Dap News...Admin

សហរដ្ឋអាមេរិក៖ យោងតាមទូរទស្សន៍ ស៊ីអ៊ិនអ៊ិន បានចុះផ្សាយនៅ ចុងសបា្តហ៍មុននេះថា បើតាម របាយការណ៍ការងារ គិតក្នុងខែមេសា ឆ្នាំ២០១៣ តម្រូវការបុគ្គលិក បានកើនឡើងគួរ កត់សម្គាល់ ។

ក្រសួងការងារសហរដ្ឋអាមេរិក បានឲ្យដឹងថា នៅក្នុងរបាយការណ៍ ស្តីអំពីការងារនៅក្នុង ខែមេសា ឆ្នាំ ២០១៣ បានកើនឡើង និងបានបន្ថែមបុគ្គលិក បម្រើការងារប្រមាណ ១៦៥.០០០ នាក់ ។

ក្រុមអ្នកសេដ្ឋកិច្ចមួយចំនួនបានព្យាករណ៍ថា តម្រូវការបុគ្គលិកបម្រើការ មានរហូតដល់ជាង ១៤០.០០០ នាក់ តួលេខនេះ ធៀបនឹងខែមីនា មានសន្ទុះកើនឡើង។

របាយការណ៍បានបញ្ជាក់ថា បរិមាណបុគ្គលិកដែលបម្រើការងារ នៅតាមរោងចក្រជាច្រើន គិតចាប់ពី ពាក់កណ្តាល ខែមេសា បានកើនឡើងធៀបនឹងខែមុន (មីនា) ។

ក្នុងនោះ វិស័យសំណង់ ក៏មានតម្រូវការបុគ្គលិក កើនជាងមុនដែរ ។

ក្រុមអ្នកវិភាគសេដ្ឋកិច្ចបានឲ្យដឹងថា ស្ថានភាពសេដ្ឋកិច្ចនៅសហរដ្ឋអាមេរិក បានងើបឡើង វិញគិតចាប់ ពីឆ្នាំ២០០៩ និងបន្តកើនឡើងមកដល់ ឆ្នាំ២០១៣នេះ តែអត្រាអ្នកគ្មានការងារធ្វើ នៅប្រឈម នៅឡើយ ៕

ភ្នំពេញ ៖ ជាការឆ្លើយតប ទៅនឹងសេចក្តីត្រូវការរបស់ប្រជាជនកម្ពុជា ដែលចេះតែកើនឡើងពីមួយថ្ងៃទៅមួយ លើការប្រើប្រាស់ម៉ាស៊ីនត្រជាក់នោះ នៅថ្ងៃទី៦ ខែឧសភា ឆ្នាំ២០១៣ ក្រុមហ៊ុន LG បានសម្ពោធលក់ជាផ្លូវការ នូវម៉ាស៊ីនត្រជាក់ម៉ូឌែលថ្មី ស៊េរី ២០១៣ Inverter V Plasma ដែលមាន បច្ចេកវិទ្យាទំនើបចុងក្រោយ ស៊ីភ្លើងតិចបំផុត សំឡេងស្ងាត់បំផុត ឆាប់ត្រជាក់ និងមានមុខងារថែទាំសុខភាពល្អបំផុត ។

អគ្គនាយក្រុមហ៊ុន LG ប្រចាំនៅកម្ពុជា លោក Taekyu Kim សង្ឃឹមយ៉ាងមុតមាំថា ម៉ាស៊ីនត្រជាក់ ម៉ូឌែលថ្មីនេះ នឹងរួមចំណែកយ៉ាងសំខាន់ ក្នុងការ សន្សំសំចៃអគ្គិសនី ការពារបរិស្ថាន និងជួយថែរក្សាសុខភាព របស់ប្រជាជនកម្ពុជា ឲ្យបានកាន់តែប្រសើរ។

លោកបន្តថា«ជាមួយនឹងបច្ចេកទេសដ៏ទំនើប និងឈានមុខគេ យើងមានទំនុកចិត្តថា LG នឹងក្លាយជាអ្នកលក់ម៉ាស៊ីនត្រជាក់ដាច់ជាងគេ ចំណាត់ ថ្នាក់ លេខ១ នៅកម្ពុជា»។

លោកបន្ថែមថា ម៉ាស៊ីនត្រជាក់ម៉ូឌែល Inverter V Plasma ជាម៉ាស៊ីនត្រជាក់ ដែលបានបង្កើតឡើង ដោយការវិវត្តន៍យ៉ាងរហ័ស នៃបច្ចេកវិទ្យា Inverter និង Plasmaster របស់ក្រុមហ៊ុន LG ដែលអាចបង្កើតអានុភាព និងភាពត្រជាក់ពេញបន្ទប់ ជាមួយនឹងដំណើរការដ៏ស្ងាត់បំផុត និងសន្សំ សំចៃ រហូតដល់ ៦០ ភាគរយ នៃការចំណាយទៅលើថាមពលអគ្គិសនី។ Plasmaster គឺជាបច្ចេកវិទ្យាចុងក្រោយ បង្អស់របស់ក្រុមហ៊ុន LG ដែល មានមុខងារ ថែរក្សាស្បែកយ៉ាងប្រសើរបំផុត ហើយជួយបន្សុទ្ធ ឲ្យខ្យល់បរិសុទ្ធ អាចកម្ចាត់មេរោក និងបាត់តេរីរហូតដល់ ៩៩.៩ភាគរយ៕

ដើម្បីឆ្លើយតបទៅ ការទន្ទឹងរង់ចាំការមកដល់ របស់ Galaxy S 4 និង Tablet Galaxy Note 8.0 សុទ្ធតែជាស៊េរី ទូរស័ព្ទ និង Tablet ជំនាន់ចុងក្រោយបង្អស់ ដែលប្រមូលផ្ដុំទៅដោយ បច្ចេកវិជ្ជាទំនើប រូបរាងរចនា កាន់តែទាក់ទាញ បូករួមសមត្ថភាព ខ្ពស់មិនអាចកាត់ថ្លៃបាន ទើបSamsung សម្រេចបើកសម្ពោធចរាចរ ចេញលក់ទាំង S 4 និង Note 8.0 ជាផ្លូវការរួមគ្នានៅ រសៀលថ្ងៃសុក្រ ទី 03 ខែឧសភា ឆ្នាំ 2013 នេះ។

នាឱកាសបើកសម្ពោធនេះដែរ នាយកគ្រប់គ្រងផ្នែកទូរស័ព្ទ និងបច្ចេកវិជ្ជានៃក្រុមហ៊ុន Samsung Electronic សាខាថៃប្រចាំកម្ពុជា លោក វ៉ាត់ ឡាំផេង ថា ៖‹ Samsung នៅតែប្រកាន់គោលការណ៍ ច្នៃប្រឌិតឥតឈប់ ដើម្បីបម្រើសេចក្ដីត្រូវការ របស់អតិថិជននាសម័យកាល បច្ចេកវិទ្យាសតវត្សទី 21នេះ។ ទូរស័ព្ទ Galaxy S 4 ជាកំពូល Smartphone ដែលអាចថតរូបបាន 2 ក្នុងពេលតែមួយ (Dual Shot) ដោយកាមេរ៉ាកាន់តែធំ រហូតដល់ 13 MP បង្ហាញរូបភាពសងខាង ក្នុងពេលតែមួយ អេក្រង់កាន់តែរស់រវើក ទាញរូបភាពកាន់តែរហ័ស មុខងារបញ្ជាដោយកាយវិញ្ញាណ និងមុខងារជាច្រើនទៀត។ Galaxy S 4 ពិតជា ដៃគូជីវិតដ៏ប្រសើរសម្រាប់ មិត្តយុវវ័យសម័យថ្មី។ បញ្ជាក់ពីសក្ដានុពលរបស់ Galaxy S 4 សមិទ្ធផលចុងក្រោយ បង្អស់របស់ Samsung នេះដែរ។

នាយកប្រចាំសាខា ក្រុមហ៊ុន ថៃស៊ាំសុង អេឡិចត្រូនិកប្រចាំឥណ្ឌូចិន (កម្ពុជា-ឡាវ) លោក Gwihan Lee បានសង្កត់ធ្ងន់ថា ‹ពិតណាស់ Galaxy S4 ជាសក្ខីភាពចំពោះដំណើរ វិវត្តន៍បោះជំហាន ទៅមុខឥតឈប់ឈររបស់ Samsung បន្ទាប់ពីទទួលជោគជ័យ ដ៏ត្រចះត្រចង់លើ សែស្រឡាយ Galaxy នាពេលកន្លងមក។ យើងនឹងមិនសំងំស្ងៀម ផ្ទុយទៅវិញនឹងខិតខំបោះជំហាន ទៅមុខជានិច្ចជាមួយ ទូរស័ព្ទ Smartphone និងឧបករណ៏ អេឡិចត្រូនិច ដើម្បីផ្ដល់ជូនអតិថិជន ទទួលបាននូវបទពិសោធន៍ ដ៏ល្អឥតខ្ចោះ។

លោក បន្តថា ‹ ដោយយល់ពីទំនោរ សេចក្ដីត្រូវការ របស់យុវវ័យ ដែលចង់បាន Smartphone ស៊េរីខ្ពស់ដែលមាន សមត្ថភាពឥត ព្រំដែន រូបរាងស្អាត ស្ដើង ស្រាល អេក្រង់ធំទូលាយ និងតម្លៃសមរម្យទើប Samsung ប្រមូលផ្ដុំរាល់ចំណុចចង់ បានរបស់អ្នកប្រើប្រាស់ នៃសម័យកាល បច្ចេកវិជ្ជាទាំងនេះ មកច្របាច់បញ្ចូគ្នា លេចចេញជារូបរាងរបស់ Galaxy S4 នេះឡើង។

ដោយឡែកក្រឡេកមកមើលចំណុចលេចធ្លោដែលមានលើGalaxy Note 8.0 ឯណេះវិញមានដូចជា:
-មុខងារ Call ៖ Galaxy Note 8.0 អាចដាក់ស៊ីមកាតប្រភេទ Micro-Sim អាចហៅទូរស័ព្ទចេញ ចូលដូចទូរស័ព្ទទូទៅ
-មុខងារ Multi Windows ៖ អាចឱ្យអ្នកប្រើប្រាស់បើកផ្ទាំង Windows បានច្រើនក្នុងពេលតំណាលគ្នា ដូចកុំព្យូទ័រ
-មុខងារ Reading Mode ៖ អាចអានសៀវភៅអេឡិចត្រូនិចកាន់តែងាយស្រួល
-មុខងារ S-Pen ៖ កាន់តែងាយស្រួលក្នុងការសរសេរ ឬកត់ចំណាំ
-ដង់ស៊ីតេភិចហ្សែល 189 ppi ៖ អេក្រង់ 8 អ៊ីងប្រភេទ WXGA កាន់តែច្បាស់ត្រជាក់ភ្នែក
-RAM កាន់តែធំ CPU កាន់តែលឿន ៖ ទំហំRAM 2GB ដូចម៉ាស៊ីនកុំព្យូទ័រ រីឯ CPU ប្រភេទ Quad-core ល្បឿន 1.6GHz កាន់តែលឿន
-រន្ធដោយបន្ថែម Memory Card៖ ក្រៅពី ទំហំអង្គចងចាំក្នុងម៉ាស៊ីន ចាប់ពី 16 GB ហើយនោះ Note 8.0 នៅអាចបន្ថែមមេម៉ូរីកាត ដើម្បីពង្រីកសមត្ថភាពផ្ទុកទិន្នន័យបានកាន់តែច្រើន។

ដូច្នេះចាប់ពីបើកសម្ពោធនេះទៅ អតិថិជន ក៏ដូចជាមិត្តយុវវ័យទាំងអស់ អាចរកជាវផលិតផល គុណភាពខ្ពស់ សមត្ថភាពឥតដែនកំណត់ ជាមួយការឌីហ្សាញ កាន់តែទាក់ទាញទាំងពីរ ស៊េរីខាងលើនេះ មាន Galaxy S 4 និង Tablet Note 8.0 បានពីគ្រប់ហាង ចែកចាយបន្តផលិតផល Samsung គ្រប់សាខាទាំងអស់។ អ្វីដែលសំខាន់ សូមកុំភ្លេចសួរ រកប័ណ្ណធានា រយៈពេលមួយឆ្នាំ៕

ភ្នំពេញ៖ បណ្តាប្រទេស នៅសហគមន៍អឺរ៉ុប នៅតែជាទីផ្សារដ៏សំខាន់ របស់អង្ករកម្ពុជា បើទោះបីរាជរដ្ឋាភិបាល ប្រឹងប្រែងស្វែងរកទីផ្សារថ្មីនៅតំបន់ អាស៊ីយ៉ាងណាក្តី។

បើតាមរបាយការណ៍ស្ថានភាព នៃការនាំចេញអង្ករកម្ពុជា ក្នុងរយៈពេល៤ ខែដើមឆ្នាំ២០១៣ របស់លេខាធិការ ដ្ឋានច្រកចេញចូលតែមួយ សម្រាប់ បំពេញបែបបទនាំចេញអង្ករ ដែលដើមអម្ពិលទទួលបាននៅថ្ងៃទី២ ខែឧសភា ឆ្នាំ២០១៣ បានឲ្យបង្ហាញថា ប្រទេសនៅសហគមន៍អឺរ៉ុបជាទីផ្សារ ដែលកម្ពុជានាំចេញអង្ករបានច្រើនជាងគេ។

របាយការណ៍ដដែលបង្ហាញថា នៅក្នុង៤ខែដើមឆ្នាំ២០១៣ ប្រទេសកម្ពុជាបាននាំចេញអង្ករកើនឡើង ១៣០ ភាគរយ បើធៀបនឹងរយៈពេលដូចគ្នា កាលពីឆ្នាំ២០១២។ ៤ខែ ដើមឆ្នាំនេះ កម្ពុជានាំចេញអង្ករបានចំនួន ១១៨.៥០៤តោន ដែលរយៈពេលដូចគ្នា កាលពីឆ្នាំមុនមានតែ ៥១.៤៦៦តោន ប៉ុណ្ណោះ។

បើតាមទិន្នន័យ នៃរបាយការណ៍បានឲ្យដឹងទៀតថា ប្រទេសបារាំង និង ប្រទេសប៉ូឡូញ ដែលសមាជិកសហគមន៍ អឺរ៉ុប ជាប្រទេសដែលកម្ពុជានាំ ចូលទៅច្រើនជាងគេ។ ក្នុងនោះប្រទេសបារាំងមានចំនួនជិត ១,៩ម៉ឺនតោន និង ប៉ូឡូញ មានចំនួន១,៧ម៉ឺនតោន។ ចំណែកតំបន់អាស៊ីវិញ ប្រទេស ម៉ាឡេស៊ី ថៃ និងចិន ជាអ្នកនាំចូលអង្ករកម្ពុជា ច្រើនជាងគេ ដែលម៉ាឡេស៊ីមានចំនួនជិត ១,៥ម៉ឺនតោន, ថៃ ចំនួន ១,៤២ម៉ឺនតោន និងចិនចំនួន ១,១៥ម៉ឺន តោន។ ក្រៅពីនេះ នៅមានប្រទេស ៣៧ប្រទេសផ្សេងទៀត ដែលបាននាំចូលអង្ករកម្ពុជា។

ប្រធានសហព័ន្ធ អ្នកនាំចេញអង្ករកម្ពុជា លោក ឧកញ៉ា គឹម សាវុធ និងជាប្រធានក្រុមហ៊ុន នាំចេញអង្ករខ្មែរហ្វូដ បានប្រាប់មជ្ឈមណ្ឌលព័ត៌មាន ដើមអម្ពិល នៅថ្ងៃទី២ ខែឧសភា ឆ្នាំ២០១៣ ថា «សហគមន៍អឺរ៉ុបនៅតែជាទីផ្សារ ដ៏សំខាន់សម្រាប់អង្ករកម្ពុជា ដោយសារតែប្រទេសទាំងអស់នោះ បានលើកលែងពន្ធនាំចូលផលិតផលពីកម្ពុជា ដែលធ្វើឲ្យយើង អាចប្រកួតប្រជែងជាមួយអង្ករប្រទេសផ្សេងៗបាន»។

ក្រុមហ៊ុនខ្មែរហ្វូដ រយៈពេល៤ខែនេះ បាននាំចេញអង្ករច្រើនជាងគេ ក្នុងចំណោមក្រុមហ៊ុននាំចេញអង្ករ ប្រមាណ ៥៦ក្រុមហ៊ុន ដោយនាំចេញអង្ករ បានជិត១,៥ម៉ឺនតោន។ លោក គឹម សាវុធ បានឲ្យដឹងថា សឹងតែ១០០ភាគរយ អង្កររបស់ក្រុមហ៊ុនខ្មែរហ្វូន បាននាំចេញទៅសហគមន៍អឺរ៉ុប។ នៅ ឆ្នាំ២០១៣ នេះ ខ្មែរហ្វូដ គ្រោងនាំអង្ករចេញឲ្យ បានប្រមាណ៣,៥ម៉ឺនតោន។

គួរបញ្ជាក់ថា រាជរដ្ឋាភិបាលកម្ពុជា មានផែនការនាំចេញអង្ករយ៉ាងតិច ឲ្យបាន១លានតោនក្នុងឆ្នាំ២០១៥ ។ កាលពីពេលថ្មីៗនេះ ប្រមុខរាជរដ្ឋា ភិបាល កម្ពុជាសម្តេចតេជោ ហ៊ុន សែន បានសម្តែងនូវក្តីសុទិដ្ឋិនិយមថា គោល នយោបាយនាំចេញអង្ករ របស់រាជរដ្ឋាភិបាល អាចនឹងសម្រេចតាម ផែនការ ដោយសារមើលឃើញពីកំណើននៃ ការនាំចេញអង្ករយ៉ាងឆាប់រហ័ស ជាពិសេសនៅដើមឆ្នាំ២០១៣នេះ៕

ផលិតផលទំនើបៗ ប្រកបដោយគុណភាពខ្ពស់ របស់Samsung ចំនួនបួនស៊េរី ដែលទទួលបាន ទទួលការគាំទ្រ  ពីសំណាក់មិត្តយុវវ័យ នាពេលកន្លងទៅនេះ បានអភិវឌ្ឍខ្លួនចេញ ស៊េរី La Fleur មួយប្រភេទទៀត ដែលផ្ដោតសំខាន់ និងសម្រិតសម្រាំង យ៉ាងពិសេសសម្រាប់ មិត្តនារីៗ។

Tablet និងទូរស័ព្ទទាំងបួន ម៉ូដែលរចនាថ្មី ជាពិសេសអម ដោយសំបកទូរស័ព្ទ រចនារូបផ្កា ពណ៌កាន់តែ ទាក់ទាញ Interface  កាន់តែស័ក្ដិសម ស្ថិតក្នុងដៃមិត្តយុវតី ក្នុងសម័យបច្ចេកវិទ្យា កាន់តែទំនើបទាំងនោះរួមមាន៖ Galaxy Tab 2 7.0អ៊ីញ, Galaxy S III mini, Galaxy Y និងប្រភេទទូរស័ព្ទបត់ម៉ាក C3520។ ក្រៅពីនេះ យុវនារីទាំងអស់អាចទាញយក កម្មវិធីជាច្រើនពីGoogle Play ជាពិសេស  គឺកម្មវិធីសម្រាប់តាមដានសុខភាព របស់អ្នកផ្ទាល់ដូចជា កម្ពស់ ទម្ងន់ របបអាហារ និងបរិមាណកាឡូរីជាដើម។

ទាក់ទិននឹង ការបន្ថែមជម្រើស ឲ្យកាន់តែសម្បូរ បែបពីលើផលិតផល ដែលទទួលបាន ការគាំទ្រច្រើនស្រាប់លើទីផ្សារនេះដែរ លោក វ៉ាត ឡាំផេង នាយកគ្រប់គ្រងផ្នែកទូរស័ព្ទ និងព័ត៌មានវិទ្យា នៃសាខាថៃSamsung អេឡិចត្រូនិកប្រចាំកម្ពុជា បានមានប្រសាសន៍ថា ការដាក់បន្ថែមជម្រើស កាន់តែពិសេស កាន់តែច្រើន គុណភាព នៅល្អដូចដើម នៃផលិតផល La Fleur ចំនួន ៤ស៊េរីនេះ គឺធ្វើទៅតាម ការទទូច ចង់បានពីសំណាក់យុវនារីកម្ពុជា ទាន់សម័យ នាពេលកន្លងទៅ។

ថ្នាក់ដឹកនាំរូបនេះ ក៏បានថ្លែងបន្តថា “ការរចនាកាន់តែល្អ ទាំងសំបក ពណ៌ និងមុខងារមួយចំនួនទៀត គឺសំដៅទៅរកភាពស៊ីចង្វាក់ បង្កើនភាពទាក់ទាញ ពីលើបច្ចេកវិទ្យាទំនើបអស្ចារ្យ ដែលមានស្រាប់”។

ម្យ៉ាងវិញទៀត សព្វថ្ងៃលោកសង្កេតឃើញថា មិត្តយុវវ័យកម្ពុជាភាគច្រើន ក្រៅពីព្យាយាមអភិវឌ្ឍខ្លួន ដើរឲ្យទាន់ឧស្សាហកម្ម បច្ចេកវិទ្យា ពួកគេបានបន្ថែមការតុបតែង លើឧបករណ៍ទំនើបៗ មិនថាទូរស័ព្ទ Tablet ម៉ាស៊ីនកុំព្យូទ័រ ឬផលិតផលអេឡិចត្រូនិក មួយចំនួនទៀត។ ឈរលើមូលហេតុកាត់ បន្ថយការចំណាយពេលវេលា និងប្រាក់កាសលើAccessory យុវវ័យកម្ពុជា បូករួមទាំង គំនិតច្នៃប្រឌិតឈានឡើងរបស់ Samsung ក្រុមហ៊ុនក៏សម្រេចចិត្ត បន្ថែមការរចនាសម្រាប់មិត្តនារីៗលើផលិតផលផ្ទាល់តែម្ដង។

Samsung La Fleur Collection ទាំងបួនជម្រើសមាន Galaxy Tab 2 7.0អ៊ីញ, Smartphone ពីរម៉ូដែលមាន Galaxy SIII mini និង Galaxy Y បូករួមទាំងទូរស័ព្ទ ស៊េរីបត់ម៉ាក C3520 មានលក់លើទីផ្សារកម្ពុជាហើយ មិត្តយុវវ័យទាំងអស់ ជាពិសេសមិត្តនារីៗ អាចរកជាវបាន នៅគ្រប់សាខា ហាងទំនើបស៊ាំស៊ុង និងតាមបណ្តា ហាងចែកចាយ ដទៃផ្សេងទៀត អមដោយការធានា រយៈពេលពេញ ១ឆ្នាំ៕

-ការធ្លាក់ចុះទំហំពាណិជ្ជកម្មទ្វេភាគីនេះ មិនពាក់ព័ន្ធបញ្ហាប្រាសាទព្រះវិហារទេ

ភ្នំពេញៈ ទំហំពាណិជ្ជកម្ម ទ្វេភាគីរបស់កម្ពុជា-ថែ នៅត្រីមាសទី១ ឆ្នាំ២០១៣ បាន ធ្លាក់ចុះតិចតួច ប្រមាណជិត៣ភាគរយ បើប្រៀបធៀបទៅនឹង រយៈពេលដូចគ្នា កាលពី ឆ្នាំ២០១២។

មន្ត្រីពាណិជ្ជកម្មប្រចាំស្ថានទូតថៃ ប្រចាំនៅកម្ពុជាបានថ្លែងថា ទំហំពាណិជ្ជកម្មរវាង ប្រទេសកម្ពុជា-ថៃ ធ្លាក់ចុះប្រមាណ ២,៣ភាគរយ ក្នុងនោះថៃនាំចេញ មកកម្ពុជា មានចំនួនទឹកប្រាក់ ១០០៥ លានដុល្លារ ថយចុះប្រមាណ ៤ ភាគរយធៀប នឹងត្រីមាសទី១ ហើយកម្ពុជានាំចេញ ទៅកម្ពុជាមានចំនួន ១០១ លានដុល្លារ កើនឡើងប្រមាណ ១៩ ភាគរយ។

អគ្គទីប្រឹក្សាពាណិជ្ជកម្មប្រចាំឯកអគ្គរាជទូតថៃប្រចាំប្រទេសកម្ពុជា លោក ស្រី ជីរ៉ាណាន់ វង្សមង្គល បានថ្លែងក្នុង សន្និសីទ សារព័ត៌មាន មួយកាលពីថ្ងៃទី២៩ ខែមេសា ឆ្នាំ២០១៣ ថា មូលហេតុដែលនាំឲ្យ មានការធ្លាក់ចុះបន្តិចបន្តួច នេះដោយសារ ប្រាក់បាតថៃមានស្ថានភាព ល្អប្រសើរជាងដែលដើមឆ្នាំ២០១២ ដែលឆ្នាំ២០១២ក្នុង ១ដុល្លារអាមេរិក មានអត្រាស្មើរនឹង៣២បាត ហើយដើមឆ្នាំ២០១៣ នេះ១ដុល្លារអាមេរិក មានអត្រាស្មើរនឹងជាង២៨បាត។

លោកស្រីបញ្ជាក់ដែរថា «កម្ពុជាប្រើប្រាស់រូបបិយវត្ថុប្រាក់ដុល្លារ ក្នុងការទិញទំនិញពីប្រទេសថៃ ដែលនាំឲ្យទំនិញទាំង នោះមានតម្លៃ កើតតិចតួចនាំឲ្យមាន ការប្រកួតប្រជែង ជាមួយផលិតផល មកពីប្រទេសដទៃ»។

មន្ត្រីពាណិជ្ជកម្មដដែលបន្តថា ការធ្លាក់ចុះតិចតួចនេះក៏ស្រពពេលដែលលុយ ដុង របស់ វៀតណាម និងលុយ យ៉េន របស់ជប៉ុន មានការធ្លាក់ថ្លៃ នាំឲ្យការនាំចូលទំនិញពីវៀតណាម និងជប៉ុន មានការកើនឡើងច្រើន នាំឲ្យមានការប្រកួត ប្រជែង។ លោកស្រីនៅតែរំពឹងដែរថា ស្ថានភាពពាណិជ្ជកម្មនៃប្រទេសកម្ពុជា និងថៃក្នុងឆ្នាំ២០១៣នេះ នៅតែល្អប្រសើរ ស្រពេលរាជរដ្ឋាភិបាលនៃប្រទេសទាំងពីរ ព្យាយាមជំរុញកំណើន ពាណិជ្ជកម្មឲ្យបានកើនឡើង យ៉ាងតិច៣០ភាគរយ ក្នុងមួយឆ្នាំៗ។

ឯកអគ្គរាជទូតថៃប្រចាំនៅកម្ពុជា លោក Touchayoot Pakdi មានប្រសាន៍ថា ការធ្លាក់ចុះបន្តិចនៃទំហំ ការនាំចូលពីប្រទេស ថៃ មកប្រទេសកម្ពុជានេះ មិនជាប់ពាក់ព័ន្ធនឹងបញ្ហា នយោបាយ ពិសេសបញ្ហា ទំនាស់រឿងក្តីប្រាសាទព្រះវិហាឡើយ។

លោកបន្តទៀតថា «បញ្ហាតុលាការអន្តរជាតិវាយតម្លៃអំពីការបកស្រាយ គឺធ្វើឡើងតាមលំដាប់លំដោយ ហើយបើទោះបី ជាលទ្ធផល ដែលនឹងប្រាប់នៅចុងឆ្នាំយ៉ាងណា គឺជាការសម្រេចរបស់តុលាការអន្តរជាតិ ហើយប្រជាជន និងរដ្ឋាភិបាលថៃ ទទួលស្គាល់ការសម្រេចនោះ»។

គួរបញ្ជាក់ថា បើតាមទិន្ន័យរបស់ស្ថានទូតថៃប្រចាំនៅកម្ពុជា ពាណិជ្ជកម្មទ្វេភាគីរវាងថៃ-កម្ពុជា ក្នុងឆ្នាំ២០១២ ទំហំ ទឹកប្រាក់ ចំនួន៣៨០០លានដុល្លារអាមេរិក គឺមានការកើនឡើង៤០ភាគ រយបើប្រៀបធៀបជាមួយនឹងឆ្នាំ២០១១។ ក្នុង នោះទំនិញនាំចូលពីប្រទេសថៃមកប្រទសកម្ពុជាមានទឹកប្រាក់៣៥០០លានដុល្លារអាមេរិក ចំណែកកម្ពុជានាំចេញ ទៅប្រទេសថៃ មានទឹកប្រាក់៣០០លានដុល្លារអាមេរិក៕

ភ្នំពេញៈ មន្ត្រីពាណិជ្ជកម្មស្ថានទូតថៃ ប្រចាំនៅកម្ពុជា បាន ថ្លែងនៅថ្ងៃទី ២៩ ខែមេសា ឆ្នាំ ២០១៣ ថា ប្រទេស ថៃគ្រោងនឹងបើក ពិព័រណ៍ពាណិជ្ជកម្មធំប្រចាំឆ្នាំ២០១៣ ចាប់ពីថ្ងៃទី២ ដល់ថ្ងៃទី៥ ខែឧសភា ឆ្នាំ២០១៣ នៅ កោះពេជ្រ ដោយមានស្តង់សរុប ៣៣៩ មកពីក្រុមហ៊ុនប្រមាណ ២៧០ក្រុមហ៊ុន មកពីប្រទេសថៃ។

អគ្គទីប្រឹក្សាពាណិជ្ជកម្ម ប្រចាំឯកអគ្គរាជទូតថៃ ប្រចាំប្រទេសកម្ពុជា លោក ស្រី ជីរ៉ាណាន់ វង្សមង្គល បានថ្លែង ក្នុងសន្និសីទសារព័ត៌មាន ស្តីពីពិព័រណ៍ពាណិជ្ជកម្ម នៅស្ថានទូតថៃប្រចាំនៅកម្ពុជាថា ពិព័រណ៍ពាណិជ្ជកម្មថៃ ដែលនឹងបើកដំណើរការ ថ្ងៃទី២ ខែឧសភា ដោយរដ្ឋមន្រ្តី នៃប្រទេសកម្ពុជា និងប្រទេសថៃចូលរួម។

អ្នកស្រីបន្តថា ក្រុមហ៊ុនដែលនាំទំនិញ មកដាក់តាំងបង្ហាញ និងស្វែងរកដៃគូលក់នៅកម្ពុជា មានផលិតផលជា ច្រើនដូចជា សម្ភារសំណង់, គ្រឿងបន្លាស់ម៉ាស៊ីន, អាហារ, ភេសជ្ជៈ , សម្លៀកបំពាក់, គ្រឿងសម្អាង, សម្ភារប្រើ ប្រាស់ក្នុងផ្ទះ, វត្ថុអនុស្សាវរីយ៍, គ្រឿងបន្លាស់រថយន្ត, សម្ភារធ្វើពីស្បែក, សម្ភារអគ្គិសនី និងគ្រឿងអេឡិចត្រូនិច ជាដើម។

ឯកអគ្គរាជទូតថៃ ប្រចាំនៅកម្ពុជា លោក Touchayoot Pakdi មានប្រសាសន៍ថា គោលបំណងសំខាន់ ក្នុងការ រៀបចំពិព័រណ៍នេះ គឺដើម្បីផ្សព្វផ្សាយផលិតផល មកពីប្រទេសថៃ ដែលជាផលិតផលមានគុណភាព តម្លៃ សមរម្យ និងដើម្បីថ្លែងអំណរគុណ ចំពោះអតិថិជន ដែលគាំទ្រទំនិញថៃ។ លោកប្រាប់ដែរថា ឱកាសនេះ ក៏នឹង មានការដាក់លក់ទំនិញ ពីម្ចាស់រោងចក្រផ្ទាល់ ក្នុងតម្លៃដែលអាចធានាថា ថោកជាងទីផ្សារយ៉ាងពិតប្រាកដ។

លោករំពឹងដែរថា កម្មវិធីនេះក៏នឹងអាចតភ្ជាប់ ទំនាក់ទំនងប្រជាជន និងប្រជាជននៃប្រទេសទាំងពីរ ឲ្យកាន់តែល្អ ប្រសើរឡើងថែមមួយកម្រិតទៀត។

ពាណិជ្ជកម្មទ្វេភាគី រវាងថៃនិងកម្ពុជា ក្នុងឆ្នាំ២០១២កន្លងមក មានទំហំទឹកប្រាក់ចំនួន ៣៨០០លានដុល្លារ អាមេរិក គឺមានការកើនឡើង៤០ភាគ រយបើប្រៀបធៀបជាមួយនឹងឆ្នាំ២០១១។ ក្នុងនោះទំនិញនាំចូល ពី ប្រទេសថៃមកប្រទសកម្ពុជា មានទឹកប្រាក់៣៥០០លានដុល្លារអាមេរិក ចំណែកកម្ពុជានាំចេញទៅប្រទេសថៃ មានទឹកប្រាក់៣០០លានដុល្លារអាមេរិក។

គួរបញ្ជាក់ផងដែរថា ឆ្នាំ២០១៣នេះ ថៃក៏នឹងធ្វើការដាក់តាំងពិព័រណ៍ផលិតផល ២លើកផ្សេងទៀត នៅផ្សារ ទំនើប ផារ៉ាហ្គនផងដែរ គឺលើកទី១ នឹងធ្វើទៅនៅថ្ងៃទី៣០ ខែឧសភា ដល់ថ្ងៃទី២ខែ មិថុនា ឆ្នាំ២០១៣ និងលើកទី២ នៅថ្ងៃទី១ ដល់ថ្ងៃទី៤ ខែសីហា ឆ្នាំ២០១៣៕

ភ្នំពេញ៖ ក្រុមហ៊ុន i-Qlick កាលពីថ្ងៃទី ២៧ ខែមេសា ឆ្នាំ ២០១៣ ដែលជាក្រុមហ៊ុន តំណាងចែកចាយផលិតផល Canon ក្នុងប្រទេសកម្ពុជា បានប្រារព្ធខួបលើកទី ២ ដើម្បីថ្លែងអំណរគុណដល់ដៃគូពាណិជ្ជកម្ម រួមជាមួយនឹងពិធីសម្ពោធ ដាក់លក់ ផលិតផល Canon ថ្មីៗផងដែរ។

លោក Andy Lee នាយកប្រតិបត្តិក្រុមហ៊ុន i-Qlick មានប្រសាសន៍ក្នុងពិធីនេះថា « ក្រុមហ៊ុន i-Qlick បានចាប់បើកដំណើរការ អស់រយៈពេលជាយូរមកហើយ ក្នុងនោះយើងក៏បានបើកសម្ពោធ ហាងតាំងលក់ផលិតផល Canon ចំនួន ៦ កន្លែង ក្នុង ហាងទំនើបធំៗ បានសហការជាមួយបណ្តាញចែកចាយ និងដៃគូសហការជាង ៥០០ កន្លែង។ យើងក៏បានបើកវគ្គបណ្តុះ បណ្តាលថតរូប និងស្ទូឌីយោថតរូបជំនាញរបស់ Canon ផងដែរ»។

លោកបាន បន្តទៀតថា «ជោគជ័យធំៗក្នុងថ្ងៃនេះ គឺជាការជួយជ្រោមជ្រែង ពីដៃគូពាណិជ្ជកម្មរបស់យើងខ្ញុំ ហើយយើងខ្ញុំ សូមថ្លែងអំណរគុណយ៉ាងជ្រាលជ្រៅ ជូនដល់ដៃគូទាំងអស់ នៅល្ងាចនេះ ជាមួយពិធីលៀងសាយភោជន ដ៏សប្បាយរីក រាយនេះ»។

កម្មវិធីជប់លៀង ថ្លែងអំណរគុណដៃគូពាណិជ្ជកម្ម របស់ក្រុមហ៊ុន i-Qlick មានកម្មវិធីលក់ផលិតផលក្នុងតម្លៃពិសេស រួម មានផលិតផល Canon ជាង ១៤ ម៉ូឌែលថ្មីៗសម្រាប់ដាក់លក់ជូន ជាពិសសសសម្រាប់ភ្ញៀវអញ្ជើញមកដល់មុនគេ។ លើស ពីនេះ ក្នុងឱកាសនោះផងដែរ i-Qlick ក៏បានបង្ហាញជូននូវផលិតផល Canon ចំនួន ១១ ម៉ូឌែលថ្មីៗ រួមមានប្រភេទម៉ាស៊ីនថត DSLR DOS 100D និង EOS 700D ម៉ាស៊ីនថតខ្នាតតូចស្រស់ស្អាត PowerShot A2600, IXUS 132, IXUS 135, IXUS 140, IXUS 255 រួមនឹងម៉ាស៊ីនព្រីន (Inkjet) ទំនើបសម្រាប់ការងារការិយាល័យ ៤ម៉ាកគឺ PIXMA 457, PIXMA E610, PIXMA iP7270, PIXMA MG5470។

សូមជម្រាបថា ភ្ញៀវទាំងអស់ដែលចូលរួម មានឱកាសសាកល្បង ប្រើផលិតផលថ្មីៗទាំងនេះមុនគេ នៅបញ្ជរតាំងផលិតផល ក្នុងសាលពិធីជប់លៀងស្រាប់ ហើយក៏មានឱកាសឈ្នះរង្វាន់ផលិតផលថ្មីៗនេះ នៅចុងកម្មវិធីផងដែរ៕

ភ្នំពេញ៖ប្រទេសកម្ពុជា បានប្រកាន់គោលជំហរថា នឹងនាំចេញ អង្ករ កៅស៊ូ ឲ្យបាន១លាន តោន ទៅប្រទេសម៉ាឡេស៊ី នៅក្នុងឆ្នាំ២០១៥ ខាងមុខនេះ ។

ការអះអាងបែបនេះ បានធ្វើឡើងនៅ ក្នុងកិច្ចជំនួបរវាងលោកឧបនាយករដ្ឋមន្រ្តី ហោ ណាំហុង រដ្ឋមន្រ្តីក្រសួងការ បរទេស ជាមួយលោក ដាតុ ប៉េងយឺរ៉ាន់ ហាជីម៉ូត ហូសេនបីន ឯកអគ្គរដ្ឋទូត ម៉ាឡេស៊ីចប់អាណត្តិ នាព្រឹកថ្ងៃ ទី២៩ ខែមេសា ឆ្នាំ២០១៣នេះ។

ភ្នំពេញ៖ ជាថ្មីម្តងទៀត មន្រ្តីប្រមុខការទូត នៃប្រទេសកម្ពុជា-ចិន បានថ្លែងអះអាង រួមគ្នាថា ទំហំពាណិជ្ជកម្ម នៃប្រទេសទាំងពីរ នឹងកើនឡើងរហូត ដល់៥ពាន់លានដុល្លារ នៅក្នុងឆ្នាំ២០១៥ ខាងមុខនេះ។

ការថ្លែងអះអាងបែបនេះ បានធ្វើឡើងនៅក្នុងពិធីជួប ពិភាក្សាងាររវាង លោកឧបនាយករដ្ឋមន្រ្តី ហោ ណាំហុង រដ្ឋមន្រ្តីក្រសួងការ បរទេសកម្ពុជា ជាមួយលោក Pan Guan Xue ឯកអគ្គរដ្ឋទូតចិន ចប់អាណត្តិ នាព្រឹកថ្ងៃទី២៩ ខែមេសា ឆ្នាំ២០១៣នៅ ទីស្តីការក្រសួង។