left
Safe Home
Safe Home
Safe Home

Dap News...Admin

Monday, Jun 29th

| English Version | dapnews: 012 571 704, 097 9999 883, email: lim.cheavutha@gmail.com

You are here:
 
Cellcard

នគរបាលល្បាត ខណ្ឌជ្រោយចង្វារ ឃាត់ខ្លួនជនសង្ស័យម្នាក់ និង ដកហូតថ្នាំញៀន មួយកញ្ចប់

E-mail Print PDF

ភ្នំពេញ ៖ តាមរយៈការចុះល្បាត របស់ខ្លួន កម្លាំងនគរបាលជំនាញ នៃអធិការដ្ឋាន នគរបាលខណ្ឌ ជ្រោយចង្វារ កាលពីវេលា ម៉ោង៩៖៣៥ នាទី យប់ថ្ងៃទី២៧ ខែមិថុនា ឆ្នាំ២០១៥ បានឃាត់ខ្លួន ជនសង្ស័យម្នាក់ និងដកហូតថ្នាំញៀនមួយកញ្ចប់ ព្រមទាំងម៉ូតូ មួយគ្រឿង ផងដែរ ។

អធិការនគរបាល ខណ្ឌជ្រោយចង្វារ លោក សៀម សុត្ថាវុធ បានថ្លែងឲ្យដឹងថា ក្រុមល្បាតអន្តរាគមន៍ របស់ អធិការដា្ឋន ខណ្ឌជ្រោយចង្វារ បានឃាត់ម៉ូតូ គ្មានស្លាកលេខ មួយគ្រឿង ក្នុងនោះកំលាំង យើងបានឆែកឃើញ ម្សៅក្រាមពណ៌ស មួយកពា្ចប់(សង្ស័យថាគ្រឿងញៀន) បាននាំយកមក អធិការដ្ឋាន ខណ្ឌដើម្បីសាកសួរ ។

លោកអធិការ បានបញ្ជាក់ថា ក្រោយការ សួរនាំ ជនសង្ស័យបានប្រាប់ថា ខ្លួនមានឈ្មោះ ម៉ា ហៀត អាយុ៣៥ ឆ្នាំ រស់នៅភូមិរការលើ សង្កាត់សំបួរមាស ក្រុងកំពង់ចាម ខេត្តកំពង់ចាម។

លោក សៀម សុត្ថាវុធ បានបញ្ជាក់ថា ដោយមានណែនាំ ពីសំណាក់ ស្នងការនគរបាលរាជធានីភ្នំពេញ លោកឧត្តមសេនីយ៍ ជួន សុវណ្ណ លើការពង្រឹងបញ្ហាសន្តិសុខជូន ប្រជាពលរដ្ឋ នៅតាមមូលដ្ឋាននោះ លោកបានដាក់ផែនការជាប្រចាំ លើការចុះល្បាត ជាពិសេស នៅពេលយប់តែម្តងងាយស្រួលចេញ ជួយអន្តរាគមន៍ភ្លាមៗ នៅពេលដែលមាន បទល្មើសអ្វីមួយកើតឡើង និងទប់ស្កាត់រាល់សកម្មភាពដែលជនល្មើសចង់ ធ្វើសកម្មភាព ជាដើម៕

កម្លាំងនគរបាល ខណ្ឌទួលគោក បង្ក្រាបក្រុមចោរ ឆក់ទូរស័ព្ទ ៣នាក់ និងដកហូតដាវសាំម៉ូរៃមួយដើម

E-mail Print PDF

ភ្នំពេញ ៖ ជនសង្ស័យ ចំនួន៣នាក់ ដែលធ្វើសកម្មភាព ឆក់ទូរស័ព្ទ របស់ប្រជាពលរដ្ឋ នៅតាមដងផ្លូវ ហើយមាន កាន់កាប់ដាវសាំម៉ូរៃ ខុសច្បាប់ផងនោះ ត្រូវកម្លាំងនគរបាល ប៉ុស្តិ៍ដេប៉ូទី២ នៃអធិការដ្ឋាន នគរបាលខណ្ឌទួលគោក បង្ក្រាប និងចាប់ខ្លួនបាន កាលពីរសៀលថ្ងៃទី២៧ ខែមិថុនា ឆ្នាំ២០១៥។

មន្រ្តីនគរបាល ប៉ុស្តិ៍ដេប៉ូទី២ បានឲ្យដឹងថា ក្រោយទទួលបានព័ត៌មាន នៃការធ្វើសកម្មភាព ឆក់ទូរស័ព្ទរបស់ ប្រជាពលរដ្ឋ នៅតាមដងផ្លូវរួចមកនោះ កម្លាំងនគរបាល បានចុះទៅជួយអន្តរាគមន៍ ហើយឈានទៅដល់ ការបង្ក្រាប និងចាប់ខ្លួនពួកគេ ទាំង៣នាក់ ស្ថិតនៅចំណុចផ្លូវ២៦១ កែង២១៨ សង្កាត់បឹងសាឡាង ។

មន្រ្តីនគរបាល ដដែលបានបញ្ជាក់ថា ជនសង្ស័យទាំង៣នាក់ រួមមាន ទី១ ឈ្មោះ សុ វាសនា ហៅក្រពើអាយុ១៦ឆ្នាំ ស្នាក់នៅភូមិរបោះ អង្កាញ់ សង្កាត់ច្បារអំពៅ២ ខណ្ឌច្បារអំពៅ ទី២ ឈ្មោះ ឆន វណ្ណះ អាយុ១៧ឆ្នាំ(អ្នក់ឆក់)រស់នៅ ភូមិចំពុះក្អែក សង្កាត់ព្រែកថី្ម ខណ្ឌច្បារ អំពៅ និងទី៣ ឈ្មោះ ឃីតេង អាយុ២០ ឆ្នាំ រស់នៅភូមិរបោះ សង្កាត់ច្បារអំពៅ២ ខណ្ឌច្បារអំពៅ ។

មន្រ្តីនគរបាល ព្រហ្មទណ្ឌ ខណ្ឌទួលគោក បានឲ្យដឹងថា ដោយមានការណែនាំពីសំណាក់ អធិការនគរបាល ខណ្ឌទួលគោក លើការពង្រឹងបញ្ហាសន្តិសុខ និងសុវត្ថិភាព តាមមូលដ្ឋាននោះ កម្លាំងនគរបាលតាមប៉ុស្តិ៍ បានចុះល្បាត ជាប្រចាំ ទាំងថ្ងៃទាំងយប់ ងាយស្រួលចេញជួយអន្តរាគមន៍ ភ្លាមៗ នៅពេលដែលមានបទល្មើស អ្វីមួយកើតឡើង ជាក់ស្តែងដូចករណីនេះតែម្តង។

បច្ចុប្បន្ន ជនសង្ស័យ ទាំង៣នាក់ ស្ថិតក្រោមការឃុំខ្លួន និងកំពុង កសាងសំណុំរឿង បញ្ជូនទៅតុលាការ ចាត់ការតាមផ្លូវច្បាប់៕

លោកយាយ អាយុ ៨៣ឆ្នាំ ស្នើសម្តេចតេជោ ជួយទប់ស្កាត់ ការរំលោភយកដី របស់គាត់ និងអ្នកភូមិ ដែលបានរស់នៅ ជាយូរឆ្នាំមកហើយ

E-mail Print PDF

ព្រះសីហនុ៖ លោកយាយអាយុ ៨៣ឆ្នាំ រួមនិងប្រជាពលរដ្ឋចំនួន១៤គ្រួសារ ផ្សេងទៀត ដែលកំពុងរស់នៅលើដីមួយកន្លែង ក្បែរអាងចម្រោះទឹកស្អុយ មានទីតាំងស្ថិតនៅក្នុងភូមិ៥ សង្កាត់លេខ៤ ក្រុងខេត្តព្រះសីហនុ សូមស្នើទៅសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន មេត្តាជួយអន្តរាគមន៍ ទៅអាជ្ញាធរពាក់ព័ន្ធ ដែលបានឃុបឃិត ជាមួយឈ្មួញមានអំណាចម្នាក់ រំលោភយកដីរបស់ពួកគាត់ ដោយប្រើប្រាស់ប្រព័ន្ធតុលាការខេត្តព្រះសីហនុ ។

នៅព្រឹកថ្ងៃទី២៥ ខែមិថុនា ឆ្នាំ២០១៥ លោកយាយ ង៉ែត យី មានអាយុ ៨៣ឆ្នាំ ដែលមានស្បែកជ្រីវជ្រួញ និងមានដំណើរកោងខ្នងផងនោះ បានយំរៀបរាប់ពីភាពអយុត្តិធម៌ នៅពីមុខសមត្ថកិច្ច អ្នកសារព័ត៌មាន និងជាពិសេសលោក ប្លុង វិសាល ជាចៅក្រមទទួលបន្ទុកអនុវត្ត ដែលបានចុះមកអនុវត្តដីកា សម្រេចរក្សាការពារលេខៈ ២២៨ ត.រ/១៥ ចេញដោយលោក គឹម អេង ចៅក្រមសាលាដំបូងខេត្តព្រះសីហនុ ចុះថ្ងៃទី១៥ ខែមិថុនា ឆ្នាំ២០១៥ ដោយបានហាមមិនឲ្យប្រជាពលរដ្ឋចំនួន ១៥គ្រួសារ រស់នៅសង្កាត់លេខ៤ ដោយមិនអនុញ្ញាតឲ្យសង់ផ្ទះ ឬធ្វើសកម្មភាពផ្សេងៗ នៅលើដីកំពុងមានទំនាស់ តបតាមបណ្តឹងរបស់លោក ង៉ាន់ វណ្ណា ដែលកំពុងរស់នៅឯភ្នំពេញឯណោះ ។
ក្នុងនោះលោកយាយបានចោទ លោក ង៉ាន់ វណ្ណា ថា បានឃុបឃិតជាមួយមន្ត្រីក្រសួង ឬមន្ទីរពាក់ព័ន្ធលួចធ្វើប្លង់ រំលោភយកដីលំនៅឋានពួកគាត់ ដែលកំពុងរស់នៅសព្វថ្ងៃជាយូរឆ្នាំមកហើយ ។  លោកយាយ និយាយទាំងអស់សង្ឃឹមក្នុងជីវិត នាដង្ហើមចុងក្រោយ ដោយកាយវិការអង្គុយបត់ជើង និងលើកដៃសំពះ សុំការអាណិតពីសំណាក់សម្តេចតេជោ និងសម្តេចកិត្តិព្រឹទ្ធបណ្ឌិត ហើយឆ្លៀតយកដៃជូតទឹកភ្នែក ដែលហូរមិនឈប់កាត់ថ្ពាល់ជ្រីវជ្រួញ នៅលើគ្រែមុខផ្ទះ ក្នុងភូមិ៥ សង្កាត់លេខ៤ លោកយាយ ដែលមានវ័យចំណាស់ហើយរញីរញ័រ មានសម្លៀកបំពាក់ពណ៌ស ដែលតែងនាំយកចង្ហាន់ទៅប្រគេនព្រះសង្ឃ ឬតាំងសម្មាធិ និងធ្វើបុណ្យនៅទីវត្តអារាម ជារៀងរាល់ថ្ងៃសីល បានលើកដៃសំពះ អំពាវនាវដល់សម្តេចតេជោប្រមុខដឹកនាំ ជួយបញ្ជូនមន្ត្រីឯករាជ្យ ចុះស៊ើបអង្កេតលើករណីទំនាស់ដីធ្លី រវាងពលរដ្ឋ ១៥គ្រួសារ ជាមួយភាគី លោក ង៉ាន់ វណ្ណា ដោយអនុគ្រោះជាទីបំផុត គ្រាដែលអាជ្ញាធរខេត្ត បានរាយការណ៍ថា ពួកគាត់មករស់នៅលើដីនេះ ដោយអនាធិបតេយ្យទៅវិញ ។

លោកយាយ ង៉ែត យី បានរៀបរាប់ទាំងសំឡេងយំខ្សឹកខ្សួល ប្រាប់អ្នកចូលរួមថា មុននឹងលោកយាយត្រូវលាចាកពីលោកនេះទៅ រូបគាត់ចង់ឃើញភាពយុត្តិធម៌ និងទទួលបានកម្មសិទ្ធិដីធ្លី រស់នៅដោយស្របច្បាប់ លើដីសង់លំនៅឋាន និងដំណាំហូបផ្លែផ្សេងៗទៀតជាច្រើន ដែលដាំដោយផ្ទាល់ដៃលោកយាយ ដោយគ្មានការរំលោភបំពាន ឬបំភិតបំភ័យ ។ ជាងនេះលោកយាយ ង៉ែត យី ក៏បានបង្ហាញអារម្មណ៍ក្តុកក្តួល ដោយមិនអស់ចិត្តទាល់តែសោះថា មិនគួរណារូបគាត់មានអាយុជាង ៨០ឆ្នាំ នឹងជិតត្រូវចូលដេកក្នុងក្តារមឈូសទៅហើយ សុខៗបែរជាត្រូវគេមកគំរាម បណ្តេញចេញពីដីដែលកំពុងរស់នៅ តកូន តចៅ ចៅទួតជាយូរឆ្នាំមកហើយ ដោយប្រើប្រព័ន្ធតុលាការដូចសព្វថ្ងៃនេះទេ។

ស្ត្រីវ័យចាស់រូបនេះ ហាក់គ្មានជំនឿទៅលើប្រព័ន្ធតុលាការថា អាចជួយស្វែងរកយុត្តិធម៌ លើករណីទំនាស់ដីធ្លីរ៉ាំរ៉ៃរបស់កូនចៅ ឬញាតិជាប់ភូមិផងទាំង ១៥គ្រួសារ នៅសង្កាត់លេខ៤ ក្រុងខេត្តព្រះសីហនុ ដែលមានផ្ទៃដីសរុបមិនដល់មួយហិកតារនេះទេ។ ប៉ុន្តែលោកយាយ បានបង្ហាញជំនឿយ៉ាងមុតមាំតែមួយគត់ ទៅលើដំណោះស្រាយរបស់ សម្តេចនាយករដ្ឋមន្ត្រី ហ៊ុន សែន និងភរិយា ទើបអាចជួយអន្តរាគមន៍ និងផ្ដល់ភាពយុត្តិធម៌ជូនពួកគាត់បាន ។ លោកចៅក្រម ប្លុង វិសាល បានអានដីកាសម្រេចរក្សាការពារ ក្នុងសម្តីសុភាពរាបសារមួយៗ និងមានកាយវិការមទម ទៅកាន់តំណាងអ្នកភូមិទាំង ១៥គ្រួសារ ដោយបានបញ្ជាក់ថា ដីកានេះតុលាការបានអនុវត្ត នៅលើដីដែលមានវិញ្ញាបនប័ត្រសម្គាល់ ម្ចាស់អចលនវត្ថុលេខ 18010405-3228 ចុះថ្ងៃទី១៥ ខែសីហា ឆ្នាំ២០១៤ ដែលទទួលស្គាល់ដោយលោក ហ៊ុន ភី ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី មានទីតាំងនៅភូមិ ៥ សង្កាត់លេខ ៤ ក្រុងខេត្តព្រះសីហនុ ដែលមានម្ចាស់បំណុល នៃការអនុវត្តឈ្មោះ ង៉ាន់ វណ្ណា និងសហកូនបំណុល នៃការអនុវត្តមានឈ្មោះ ង៉ែត យី ប៉ាក់ ស៊ីណា និងប៉ាក់ អៀប ជាដើម សរុបមានឈ្មោះជាង ១០នាក់។

នៅក្នុងឱកាសនោះ លោក ប្លុង វិសាល បញ្ជាក់ថា ដីកាសម្រេចរក្សាការពារ ដែលអនុវត្តពេលនេះ គឺមិនតម្រូវឲ្យពលរដ្ឋរុះរើផ្ទះ ឬលំនៅឋានចេញទេ ប៉ុន្តែបានហាមពលរដ្ឋមិនឲ្យសង់ផ្ទះ ឬធ្វើសំណង់រឹងមាំផ្សេងៗ នៅលើដីកំពុងមានទំនាស់នេះ ដោយរង់ចាំស្វែងរកដំណោះស្រាយ តាមផ្លូវច្បាប់ឲ្យរួចរាល់សិន។

លោកចៅក្រម ក៏បានណែនាំឲ្យពលរដ្ឋ ដាក់ពាក្យបណ្តឹងតវ៉ា លើករណីនេះ ទៅកាន់តុលាការគ្រប់ជាន់ថ្នាក់ ព្រមទាំងចូលរួមគ្រប់ដំណាក់កាល នៃនិតិវិធីរបស់តុលាការ ដើម្បីដោះស្រាយតាមផ្លូវច្បាប់ជាបន្តទៀត បើមិនសុខចិត្តទៅលើដីកា សម្រេចរក្សាការពារនេះ ប្រយោជន៍កុំឲ្យបាត់បង់ផលប្រយោជន៍ របស់បងប្អូននាពេលអនាគតផងដែរ ។ ការចុះអនុវត្តដីកា សម្រេចរក្សាការពារ របស់មន្ត្រីតុលាការ ខេត្តព្រះសីហនុពេលនេះ មិនមានអំពើហិង្សាកើតឡើងទេ ហើយកម្លាំងប្រដាប់អាវុធចម្រុះ ក៏មិនមានវត្តមានច្រើន នៅទីតាំងចុះអនុវត្តដីកាដែរ ដោយឃើញមានកម្លាំង នគរបាលប៉ុស្តិ៍រដ្ឋបាលសង្កាត់លេខ ៤ ម្នាក់ ឬ២នាក់ និងប្រធានក្រុម និងភូមិប៉ុណ្ណោះ។ ទោះជាបែបនេះក្តី តំណាងពលរដ្ឋទាំង១៥គ្រួសារ រស់នៅភូមិ៥ សង្កាត់លេខ៤ ថ្លែងថា ពួកគាត់ជំទាស់ ដីកាសម្រេចរក្សាការពារ ដែលតុលាការចុះអនុវត្តពេលនេះទេ។

តំណាងពលរដ្ឋ លោកស្រី ប៉ាក់ ស៊ីណា មានប្រសាសន៍ថា រឿងក្តីនេះបានអូសបន្លាយពេលយូរឆ្នាំមកហើយ ហើយពួកគាត់ត្រូវរងភាពអយុត្តិធម៌បំផុត។ លោកស្រីបន្តថា ដីដែលភាគីម្ខាងទៀត ឈ្មោះ លោក ង៉ាន់ វណ្ណា ប្តឹងផ្តល់ទៅកាន់តុលាការ គឺមានពលរដ្ឋខ្លះក្នុងចំណោម ១៥គ្រួសារ បានមករស់នៅតាំងពីឆ្នាំ ១៩៨៧ មកម្ល៉េះ។ ប៉ុន្តែដោយសារតែការឃុបឃិត ពីមន្ត្រីស្ថាប័នពាក់ព័ន្ធមួយចំនួន នាខេត្តព្រះសីហនុ ទើប ឈ្មោះលោក ង៉ាន់ វណ្ណា អាចលួចធ្វើប្លង់កម្មសិទ្ធិ ដោយមិនបានជូនដំណឹងមកពួកគាត់ បានដឹងមុននោះទេ។

ត្រង់ចំណុចនេះ លោកស្រី ប៉ាក់ ស៊ីណា បានចោទថា ក្រុមអ្នកដែលឃុបឃិត ធ្វើប្លង់រំលោភយកដីលំនៅឋានពួកគាត់ទាំង ១៥គ្រួសារ គឺមានថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ និងមន្ត្រីមន្ទីរពាក់ព័ន្ធមួយចំនួន នាខេត្តព្រះសីហនុ។ តំណាងពលរដ្ឋរូបនេះ បន្តថា ពលរដ្ឋទាំង ១៥គ្រួសារកំពុងកើតមានទំនាស់ដីធ្លី បានមករស់នៅក្បែរតំបន់ អាងចម្រោះទឹកស្អុយនាខេត្តព្រះសីហនុ មានអាជ្ញាធរមូលដ្ឋានដឹងឮ និងទទួលស្គាល់ជាបន្តបន្ទាប់ រហូតដល់មានសកម្មភាពចុះវាស់វែងដីធ្លី ត្រៀមផ្តល់ប្លង់កម្មសិទ្ធិជូនពួកគាត់ ថែមទៀតកន្លងមក។ ប៉ុន្តែនៅពេលតម្លៃដីធ្លីកើនខ្ពស់ ក៏កើតមានករណីប្តឹងទាស់ពីឈ្មួញមានទ្រព្យធន ហើយជាប់សែស្រឡាយ មន្ត្រីមានអំណាច បានរំលោភយកដីធ្លីពួកគាត់ មកដល់ពេលនេះ។ លោកស្រី ប៉ាក់ ស៊ីណា បញ្ជាក់ឲ្យដឹងទៀតថា ទីតាំងដី របស់ លោក ង៉ាន់ វណ្ណា ដែលប្តឹងពួកគាត់ គឺមានព្រំប្រទល់ នៅជាប់ខាងក្រោយផ្ទៃដីធ្លី របស់ប្រជាពលរដ្ឋទាំង ១៥គ្រួសារ ដែលមានព្រំ ឬទីតាំងជាប់ ថ្នល់ក្រាលកៅស៊ូ។ ប៉ុន្តែទីតាំងដី របស់ លោក ង៉ាន់ វណ្ណា មានព្រំប្រទល់ មិនជាប់ថ្នល់កៅស៊ូទេ គឺនៅលើជំរាលដីភ្នំឯណោះ។ ផ្ដើមពីបញ្ហានេះ តំណាងពលរដ្ឋមានទំនាស់ដីធ្លីទាំង ១៥គ្រួសារ បានសំណូមពរ ដល់សម្តេចនាយករដ្ឋមន្ត្រី ហ៊ុន សែន ដែលបានលើកឡើង ពីការធ្វើកំណែទម្រង់ស៊ីជម្រៅ នៅក្នុងរដ្ឋាភិបាល អាណត្តិទី៥ ស្នើឲ្យជួយបញ្ឈប់រាល់សកម្មភាព ឃុបឃិតរំលោភយកដីពួកគាត់តទៅទៀត។ ជាងនេះ ក៏បានស្នើឲ្យប្រមុខដឹកនាំរដ្ឋាភិបាល ជួយបញ្ជូនមន្ត្រីចុះស៊ើប អង្កេតលើករណីមន្ត្រីក្រសួង ឬស្ថាប័នពាក់ព័ន្ធខេត្តព្រះសីហនុ ឃុបឃិតចេញប្លង់កម្មសិទ្ធិជូនបុគ្គលឈ្មោះ ង៉ាន់ វណ្ណា ដែលគ្មានវត្តមានក្នុងមូលដ្ឋានខេត្តព្រះសីហនុ រំលោភដីលំនៅឋានពលរដ្ឋពួក គាត់ដោយអនុគ្រោះ។

ចំណែកលោកង៉ាន់ វណ្ណា ដែលពលរដ្ឋចោទថា បានលួចធ្វើប្លង់កម្មសិទ្ធិដីធ្លី រំលោភយកដីលំនៅឋានចំនួន ១៥គ្រួសារ និងបានដាក់ពាក្យប្ដឹងពលរដ្ឋទៅតុលាការ ឲ្យរុះរើលំនៅឋានចេញពីដី មានកម្មសិទ្ធិស្របច្បាប់របស់គាត់មិនទាន់អាចទាក់ទងបានទេ នៅថ្ងៃទី២៧ ខែមិថុនានេះ។ ប៉ុន្តែករណីនេះ លោក ហ៊ុន ភី ប្រធានមន្ត្រីរៀបចំដែនដី នគរូបនីយកម្ម និងសំណង់ ខេត្តព្រះសីហនុ ធ្លាប់ឲ្យដឹងថា ពិតជាបានចេញវិញ្ញាបនបត្រ សម្គាល់ម្ចាស់អចលនវត្ថុ ឬកម្មសិទ្ធិដីធ្លីជូន លោក ង៉ាន់ វណ្ណា មានទីតាំងនៅភូមិ៥ សង្កាត់៤ ក្រុងព្រះសីហនុ មានផ្ទៃដីសរុបជាង ៦ម៉ឺន ៤ពាន់ម៉ែត្រការ៉េ កាលពីខែសីហា ឆ្នាំ២០១៤ ពិតមែន។ ប៉ុន្តែលោកថា ការចេញប័ណ្ណនេះ គឺមន្ទីរអនុវត្តទៅតាមសេចក្ដីសម្រេច របស់ក្រសួងរៀបចំដែនដី នគរូបនីយកម្ម និងសំណង់ បង្គាប់បញ្ជាមកតែប៉ុណ្ណោះ។លោកត្អូញត្អែរថា ការចេញកម្មសិទ្ធិដីធ្លីជូនលោក ង៉ាន់ វណ្ណា នេះ កំហុសឆ្គងបានធ្លាក់មកលើ អាជ្ញាធរថ្នាក់ខេត្តពួកគាត់ជាអ្នកអនុវត្ត។

យ៉ាងណា លោក ហ៊ុន ភី បាន ទម្លាក់ការទទួលខុសត្រូវ ចំពោះការបង្គាប់បញ្ជា ឲ្យចេញប័ណ្ណកម្មសិទ្ធិ ជាន់លើដី របស់ប្រជាពលរដ្ឋទាំង ១៥គ្រួសារ ទៅឲ្យថ្នាក់ដឹកនាំ ក្រសួងរៀបចំដែនដីនគរូបនីយកម្មថ្នាក់ជាតិ ជាអ្នកទទួលខុសត្រូវ ព្រោះជាអ្នកចេញលិខិត អន្តរាគមន៍ក្នុងរឿងនេះ។ ការឆ្លើយបញ្ហាដាក់គ្នា ដែល លោក ហ៊ុន ភី ប្រធានមន្ទីររៀបចំដែនដី ខេត្តព្រះសីហនុលើកឡើងនេះ ត្រូវមន្ត្រីសង្គមស៊ីវិលធ្វើការងារពាក់ព័ន្ធដីធ្លី នាខេត្តទេសចរណ៍មួយនេះ មានមន្ទិលថា អាចមានភាពមិនប្រក្រតី ឬអំពើពុករលួយកើតមាន ក្នុងសកម្មភាពចេញប័ណ្ណកម្មសិទ្ធិដីធ្លីរំលោភ យកដីលំនៅឋាន របស់ប្រជាពលរដ្ឋទាំង ១៥គ្រួសារ។

មន្ត្រីសម្របសម្រួលអង្គការលីកាដូ (Licadho) ខេត្តព្រះសីហនុ លោក ប៊ួន ណារិទ្ធ ដែលចុះដល់ទីតាំង អនុវត្តដីកាសម្រេចរក្សាការពារ បានបង្ហាញទស្សនៈថា រាជរដ្ឋាភិបាលកម្ពុជាបច្ចុប្បន្ន ដរាបណាទុកបណ្តោយឲ្យ មានសកម្មភាពឃុបឃិតជាលក្ខណៈប្រព័ន្ធ រវាងមន្ត្រីតាមក្រសួង ឬស្ថាប័នមួយចំនួនដូចរាល់ថ្ងៃនេះ គឺទំនាស់ធ្លីនឹងបន្តកើតមាន និងមិនអាចដោះស្រាយបានទេ។ ជាងនេះ អាជ្ញាធរជាតិដោះស្រាយទំនាស់ដីធ្លី ដែលបានបង្កើតឡើងក៏មិនអាច ដោះស្រាយបញ្ចប់ជម្លោះដីធ្លីដែលបានកើតមាន ស្ទើរទូទាំងប្រទេស ដើម្បីផ្ដល់យុត្តិធម៌ ជូនប្រជាពលរដ្ឋបានដែរ។ លោក ប៊ួន ណារិទ្ធ បានចាត់ទុកការចេញប័ណ្ណកម្មសិទ្ធិដីធ្លី របស់ក្រសួង ឬមន្ទីរពាក់ព័ន្ធ ខេត្តព្រះសីហនុ ជូនបុគ្គលឈ្មោះ លោក ង៉ាន់ វណ្ណា ជាន់លើដីលំនៅឋានប្រជាពលរដ្ឋទាំង ១៥គ្រួសារ ថាមានភាពមិនប្រក្រតី និងអាចមានបញ្ហាពុករលួយ រវាងឈ្មួញ និងមន្ត្រីនៅតាមក្រសួង ឬស្ថាប័នពាក់ព័ន្ធមួយចំនួននាខេត្តព្រះសីហនុ។
លោក ប៊ួន ណារិទ្ធ មន្ត្រីសម្របសម្រួលអង្គការលីកាដូ ខេត្តព្រះសីហនុ ឲ្យដឹងថា បញ្ហាឃុបឃិតចេញប័ណ្ណកម្មសិទ្ធិមិនប្រក្រតី ផ្តើមដោយមន្ត្រីនៃមន្ទីររៀបចំដែនដី នគរូបនីយកម្ម សំណង់ និងសុរិយោដី និងស្ថាប័នពាក់ព័ន្ធខ្លះ នាខេត្តព្រះសីហនុ គឺមិនមែនជារឿងថ្មីទេ។ បញ្ហានេះ ធ្លាប់កើតមានជាហូរហែ នៅខេត្តជាប់មាត់សមុទ្រមួយនេះ ហើយភាគច្រើនឈ្មួញដី ឬមន្ត្រីមានអំណាច តែងប្រើប្រព័ន្ធតុលាការ ដើម្បីគំរាមកំហែង និងចាប់ពលរដ្ឋម្ចាស់ដីពិតប្រាកដ ដែលជាជនក្រីក្រដាក់គុកច្រវាក់ជាបន្តបន្ទាប់ រហូតមកដល់ពេលនេះ។
ទាក់ទិនទំនាស់នេះដែរ លោក ឈិត សុខុន អភិបាលខេត្តព្រះសីហនុ កាលពីថ្ងៃទី១៥ ខែកក្កដា ឆ្នាំ២០១៤ បានចុះហត្ថលេខាឯកភាព តាមសំណើសុំគោលការណ៍ លុបក្បាលដីលេខ ២៣១៩ ចោល និងកែតម្រូវក្បាលដីលេខ ២៤០២ ឲ្យជាប់ផ្លូវឡើងវិញ ស្ថិតនៅភូមិ៥ សង្កាត់៤ ក្រុង និងខេត្តព្រះសីហនុ តាមសំណើរបស់មន្ទីរ រៀបចំដែនដីនគរូបនីយកម្ម ខេត្តព្រះសីហនុ ទៅតាមការសម្រេច របស់ក្រសួងរៀបចំដែនដីនគរូបនីយកម្ម។ សេចក្ដីសម្រេចនេះ ប្រជាពលរដ្ឋរងគ្រោះដីធ្លីទាំង ១៥គ្រួសារ បានចាត់ទុកថា ជារឿងអយុត្តិធម៌សម្រាប់ពួកគាត់ជាថ្មីទៀត ព្រោះបានរំលោភដីលំនៅឋានពួកគាត់កំពុងរស់នៅ ដើម្បីផ្គាប់ចិត្ត តាមមហិច្ឆតា របស់បុគ្គលឈ្មោះ ង៉ាន់ វណ្ណា ដែលមានខ្នងបង្អែកមន្ត្រីមានអំណាច ក្នុងជួររដ្ឋាភិបាលបច្ចុប្បន្ន។

ជាងនេះ ក្រុមប្រជាពលរដ្ឋក៏បានអះអាងថា កង្វល់នៃការចេញប័ណ្ណកម្មសិទ្ធិ រំលោភយកដីលំនៅឋាន ផ្ដើមដោយក្រសួងរៀបចំដែនដី និងមន្ទីរពាក់ព័ន្ធមួយចំនួននាខេត្តព្រះសីហនុ ពួកគាត់ធ្លាប់បានដាក់ពាក្យបណ្ដឹង ជូនស្ថាប័នកំពូលៗ នៃរាជរដ្ឋាភិបាល មានរដ្ឋសភា និងអង្គភាពប្រឆាំងអំពើពុករលួយជាដើម ដើម្បីស្នើជួយរកដំណោះស្រាយ ប៉ុន្តែរហូតមកដល់ពេលនេះស្ងាត់ដូចចោរលួចសេះ។ ហើយពលរដ្ឋទាំង ១៥គ្រួសារ ត្រូវភាគី លោក ង៉ាន់ វណ្ណា ដាក់ពាក្យបណ្តឹងជាច្រើនបទចោទទៀត ទៅកាន់តុលាការ ខេត្តព្រះសីហនុមកដល់សព្វថ្ងៃនេះ ក្នុងនោះមានបទព្រហ្មទណ្ឌ ដែលអាចប្រឈមនឹងជាប់គុក ច្រវាក់នាពេលអនាគតផងដែរ ។
ចំណែកមន្រ្តីអាជ្ញាធរថ្នាក់មូលដ្ឋាន ដែលជាម៉ែជាឪផ្ទាល់របស់ប្រជាពលរដ្ឋ ក្នុងលក្ខខណ្ឌមិនបញ្ចេញឈ្មោះ បានបង្ហាញទស្សនៈថា មកដល់សម័យនេះទៅហើយ នៅមានមន្រ្តីអាជ្ញាធរឃុបឃិតគ្នា ជាមួយឈ្មួញរំលោភយកដីរបស់ប្រជាពលរដ្ឋ ដោយចំហរបែបនេះ ។ ដែលនេះក៏ជាមូលហេតុមួយ ក្នុងចំណោមមូលហេតុដទៃទៀត ដែលបណ្តាលឲ្យបក្សកាន់អំណាចធ្លាក់ឆ្នោត ៕

Photo by DAP-News

Photo by DAP-News

Photo by DAP-News

Photo by DAP-News

Photo by DAP-News

Photo by DAP-News

Photo by DAP-News

សមាគម ប្រភពល្អកម្ពុជា រៀបចំពិធី ស្រាយបួស រ៉ាម៉ាដន

E-mail Print PDF

ភ្នំពេញ៖ នៅវេលាម៉ោង ៥និង៣០ នាទី ថ្ងៃទី ២៧ ខែមិថុនា នៅសមាគមប្រភពល្អកម្ពុជា ស្ថិតនៅសង្កាត់ចោមចៅ ខណ្ឌពោធិ៍សែនជ័យ មានរៀបចំពិធីស្រាយបួសរ៉ាម៉ាដន ដែលមានសិស្សជាក្មេងកំព្រា និង គ្រួសារក្រីក្រចំនួន សរុប ៤៥០នាក់ លោកគ្រូ អ្នកគ្រូ ៣៤ នាក់ បុគ្គលិកការិយាល័យចំនួន ៣៤ នាក់ ។

កម្មវិធីនេះប្រព្រឹត្តទៅ ក្រោមអធិបតីភាព លោក នុត សវនា ប្រធានសហភាពសហព័ន្ធ យុវជនកម្ពុជាក្រសួងមហាផ្ទៃ និង មានការចូលរួមពី លោក ច័ន្ទ រដ្ឋា, លោក សុះ មូហាំម៉ាត់ អគ្គនាយក សមាគមប្រភពល្អកម្ពុជា រួមទាំងសប្បុរសជនមកពី ប្រទេសម៉ាឡេស៊ីមួយចំនួនទៀត៕

Photo by DAP-News

Photo by DAP-News

Photo by DAP-News

Photo by DAP-News

Photo by DAP-News

Photo by DAP-News

Photo by DAP-News

Photo by DAP-News

ទាហានសឹករង ខេត្តមណ្ឌលគិរី ស្រវឹងលេងកាំភ្លើង ផ្ទុះត្រូវម្ចាស់ផ្ទះ រងរបួសធ្ងន់

E-mail Print PDF

មណ្ឌលគិរី៖ ទាហានឃ្វាលគោ នៅស្រែអភិវឌ្ឍន៍តំបន់សឹករងខេត្តមណ្ឌលគិរី ដែលមានអាការស្រវឹងនៅពេលកំពុងផឹកស៊ី បានយកកាំភ្លើង K54 មកលេង បណ្តាលឲ្យផ្ទុះត្រូវម្ចាស់ផ្ទះកំពុងផឹកស៊ីជាមួយគ្នា រងរបួសយ៉ាងធ្ងន់ធ្ងរ ហើយត្រូវបានដឹកបញ្ជូនទៅកាន់ មនី្ទរពេទ្យបង្អែកខេត្តមណ្ឌលគិរី នៅវេលាម៉ោង ១៧និង៤០នាទី ថ្ងៃទី២៧ ខែមិថុនា ឆ្នាំ២០១៥ ។

លោកឧត្តមសេនីយ៍ ញ៉ែម វ៉ាន់នី ស្នងការនគរបាលខេត្តមណ្ឌលគិរី បានប្រាប់មជ្ឈមណ្ឌលព័ត៌មានដើមអម្ពិល ឲ្យដឹងថា ជនរងគ្រោះ បានត្រូវគ្រាប់កាំភ្លើងចំសៀតផ្កា ធ្លាយទៅក្រោយ ឈ្មោះ ផន ឃន ភេទប្រុស អាយុ ៤៣ឆ្នាំ ជាម្ចាស់ផ្ទះ រស់នៅភូមិអូយ៉េះ ឃុំស្រែសង្គម ស្រុកកោះញែក ។ ដោយឡែកជនបង្កឈ្មោះ ម៉េត ភេទប្រុស មុខរបរជាទាហានឃ្វាលគោ នៅស្រែអភិវឌ្ឍន៍ តំបន់សឹករងខេត្តមណ្ឌលគិរី បានរត់គេចខ្លួនបាត់ ហើយកម្លាំងរបស់លោក សហការជាមួយកម្លាំងអាវុធហត្ថ បាននិងកំពុងធ្វើការស្រាវជ្រាវតាមចាប់ខ្លួន ។

លោកឧត្តមសេនីយ៍បានបញ្ជាក់ថា មុនពេលកើតហេតុ ជនបង្កនិងជនរងគ្រោះ ដែលជាមនុស្សស្គាល់គ្នា បានមកផឹកស៊ីជាមួយគ្នា ហើយពេលនោះស្រវឹង ក៏យកកាំភ្លើង K54 មកលេង បណ្តាលឲ្យផ្ទុះត្រូវម្ចាស់ផ្ទះរងរបួស ហើយជនបង្ករត់គេចខ្លួនបាត់តែម្តងទៅ៕

Photo by DAP-News

Photo by DAP-News

បុគ្គលិក កំពុងបម្រើការ ក្នុងមណ្ឌលកម្សាន្ត មនុស្សពេញវ័យ ២១១នាក់ បានទទួលចំណេះដឹង ស្ដីពី “បដិសណ្ឋាកិច្ច និង វិជ្ជាជីវៈ”

E-mail Print PDF

សៀមរាប ៖ នៅរសៀលថ្ងៃទី២៦ ខែមិថុនា ឆ្នាំ២០១៥នេះ មន្ទីរទេសចរណ៍ខេត្តសៀមរាប បានប្រារព្ធពិធីបិទវគ្គបណ្ដុះបណ្ដាល ជំនាញបដិសណ្ឋារកិច្ច ជូនអ្នកគ្រប់គ្រង បុគ្គលិក បម្រើការងារនៅតាម មណ្ឌលកម្សាន្តមនុស្សពេញវ័យ ក្នុងខេត្តសៀមរាប ដោយបានការសហការជាមួយ សាកលវិទ្យាល័យអង្គរ សម្រាប់ការបើកវគ្គបណ្ដុះបណ្ដាលរយៈពេល ៤ថ្ងៃ ចាប់ពីថ្ងៃទី២៣ មិថុនា នេះ នៅសកលវិទ្យាល័យអង្គរ ក្រុងសៀមរាប ដែលមានអ្នកចូលរួមសរុប ១០១នាក់ មកពី ២២កន្លែង សម្រាប់វគ្គលើកទី២នេះ ដែលកាលពីវគ្គទី២ បានបើកកាលពីសប្ដាហ៍កន្លងទៅ មានអ្នកចូលរួមចំនួន ១១០នាក់ ។

លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប បានមានប្រសាសន៍ នៅក្នុងពេលបិទវគ្គនារសៀលថ្ងៃនេះថា វគ្គនេះ គឺក្នុងគោលបំណង ដើម្បីពង្រឹងការគ្រប់គ្រង និងទទួលខុសត្រូវ ក្នុងការរក្សាសុវត្ថិភាពជូនភ្ញៀវទេសចរ ។

លោកបញ្ជាក់ថា យោងតាមសារាចរណែនាំ របស់ក្រសួងលេខ ០០២ ស.ណ.ន ចុះថ្ងៃទី២៣ មេសា ឆ្នាំ២០១៤ អនុក្រិត ស្ដីពី ការគ្រប់គ្រងមណ្ឌលកម្សាន្តទេសចរណ៍ សម្រាប់មនុស្សពេញវ័យ ដែលមាន ៖ រង្គសាល, ឌីស្កូតេស, ខារ៉ាអូខេ, បៀហ្គាឌិន, និងមណ្ឌលកម្សាន្តទេសចរណ៍ ដទៃទៀត ដែលតម្រូវឲ្យមានការគ្រប់គ្រង ច្បាស់លាស់ ពីអង្គភាពជំនាញពិសេស មន្ទីរទេសចរណ៍ លើការផ្ដល់សេវាបដិសណ្ឋាកិច្ច សណ្ដាប់ធ្នាប់ សន្ដិសុខ ការបំពងសំឡេងជាដើមនោះ ។

លោកក៏បានលើកឡើងផងដែរថា អាស្រ័យដូចនេះហើយ ទើបថ្ងៃនេះផ្អែកតាមសារាចរណែនាំលេខ ០១១ សរណន ចុះថ្ងៃទី០១ ខែមេសា ឆ្នាំ២០១៥ របស់ក្រសួងទេសចរណ៍ តម្រូវឲ្យមណ្ឌលកម្សាន្តទេសចរណ៍ មនុស្សពេញវ័យ ត្រូវបញ្ជូនបុគ្គលិក កំពុងបម្រើការងារផ្ដល់សេវាកម្ម ចូលរៀនវគ្គបណ្ដុះបណ្ដាល បដិសណ្ឋាកិច្ច និងវិជ្ជាជីវៈ ដល់បុគ្គលិកកំពុងបម្រើការក្នុងមណ្ឌលកម្សាន្ត មនុស្សពេញវ័យ យ៉ាងតិចឲ្យបាន ៣០% នៃចំនួនបុគ្គលិក កំពុងបម្រើការងារទាំងអស់។

លោកបញ្ជាក់ថា ការបណ្ដុះបណ្ដាលធនធានមនុស្ស សម្រាប់ការធ្វើបដិសណ្ឋារកិច្ច  រួមទាំងក្រមសីលធម៌វិជ្ជាជីវៈ និងការគោរពច្បាប់ គឺជាភាពចាំបាច់ ។ ហើយបើមិនមានការសហការ ក្នុងការបញ្ជូនបុគ្គលិក តាមការកំណត់ខាងលើទេនោះ នៅពេលបន្ត ឬ ធ្វើអាជ្ញាប័ណ្ណថ្មី ក្រសួងនឹងមិនអនុញ្ញាតបន្តអាជ្ញាប័ណ្ណឲ្យឡើយ ។ ចំពោះមេរៀន សំខាន់ៗរួមមាន ៖ ការធ្វើបដិសណ្ឋាកិច្ច, សង្គ្រោះបឋម, អនាម័យចំណីអាហារ, ការទប់ស្កាត់ការជួញដូរកុមារក្នុងវិស័យទេសចរណ៍, ការទប់ស្កាត់ការជួញដូរគ្រឿងញៀន និងការពន្លត់អគ្គិភ័យ ផងដែរ ៕

Photo by DAP-News

Photo by DAP-News

Photo by DAP-News

Photo by DAP-News

Photo by DAP-News

ឆ្លងចរន្តអគ្គសនី តាមបង្គោលភ្លើង នៅទីរួមខេត្តកំពង់ស្ពឺ បណ្តាលដាច់ភ្លើង ស្ទើរពញមួយក្រុង

E-mail Print PDF

កំពង់ស្ពឺ : ភ្នាក់ងារបានរាយការណ៍មកថា នៅរសៀលថ្ងៃទី២៧ ខែមិថុនា ឆ្នាំ២០១៥នេះ មានករណីឆ្លងចរន្តភ្លើង នៅតាមប្រអប់អគ្គិសនី លើបង្គោលភ្លើង ចំនួន៧កន្លែង នៅក្រុងច្បារមន បណ្តាលឲ្យដាច់ភ្លើងប្រើប្រាស់ ដល់ប្រជាពលរដ្ឋ ជាច្រើនគ្រួសារ នៅទីរួមខេត្ត ។

ហេតុការណ៍នេះ បានកើតឡើង តាំងពីម៉ោង ២:២០នាទី រហូតម៉ោង៥:២០នាទីល្ងាចថ្ងៃដដែលនេះ ទើបរលត់ទៅវិញ ក្រោយពីមានការជួយអន្តរាគមន៍ ពីក្រុមសមត្ថកិច្ចពន្លត់អគ្គភ័យ និងក្រុមអគ្គសនី ។

សេចក្តីរាយការណ៍ បានឲ្យដឹងទៀតថា កន្លែងខ្លះ បានដាច់ធ្លាក់ខ្សែភ្លើង រប៉ាត់រប៉ាយ រាយពេញផ្លូវ ប៉ុន្តែក្រុមការងារ របស់អាជ្ញាធរ និងសមត្ថកិច្ច បាននិងកំពុងជួយរៀបចំឡើងវិញហើយ៕

ក្រុមចលនា យុវជនកម្ពុជា ១៥៧ បញ្ចូលសមាជិកថ្មីជិត ១០០នាក់ នៅខេត្តកោះកុង និងព្រះសីហនុ

E-mail Print PDF

កោះកុង : ក្រុមចលនាយុវជនកម្ពុជា ១៥៧ បានរៀបចំពិធី បញ្ជូលសមាជិកថ្មី ជិត១០០នាក់ ប្រចាំខេត្តព្រះសីហនុ និងខេត្តកោះកុង នារសៀលថ្ងៃទី២៧ ខែមិថុនា ឆ្នាំ២០១៥ ក្រោមវត្តមាន លោក មុឹង ពន្លក ប្រធាន ចលនាយុវជនកម្ពុជា ក្រុម១៥៧ តំណាងលោក ហ៊ុន ម៉ាណែត ជាប្រធានកិត្តិយស លោក ផៃធូន ផ្លាមកេសន អភិបាលក្រុងខេមរន្ទភូមិន្ទ និងលោក ទៀ សុខា ប្រធានសាខាខេត្ត ព្រះសីហនុ និងខេត្តកោះកុង ។

លោក ទៀ សុខា បានមានប្រសាសន៍ នៅក្នុងរបាយការណ៍របស់ខ្លួន ថា បច្ចុប្បន្នកម្លាំង ចលនាយុវជនកម្ពុជាក្រុម១៥៧ សាខាខេត្តព្រះសីហនុ មានចំនួន ៩២៤នាក់ ហើយបញ្ចូលថ្មីនៅថ្ងៃនេះ មានចំនួន៣០នាក់ ខណ:ដែលសាខាខេត្តកោះកុងចំនួន៤២នាក់ និងបញ្ចូលថ្មី ថ្ងៃនេះ ៦៥នាក់ ក្នុងនោះស្រី ១៨នាក់ ដូច្នេះសមាជិកថ្មី ដែលត្រូវបញ្ចូលថ្មីនៅពេលនេះទាំង២សាខា មានចំនួន ៩៥នាក់ ។

លោក ទៀ សុខា បានលើក ឡើងថា រយ:ពេល១ឆ្នាំកន្លង មកនេះ ក្រុមចលនាយុវជនកម្ពុជា ក្រុម១៥៧ ដោយមានការណែនាំពីលោកហ៊ុន ម៉ាណែត និងលោក មុឹង ពន្លក បានចូលរួមសកម្មភាព យ៉ាងច្រើន ចុះសួរសុខទុក្ខ ចែកអំណោយ ជួយសាងសង់ផ្ទះ ជួយដកស្ទូង ជួយច្រូតកាត់ស្រូវរបស់ប្រជាពលរដ្ឋ និងបាននាំយកអំណោយជាថវិកាជូនកម្លាំងយោធា នៅតាមព្រំដែន មន្ទីរពេទ្យគន្ឋបុប្ផា និងកាកបាទក្រហមផងដែរ ។

ប្រធានចលនាសាខាទាំង២ ខេត្តរូបនេះ ក៏បានលើកឡើង អំពីការចុះ ទៅសាងសង់សាលារៀន ការធ្វើផ្លូវ ជីកអណ្តូងទឹក នៅតាមឃុំមួយចំនួន របស់ស្រុកថ្មបាំង និងតាមតំបន់មួយចំនួនទៀត បន្ទាប់ប្រជាពលរដ្ឋនៅទីនោះបានទទួលការសន្យាពីអង្គការ ក្រៅរដ្ឋាភិបាល និងសមាគម មួយចំនួន ប៉ុន្តែ២ឆ្នាំហើយ មិនឃើញទៅធ្វើជូននោះទេ ។

នៅក្នុងឱកាសនោះ លោក មុឹង ពន្លក ក្រៅពីការផ្តាំផ្ញើពី សំណាក់លោក ហ៊ុន ម៉ាណែត រួចមក លោកបានជំរុញអោយក្រុមការងារទាំងអស់ ត្រូវខិតខំបង្កើនសកម្មភាពការងាររបស់ខ្លួនខ្លាំងឡើង លើការចុះជួយ និងដោះស្រាយបញ្ហាជូនប្រជាពលរដ្ឋ តាមមូលដ្ឋាននៅ ពេលដែលពួកគាត់ជួបបញ្ហាលំបាក ដែលជាការរួមចំណែកជាមួយអាជ្ញាធរ ថ្នាក់ក្រោមជាតិ ដែលជាសេនាធិការរបស់ រាជរដ្ឋាភិបាល ។

លោកក៏បានផ្តាំផ្ញើអោយសមាជិកនៅក្នុងក្រុមទាំងអស់ ត្រូវរួមសាមគ្គីគ្នា លើកការដោះ ស្រាយបញ្ហានានា ចៀសវាងការឈ្នានីស ការច្រណែន ការមើលបំណាំគ្នា ដែលនាំអោយការងារទាំងមូលភាពបរាជ័យ ៕

Photo by DAP-News

Photo by DAP-News

Photo by DAP-News

Photo by DAP-News

Photo by DAP-News

Photo by DAP-News

Photo by DAP-News

Photo by DAP-News

លោក វង សូត ប្រារព្ធពិធីអបអរសាទរ ខួប៦៤ឆ្នាំ ថ្ងៃកំណើតបក្ស ប្រជាជនកម្ពុជា និងសម្ពោធទីស្នាក់ថ្មី ក្នុងឃុំក្រែក

E-mail Print PDF

ត្បូងឃ្មុំ៖ លោក វង សូត ប្រធានក្រុមការងារថ្នាក់កណ្តាលចុះជួយស្រុកពញាក្រែក នៃគណបក្សប្រជាជនកម្ពុជា រួមនិងសមា ជិក សមាជិកាជិត ៥០០នាក់ នៅព្រឹកថ្ងៃទី២៧ ខែមិថុនា ឆ្នាំ២០១៥នេះ បានរៀបចំប្រារព្ធពិធីអបអរសាទរខួប ៦៤ឆ្នាំថ្ងៃកំណើតបក្ស (២៨ មិថុនា ១៩៥១-២៨ មិថុនា ២០១៥) ព្រមទាំងសម្ពោធដាក់ឲ្យប្រើប្រាស់ទីស្នាក់ការ គណបក្សថ្មី ដែលបានសាងសង់រួចរាល់ក្នុងតម្លៃប្រមាណ ៦ម៉ឺនដុល្លារ។

មុននឹងចាប់ផ្តើមកិច្ចសំណេះសំណាល និងសម្ពោធដាក់ឲ្យប្រើប្រាស់អគារទីស្នាក់ការថ្មីសន្លាងសម្រាប់បម្រើការ ងារបក្សនៅក្នុងឃុំក្រែកនោះ លោក វង សូត រួមនិងសមាជិក សមាជិកាទាំងអស់ បានធ្វើពិធីស្មឹងស្មាធិ៍គោរពដល់ វិញ្ញាណក្ខន្ធសម្តេច ជា ស៊ីម ព្រមទាំងបានសម្តែងទុក្ខក្រៀមក្រោះអាឡោះអាល័យចំពោះការបាត់បង់អតីតប្រធាន បក្សផងដែរ។

ក្នុងពិធីអបអរសាទរថ្ងៃកំណើតបក្សនេះ ក៏មានការថ្លែងបង្ហាញនូវសុន្ទរកថារបស់សម្តេចតេជោ ហ៊ុន សែន ប្រធាន គណបក្សប្រជាជនកម្ពុជា ទៅកាន់សមាជិក សមាជិការបស់ខ្លួនផងដែរ។

តាមរយៈសុន្ទរកថានេះ សម្តេចតេជោ ហ៊ុន សែន បានគូសបញ្ជាក់ថា ចាប់ពីថ្ងៃចាប់បដិសន្ធិមកដល់បច្ចុប្បន្ននេះ គណបក្សប្រជាជនកម្ពុជា បានប្រកាន់យ៉ាងខ្ជាប់ឥតប្រែប្រួលនូវគោលបំណង និង ឧត្ដមគតិរបស់ខ្លួន ដែលផ្សារ ភ្ជាប់ទៅនឹងគោលការណ៍ប្រជាធិបតេយ្យប្រជាជន។

តាមរយៈសុន្ទរកថា ដែលចែកជូនដល់ក្រុមការងារ ដើម្បីផ្សព្វផ្សាយដល់សមាជិក សមាជិកាទូទាំងប្រទេសនេះ  ប្រធានគណបក្សប្រជាជនថ្មី ដែលទើបទទួលបានការបោះឆ្នោតគាំទ្រ យ៉ាងលើសលប់ពីសមាជិក សមាជិកា សម្តេចតេជោ បានបន្តថា រយៈពេល៦៤ឆ្នាំកន្លងទៅនេះ ទោះបីត្រូវឆ្លងកាត់ការលំបាកនិងបញ្ហាស្មុកស្មាញជា ច្រើនយ៉ាងណា ក៏ដោយក៏គណបក្ស បានស្ថិតនៅរួមសុខរួមទុក្ខជាប្រជាជនជានិច្ច និង បានធ្វើអ្វីៗគ្រប់បែបយ៉ាង ដើម្បីផលប្រយោជន៏ជាតិ និង ប្រជាជនគ្រប់ដំណាក់កាល។

តាមរយៈសុន្ទរកថា សម្តេចតេជោ បានបង្ហាញថា គណបក្សប្រជាជនកម្ពុជា នៅតែប្រកាន់ជំហរយ៉ាងរឹងមាំក្នុងការ ថែរក្សាការពាររាល់សមិទ្ធផលរបស់សង្គមជាតិ ពិសេសសន្តិភាព និង ស្ថេរភាពនយោបាយ ដែលជាសមិទ្ធផលដ៏ ធំមិនអាចកាត់ថ្លៃបាន សម្រាប់ការអភិវឌ្ឍសេដ្ឋកិច្ចនិងសង្គម។

បន្ទាប់ពីការអានចប់នូវសុន្ទរកថារបស់ប្រធានគណបក្សប្រជាជនកម្ពុជា លោក វង សូត ក៏បានស្នើឲ្យប្រជាពលរដ្ឋ និងសមាជិក សមាជិកា បន្តគាំទ្រគណបក្សបករជាជនកម្ពុជាជាបន្ត ដើម្បីដឹកនាំប្រទេសឲ្យមានការភិវឌ្ឍថ្មីៗ ថែម ទៀត។

លោក វង សូត ក៏បាន អំពាវនាវដល់ក្រុមការងារយុវជនឲ្យជួយអប់រំ និងសាបព្រោះទង្វើ និងសកម្មភាពល្អៗ ដល់ យុវជនក្នុងមូលដ្ឋាន ដើម្បីឲ្យពួកគេក្លាយជាអ្នកបន្តវេណប្រកបដោយសមត្ថភាព និងចំណេះដឹងពិតប្រាកដ។

លោក វង សូត ក៏បានស្នើឲ្យសមាជិក សមាជិកាទាំងអស់ប្រើប្រាស់ និងថែទាំងទីស្នាក់ការបក្សថ្មីនៅក្នុងឃុំក្រែក ផងដែរ ដើម្បីប្រើប្រាស់ឲ្យបានយូរអង្វែងបម្រើការងារជូនប្រជាពលរដ្ឋ។

នៅក្នុងឱកាសនោះ លោក វង សូត ក៏បានផ្តល់ថវិកា ២០លានរៀលបន្ថែមទៀត ដើម្បីបញ្ចប់ការសាងសង់នានា នៅក្នុងបរិវេណទីស្នាក់ការគណបក្ស។

លោក វង សូត ក៏បានឧបត្ថម្ភថវិកាដល់សមាជិក សមាជិកា ចូលរួម ៣៧៨នាក់ ក្នុងម្នាក់ៗ៣ម៉ឺនរៀល និងឧបត្ថម្ភ ដល់សមាជិកបក្សជានិវត្តន៍ជន ១០០នាក់ ម្នាក់ៗ ៥ម៉ឺនរៀល៕

ថ្ងៃស្អែក គណបក្ស ប្រជាជនកម្ពុជា រំលឹកខួប៦៤ឆ្នាំ នៃការបង្កើតគណបក្ស ដោយមានសមាជិកចូលរួម ១ម៉ឺននាក់

E-mail Print PDF

ភ្នំពេញ៖ អ្នកនាំពាក្យគណបក្ស ប្រជាជនកម្ពុជា លោក សុខ ឥសាន បានឱ្យដឹងថា ក្នុងពិធីរំលឹកខួប ៦៤ឆ្នាំ របស់គណបក្ស ប្រជាជនកម្ពុជា នាទីស្នាក់ការកណ្តាល រាជធានីភ្នំពេញ នៅថ្ងៃទី២៨ ខែមិថុនា ឆ្នាំ២០១៥នេះ នឹងមានសមាជិកគណបក្ស ចូលរួមរហូតដល់ ១ម៉ឺននាក់ ។

ពិធីនេះនឹងត្រូវធ្វើឡើង ក្រោមអធិបតីភាពដ៏ខ្ពង់ខ្ពស់ សម្តេចតេជោ ហ៊ុន សែន នាយករដ្ឋមន្រ្តី ជាប្រធានបក្ស និង សម្តេច ហេង សំរិន ប្រធានរដ្ឋសភា និងជាប្រធានកិត្តិយសគណបក្សប្រជាជនកម្ពុជា ។

លោក សុខ ឥសាន បាននិយាយថា ពិធីនៅថ្ងៃស្អែកនេះ នឹងមានការជំរុញការប្តេជ្ញាចិត្តរបស់យុវជន នៅក្នុងការបម្រើបក្ស និងប្រទេសជាតិ។

សូមជំរាបថា គណបក្សប្រជាជនកម្ពុជា ត្រូវបានបង្កើតលើកដំបូង កាលពីថ្ងៃទី២៨ ខែមិថុនា ឆ្នាំ១៩៥១ ដោយមានឈ្មោះថា «គណបក្សប្រជាជនបដិវត្តន៍កម្ពុជា» ប៉ុន្តែរហូតដល់ឆ្នាំ១៩៩១ គណបក្សនេះ បានប្តូឈ្មោះ មកជា «គណបក្សប្រជាជនកម្ពុជា» រហូតដល់សព្វថ្ងៃ៕

ប្រជាពលរដ្ឋ ៦៨គ្រួសារ ទទួលបាន លំនៅឋានរស់នៅ សមរម្យ ពីលោកឧបនាយករដ្ឋមន្រ្តី កែ គឹមយ៉ាន

E-mail Print PDF

បន្ទាយមានជ័យ៖ ប្រជាពលរដ្ឋ ដែលរស់នៅ ក្នុងភូមិទាំង៩ នៃស្រុកស្វាយចេក ខេត្តបន្ទាយមានជ័យ បានទទួលអំណោយផ្ទះឈើ ប្រកសង្ក័សី ចំនួន៦៨ខ្នង ពីលោកឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិ ប្រយុទ្ធ ប្រឆាំងគ្រឿងញៀន នៅព្រឹកថ្ងៃទី២៧ខែមិថុនា ឆ្នាំ២០១៥នេះ។

ថ្លែងទៅកាន់ប្រជាពលរដ្ឋ នាឱកាសនោះ លោកឧបនាយករដ្ឋមន្ត្រី កែ គឹមយ៉ាន បានមានប្រសាសន៍ថា ទីជម្រកសំខាន់ ណាស់សំរាប់មនុស្ស ហើយបើគ្មានជម្រកទេ វាពិតណាស់ថា ពិបាកក្នុងការរស់នៅ ។ ដោយមើលឃើញពីការលំបាក របស់បងប្អូនប្រជាពលរដ្ឋ ក្នុងរដូវវស្សា ដែលចូលមកដល់នេះ ទើបក្រុមការងារ និងអាជ្ញាធរ បានសម្រេចជួសជុល ឡើងនូវផ្ទះដែលមានភាព ទ្រុឌទ្រោមដំបូល ប្រកស្បូវដាច់ រហែកដូរមកប្រក សង្ក័សីដើម្បីបញ្ជៀសកុំអោយ មានភ្លៀងលិច ។

ចំពោះផ្ទះដែលមានសសរពុក ផុយ ឬនិយាយបានថា ទ្រុឌទ្រោមខ្លាំងគឺ ក្រុមការងារត្រូវរុះរើ ចេញហើយធ្វើឡើងវិញពីឈើប្រកសង្ក័សី   ។ លោកឧបនាយករដ្ឋមន្ត្រី បានផ្តាំផ្អើរដល់ប្រជាពលរដ្ឋ ដែលទទួលបានលំនៅដ្ឋាននេះ ត្រូវថែរក្សាវា រស់នៅសូម ប្រកបតែសេចក្តីសុខ ត្រូវខិតខំដាំដុះដំណាំ រួមផ្សំដើម្បីបង្កើន ប្រាក់ចំណូល ក្នុងគ្រួសារ ។ បងប្អូនអាចមានជម្រករស់នៅ បានសមរម្យ និងគេអាចមានឱកាសប្រកបការងារ ខាងក្រៅដើម្បីចិញ្ចឹមជីវិត។

ជាមួយនិងការសង់លំនៅដ្ឋាន ជូនប្រជាពលរដ្ឋ៦៨ខ្នងនេះ លោកឧបនាយករដ្ឋមន្ត្រី បានបញ្ជាក់បន្ថែមថា ក្រុមការងារបក្ស និងអាជ្ញាធរបានគិតគូរ ត្រូវបន្តចុះជួយសាងសង់ផ្ទះជូន ពលរដ្ឋដែលគ្មានលទ្ធភាពទីទ័លក្រ ទូទាំងបន្ទាយមានជ័យ ប្រមាណជាង៣ពាន់គ្រួសារទៀត។ លោក អាត់ ខែម ស្នងការនគរបាលខេត្តបន្ទាយមានជ័យ បាននិយាយថា ការសាង់សង់ជួសជុលផ្ទះ ជូនប្រជាពលរដ្ឋទាំង៦៨ខ្នងនេះ គឺធ្វើឡើងដោយកម្លាំងអាវុធហត្ថ និងកម្លាំងនគរបាលទូទាំង ខេត្តរយៈពេលមួយថ្ងៃពេញ។

ប្រជាពលរដ្ឋបានសម្តែងពីក្តី រំភើបរីករាយចំពោះចំណាត់ការ ចុះជួយក្រោមការឧបត្ថម្ភពី លោកឧបនាយករដ្ឋមន្រ្តី កែ គឹមយ៉ាន ដែលជានិច្ចកាលលោកតែងតែគិតគូរ ដល់សុខទុក្ខប្រជាពលរដ្ឋក្នុង ខេត្តបន្ទាយមានជ័យទាំងមូល។

សូមបញ្ជាក់ថា នាពេលកន្លងទៅ នៅពេលដែលផ្ទះប្រជាពលរដ្ឋ ទទួលរងខ្យល់បោកបក់ បណ្តាលអោយដួលរលំ និងរងការខូចខាត ក៏ដូចជា ត្រូវសាងសង់នោះ កម្លាំងអាជ្ញាធរ បានសហការជាមួយ កម្លាំងនគរបាល កម្លាំងអាវុធហត្ថ កម្លាំងយោធា សហការជាមួយកម្លាំងយុវជន បាននាំគ្នា ចុះទៅជួយអន្តរាគមន៍ភ្លាមៗ ដល់ភូមិឋានតែម្តង ដើម្បីឲ្យពួកគាត់បន្តស្នាក់នៅ ដូចដើម៕

 

 

សកម្មភាពកម្លាំង នគរបាលខេត្តបន្ទាយមានជ័យ ចុះជួយជួសជុល និងសាងសង់ផ្ទះប្រជាពលរដ្ឋ

Page 9 of 294

Photo by DAP-NEWS
Photo by DAP-NEWS
Photo by DAP-NEWS
Photo by DAP-NEWS
Photo by DAP-NEWS
Photo by DAP-NEWS
Photo by DAP-NEWS
Photo by DAP-NEWS
Photo by DAP-NEWS
Photo by DAP-NEWS
Photo by DAP-NEWS
Photo by DAP-NEWS
Photo by DAP-NEWS
Photo by DAP-NEWS
Photo by DAP-NEWS
Photo by DAP-NEWS
Photo by DAP-NEWS