Dap News...Admin

ឥណ្ឌូនេស៊ី៖ លោក Syahrul Yasin Limpo អភិបាល ខេត្តស៊ូឡាវេស៊ី ខាងត្បូង នៃសាធារណរដ្ឋឥណ្ឌូនេស៊ី បានបំពាក់មួក ដំបងដាវ និងជូនវត្ថុ អនុស្សាវរីយ៍ ដល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃ ព្រះរាជាណាចក្រកម្ពុជា ជាសក្ខីភាពនៃការ ផ្តល់នូវឋានៈ ជាពលរដ្ឋ កិត្តិយសរបស់ ខេត្តស៊ូឡាវេស៊ីខាងត្បូង នៅក្នុងពិធីលាង សាយភោជន៍ នារាត្រីថ្ងៃទី១៩ ខែឧសភា ឆ្នាំ២០១៣ នៅទីក្រុងម៉ាកាសា ។

យោងតាមការចុះផ្សាយ របស់គេហទំព័រ AKP បានឲ្យដឹងថា សម្តេចនាយករដ្ឋមន្រ្តី ហ៊ុន សែន បានក្លាយ ជាពលរដ្ឋកិត្តិយស របស់ខេត្ត ស៊ូឡាវេស៊ី ខាងត្បូង នៃសាធារណរដ្ឋ ឥណ្ឌូណេស៊ី ជាមួយនឹងគុណ បំណាច់ និងសេចក្តីគោរព ស្រឡាញ់របស់ថ្នាក់ដឹកនាំ និងប្រជាពលរដ្ឋ ខេត្តស៊ូឡាវេស៊ី ចំពោះការដឹកនាំប្រកបដោយ បញ្ញាញាណរបស់ សម្តេចនាយករដ្ឋមន្រ្តី ក្នុងការដឹកនាំប្រទេសកម្ពុជា ឆ្លងផុតពីដំណាក់កាល សង្រ្គាម មកកាន់ សុខសន្តិភាព និងការអភិវឌ្ឍប្រទេសមានការរីកចម្រើន គួរឲ្យគោរពនិងកោតសរសើរបំផុត។

ជាមួយគ្នានេះ យោងតាមការចុះផ្សាយ របស់គេហទំព័រទូរទស្សន៍ជាតិកម្ពុជា បានឲ្យដឹងថា នៅក្នុងសុន្ទរកថា ដ៏មានសារៈសំខាន់នោះដែរ បណ្តាមេដឹកនាំ ទាំងអស់ បានចាត់ទុកថា កាបឌី បានឈានមុខគេ ដោយនាំមកនូវជម្រើស ដំណោះ ស្រាយ ដើម្បីសន្តិភាព និងការបង្រួប បង្រួមជាតិ សម្រាប់ ប្រជាធិបតេយ្យ និងសិទ្ធមនុស្ស ហើយបញ្ចប់ សង្រ្គាមសម័យ ទំនើបនៃសតវត្សទី២១ តាមរយៈការផ្តល់ នូវកិច្ចពិភាក្សា ដ៏មានខ្លឹមសារ រវាងថ្នាក់ដឹកនាំ និងរដ្ឋបុរស នៅជុំវិញពិភពលោក ។

ជាមួយនិងសុន្ទរកថា នៅក្នុងមហាសន្និបាត លើកទី៤ របស់កាបឌី នោះដែរ បណ្តាមេដឹកនាំកាបឌី ក៏ដូចជា មេដឹកនាំគណបក្ស នយោបាយ នៃអ្នកប្រជាធិបតេយ្យ និយម កណ្តាល អាស៊ីប៉ាស៊ីហ្វីក អន្តរជាតិ បានសំដែង នូវការវាយតំលៃខ្ពស់ និងកោតសរសើរ ចំពោះតួនាទីស្នូល នៃការដឹកនាំ ប្រកបដោយកិត្តិបណ្ឌិត របស់ សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ដែលបានដឹកនាំ ប្រទេសជាតិ ឆ្លងកាត់ពីភ្នក់ភ្លើង នៃសង្រ្គាម ឈានឆ្ពោះមក កាន់ប្រជាជាតិមួយ មានសុខសន្តិភាព យ៉ាងពេញលេញ ពិសេសការប្រកាន់យក នូវដំណោះស្រាយផ្សះ ផ្សា បង្រួបបង្រួមជាតិ និងដឹកនាំស្តារអភិវឌ្ឍន៍ ប្រទេសកម្ពុជា មានការរីកចំរើន យ៉ាងឆាប់រហ័ស ពីមួយថ្ងៃ ទៅមួយថ្ងៃ។

ជាមួយគ្នានេះសម្តេចនាយករដ្ឋមន្រ្តី ហ៊ុន សែន បានអំពាវនាវឲ្យកាប់ឌី បញ្ជូនអ្នកសង្កេតការណ៍របស់ខ្លួន មកកាន់ប្រទេសកម្ពុជា ដើម្បីមកតាមដាន ការបោះឆ្នោតជ្រើសរើសតំណាងរាស្រ្ត នាថ្ងៃទី២៧ ខែកក្កដា ឆ្នាំ២០១៣ខាងមុខនេះ។

 សូមបញ្ជាក់ថា មហាសន្និបាតលើកទី៤ នៃអង្គការ អ្នកប្រជាធិបតេយ្យ និយមកណ្តាល អាស៊ីប៉ាស៊ីហ្វីកអន្តរជាតិ (CAPDI) ក្រោមប្រធានបទ រដ្ឋាភិបាល គណបក្សនយោបាយ និងសង្គមស៊ីវិល រួមគ្នាជំរុញ ឲ្យមានសន្តិភាព ការផ្សះផ្សា និងរួមគ្នាប្រយុទ្ធប្រឆាំង នឹងការប្រែប្រួលអាកាសធាតុ នៅអាស៊ី បានប្រារព្វ ពិធីបើកជាផ្លូវការ នៅសណ្ឋាគារ Sahid Jaya Makassar ទីក្រុងម៉ាកាសា ខេត្តស៊ូឡាវេស៊ី ខាងត្បូង នៃសាធារណរដ្ឋ ឥណ្ឌូណេស៊ី នៅព្រឹកថ្ងៃទី២០ ឧសភា៕

ភ្នំពេញ៖ ទេសរដ្ឋមន្ត្រី និង ជាប្រធានអង្គភាព ប្រឆាំងអំពើពុករលួយ លោក ឱម យិនទៀង នៅរសៀល ថ្ងៃចន្ទ ទី២០ ខែឧសភា ឆ្នាំ២០១៣ នេះ បានចេញលិខិត ព្រមានមួយ ទៅកាន់ អ្នកអង្គម្ចាស់ធម្មិកោ  លេខាផ្ទាល់ របស់សម្តេច ព្រះមហាក្សត្រី នរោត្តម មុនីនាថ សីហនុ រឿងបញ្ហាអ្នកអង្គម្ចាស់ មិនចូលប្រកាសទ្រព្យសម្បត្តិ ស្របតាមសេចក្តីប្រកាសព័ត៌មាន របស់អង្គភាព ប្រឆាំងអំពើពុករលួយ ដែលបានកំណត់ ។

យោងតាមប្រសាសន៍លោក ឱម យិនទៀង បានប្រាប់មជ្ឈមណ្ឌលព័ត៌ដើមអម្ពិលនៅល្ងាចថ្ងៃនេះថា បើអ្នកអង្គ ម្ចាស់ មិនចូលប្រកាសទ្រព្យសម្បត្តិ នៅអង្គភាពប្រឆាំងអំពើពុករលួយទេ អង្គភាពប្រឆាំងអំពើពុករលួយ នឹងកសាង សំណុំរឿង បញ្ជូនទៅកាន់តុលាការ ។

យោងតាមមាត្រា៣៩ ប្រឆាំងអំពើពុករលួយ បើជនណាមិនចូល ប្រកាសទ្រព្យសម្បត្តិតាមការកំណត់ទេ នឹងត្រូវជាប់ពន្ធនាគារពី មួយខែទៅមួយឆ្នាំ ៕

កំពង់ឆ្នាំង ៖ អំណោយជា គ្រឿងឧបភោគ បរិភោគ ឧបត្ថម្ភដោយ លោក ឯក ស៊ុនរស្មី ព្រះរាជអាជ្ញារង អមសាលាដំបូង ខេត្តកំពង់ឆ្នាំង លោកស្រី គឹម លុយ អនុប្រធានសាលាដំបូង ខេត្តកំពង់ឆ្នាំង លោក ហេង ចន្ទស៊ីបូរិន ចៅក្រមសាលាដំបូង លោក ទី សំណាង ចៅក្រមសាលាដំបូង លោក សុក ហេង  ចៅក្រមសាលាដំបូង លោក ហេង សាម៉ន ក្រឡាបញ្ជី នៃសាលាដំបូង ខេត្តកំពង់ឆ្នាំង តាមរយៈភ្នាក់ងារ មជ្ឈមណ្ឌល ព័ត៌មាន ដើមអម្ពិល ប្រចាំ ខេត្តកំពង់ឆ្នាំង នៅវេលាម៉ោង៤និង៣០នាទី ថ្ងៃទី២០ ខែឧសភា ឆ្នាំ២០១៣ បានជូនដល់ដៃ ស្ត្រី ឈ្មោះ ពៅ រស់នៅតាមចិញ្ចើមថ្នល់ ក្រោមដើមទៀប ក្លោងទ្វារ ចូលវត្តធម្មយុត្តិ ស្ថិតក្នុងភូមិឡទឹកត្រី សង្កាត់កំពង់ឆ្នាំង  ក្រុងកំពង់ឆ្នាំង ។

 អំណោយមាន សារុង១ ភួយ១ តង់ខៀវ១ កន្ទេល១ ខ្នើយ១ សារុង១ មីយើង២កេស ទឹកត្រី១យួរ  ទឹកស៊ីអ៊ីវ១ យួរ អំបិល១គ.ក្រ  ស្ករស១គ.ក្រ សាប៊ូ១កញ្ចប់ អង្ករ៥គ.ក្រ ប៊ីចេង១កញ្ចប់ ទឹកសុទ្ធ១០យួរ និងថវិកា១ ចំនួន។

អំណោយ ទាំងនេះបើទោះមាន ចំនួនតិចតួច ប៉ុន្តែអាចជួយ សំរាលជីវភាព រស់នៅប្រចាំថ្ងៃបាន មួយរយៈពេល ហើយអំណោយ ទាំងនេះ មិនមែនជាការ លើកទឹកចិត្ត អោយបង្កើត ភាពអាណាធិបតេយ្យ បង្កអោយមានការលំបាក ដល់អាជ្ញាធរឡើយ ជាអំណោយ ក្នុងនាមមនុស្សធម៌ ដោយក្តីអាណិតអាសូរ ដោយសារស្រ្តីខាងលើ រស់នៅយ៉ាងកំសត់ ក្រោមដើម ទៀប គ្មានដំបូលជ្រក នៅពេលភ្លៀងធ្លាក់ នៅពេលយប់ម្តងៗ គេតែងតែសង្កេតឃើញ ស្រ្តីខាងលើអង្គុយ សំកុករងារញ័រ ញាក់ក្រោម ដំណក់ភ្លៀងគួរអោយ អាណិតពន់ពេក ៕

ភ្នំពេញ ៖ រដ្ឋមន្ដ្រីក្រសួង ព័ត៌មាន លោក ខៀវ កាញារីទ្ធ ដោយមានក្ដីអាណិតអាសូរ យ៉ាងពន់ពេក បានឧបត្ថម្ភថវិកាចំនួន៤០០ ដុល្លារនិងអង្ករ មួយបាវ៥០គីឡូក្រាម ព្រម ទាំងចេញថ្លៃជួលផ្ទះរបស់ស្ដ្រីម្នាក់ ដែលកូន ចំនួន៤នាក់ ហើយធ្លាក់ខ្លួនពិការ ព្រោះតែ ប្ដី កំណាចធាក់ទម្លាក់ពីលើរថយន្ដ ក្រោយពីប្ដី រូបនេះមានស្រីស្នេហ៍ ហើយប្រពន្ធតាមទាន់។

ស្ដ្រី វង់ ធាវី អាយុ៤៦ឆ្នាំ រស់នៅភូមិឡ កំបោក សង្កាត់ស្វាយប៉ា ខណ្ឌឫស្សីកែវ រួម ជាមួយកូនៗបានធ្វើដំណើរមកកាន់ក្រសួង ព័ត៌មាន ដើម្បីរង់ចាំលោកខៀវ កាញារីទ្ធ ក្នុងគោលបំណងសុំការឧបត្ថម្ភនូវថវិកា និង អំណោយមួយចំនួន ដើម្បីផ្គត់ផ្គង់ជីវភាពដ៏ ក្រីក្ររបស់ខ្លួន ក្នុងការចិញ្ចឹមកូនៗ ។

លោកខៀវ កាញារីទ្ធ នៅពេលធ្វើដំណើរ ចេញពីការិយាល័យធ្វើការ នៅល្ងាចថ្ងៃទី ២០ ខែឧសភា ឆ្នាំ២០១៣នេះ ក៏បានឧបត្ថម្ភថវិកាផ្ទាល់ខ្លួន ចំនួន ៤០០ដុល្លារ អង្ករ មួយបាវ៥០គីឡូក្រាម ព្រមទាំងឧបត្ថម្ភថ្លៃជួលផ្ទះទៀតផង ។

គួររំលឹកថា កាលពីប៉ុន្មានឆ្នាំមុន ស្ដ្រីវង់ ធារី ដែលមានកូន៣នាក់ និងមានកូនក្នុងផ្ទៃ ម្នាក់ទៀតនោះ បានជួបប្រទះប្ដីរបស់ខ្លួន កំពុងបើករថយន្ដដឹកស្រីស្នេហ៍ ពេលនោះក៏ កើតមានជម្លោះជាមួយគ្នា រហូតដល់បុរសជា ប្ដី បានឱ្យស្រីស្នេហ៍ធ្វើដំណើរទៅមុន ហើយឱ្យប្រពន្ធរបស់ខ្លួនចូលក្នុងរថយន្ដ ។ ពេលបើករថយន្ដនៅតាមផ្លូវ ស្រាប់តែបុរស ជាប្ដីកំណាចរូបនេះ បើកទ្វារធាក់ប្រពន្ធទម្លាក់ពីលើរថយន្ដ រួចហើយថយរថយន្ដកិន ប៉ងសម្លាប់ចោល ប៉ុន្ដែបណ្ដាលឱ្យពិការអស់មួយជីវិតតែម្ដង ទៅ ។

-ប្រធានផ្សារទួលទំពូង នឹងកោះហៅ អ្នកលក់គ្រឿងក្លែម ធ្វើកិច្ចសន្យា សាជាថ្មី

ភ្នំពេញៈ អាជីវករ ជាច្រើននាក់ ដែលរកស៊ីលក់ដូរ វត្ថុអនុស្សាវរីយ៍ នៅផ្សារទួលទំពូង បានរិះគន់ចំៗ ទៅលើថ្នាក់ដឹកនាំ ផ្សារទួលទំពូងថា បានអនុញ្ញាត ឲ្យអ្នកលក់ដូរ គ្រឿងក្លែម ពេលយប់ ដើម្បីបានកម្រៃបន្ថែម ដោយពុំគិតដល់ ផលប៉ះពាល់ អាជីវករលក់ដូរ វត្ថុអនុសាវរីយ៍ ពេលថ្ងៃ ដោយអ្នក់លក់ដូរគ្រឿង ក្លែមនៅទីនោះ មិនបានសំអាត អនាម័យឲ្យបាន ល្អនោះទេ។

អាជីវករម្នាក់ ដែលរកស៊ីលក់ដូរ វត្ថុអនុសាវរីយ៍ នៅផ្សារខាងលើ សុំមិន បញ្ចេញឈ្មោះ បានឲ្យអ្នកយកព័ត៌មានដឹងថា នៅកន្លែងលក់គ្រឿងក្លែមទីនោះ គេដាក់លក់បង្គារមឹក និងងាវ ដែលចោល សម្បកមិនមានកាទុកដាក់ ត្រឹមត្រូវដែលបណ្តាលឲ្យ មានក្លិន ស្អុយ ឆ្អេះឆ្អាប ដែលជាហេតុធ្វើឲ្យ ប៉ះពាល់ដល់អ្នកលក់ នៅទីនោះពេលថ្ងៃ។ អាជីវករម្នាក់ទៀត ដែលសុំមិនបញ្ចេញឈ្មោះ ដែរនោះ បានលើកឡើងថា កន្លែងលក់ដូរគ្រឿង ក្លែមនៅទីនោះ មិនត្រឹមតែលក់ដូរគ្មាន អានាម័យនោះទេ ថែមទាំងបង្ក ឲ្យអ្នកចូលទៅ ផឹកស៊ីទីនោះ អាងតែពេលយប់ ក៏នោមដាក់នៅលើ ជញ្ជាំងតូបលក់ដូរ វត្ថុអនុស្សាវរីយ៍ ដែលមានក្លិនមិនល្អ។

អាជីវករដដែល បានលើកឡើងបន្តទៀតថា បើសិនថ្នាក់ដឹកនាំ ផ្សារទួលទំពូង បច្ចុប្បន្ន មិនលើកទិសដៅ ក្រុមអ្នកលក់គ្រឿងក្លែម នៅទីនោះផ្អាកទេ ពួកគាត់នឹងនាំគ្នាប្រមាណជិត ៣០តូបឡើង ទៅតវ៉ាដល់សាលា រាជធានីភ្នំពេញ ដើម្បីឲ្យលោកអភិបាលក្រុង ដែលទើបឡើងថ្មី មានវិធានការចាត់ ចែងតាមកាគួរ។

ទាក់ទងនឹងការរិះគន់ របស់ក្រុមអាជីវករខាងលើនេះ ប្រធានផ្សារទួលទំពូង លោកថោង ថង បានទទួលស្គាល់ ថាមានចំណុចខ្វះខាតដែលធ្វើឲ្យប៉ះពាល់ នឹងរំខានដល់បងប្អូនអាជីវករទាំងនេះ ព្រោះតែអាជីវករ ដែលរកស៊ី លក់គ្រឿងក្លែម ម៉ឹក បង្គារ ទាំងនេះពេលខ្លះលាងមិនស្អាត និងជួនកាលជះទឹកហូរកខ្លិក កខ្លាក ។

យ៉ាងណាក៏ដោយប្រធានផ្សារទួលទំពូងរូបនេះបានសន្យាថា នឹងធ្វើការកែសម្រួលឡើងវិញ នៅចំណុច ខ្វះខាត់ទាំងនេះ ហើយលោកនឹងហៅអ្នកលក់ដូរគ្រឿងក្លែមខាងលើ មកធ្វើកិច្ចសន្យាសារជាថ្មី ចំពោះបញ្ហានេះ។

ជាមួយគ្នានេះ ប្រធានផ្សារទួលទំពូង លោកថោង ថង បានអះអាងថា លោកនឹងខិតខំ ធ្វើយ៉ាងណាមិនឲ្យ មានការប៉ះពាល់ ឬការថ្នាំងថ្នាក់ ដល់បងប្អូនអាជីវកដែលរកស៊ីនិងលក់ដូរនៅក្នុងផ្សារទួលទំពូងនោះឡើយ ៕

ម្ចាស់ផ្ទះដែល ទទួលក្លិនស្អុយ ឆ្អេះឆ្អាប មកពីការលក់គ្រឿងក្លែម

កំពត៖ លោក ឆាយ វណ្ណា អនុរដ្ឋលេខាធិការ និងជា នាយកខុទ្ទ កាល័យ តំណាង របស់ លោកបណ្ឌិត អ៊ិត សំហេង រដ្ឋមន្រ្តីក្រសួង សង្គមកិច្ច អតីតយុទ្ធជន និងយុវនីតិសម្បទា កាលពីព្រឹកថ្ងៃទី ១៨ ខែ ឧសភា ឆ្នាំ ២០១៣ បានដឹកនាំ ក្រុមការងារ ចុះចែកអំណោយ ដល់ជនពិការភ្នែក នៅភូមិព្រែកក្រឹស ឃុំព្រែកក្រឹស ស្រុកកំពង់ត្រាច ខេត្តកំពត។

ការឧបត្ថម្ភ អំណោយខាងលើនេះ បានធ្វើឡើង តាមរយៈការចុះផ្សាយ របស់សារព័ត៌មាន ក្នុងស្រុក ចុះថ្ងៃទី០២ ខែឧសភា ឆ្នាំ២០១៣ អំពីគ្រួសារ បុរសពិការភ្នែក ទាំងសងខាងឈ្មោះ ចេង ញន អ្នកច្រៀងចាប៉ី រស់នៅ នៅភូមិព្រែកក្រឹស ឃុំព្រែកក្រឹស ស្រុកកំពង់ត្រាច ខេត្តកំពត ដែលបច្ចុប្បន្ន ជនពិការ រូបនេះ កំពុងជួបលំបាក បញ្ហាខ្វះខាតជីវភាព បានអំពាវនាវ ស្នើសុំសប្បុរសជន ជួយឧបត្ថម្ភ ចាប៉ី ដើម្បីប្រកបរបរ ច្រៀងចាប៉ី ក្នុងពិធីផ្សេងៗ រកចំណូលចិញ្ចឹមគ្រួសារ ។

ដោយមានទឹកចិត្តអាណិត អាសូរដល់ គ្រួសារជនពិការ លោកបណ្ឌិត អ៊ិត សំហេង បានចាត់តាំង ក្រុមការងារ នាំយកអំណោយ ឧបត្ថម្ភជូនគ្រួសារ ខាងលើ ដែលរួមមាន ចាប៉ីដងវែង ១ដើម, អង្ករ ១ បាវ, មី ១កេស, កន្ទេល ១, ទឹកត្រី ១យួរ, ត្រីខ ១យួរ និងថវិកាចំនួន ១០០.០០០ រៀល។ ពិធីប្រគល់ អំណោយនេះ មានការចូលរួមពីតំណាង អាជ្ញាធរមូលដ្ឋាន ភូមិ ឃុំ ស្រុក និង ប្រជាពលរដ្ឋ រស់នៅ ក្នុងភូមិព្រែកក្រឹស ផងដែរ។

ក្នុងនាមអាជ្ញាធរ មូលដ្ឋាន លោកមេឃុំព្រែកក្រឹស ក៏បានថ្លែង អំណរគុណដល់ លោកបណ្ឌិត អ៊ិត សំហេង និងលោកស្រី ដែលបានយកចិត្តទុកដាក់ គិតគូរដល់ជីវភាព និងសុខទុក្ខ ប្រជាពលរដ្ឋគ្រួសារជនពិការ រស់នៅភូមិព្រែកក្រឹស ឃុំព្រែកក្រឹស ស្រុកកំពង់ត្រាច ខេត្តកំពត ។

ទន្ទឹមនោះ លោក ចេង ញន ព្រមទាំង ក្រុមគ្រួសារ ក៏បានសម្តែងទឹកចិត្ត សប្បាយរីករាយដែលរូបគាត់បាន ទទួលអំណោយពីលោក បណ្ឌិត អ៊ិត សំហេង និង ក៏បានថ្លែងអំណរគុណ ចំពោះលោក បណ្ឌិត រដ្ឋមន្រ្តី ជាពិសេស គណបក្ស ប្រជាជនកម្ពុជា សូមឲ្យទទួលបានជ័យជំនះ បន្ថែម ទៀតសម្រាប់ការបោះឆ្នោតខាងមុខនេះ។

លោក ឆាយ វណ្ណា មានមតិផ្តាំផ្ញើដល់ ក្រុមគ្រួសារលោក ចេង ញន កុំឲ្យមានការ អស់សង្ឃឹម ត្រូវតស៊ូជំនះ រាល់ឧបសគ្គ និងការលំបាកទាំងឡាយ ក្នុងការរកទទួលទាន ចិញ្ចឹមជីវិត។

លោកក៏បានបន្ថែមទៀតថា ការនាំយកអំណោយ ឧបត្ថម្ភនាពេលនេះ គឺជាការយកចិត្ត ទុកដាក់ របស់ថ្នាក់ដឹកនាំ ក្រសួងចំពោះប្រជាជនក្រីក្រ ងាយរងគ្រោះ  ជាពិសេស សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ដែលតែង តែគិតគូរអំពីសុខទុក្ខ របស់ប្រជាពលរដ្ឋទូទៅ ជាពិសេស ប្រជាជនក្រីក្រ រងគ្រោះជួបការ លំបាក៕

កំពង់ចាមៈ ក្រុមគ្រួពេទ្យស្ម័គ្រចិត្តសម្តេចតេជោ ហ៊ុន សែន នាយករដ្ឋមន្រ្តីកម្ពុជា ដឹកនាំដោយលោក ហ៊ុន ម៉ាណែត អនុប្រធានក្រុមការងារថ្នាក់កណ្តាល ចុះជួយខេត្តកំពង់ចាម ទទួលបន្ទុកលើការងារយុវជន បានចុះសាកសួរសុខទុក្ខ បងប្អូនប្រជាពលរដ្ឋ ជាអ្នកជំងឺ និងពិនិត្យព្យាបាលជំងឺ ដោយឥតគិតថ្លៃ ជូនដល់ប្រជាពលរដ្ឋស្រុកត្បូង ឃ្មុំ ខេត្តកំពង់ចាម ជិតមួយម៉ឺននាក់។

ការចុះព្យាបាល និងសួរសុខទុក្ខ ដល់ប្រជាពលរដ្ឋពីសំណាក់ក្រុមគ្រួពេទ្យស្ម័គ្រចិត្តសម្តេចតេជោ តែងតែធ្វើឡើង ជាប្រចាំសប្តាហ៍ ដើម្បីជួយកាត់បន្ថយការចំណាយរបស់ប្រជាពលរដ្ឋ ជាពិសេសផ្នែកខាងសុខភាពនេះតែម្តង។

លោកវេជ្ជបណ្ឌិត ស៊ូ ស៊ីផាណ្ណា ប្រធានក្រុមគ្រូពេទ្យស្ម័គ្រចិត្តយុវជនសម្តេចតេជោ បានប្រាប់ឲ្យដឹងថា ក្នុងថ្ងៃនេះលោកបានដឹកនាំសមាជិកក្រុមគ្រូពេទ្យ ស្ម័គ្រចិត្តចំនួន ៣២៦នាក់ រួមសហការជាមួយគ្រូពេទ្យមូលដ្ឋាន ដោយបែងចែកជា៥ទីតាំង គឺក្នុងឃុំគរ ឃុំស្រឡប់ ឃុំរកាពប្រាំ ឃុំបឹងព្រួល និងឃុំជីរោទិ៍ទី២ នៃស្រុកត្បូងឃ្មុំ ខេត្តកំពង់ចាម ដោយបានពិនិត្យ និងព្យាបាលជំងឺជូនដល់ប្រជាពលរដ្ឋសរុបចំនួន ៩៦០០នាក់ ដែលក្នុងនោះបានព្យាបាលជំងឺមាត់ធ្មេញ និងដកធ្មេញបាន ៥៤២នាក់ វះកាត់នៅកន្លែងចំនួន ៤ករណី។

លោកវេជ្ជបណ្ឌិត បានបន្តទៀតថា ដោយសង្កេតឃើញជំងឺរបស់ប្រជាពលរដ្ឋ ចំនួន២៦នាក់ មានអាការៈធ្ងន់ ក៏បានបញ្ជូនមកវះកាត់បន្តនៅរាជធានីភ្នំពេញ។ រាល់ការចំណាយទាំងអស់ ត្រូវបានជួយឧបត្ថមពីសំណាក់លោក ហ៊ុន ម៉ាណែត និងភរិយា។

សូមបញ្ជាក់ថា កន្លងមកក្រុមគ្រូពេទ្យស្ម័គ្រចិត្តយុវជនសម្តេចតេជោ ខេត្តកំពង់ចាម បានធ្វើសកម្មភាពមនុស្សធម៌នេះ ស្ទើរតែគ្រប់ស្រុកទាំងអស់ក្នុងខេត្ត ដែលក្នុងមួយលើកៗ បានពិនិត្យ និងព្យាបាលជំងឺ ចន្លោះពី ១.៥០០នាក់ដល់ ៣.០០០នាក់ ហើយលើកនេះ ជាសកម្មភាពពិសេសមួយថ្មីទៀត ដែលមិនធ្លាប់មានរបស់ក្រុមគ្រូពេទ្យស្ម័គ្រចិត្តយុវជនសម្តេចតេជោ ដោយក្នុងថ្ងៃនេះ បានពិនិត្យ និងព្យាបាលជំងឺរហូតដល់ ៩.៦០០នាក់៕

-អភិបាល ខណ្ឌមានជ័យ ឧបត្ថម្ភជនរងគ្រោះម្នាក់ៗ ចំនួន២០ម៉ឺនរៀល

ភ្នំពេញ ៖ រោងហូបបាយ និងជាកន្លែង សម្រាកលំហែកាយ របស់កម្មករ កម្មការិនី នៅក្នុងរោងចក្រ ថបវើល ដែលមានទីតាំង ស្ថិតនៅតាមបណ្ដោយ ផ្លូវជាតិលេខ១ ក្នុង ភូមិជ្រោយអំពិល សង្កាត់ក្បាលកោះ ខណ្ឌ មានជ័យ ត្រូវបានគេរាយការណ៍ថា បាក់ធ្លាក់ ចូលបឹងកំបោ្លក បណ្ដាលឱ្យកម្មករកម្មការិនី ចំនួន២៣ នាក់ រងរបួសធ្ងន់ស្រាល ពេលកំពុង អង្គុយហូបបាយជុំគ្នានៅទីនោះ នារសៀល ថ្ងៃទី២០ ខែឧសភា ឆ្នាំ២០១៣។

អ្នកយកព័ត៌មានដើមអម្ពិល ប្រចាំខណ្ឌ មានជ័យ លោកប៉ិច នរៈ ដែលស្ថិតនៅកន្លែង កើតហេតុ បានរាយការណ៍ថា ខណៈដែល កម្មករកម្មការិនីរបស់រោងចក្រ ក្រោយពី សម្រាកការងារពេលថ្ងៃ រួចមក ក៏បាននាំគ្នា ទៅអង្គុយហូបបាយ នៅក្នុងរោងខាងលើ ដែលសាងសង់នៅជាប់បឹងកំបោ្លក ហើយ ពេលកំពុងហូបបាយនោះ ស្រាប់តែបាក់ធ្លាក់ ចូលក្នុងបឹងកំបោ្លកបណ្ដាលឱ្យជនរងគ្រោះ ទាំងនេះ រងរបួសធ្ងន់ស្រាល២៣នាក់។

ប្រភពព័ត៌មានពីកន្លែងកើតហេតុបានបន្ដ ថា ក្រោយពីទទួលបានព័ត៌មាននេះភ្លាម ស្នងការនគរបាលរាជធានីភ្នំពេញ លោកឧត្ដម សេនីយ៍ ជួន សុវណ្ណ អមដោយអភិបាល ខណ្ឌមានជ័យ លោកគួច ចំរើន អធិការនគរ បាលខណ្ឌលោកហ៊ី ណារិន និងសមត្ថកិច្ច អាជ្ញាធរជាច្រើននាក់ បានទៅជួយអន្ដរាគមន៍ ភ្លាមៗ ។

ប្រភពព័ត៌មានបានបន្ដថា ពេលទៅដល់ កន្លែងកើតហេតុនោះ សមត្ថកិច្ចនិងអាជ្ញាធរ បានយកគ្រឿងចក្រទៅកាយ និងស្ទូចដំបូល រោង ដែលបាក់ចូលក្នុងទឹកបឹង ក្នុងគោល បំណងស្វែងរកជនរងគ្រោះ ដោយសង្ស័យ ថា អាចមាននៅក្នុងទឹកបឹងកំបោ្លកនោះ ប៉ុន្ដែ ក្រោយពីកកាយរួចហើយ ពុំបានប្រទះឃើញ ជនរងគ្រោះណាម្នាក់នោះឡើយ ។

ជនរងគ្រោះទាំង២៣នាក់ ត្រូវបានសមត្ថ កិច្ចនិងអាជ្ញាធរជួយដឹកបញ្ជូនភ្លាមៗ ទៅ កាន់មន្ទីរពេទ្យ ។ ជាមួយគ្នានេះ លោកអភិបាលខណ្ឌមានជ័យ គួច ចំរើន បានឧបត្ថម្ភជនរងគ្រោះក្នុងម្នាក់ៗចំនួន២០ម៉ឺនរៀល៕

បាត់ដំបងៈ តាមការចាត់តាំងរបស់លោក ជីវ កេង ប្រធានអង្គភាពអធិការកិច្ច នៅព្រឹកថ្ងៃទី២០ ខែឧសភា ឆ្នាំ២០១៣ ក្រុមការងារ របស់អង្គភាព អធិការកិច្ច ដឹកនាំដោយលោក សេង ប៊ុនឃាង អនុប្រធាន អង្គភាព អធិការកិច្ច បានចុះធ្វើអធិការកិច្ច នៅអយ្យការ និងសាលាដំបូង ខេត្តបាត់ដំបង ។

ក្រុមការងារអធិការកិច្ច បានជម្រាបជូន ដល់ចៅក្រមតុលាការ និងចៅក្រមអយ្យការទាំងអស់ អំពីគោលដៅចម្បង នៃការធ្វើអធិការកិច្ចនេះ គឺដើម្បី ស្វែងយល់ អំពីការលំបាក, ភាពងាយស្រួល, ការអនុវត្ត ក្រមសីលធម៌វិជ្ជាជីវៈ និងចំណាត់ការផ្សេងៗ របស់ចៅក្រមតុលាការ និងចៅក្រមអយ្យការ នីមួយៗ។

សូមរំលឹកថា កន្លងមកអង្គភាព អធិការកិច្ចបានចុះធ្វើ អធិការកិច្ច នៅតាមតុលាការជាច្រើន បានពិនិត្យឃើញ នូវគុណសម្បត្តិ ជាច្រើនរបស់ ចៅក្រមតុលាការ និងចៅក្រមអយ្យការ នៅក្នុងការដោះស្រាយ លើសំណុំរឿងក្តី ហើយអង្គភាព អធិការកិច្ច បានជំរុញឲ្យបន្តអនុវត្ត នូវគុណសម្បត្តិ ទាំងនេះ បន្ថែមទៀត។ ទន្ទឹមនឹងនេះដែរ អង្គភាពអធិការកិច្ច ក៏បានពិនិត្យ ឃើញនូវចំណុចខ្វះខាត មួយចំនួន ហើយបានធ្វើការរំលឹក កែលំអ និងជំរុញ ឲ្យបំពេញការងារឲ្យបានត្រឹមត្រូវ តាមនីតិវិធីច្បាប់ ព្រមទាំងបានជំរុញ ឲ្យចាត់ការលើរឿងក្តី ដោយឆាប់រហ័ស ដោយតម្លាភាព និងដោយយុត្តិធម៌ ក្នុងគោលបំណង ធ្វើយ៉ាងណាដើម្បី ឲ្យសាធារណជន មានទំនុកចិត្ត លើចំណាត់ការ របស់ស្ថាប័នតុលាការ។

លោក សេង ប៊ុនឃាង បានលើកឡើងថា ចៅក្រមតុលាការ និងចៅក្រមអយ្យការ គឺជាកម្លាំងចលករ ដ៏សំខាន់ក្នុងការចូលរួម អនុវត្តផែនការ យុទ្ធសាស្ត្រ កំណែទម្រង់រដ្ឋ និងធ្វើឲ្យវិស័យយុត្តិធម៌ មានការរីកចម្រើនផងដែរ។ ជាមួយគ្នានេះដែរ អង្គភាពអធិការកិច្ច គឺជាសេនាធិការផ្ទាល់ របស់ក្រុមប្រឹក្សាវិន័យ នៃឧត្តមក្រុមប្រឹក្សានៃអង្គចៅក្រម ដែលត្រូវខិតខំសម្រេច ឲ្យបាននូវយុទ្ធសាស្ត្រ កំណែទម្រង់រដ្ឋ ទាក់ទងនឹងប្រព័ន្ធ យុត្តិធម៌នេះ។

ថ្លែងបើកការងារអធិការកិច្ចនេះដែរ លោក សេង ប៊ុនឃាង បានដាស់តឿន រំលឹក កែលំអ ចំពោះចៅក្រម តុលាការ និងចៅក្រមអយ្យការគ្រប់រូប ឲ្យគោរពក្រមសីលធម៌ ឲ្យបានខ្ជាប់ខ្ជួន, អនុវត្តច្បាប់ឲ្យម៉ឺងម៉ាត់ក្នុងការ បំពេញមុខងារ វិជ្ជាជីវៈរបស់ខ្លួន ហើយមិនត្រូវប្រព្រឹត្តិ អំពើផ្ទុយច្បាប់ ដែលអាចបណ្តាលឲ្យ មានការប្រឈមមុខនឹង ការដាក់វិន័យ ឬទទួលទណ្ឌកម្មព្រហ្មទណ្ឌជាយថាហេតុ។ ក្នុងតួនាទីជាចៅក្រម តុលាការ និង ចៅក្រមអយ្យការ ចាំបាច់ត្រូវតែខិតខំពង្រឹងខ្លួន ឲ្យបានរឹងមាំ និងត្រូវខិតខំធ្វើយ៉ាងណា ឲ្យមានការទទួលស្គាល់ និងមានទំនុកចិត្ត ពីសាធារណជន ផងដែរ។

បន្ទាប់មក ក្រុមការងារអធិការកិច្ច បានចាប់ផ្តើមពិនិត្យ ជាក់ស្តែង នូវការងាររដ្ឋបាល ការងារបច្ចេកទេស និងការគោរពក្រមសីលធម៌ របស់ចៅក្រមតុលាការ និងចៅក្រមអយ្យការ ព្រមទាំងបានជួបពិភាក្សាការងារ ជាមួយអង្គភាពាក់ព័ន្ធមួយចំនួន នៅខេត្តបាត់ដំបង៕