបក្ស ប្រឆាំងតទៅទៀត ដែលបានតែស្រែក និងមិនដែលបានធ្វើអ្វី ទាល់តែសោះដើម្បីបម្រើជាតិ មាតុភូមិ ។
ចុងបញ្ចប់លោក ហេង សុខគង់ ក៏បានចែកជូននូវវត្ថុអនុស្សាវរីយ៍ដែលជាអំណោយរបស់ លោក ស៊ុយ សែម ប្រធានក្រុមការងារចុះជួយខេត្តពោធិ៍សាត់ដល់បងប្អូនទាំង១១៩រូប ដែលម្នាក់ៗទទួលបាននូវ អាវយឺតគណបក្ស មួយ មួកមួយ ថ្នាំពេទ្យ២កញ្ចប់ និងថវិកា៥០០០រៀលផងដែរ៕
ភ្នំពេញ៖នៅល្ងាចថ្ងៃទី២១ ខែឧសភា ឆ្នាំ២០១៣នេះ ក្រុមនិស្សិតពេទ្យប្រមាណជា៣០នាក់ ដែលបានបញ្ចប់ ការ សិក្សាឆ្នាំទី៦នៃ មហាវិទ្យាល័យ សុខាភិបាល សាកលវិទ្យាល័យ អន្តរជាតិ (IU) ស្ថិតនៅសង្កាត់ភ្នំពេញថ្មី ខណ្ឌសែនសុខ បាននាំគ្នាដើរសំដៅមក ទីស្តីការគណៈរដ្ឋមន្រ្តី ក្នុងគោលបំណងឲ្យលោកឧបនាយករដ្ឋមន្រ្តី សុខ អានជួយអន្តរាគមន៍ ក្នុងករណីសាលា មិនកំណត់ថ្ងៃប្រឡងច្បាស់លាស់។
កាលពី ថ្ងៃទី១៩ ខែឧសភា ឆ្នាំ២០១៣កន្លងមកនេះ និស្សិតជាង៥០០នាក់បាន ក្នុងចំណោម និស្សិត៧៨៤ នាក់បានធ្វើកូដកម្ម ម្តងរួចមកហើយ ដើម្បីស្នើឲ្យប្រមុខរាជរដ្ឋាភិបាល កម្ពុជា សម្តេចតេជោ ហ៊ុន សែន ជួយ ដោះស្រាយបញ្ហារបស់ពួកគេ ដែលបានជួបប្រទះ ដោយសាលាមិនទាន់ កំណត់ថ្ងៃប្រឡង សម្រាប់ពួកគេ។ ម្យ៉ាងទៀត សុំឲ្យសកលវិទ្យាល័យគោរព តាមសន្យា ដូចដែលកាលពីពួកគេ ចុះឈ្មោះចូលរៀន កាលពី ឆ្នាំ ២០០៦៕
កំពង់ឆ្នាំងៈ កាលពីថ្ងៃទី២០ ខែឧសភា កន្លងទៅក្រុមការងារ ថ្នាក់កណ្តាល CPP ដឹកនាំដោយ លោក ស្លូត សំបូរ និង សហការី បានចុះជួប សំណេះសំណាល ជាមួយក្រុមបក្ស នៅភូមិចាន់ត្រក ឃុំក្រាំងស្គារ ស្រុកទឹកផុស ខេត្តកំពង់ឆ្នាំង ចំនួន ២៧ នាក់។
លោក ស្លូត សំបូរ បានថ្លែងអំណរគុណ ប្រជាពលរដ្ឋ ក្នុងឃុំក្រាំងស្គារ ទាំងមូល ដែលតែងគាំទ្រ យ៉ាងសកម្ម ក្នុងការអនុវត្ត គោលនយោបាយភូមិ ឃុំមាន សុវត្ថិភាព ព្រមទាំងចូលរួម យ៉ាងសកម្ម ជាមួយអជ្ញាធរ ក្នុងការសម្អាតអនាម័យ តាមមូលដ្ឋាន ដើម្បីកម្ចាត់ ជម្រកមូសខ្លា នាពេល កន្លងមក។ លោក ក៏បានលើកឡើង នូវប្រសាសន៍ ៤ ចំណុចដែល សម្តេចតេជោនាយករដ្ឋមន្ត្រី បានថ្លែងនាពេលកន្លង មកគឺ៖ “ បើស្រឡាញ់ បើអាណិត បើពេញចិត្ត បើជឿទុកចិត្ត សម្តេចតេជោ សូមបោះឆ្នោតជូនគណបក្សប្រជាជនកម្ពុជា បោះឆ្នោត ជូនគណបក្ស ប្រជាជនកម្ពុជា មានន័យថាៈ បោះឆ្នោតឲ្យខ្លួនឯង! ” ។
លោក នូ ផូ ប្រធាន ក្រុមប្រឹក្សាឃុំក្រាំងស្គារ លើកឡើងថា គណបក្ស ប្រជាជនកម្ពុជា តែងខ្វល់ពីសេចក្តីសុខ ទុក្ខ របស់ប្រជាជន មានកម្មវិធី នយោបាយ ប្រកបដោយ ចក្ខុវិស័យ ច្បាស់លាស់ ដឹកនាំប្រទេសឆ្ពោះទៅរក ការអភិវឌ្ឍដោយ ចីរភាព មានចរិតលក្ខណៈ ជាអ្នកបង្រួប បង្រួមជាតិ។ ជាក់ស្តែងផ្លូវក្រាលកៅស៊ូពីរជាន់ប្រវែង ២៦ គ.ម (ពង្រ-ក្រាំងស្គារ) ផ្លូវក្រាលក្រួសក្រហមប្រវែង ៣២ គ.ម (ពីឃុំរមាស ស្រុកទឹកផុស ខេត្តកំពង់ឆ្នាំង-ឃុំឈើតុំ ស្រុកក្រគរ ខេត្តពោធិ៍សាត់) និងផ្លូវពាក់ព័ន្ធ មួយចំនួនទៀត ដូចបងប្អូនឃើញស្រាប់ហើយ៕
ព្រះវិហារៈ កម្លាំងសមត្ថកិច្ច រួមនិងអាជ្ញាធរជាច្រើន នាក់ ក្នុងខេត្តព្រះវិហារ បាននិងកំពុងបន្តជីកកកាយ រុករកជនរងគ្រោះ បន្ទាប់ពីហេតុការណ៍ បាក់រណ្តៅរ៉ែមាស កាលពីរសៀលថ្ងៃទី២០ ខែឧសភា ឆ្នាំ២០១៣។ ការរុករករហូត ដល់ល្ងាចថ្ងៃទី២១ ខែឧសភា សមត្ថកិច្ចមិនទាន់រកឃើញ ជនរងគ្រោះណាម្នាក់ ក្នុងរណ្តៅនៅឡើយទេ។
ស្នងការនគរបាលខេត្ដព្រះវិហារ លោក ស៊ី គីរី បានថ្លែងប្រាប់មជ្ឈមណ្ឌលព័ត៌មានដើមអម្ពិមតាមទូរស័ព្ទនៅល្ងាច ថ្ងៃទី២១ ខែឧសភា ឆ្នាំ២០១៣ថា រហូតដល់ល្ងាចថ្ងៃនេះ រូបលោក ក៏ដូចលោកអភិបាលខេត្ត បាននិងកំពុងដឹកនាំ កម្លាំងយកអេស្កាវ៉ាទ័រ ជីកកកាយរណ្តៅរ៉ែមាស ដែលរងការបាក់ស្រុត ហើយការជីកកកាយនេះទៀតសោត មិន ទាន់រកឃើញជនរងគ្រោះណាម្នាក់ទេ។
លោកឧត្តមសេនីយ៍ ស៊ី គីរី ក៏បានឲ្យដឹងទៀតថា អេស្កាវ៉ាទ័រ បានជីកជម្រៅរហូតដល់ ៥ម៉ែត្រ ដោយវាតទីលើ ទំហំដី ១០ម៉ែត្រ បួនជ្រុង ពោលគឺទំហំផ្ទៃដី ដែលប្រជាពលរដ្ឋបាននាំគ្នាជីករូងខ្វែងខ្វាត់ ដើម្បីរុករករ៉ែមាស។
ពាក់ព័ន្ធនឹងជនរងគ្រោះវិញ លោកស្នងការខេត្តរូបនេះ ក៏បានបញ្ជាក់ថា រណ្តៅរ៉ែនេះ ជារណ្តៅរុករកលក្ខណៈ គ្រួសារមានតែអ្នកក្នុងភូមិប៉ុណ្ណោះ ជាអ្នកមករក មិនមានអ្នកស្រុកដទៃមកជីកទេ។ រហូតដល់ល្ងាចថ្ងៃដដែលនេះ ទៀតសោត មិនទាន់មានការទាក់ទងពីក្រុមគ្រួសារណា មកបញ្ជាក់ពីការបាត់សមាជិករបស់ ខ្លួឡើយ គឺមាន តែមួយគ្រួសារ បានមកទាក់ទងជាមួយសមត្ថកិច្ច ព្រមទាំងបានអះអាងថា រូបគាត់បាត់កូន ហើយមករកជីករ៉ែ ក្នុង រណ្តៅបាក់ស្រុតនេះ។
បើតាមលោក ស៊ី គីរី បានបញ្ជាក់ថា រូបលោក និងលោកអភិបាលខេត្ត នឹងបន្តបេសកកម្មជីករុករករហូតដល់ ឃើញជនរងគ្រោះ ព្រោះចង់ដឹងថា មានជនរងគ្រោះប៉ុន្មាននាក់ តែបើតាមប្រជាពលរដ្ឋនៅក្នុងភូមិកើតហេតុ ប្រហែលជាមានតែមួយករណីប៉ុណ្ណោះ។
លោកឧត្តមសេនីយ៍ ស៊ី គីរី បានដកស្រង់សម្តីពីអ្នកជីករ៉ែ វ័យ១៧ឆ្នាំម្នាក់ មកបញ្ជាក់ថា មុនពេលកើតហេតុរូបគេ បានចូលទៅជីករ៉ែមាសក្នុងរណ្តៅ ដែលមានជម្រៅជាង ៥ម៉ែត្រ ក្រោយពីជីក និងដីរ៉ែបាន ៥ការ៉ុង ស្រាប់តែមាន ទឹកហូរចូល ពេលឃើញដូច្នោះខ្លាចក្រែងដីបាក់ស្រុតរូបគេ ក៏ចេញមកវិញ ហើយដីបាក់ស្រុតតែម្តង។
អ្នកជីករ៉ែរូបនេះ បានបន្តឲ្យសមត្ថកិច្ចដឹងផងដែរ នៅមុនពេលកើតហេតុ រូបគេចូលទៅជីកតែម្នាក់ឯង ប៉ុណ្ណោះ មិនមានអ្នកដទៃចូលទៅជាមួយនោះទេ។
លោក ស៊ី គីរី ក៏បានបញ្ជាក់ផងដែរ រណ្តៅរ៉ែមាសស្ថិតនៅឃុំរមទុំ ស្រុករវៀង ខេត្ដព្រះវិហារ ជារណ្តៅដែលប្រជា ពលរដ្ឋជីកជាលក្ខណៈគ្រួសារ ស្ថិតនៅជិតជើងភ្នំ ដែលពួកគាត់តែងរុករកពេលទំនេរពីរដូវបង្កបង្កើនផល។
ជាមួយគ្នានេះ អភិបាលខេត្តព្រះវិហារ លោក អ៊ុំ ម៉ារ៉ា បានថ្លែងឲ្យដឹងថា នៅវេលាម៉ោង៧យប់ថ្ងៃទី២១ ខែឧសភា ឆ្នាំ២០១៣នេះ កម្លាំងសមត្ថកិច្ច និងអាជ្ញាធរ បានផ្អាកការ ជីករុករកជា បណ្តោះអាសន្ន ដោយរង់ចាំថ្ងៃស្អែក នឹងធ្វើបន្តទៀត ហើយរហូតមកដល់ពេលនេះ មានតែមនុស្ស ម្នាក់ប៉ុណ្ណោះ បានបាត់ខ្លួន មិនដូចសេចក្តីរាយការណ៍ ខ្លះថា មានការបាត់ខ្លួន ជាច្រើននោះឡើយ។
យ៉ាងណាក៏ដោយ លោកអភិបាលខេត្តបាន សន្យាថា នឹងខិតខំស្វែង រកជនរងគ្រោះ បើទោះបីមានការហត់នឿយ បែបណានោះ៕
ទោះជាយ៉ាងណា លោក ស៊ី គិរី បានអះអាងថា ក្រោយកើតហេតុការណ៍នេះ មន្រ្តីអាជ្ញាធរខេត្តនឹងធ្វើការអប់រំ ព្រមទាំងកម្លាំងសមត្ថកិច្ចមិនឲ្យរុករកបន្តទៀតទេ ក្លាចជួបគ្រោះថ្នាក់បន្តទៀត៕
កំពង់ធំ ៖ អ្នកបើកគោយន្ដម្នាក់ បានរង របួសធ្ងន់ ដោយសារគ្រោះថ្នាក់ចរាចរជា មួយរថយន្ដហាយឡែនឌឺមួយគ្រឿង កាល ពីវេលាម៉ោង ១០ និង៥នាទីព្រឹក ថ្ងៃទី២១ ខែឧសភា ឆ្នាំ ២០១៣ នេះ ស្ថិតនៅលើផ្លូវ ជាតិលេខ ៦ ក្នុងភូមិក្រសាំងគ ឃុំសានគ ស្រុកកំពង់ស្វាយ ខេត្ដកំពង់ធំ ហើយបណ្ដាល ឱ្យទាំងគោយន្ដ និងរថយន្ដ ឡាយឡែនឌឺ ធ្លាក់ពីលើផ្លូវជាតិរងការខូច ខាតយ៉ាងធ្ងន់ធ្ងរ ។
មន្ដ្រីនគរបាល ចរាចរជើងគោកស្រុក កំពង់ស្វាយ លោក លឹម ឆាយហៀក បាន ប្រាប់ដើមអម្ពិល តាមទូរស័ព្ទថា មុនពេល កើតហេតុ អ្នកបើករថយន្ដឈ្មោះ វិត អាយុ ១៩ឆ្នាំ ជាមួយបុរសម្នាក់ទៀត បានធ្វើ ដំណើរ ទៅចូលរួមក្នុងពិធីមង្គលការមួយ នៅក្បែរកន្លែងកើតហេតុ ប៉ុន្ដែ បើកគោ យន្ដហួស ពេលនោះក៏បត់ក្បាលគោយន្ដ មកក្រោយ គាប់ជួបរថយន្ដឡាយឡែនឌឺ កំពុងបើកតាមផ្លូវ ក្នុងល្បឿនលឿនផង នោះ ក៏បុកចំពាក់កណ្ដាល បណ្ដាលឱ្យគោ យន្ដ និងរថយន្ដក្រឡាប់ធ្លាក់ពីលើផ្លូវតែ ម្ដង ។
លោក លឹម ឆាយហៀក បានបន្ដថា គ្រោះថ្នាក់ចរាចរនេះ បណ្ដាលឱ្យអ្នកបើក គោយន្ដ រងរបួសធ្ងន់ រីឯអ្នករួមដំណើរគេច ពីកន្លែងកើតហេតុបាត់ ។ ដោយឡែកម្ចាស់ រថយន្ដហាយឡែនឌឺ ដែលធ្វើដំណើរតែ ម្នាក់ឯង ក្នុងទិសដៅពីខេត្ដកំពង់ចាម ទៅ ក្រុងប៉ោយប៉ែត រងរបួសស្រាល ប៉ុន្ដែ មិន ស្គាល់ឈ្មោះនោះទេ ។
បច្ចុប្បន្នជនរងគ្រោះ ត្រូវបានបញ្ជូនទៅកាន់មន្ទីរពេទ្យ រីឯរថយន្ដ និងគោយន្ដ ត្រូវបានបញ្ជូនទៅ រក្សាទុកនៅអធិការដ្ឋាន នគរបាល ស្រុកកំពង់ស្វាយ ដើម្បីដោះស្រាយបន្ដទៀត ៕
ខេត្តបន្ទាយមានជ័យ៖ កាំកុងត្រូល ខេត្តបន្ទាយមានជ័យ ដុតកម្ទេចអាហារខូចគុណភាព និងទំនិញហួសប្រើ ប្រាស់ជាង ១តោន កាលពីវេលាម៉ោង៣ ល្ងាចថ្ងៃទី២១ ខែឧសភា ឆ្នាំ២០១៣ នៅចំណុចទីលានចាក់សម្រាម ភ្នំកងវ៉ាក្នុង ភូមិកងវ៉ា សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។
យុទ្ធនាការដុតកម្ទេចនេះ ដឹកនាំដោយ លោក សាន វិជ្ជាសារ៉ាវុធ អនុប្រធានសាខាកាំកុងត្រូល ខេត្តបន្ទាយមាន ជ័យ លោក ចាប សុផារឹទ្ធ នាយការិយាល័យ នគរបាលប្រឆាំងបទល្មើសសេដ្ឋកិច្ចខេត្ត លោក ហុក ចិត្ត្រា នគរបាលប្រឆាំងបទល្មើស សេដ្ឋកិច្ចក្រសួង ក្នុងនោះក៏មានការចូលរួមពីលោក លោកស្រីមកពីមន្ទីរស្ថាប័ន ពាក់ព័ន្ធជាច្រើនរូបផងដែរ ។
លោក សាន វិជ្ជា សារ៉ាវុធ បានឲ្យដឹងថា អាហារខូចគុណភាព និងទំនិញហួសកាលបរិច្ឆេទ ប្រើប្រាស់ជាច្រើន ប្រភេទ ដែលសមត្ថកិច្ចយើង រួមគ្នាដុតកម្ទេចចោលថ្ងៃនេះ មានចំនួន ៥៣ប្រភេទ មានទម្ងន់ស្មើ ១២២៦គីឡូ ក្រាម ដែលជាប្រភេទនំ មី ដំណាប់ ភេសជ្ជៈ និងអាហារប្រភេទកញ្ចប់ ប្រភេទដប ដែលអាហារទាំងនេះ គឺជា ទំនិញដែលសមត្ថកិច្ចយើង រកឃើញតាមទីផ្សារ ទូទាំងខេត្តបន្ទាយមានជ័យ ដែលអាជីវករតាំងលក់ ។
លោកបានបន្តថា ការដុតកម្ទេចចោល អាហារខូចគុណភាព និងទំនិញហួសកាលបរិច្ឆេទ ប្រើប្រាស់នេះ គឺ សមត្ថកិច្ចយើង ធ្វើឡើងក្នុងបំណង ពង្រឹងគុណភាពម្ហូបអាហារ នៅតាមទីផ្សារ ក្នុងខេត្តបន្ទាយមានជ័យ ឲ្យ កាន់តែមានសុវត្ថិភាព គុណភាព ប្រយោជន៍ គឺបញ្ជៀសជំងឺឆ្លងរាលដាល ដល់អ្នកប្រើប្រាស់ ឬប្រជាពលរដ្ឋ ដែលពួកគាត់ ទិញយកទៅបរិភោគ អោយពួកគាត់បានទទួលនូវសុខភាពល្អ និងមានជីវភាពធូរធារ ប្រកបទៅ ដោយសុភមង្គល ។
លោក សាន វិជ្ជាសារ៉ាវុធ បានបញ្ជាក់ថា យោងការចង្អុលបង្ហាញពី លោកទេសរដ្ឋមន្រ្តី ចម ប្រសិទ្ធ រដ្ឋមន្រ្តី ក្រសួងពាណិជ្ជកម្ម លោក ម៉ក់ ពេជ្ររិទ្ធ ប្រធាននាយកដ្ឋាន កាំកុងត្រូលនិង ការបញ្ជាផ្ទាល់ពីលោក អ៊ុត សុភាព ប្រធានសាខាកាំកុងត្រូល ខេត្តបន្ទាយមានជ័យ ឲ្យធ្វើយ៉ាងណាលុបបំបាត់ ការលបលួចលក់ទំនិញ និងអាហារ ខូចគុណភាពរបស់អាជីវករ ទុច្ចរិតដែលគិតតែពីប្រយោជន៍ខ្លួន នៅតាមផ្សារទូទាំងខេត្ត ទើបលោកចុះត្រួត ពិនិត្យតាមផ្សារ និងពន្យល់ពីផលប៉ះពាល់ ដល់ក្រុមអាជីវករ ហើយក៏រកឃើញទំនិញ ខូចគុណភាពទាំងនេះ រួច រឹបអូស យកមកដុតកម្ទេចចោល នាថ្ងៃនេះតែម្ដង ៕
កំពត ៖ ក្រោយពីការស៊ើបអង្កេត និង ស្រាវជ្រាវយ៉ាងយកចិត្ដទុកដាក់រួចមក កម្លាំងនគរបាលមូលដ្ឋាន ស្រុកអង្គរជ័យ និងកម្លាំងនគរបាលព្រហ្មទណ្ឌកម្រិតធ្ងន់ ខេត្ដកំពត បានឈានទៅដល់ការឃាត់ខ្លួន ជនសង្ស័យ ដែលជាប់ពាក់ព័ន្ធការសម្លាប់ ស្ដ្រីមេម៉ាយកូន ២ រស់នៅជាមួយម្ដាយ ចាស់ជរា កាលពីថ្ងៃទី១៦ ខែឧសភា ឆ្នាំ ២០១៣ វេលាម៉ោង ៤ និង៥០នាទីទៀប ភ្លឺ ហើយជនសង្ស័យរូបនេះត្រូវជាក្មួយ បង្កើតរបស់ជនរងគ្រោះតែម្ដង ។
ការចាប់ខ្លួនជនសង្ស័យ ខាងលើនេះ បានធ្វើឡើងកាលពីវេលាម៉ោង ២រសៀល ថ្ងៃទី២០ ខែឧសភា ឆ្នាំ ២០១៣ ស្ថិតនៅ ភូមិព្រៃផ្គាំ ឃុំភ្នំកុង ស្រុកអង្គរជ័យ ខេត្ដ កំពត ។
មន្ដ្រីនគរបាលព្រហ្មទណ្ឌកម្រិតធ្ងន់បាន ឱ្យដឹងថា ជនសង្ស័យរូបនេះឈ្មោះ យុង មិនា អាយុ ២០ឆ្នាំ រស់នៅភូមិឃុំកើត ហេតុខាងលើ និងត្រូវជាក្មួយបង្កើតរបស់ ស្ដ្រីរងគ្រោះ ។ នៅចំពោះមុខសមត្ថកិច្ច ជនសង្ស័យរូបនេះបានសារភាពថា មូល ហេតុដែលខ្លួនសម្លាប់ម្ដាយមីង ឈ្មោះ ពៅ អុក អាយុ ៣៨ឆ្នាំ ដោយសារតែម្ដាយ មីង តែងតែប្រមាថមើលងាយ ដល់ក្រុមគ្រួសារ របស់ខ្លួន ព្រោះតែជីវភាពក្រីក្រ ហើយ ក្រោយមក នៅពេលម្ដាយមីងបាត់លុយ ចំនួន ៥០ម៉ឺនរៀល ក៏ជេរប្រមាថរូប ខ្លួនធ្វើ ឱ្យទប់កំហឹងមិនបាន ឈានទៅដល់ការ កាប់សម្លាប់យ៉ាងដូច្នេះ ។
សូមបញ្ជាក់ថា ជនរងគ្រោះដែលស្លាប់ ឈ្មោះ ពៅ អុក ជាស្ដ្រីមេម៉ាយកូន ២ និង រស់នៅជាមួយម្ដាយចាស់ជរា ហើយត្រូវ បានក្មួយប្រុសកាប់សម្លាប់ ពេលកំពុងដើរ ទៅផ្សារ ។ បច្ចុប្បន្ន ជនសង្ស័យរូបនេះ ត្រូវបានកម្លាំងនគរបាលព្រហ្មទណ្ឌកម្រិត ធ្ងន់ កសាងសំណុំរឿងបញ្ជូនទៅតុលាការ ចាត់ការតាមផ្លូវច្បាប់ ៕
Page 5 of 68
