Dap News...Admin

បាដាដ៖ ប៉ូលីស និងមន្រ្តីអ៊ីរ៉ាក់ បាននិយាយថា រលកនៃការវាយប្រហារ ដោយគ្រាប់បែក បានអង្រួនប្រទេស អ៊ីរ៉ាក់ជាថ្មី កាលពីថ្ងៃសុក្រ ទី១៧ ខែឧសភា បណ្តាលឲ្យមានអ្នកស្លាប់ យ៉ាងហោចណាស់ ៧៣នាក់ និង១៤៨នាក់ ទៀតរងរបួស។

ទីភ្នាក់ងារព័ត៌មានចិន ស៊ីនហួ បានផ្សាយនៅថ្ងៃសៅរ៍ ទី១៨ ខែឧសភា ដោយស្រង់សម្តី អភិបាលក្រុង លោក អាប់ឌុលឡា ហាយ៉ាលី ប្រាប់ស៊ីនហួថា «យ៉ាងហោចណាស់មនុស្ស ៤១នាក់ ស្លាប់ និង៥៦នាក់ទៀតរងរបួស នៅក្នុងការបំផ្ទុះពីរ ដែលបានកើតឡើងតំណាលគ្នាក្នុងទីក្រុង បាគូបា ភាគខាងកើតខេត្ត ឌីយ៉ាឡា ប្រទេសអ៊ីរ៉ាក់ បន្ទាប់ពីមានការសូត្រហើយកាលពីថ្ងៃសុក្រ»។

លោកបន្តថា ការបំផ្ទុះគ្រាប់បែកចំនួនពីរតាមដងផ្លូវបានកើតឡើងនៅជិតវិហារឥស្លាម សារ៉ូយ៉ា ក្នុងទីក្រុង បាគូបា ចម្ងាយ ៦៥គីឡូម៉ែត្រ ភាគឦសានរដ្ឋធានីបាដាដ ដោយបានវាយប្រហារទៅលើអ្នកកាន់សាសនាឥស្លាមនិកាយ សាន់នី ខណៈពួកគេចាកចេញពីព្រះវិហារបន្ទាប់ពីសូត្រធម៌រួច។

បើតាមប្រភពពីប៉ូលីសបានឲ្យដឹងទៀតថា យ៉ាងហោចណាស់មនុស្ស ២២នាក់បានស្លាប់ និង៥៧នាក់ទៀត រងរបួស នៅក្នុងការបំផ្ទុះតាមដងផ្លូវចំនួនបី កាលពីល្ងាចថ្ងៃសុក្រ ទី១៧ ខែឧសភាដដែលនោះ នៅទីក្រុង បាដាដ ប្រទេសអ៊ីរ៉ាក់។ ចំណែកការបំផ្ទុះតាមដងផ្លូវមួយទៀត នៅសង្កាត់ អាមីរីយ៉ា ភាគខាងលិចទីក្រុង បាដាដ បណ្តាល ឲ្យមនុស្ស ១៩នាក់ស្លាប់ និង៣២នាក់ទៀតរងរបួស។

គួរបញ្ជាក់ផងដែរថា ប្រទេសអ៊ីរ៉ាក់ក្នុងរយៈពេលថ្មីៗ ការវាយប្រហារដោយគ្រាប់បែកអត្តឃាត បានកម្រើក ឡើងវិញ យ៉ាងខ្លំាង ដោយបានបណ្តាលឲ្យមានព្រួយបារម្ភថា ក្រុមភេរវជន និងក្រុមឧទ្ទាមប្រដាប់អាវុធ អាចបង្ក ទៅជាអំពើហិង្សានៅទូទំាងប្រទេស ជាពិសេសខណៈអ៊ីរ៉ាក់ កំពុងព្យាយាមទប់ស្កាត់អំពើហិង្សា ដែលកំពុងបន្តការ ហែកហួរក្នុងប្រទេសជិតខាងខ្លួន គឺស៊ីរី។ ចំណែការវាយប្រហារថ្មីៗនេះ មិនទាន់មានក្រុមណាមូយចេញមុខ អះអាងទទួលខុសត្រូវនោះទេ ប៉ុន្តែក្រុមភេរវជនអាល់កៃដា ក្នុងប្រទេសអ៊ីរ៉ាក់ តែងតែចេញមុខទទួលខុសត្រូវ សម្រាប់ការវាយប្រហារធំៗក្នុងប្រទេសនេះ ៕

មូស្គូ៖ ប្រធានឃ្លំាមើល នុយក្លេអ៊ែររបស់ អង្គការសហប្រជាជាតិ លោក យូគីយ៉ា អាម៉ាណូ បាននិយាយកាលពី ថ្ងៃសុក្រថា ប្រទេសអ៊ីរ៉ង់ បានបដិសេធមិនធ្វើ កិច្ចសហប្រតិបត្តិការ ជាមួយទីភ្នាក់ងារ ថាមពលអាតូមិក (IAEA) ជុំវិញវិវាទលើកម្មវិធី នុយក្លេអ៊ែរ របស់ខ្លួននោះទេ។

ទីភ្នាក់ងារព័ត៌មានចិន ស៊ិនហួ ចេញផ្សាយថ្ងៃសៅរ៍ ទី១៨ ខែឧសភា ដោយផ្អែកតាមការលើកឡើង របស់លោក អាម៉ាណូ នៅវិទ្យាស្ថាន ទំនាក់ទំនងអន្តរជាតិ ក្នុងទីក្រុង មូស្គូ ប្រទេស រុស្ស៊ីថា «IAEA មិនដឹងថាតើកម្មវិធី នុយក្លេអ៊ែររបស់អ៊ីរ៉ង់ មានគោលដៅ សម្រាប់យោធាឬអត់»។

ជាមួយគ្នានោះដែរ លោកបានកត់សម្គាល់ឃើញថា ទីភ្នាក់ក៏បានបង្ហាញពីការព្រួយបារម្ភផងដែរ ទៅលើឱកាស ជាច្រើនដែលថា អាជ្ញាធរអ៊ីរ៉ង់ មិនបានអនុញ្ញាតឲ្យក្រុមអ្នកត្រួតពិនិត្យ អន្តរជាតិ ដើម្បីទៅពិនិត្យរោងចក្រ នុយក្លេអ៊ែររបស់ខ្លួន នៅមូលដ្ឋានយោធា ប៉ាចិននោះទេ។

ចំណែកក្រុមមហាអំណាចពិភពលោកវិញ បានសង្ស័យថា អ៊ីរ៉ង់កំពុងអភិវឌ្ឍន៍អាវុធនុយក្លេអ៊ែរ តាមរយៈកម្មវិធី នុយក្លេអ៊ែរ របស់ខ្លួន ខណៈដែលប្រទេសនេះ នៅតែទទួចថា នុយក្លេអ៊ែរនេះ គ្រាន់តែសម្រាប់បម្រើ គោលដៅ ស៊ីវិលតែប៉ុណ្ណោះ។

លើសពីនេះទៅទៀត កាលពីប៉ុន្មានខែមុន រដ្ឋាភិបាលទីក្រុង តេហេរ៉ង់ និងទីភ្នាក់ងារថាមពលអាតូមិក បាន ធ្វើការពិភាក្សាគ្នាជាច្រើនដង ដើម្បីស្វែងរកវិធីសាស្រ្តក្នុងការដោះស្រាយ បញ្ហានុយក្លេអ៊ែរនេះ ប៉ុន្តែមិនទាន់មាន កិច្ចព្រមព្រៀង ណាមួយត្រូវបានបង្កើត ឡើងនោះទេ។

គួរបញ្ជាក់ផងដែរថា ពាក់ព័ន្ធនឹងបញ្ហាចម្រូងចម្រាស់នៃ កម្មវិធីនុយក្លេអ៊ែរក្នុងប្រទេស អ៊ីរ៉ង់នេះ ក្រុមអ្នកឃ្លាំមើល បានដាក់ការសង្ស័យថា ការពិសោធន៍នុយក្លេអ៊ែរ អាចនឹងត្រូវធ្វើឡើងនៅ មូលដ្ឋានយោធា ប៉ាចិន ខណៈអ៊ីរ៉ង់ បានបដិសេធបានចោទប្រកាន់ ដោយនិយាយថា IAEA ដំបូងគួរតែបង្ហាញឯកសារពន្យល់សម្រាប់ ទស្សនកិច្ច របស់ខ្លួនទៅកាន់ មូលដ្ឋានយោធា ប៉ាចិននោះ ៕

យ៉ង់ហ្គូនៈ រដ្ឋាភិបាលភូមា កាលពីថ្ងៃសុក្រ ទី១៧ ខែឧសភា ឆ្នាំ២០១៣កន្លង ទៅនេះ បានដោះលែងអ្នកទោស ចំនួន២៣នាក់ផ្សេងទៀត ក្រោមបទបញ្ជាថ្មី របស់ប្រធានាធិបតីភូមា លោក U Thein Sein។ នេះបើយោង តាមសេចក្តីប្រកាសរបស់ ភ្នាក់ងារសារព័ត៌មាន។

ទីភ្នាក់ងារសារព័ត៌មាន ចិនស៊ិនហួ ចុះថ្ងៃទី១៨ ខែឧសភា ឆ្នាំ២០១៣នេះបានឲ្យដឹងថា អ្នកជាប់ពន្ធធនាគារ ទាំងនោះ នឹងត្រូវបានដោះលែង មុនពេលលោក U Thein Sein បំពេញដំណើរទស្សនកិច្ចជាលើកដំបូង នៅសហរដ្ឋអាមេរិក។

មន្ត្រីក្រោមបញ្ជារបស់ប្រធានាធិបតីភូមា បាននិយាយថា សកម្មភាពនេះត្រូវបានធ្វើឡើង ដើម្បីពង្រឹងនូវ សន្តិភាព និងស្ថេរភាព ការផ្សះផ្សាជាតិ ការបង្រួមបង្រួមក្នុងផ្នែកនយោបាយ ជំរុញលើកទឹកចិត្ត អ្នកជាប់ ពន្ធធនាគារ ក្លាយជាបុគ្គលម្នាក់ ដែលចូលរួមក្នុងការ កសាងប្រទេសជាតិ។

គួរបញ្ជាក់ថា ការដោះលែងអ្នកទោសត្រូវបានធ្វើឡើង បន្ទាប់ពីការដោះលែងអ្នកទោសចំនួន៩៣នាក់ កាលពីខែមេសា ឆ្នាំ២០១៣នេះ និងអ្នកទោសចំនួន៥១៣នាក់ផ្សេងទៀត ត្រូវបានដោះលែងកាលពីខែវិច្ឆិកា ឆ្នាំ២០១២កន្លងទៅនេះ។

អ្នកទោសសរុបចំនួន ២៩.៦៩១នាក់ត្រូវបានដោះលែងឲ្យមានសេរីភាព បន្ទាប់ពីរដ្ឋាភិបាលស៊ីវិលថ្មី ចូលកាន់ អំណាចកាលពីថ្ងៃទី៣០ ខែមិនា ឆ្នាំ២០១១កន្លងទៅនេះ៕

OWERRI: យ៉ាងហោចណាស់មនុស្ស ៣១នាក់បានស្លាប់ កាលពីថ្ងៃព្រហស្បតិ៍ ទី១៦ ខែឧសភា ឆ្នាំ២០១៣ កន្លងទៅនេះ បន្ទាប់ពីដើមឈើបាក់រលំលើ នៅតំបន់ភាគខាងត្បូង ប្រទេសនីហ្សេរីយ៉ា ក្នុងរដ្ឋ Imo។ នេះបើយោងតាម សេចក្តីរាយការណ៍ បានឲ្យដឹងកាល ពីថ្ងៃសុក្រកន្លង ទៅនេះ ។

ទីភ្នាក់ងារសារព័ត៌មាន ចិនស៊ិនហួ ចុះថ្ងៃទី១៨ ខែឧសភា ឆ្នាំ២០១៣នេះបានឲ្យដឹងថា លោក Eze Godwin Duru ជាថ្នាក់ដឹកនាំ ប្រចាំភូមិក្នុងតំបន់កើតហេតុ បានប្រាប់ទីភ្នាក់ងារសារ ព័ត៌មានថា ជនរងគ្រោះ បានស្លាប់ ដោយសារដើមឈើរលំលើពួកគេ។ លោកបានបន្តថា ហេតុការណ៍ដ៏អាក្រក់នេះ មិនធ្លាប់កើតមានទេពីមុនមក។

ភ្នាក់ងារសារព័ត៌មាន បានធ្វើសេចក្តីរាយការណ៍ថា ក្នុងហេតុការណ៍នេះ មានជនរងគ្រោះចំនួន១៦នាក់ផ្សេង ទៀតបានរួចជីវិត ដែលបង្កឡើងដោយព្យុះ និងភ្លៀង កាលពីរាត្រីថ្ងៃព្រហស្បតិ៍កន្លងទៅនេះ។ អ្នកនាំ ពាក្យរបស់មន្ត្រីប៉ូលីស លោក Joy Elemoko មិនអាចទំនាក់ទំនងបានទេក្នុងពេលធ្វើសេចក្តីសរាយការណ៍នេះ៕

វ៉ាស៊ីនតោន៖ មន្រ្តីក្រសួងការពារជាតិ អាមេរិក បានប្រកាសនៅថ្ងៃព្រហស្បតិ៍ ទី១៦ ខែឧសភាថា យោធាអាមេរិក បានដឹកនាំការសាកល្បង មីស៊ីលការពារ កាលពីរាត្រីថ្ងៃពុធ ប្រកបដោយជោគជ័យ និងបានបំផ្លាញគោលដៅ នៃមីស៊ីលរយៈចម្ងាយជិត នៅមហាសមុទ្រប៉ាស៊ីហ្វិច។

ទីភ្នាក់ងារព័ត៌មានចិន ស៊ិនហួ ចេញផ្សាយថ្ងៃសុក្រ ទី១៧ ខែឧសភា ដោយផ្អែកតាមការលើកឡើង របស់ទីភ្នាក់ងារការពារមីស៊ីល របស់ក្រសួងថា «គោលដៅមីស៊ីល ចាប់ផ្តើមចេញពីកោះ គូអាយ កោះ ហាវ៉ៃ បាញ់ឆ្ពោះទៅតំបន់មហាសមុទ្រ ប៉ាស៊ីហ្វិច។

ទីភ្នាក់ងារនោះ បាននិយាយនៅក្នុង សេចក្តីថ្លែងការណ៍មួយថា ក្រោយការចាប់ផ្តើមសាកល្បងនោះ នាវាស៊ើបកាណ៍ បំពាក់មីស៊ីល និងប្រព័ន្ធរ៉ាដា USS របស់អាមេរិក នាវាបំពាក់ប្រព័ន្ធការពារមីស៊ីលផ្លោង Aegis បានអភិវឌ្ឍន៍ការគ្រប់ការបាញ់ នៃមីស៊ីលប្រភេទ SM-៣ block ក៏បានចូលរួមផងដែរ ក្នុងការសាកល្បងនោះ៕

ស៊ីតថ្វាយ៖ ទីភ្នាក់ងារព័ត៌មានចិន ស៊ិនហួ បានចេញផ្សាយនៅថ្ងៃសុក្រ ទី១៧ ខែ ឧសភា ឆ្នាំ២០១៣ នេះថា នាយកដ្ឋានឧតុនិយម និង ជលសាស្ត្រ របស់មីយ៉ាន់ម៉ា បានប្រកាសដកចេញ នូវសេចក្តីព្រមានថា នឹងអាចកើតមាននូវ ខ្យល់ព្យុះស៊ីក្លូន នៅ រដ្ឋ រ៉ាឃីន ភាគខាងលិចប្រទេសនោះចេញ កាលពីយប់ថ្ងៃព្រហស្បតិ៍ កន្លងទៅនេះ បន្ទាប់ ពីព្យុះនេះបានបន្ថយឥទ្ធិពលរបស់វា ក្រោយពីបានវាយប្រហារ ប្រទេសបង់ក្លាដែស នោះ។

ចំពោះខ្យល់ព្យុះ ម៉ាហាសេន នោះដែរ បានបន្ថយឥទ្ធិពលរបស់ខ្លួន ទៅជាព្យុះត្រូពិក ហើយវាមិនបានបង្កឲ្យមាន មនុស្សស្លាប់នោះទេ នៅរដ្ឋរ៉ាឃីននោះ ដោយគ្រាន់តែបង្ក ឲ្យមានខ្យល់បោកបក់ខ្លាំង ព្រមទាំងភ្លៀងធ្លាក់ពេញ មួយថ្ងៃព្រហស្បតិ៍ម្សិលមិញនេះ តែប៉ុណ្ណោះ។

ដោយឡែកប្រជាជន ក្នុងតំបន់ប្រមាណជិត ៧ ម៉ឺននាក់ដែលត្រូវបាន ទីភ្នាក់ងារសង្គ្រោះរបស់ អង្គការសហប្រជាជាតិ សហការជាមួយអាជ្ញាធរ ក្នុងតំបន់ ជម្លៀសចេញទៅកាន់ ទីកន្លែងសុវត្ថិភាពនោះ នឹងត្រូវត្រឡប់មកកាន់កន្លែងដើមវិញ នៅពេលឆាប់ៗខាងមុខផងដែរ៕

មីនស្កិ៍៖ នាយករដ្ឋមន្រ្តីប្រទេស បេឡារុស លោក មីលហាល ម៉ាយ៉ាស្នីកូវិក បាននិយាយក្នុងកិច្ចប្រជុំ ជាមួយនាយករដ្ឋមន្រ្តី វៀតណាម លោក ង្វៀន តាន់ដុង នៅទីក្រុង មីនស្កិ៍ កាលពីថ្ងៃព្រហស្បតិ៍ថា វៀតណាមគ្រោងនឹងទិញយន្តហោះ គ្មានមនុស្សបើកពីបេឡារុស។

ទីភ្នាក់ងារព័ត៌មានចិន ស៊ិនហួ ចេញផ្សាយថ្ងៃសុក្រ ទី១៧ ខែឧសភា ដោយផ្អែកតាមការលើកឡើង របស់លោក ម៉ាយ៉ាស្នីកូវិកថា «យើងមានសង្ឃឹមយ៉ាងធំធេង ចំពោះកិច្ចសហប្រតិបត្តិការ ផ្នែកវិទ្យាសាស្រ្ត និងបច្ចេកវិទ្យា។ ខ្ញុំចង់មានន័យថា ប្រព័ន្ធបច្ចេកវិទ្យា អាកាសគ្មានបំពាក់អាវុធ ដែលជាយន្តហោះគ្មានមនុស្សបើក ហើយកិច្ចសន្យា ត្រូវបានចុះហត្ថលេខា ក្នុងក្របខ័ណ្ឌនៃដំណើរទស្សនកិច្ចរបស់អ្នក និងកិច្ចសន្យាចូលរួមគម្រោង ក្នុងតំបន់សម្រាប់បច្ចេកវិទ្យា ជីវសាស្រ្ត និងព័ត៌មានវិទ្យា ក៏ដូចជាផ្នែកថែទំា សុខភាពផងដែរ»។

នៅក្នុងឱកាសនោះដែរ នាយករដ្ឋមន្រ្តី បេឡារុស ក៏បានស្វាគមន៍ចំពោះ ការចុះឈ្មោះចូលរួមក្នុង គម្រោងមួយ នៅក្នុងការរចនាកុំព្យូទ័រខ្នាតតូច និងប្រព័ន្ធអេឡិចត្រូនិច-ណាណូ។ បើយោងតាមព័ត៌មាន ផ្លូវការរបស់បេឡារុស បានឲ្យដឹងថា អំឡុងទស្សនកិច្ចរបស់ នាយករដ្ឋមន្រ្តីវៀតណាម ទៅប្រទេស បេឡារុស ភាគីទំាងពីរ បានព្រមព្រៀងគ្នា ចុះហត្ថលេខាលើកិច្ចសន្យា ផ្នែកពាណិជ្ជកម្ម ដែលមានតម្លៃគិតជា ទឹកប្រាក់ជាង ១០០លានដុល្លារអាមេរិកផងដែរ។

ចំណែកនាយករដ្ឋមន្រ្ តីវៀតណាម លោក ង្វៀន តាន់ដុង បាននិយាយថា វៀតណាមបានភ្ជាប់ទំនាក់ទំនង ដែលមានសារៈសំខាន់ធំធេង ចំពោះកិច្ចសហប្រតិបត្តិការជាមួយ បេឡារុស ហើយថាវៀតណាម នឹងធ្វើកិច្ចសហប្រតិបត្តិការ ឲ្យបានពេញទំហឹងលើ ផ្នែកយោធា បច្ចេកវិទ្យា នយោបាយ និងសេដ្ឋកិច្ចជាមួយ បេឡារុសផងដែរ៕

ប៉េកាំង៖ ទីភ្នាក់ងារព័ត៌មានចិន ស៊ិនហួ បានចេញផ្សាយនៅថ្ងៃសុក្រ ទី១៧ ខែឧសភា ឆ្នាំ២០១៣ នេះថា មនុស្ស ៣៣នាក់បានស្លាប់ បាត់បង់ជីវិត និង ១២នាក់ទៀតកំពុង បាត់ខ្លួននៅឡើយ បន្ទាប់ពីព្យុះព្រិល និង ភ្លៀងធ្លាក់យ៉ាងគំហុក បានវាយប្រហារភាគ ខាងត្បូងប្រទេសចិន។ នេះបើតាមការអះអាង របស់អាជ្ញាធរកាត់បន្ថយ គ្រោះមហន្តរាយ និង កិច្ចការស៊ីវិលក្នុងប្រទេស។

ចាប់តាំងពីថ្ងៃអង្គារ សប្តាហ៍នេះមក ព្យុះភ្លៀងព្រមទាំងព្រិល បានបង្កឲ្យមានទឹកជំនន់ ព្រមទាំងការរអិលបាក់ដី នៅតាមតំបន់មួយចំនួននៃខេត្ត ហ្គ័ងដុង ភាគខាងត្បូង ប្រទេសចិន ដែលទទួលរងគ្រោះធ្ងន់ធ្ងរជាងគេ ហើយត្រូវបានអាជ្ញាធរខាងលើចាត់ ចូលទៅក្នុងកម្រិតទីបួន នៃគ្រោះមហន្តរាយដែលខ្លាំងក្លាបំផុតនោះ។

គួរបញ្ជាក់ផងដែរថា កាលពីថ្ងៃព្រហស្បតិ៍ ម្សិលមិញនេះ ទីស្នាក់ការកណ្តាលផ្នែកគ្រប់ គ្រងគ្រោះមហន្តរាយប្រចាំតំបន់ បានបញ្ជាឲ្យក្រុមសង្គ្រោះ ចំនួនពីរក្រុមទៅកាន់ខេត្ត ហ្គ័ងដុង និង ហ្សាងស៊ី ដើម្បីចាត់វិធានដោយផ្ទាល់ សង្គ្រោះប្រជាជនពីទឹកជំនន់នោះ។ ចំពោះចំនួនប្រជាជន ដែលទទួលរងផលប៉ះពាល់ ពេលនេះមានរហូតដល់ ៦សែន ៥ម៉ឺននាក់ ហើយគេហដ្ឋានប្រមាណ ២.៦៧៥ ខ្នងត្រូវបានទទួលរងការបំផ្លាញ។

ដោយឡែកអាជ្ញាធរតំបន់ នៅតែមានការព្រួយបារម្ភ ចំពោះមនុស្សដែលកំពុងបាត់ខ្លួន ព្រមទាំងការកើនឡើងកម្ពស់ នៃទឹកទន្លេបៃហ្ស៊ាង ដែលមិនធ្លាប់មាននោះទេ ក្នុងរយៈពេលមួយសតវត្សរ៍ កន្លងទៅនេះ ហើយវានឹងបន្តគម្រាមកំហែងថា នឹងអាចកើតមាន នូវទឹកជំនន់ដ៏ធ្ងន់ធ្ងរ ជាងនេះទៀតផងដែរ៕