left
Safe Home
Safe Home
Safe Home

Dap News...Admin

Sunday, Aug 30th

| English Version | dapnews: 012 571 704, 097 9999 883, email: lim.cheavutha@gmail.com

You are here:

សហព័ន្ធ​បាល់ទាត់​កម្ពុជា​ ប្រកាស​ឧបត្ថម្ភថវិកា​ ១ម៉ឺន​ដុល្លារ​ ដល់​ក្រុម​ U-19 បើ​ឈ្នះ​ថៃ​ល្ងាចនេះ​ និង​ឧបត្ថម្ភ​២ម៉ឺន​ដុល្លារ​ពេលឆ្លង​ទៅវគ្គ​ផ្តាច់ព្រ័ត្ត​

ភ្នំពេញ : លោក ខៀវ សាម៉េត អនុប្រធានសហព័ន្ធបាល់ទាត់កម្ពុជា បានប្រកាសឲ្យដឹងថា តាមការឯកភាព ពីនាយឧត្តមសេនីយ៏ សៅ សុខា ប្រធានសហព័ន្ធ នឹងឧបត្ថម្ភថវិកា ១ម៉ឺនដុល្លារ ដល់ក្រុមជម្រើសជាតិកម្ពុជា U-19 បើសិនប្រកួតឈ្នះ ក្រុមកីឡាករ U-19 របស់ថៃនៅពេលល្ងាចម៉ោង ៤៖០០នាទីថ្ងៃទី៣០ ខែសីហា ឆ្នាំ២០១៥នេះ ហើយបានត្រៀមថវិកា ២ម៉ឺនដុល្លារ ទៀត បើសិនក្រុម U-19 អាចឆ្លងទៅវគ្គផ្តាច់ព្រ័ត្តនៃការប្រកួតពានរង្វាន់ជើងឯកយុវជនអាស៊ាន AFF U-19 Chapionship 2015 ដែលមានឡាវធ្វើម្ចាស់ផ្ទះ។

បើតាមលោក ខៀវ សាម៉េត សហព័ន្ធបាល់ទាត់កម្ពុជា បានឧបត្ថម្ភថវិកា ចំនួន៥ពាន់ដុល្លារ ដល់ក្រុម U-19 នៅពេលឈ្នះមួយប្រកួត ដូច្នេះក្រោយឈ្នះ២ប្រកួត គឺឈ្នះក្រុមកីឡាករ របស់ប្រទេស ប្រ៊ុយណេ និងក្រុមហ្វីលីពីន ក្រុម U-19 របស់កម្ពុជា ទទួលបានថវិកា ១មឺុនដុល្លារ ខណ:ដែលប្រកួតស្មើជាមួយក្រុមម្ចាស់ ផ្ទះឡាវ ទទួលបាន២៥០០ដុល្លារ។

លោក ខៀវ សាម៉េត បានបញ្ជាក់ថា ទឹកប្រាក់ឧបត្ថម្ភរបស់ សហព័ន្ធបាល់ទាត់កម្ពុជា U-19 ខាងលើនេះ គឺជាការលើកទឹកចិត្ត ដល់ក្រុមកីឡាករ របស់យើង ខិតខំប្រឹងប្រែង ឲ្យអស់ពីសមត្ថភាព ពេលប៉ះក្រុមជើងខ្លាំងប្រចាំតំបន់ គឺ U-19 ថៃ នៅល្ងាចថ្ងៃនេះតែម្តង៕

ជួយអបអរ! កីឡា​ល្បុក្ក​តោ​ខ្មែរ ឡើង​វគ្គ​ផ្ដាច់​ព្រ័ត្រ​នៃ​ព្រឹត្តិការណ៍ World Martial Art Union នៅកូរ៉េ

ភ្នំពេញ៖ អ្នកលេងក្បាច់គុនបុព្វបុរសខ្មែរ គឺកីឡាល្បុក្កតោ២នាក់ រួមមានកីឡាកររ ហត សេងហ៊ន និងកីឡាការិនី សំ ថារ័ត្ន បានធ្វើឲ្យពិភពលោកភ្ញាក់ផ្អើលទៀតហើយ បន្ទាប់ពីពួកគេប្រជែងបានកៅអីវគ្គផ្ដាច់ព្រ័ត្រនៅក្នុងព្រឹត្តិការណ៍ មហាស្របកីឡាយុទ្ធសិល្ប៍ចម្រុះពិភពលោក (World Martial Art Union) លើកទី១៤ ដែលកំពុងរៀបនៅទីក្រុង Chungiu សាធារណៈរដ្ឋកូរ៉េ ។

លោក វ៉ាត់ ចំរើន ប្រធានសហព័ន្ធកីឡាចំបាប់កម្ពុជា និជាអគ្គលេខាធិការគណៈកម្មាធិការជាតិអូឡាំពិកកម្ពុជា បានឲ្យ ដឹងនៅព្រឹកថ្ងៃទី២៩ ខែសីហានេះថា កាលពីម្សិលមិញ កីឡាករ ហត សេងហ៊ន និងកីឡាការិនី សំ ថារ័ត្ន បានប្រកួត ឈ្នះអ្នកលេងក្បាច់គុនបុរាណ មកពី៨ប្រទេសនៅ ក្នុងការប្រកួតវគ្គ ពាក់កណ្ដាលផ្ដាច់ ព្រ័ត្រលើវិញ្ញាសាសម្ដែងជាគូបុរស-នារី ។ ដូច្នេះថ្ងៃនេះអត្តពលិកតំណាងឲ្យក្បាច់គុនបុរាណខ្មែរទាំង ២នាក់ នឹងបន្ដការប្រកួតក្នុងវគ្គផ្ដាច់ព្រ័ត្រ ដោយត្រូវ ជួបក្រុមកីឡាករ-កីឡាការិនីមកពី ៤ប្រទេសផ្សេងទៀត ដែលសុទ្ធតែក្បាច់គុនបុរាណដូចគ្នា ។

ប្រធានសហព័ន្ធរូបនេះ បានបន្ដថា លទ្ធផលដ៏ល្អនាពេលនេះ គឺបានបញ្ជាក់ឲ្យឃើញពីភាពអស្ចារ្យនៃកីឡាក្បាច់គុន បុរាណខ្មែរ ដែលបន្សល់ទុកដោយ បុព្វបុរសជំនាន់ដើម បង្ហាញឲ្យពីពិភពលោកបានដឹង និងបានស្គាល់កាន់តែច្បាស់ អំពីវប្បធម៌អរូបិយតំណាងឲ្យប្រទេសជាតិកម្ពុជា ។ ជាងនេះទៅទៀត លោកក៏បានប្ដេជ្ញាធ្វើឲ្យណា ជំរុញឲ្យកីឡាល្បុក្កតោខ្មែរ ក្លាយទៅជាកីឡាបុរាណជាងគេក្នុងបញ្ជីបេតិកភ័ណ្ឌអរូបិយរបស់មនុស្សជាតិ ដែលទទួលស្គាល់ដោយ អង្គការ UNESCO ។

លោក វ៉ាត់ ចំរើន បានបញ្ជាក់ដែរថា នៅក្នុងព្រឹត្តិការណ៍ World Martial Art Union លើកទី១៤នេះ គឺមានការចូលរួម ពីបណ្ដាប្រទេស ដែលមានក្បាច់គុនបុរាណចំនួន ២៦ប្រទេស ប៉ុន្ដែក្នុងនោះមានតែ ២៤ប្រទេសប៉ុណ្ណោះ ដែលជាសមាជិករបស់សហព័ន្ធកីឡាយុទ្ធសិល្ប៍ចម្រុះពិភពលោក ។ លោកបានសង្កត់ធ្ងន់ថា «ចំពោះការប្រកួត ខាងលើ គឺគ្រាន់តែជាការបង្ហាញឲ្យគេបានឃើញ និងបានស្គាល់អំពីការក្បាច់គុនបុរាណតំណាងឲ្យប្រទេសនីមួយៗ ប៉ុន្ដែការ កាត់សេចក្ដីរកលទ្ធផលឈ្នះ-ចាញ់ វាអាស្រ័យលើការសម្ដែងស្រុះគ្នា និងមានមូលដ្ឋានក្បាច់គុណច្បាស់លាស់ឬក៏អត់ ។ តែបើកាត់សេចក្ដីដោយវិភាគពីក្បាច់គុណ គឺមិនអាចនោះទេ ព្រោះកីឡាក្បាច់គុនបុរាណ សុទ្ធតែជាតំណាង និងជា ដួងព្រលឹងនៃប្រទេសជាតិនីមួយៗដែលមិនអាចឲ្យតម្លៃបានឡើយ» ៕

SMG ផ្ដល់សេវាកម្ម «កញ្ចប់​ពិ​និត្យ​សុខ​ភាព​លំ​អិត​ប្រចាំ​ឆ្នាំ»

ភ្នំពេញ៖ ជាអ្នកផ្ដល់ការថែទាំសុខភាព ឯកទេសឯកជនមួយ ដែលមានបណ្ដាញគ្រួពេទ្យ ឯកទេសចំនួន ២២រូប។ ក្រុមការងារនេះប្ដេជ្ញាចិត្ដបំពេញ ការសន្យារបស់ខ្លួន ក្នុងការផ្ដល់ការថែទាំ និងបទពិសោធន៍ ផ្នែកវេជ្ជសាស្ដ្រដោយផ្ដោតលើអ្នកជំងឺ ដល់បុគ្គលគ្រប់រូប។

ដោយមើលឃើញពីតម្រូវការ និងផលពិបាករបស់លោកអ្នក ទើប SMG បានផ្ដល់នូវសេវាកម្ម «កញ្ចប់ពិនិត្យសុខភាពលំអិតប្រចាំឆ្នាំ» ដោយនៅក្នុងនោះ បុរសមានតម្លៃត្រឹមតែ ៤៣៣ដុល្លារអាមេរិក (៦០៨ ដុល្លាសាំងហ្គាពួរ) ខណៈដែលនារីមានតម្លៃ ៤៤៩ដុល្លារអាមេរិក (៦៣០ ដុល្លាសាំងហ្គាពួរ)។

ការពិនិត្យ និងវាយតម្លៃរាងកាយ

+ ប្រវត្ដិជំងឺ និងកំរិតហានិភ័យផ្សេងៗ

+ ពិគ្រោះជំងឺ និងការពិនិត្យរាងកាយដោយ វេជ្ជបណ្ឌិត

+ វាស់កំពស់ / ថ្លឹងទំងន់

+ ការវាស់សំពាធឈាម

តេស្ដពិនិត្យផ្សេងទៀត

+ ការពិនិត្យចង្វាក់បេះដូង (ECG)

ការថតពិនិត្យដោយកាំរស្មីអ៊ិច

+ ការថតពិនិត្យសួតដោយកាំរស្មីអ៊ិច

ការធ្វើតេស្ដឈាម

+ ទំរង់លំអិតគ្រាប់ឈាម

- ការររាប់គ្រាប់ឈាម

- ការរកអត្រាគ្រាប់ឈាមអេរីត្រូស៊ីត (ESR)

- ការរុករកប្រភេទឈាម

+ ជំងឺទឹកនោមផ្អែម

- ជាតិស្ករក្នុងឈាម

- HbA1C

+ តេស្ដលំអិតអំពីមុខងារតំរងនោម

+ ជាតិរ៉ែក្នុងឆ្អឹង និងសន្លាក់

- កាល់ស្យូម

- ផូស្វាត

- ប្រគ្រីវ (កំរិតអាស៊ីតអ៊ុយរិច)

+ កំរិតលីពីត/កូឡេស្ដេរ៉ូល (ខ្លាញ់)

+ តេស្ដលំអិតអំពីមុខងារថ្លើម

+ ការពិនិត្យក្រពេញទីរ៉ូអ៊ីត

- Free T3 & T4

- TSH

+ ការរុករកជំងឺរលាកថ្លើម និងអង់ទីគ័រការពារជំងឺថ្លើម

- ការពិនិត្យរកអង់ទីគ័រ និងជំងឺរលាកថ្លើមប្រភេទអា (A)

- ការពិនិត្យរកអង់ទីគ័រ និងជំងឺរលាកថ្លើមប្រភេទបេ (B)

- ការពិនិត្យរកជំងឺរលាកថ្លើមប្រភេទសេ (C)

+ ការរុករកជំងឺកាមរោគ

- ការពិនិត្យរកជំងឺស្វាយ ប្រមះ

- ការពិនិត្យរកមេរោគអេដស៍

+ ការរុករកជំងឺស្លេកស្លាំង

- ជាតិដែកក្នុងឈាម

-  វីតាមីនបេ 12 (B12)

+ ការវិភាគទឹកនោម

+ វិភាគរកឈាមក្នុងលាមក

+ ការរុករកជំងឺមហារីកតាមឈាម

- ការកំណត់កំរិតមហារីក - ថ្លើម (AFP)

- ការកំណត់កំរិតមហារីក - ពោះវៀនធំ និងក្រពះ (CEA)

- ការកំណត់កំរិតមហារីក - លំពែង (CA 19.9)

- ការកំណត់កំរិតមហារីក - ច្រមុះ (EBV EA + EBNA – 1 lgA)

- ការកំណត់កំរិតមហារីក - ក្រពេញប្រ៉ូស្ដាត (PSA) - សំរាប់បុរស

- ការកំណត់កំរិតមហារីក - ពងស្វាស/ ដុំកោសិកាម្យ៉ាងដែលដុះក្នុងដៃស្បូន (Beta HCG)

- ការកំណត់កំរិតមហារីក - អូវ៉ែ (ដៃស្បូន - CA125) - សំរាប់ស្ដ្រី

- ការកំណត់កំរិតមហារីក - សុដន់ (ដោះ - CA15.3) - សំរាប់ស្ដ្រី

+ កំរិតអ័រម៉ូន

+ ការរុករកជំងឺមហារីកមាត់ស្បូនតាមការធ្វើ ផាប់ស្មៀ

ការវាយតំលៃ និងរបាយការណ៍វេជ្ជសាស្ដ្រ

+ ការពិនិត្យឡើងវិញ និងការណែនាំដោយវេជ្ជបណ្ឌិតក្រោយពេលពិនិត្យ

+ របាយការណ៍វេជ្ជសាស្ដ្រ

+ ការណែនាំរបបរស់នៅ និងហូបចុក

សំគាល់៖ ការពិនិត្យសុខភាពនេះធ្វើឡើងក្នុងប្រទេសសាំងហ្គាពួរតែប៉ុណោ្ណះ!

អំពី អេសអឹមជី - SMG (ស៊ីងហ្គាពួរមេឌីខលគ្រូប Singapore Medical Group)
អេសអឹមជី - SMG គឺជាអ្នកផ្ដល់ការថែទាំសុខភាព ឯកទេសឯកជនមួយ ដែលមានបណ្ដាញគ្រួពេទ្យ ឯកទេសចំនួន ២២ ។ ក្រុមការងារនេះប្ដេជ្ញាចិត្ដបំពេញ ការសន្យារបស់ខ្លួនក្នុងការផ្ដល់ការថែទាំ និងបទពិសោធន៍ ផ្នែកវេជ្ជសាស្ដ្រដោយផ្ដោតលើអ្នកជំងឺ ដល់បុគ្គលគ្រប់រូប។

បច្ចុប្បន្ន ក្រុមការងារនេះ មានគ្លីនិកសរុបចំនួន ១៤ កន្លែង ដែលមានទីតាំងយុទ្ធសាស្ដ្រនៅក្នុង មជ្ឈមណ្ឌលឯកទេស Paragon មជ្ឈមណ្ឌលឯកទេស Mount Elizabeth Novena មជ្ឈមណ្ឌល វេជ្ជសាស្ដ្រ Novena និងមជ្ឈមណ្ឌលវេជ្ជសាស្ដ្រ Gleneagles ដែលមានបណ្ដាញគ្លីនិក SMG Associates កាន់តែច្រើនឡើងៗ។
សម្រាប់ព័ត៌មានបន្ថែមសូមទំនាក់ទំនង
បុគ្គលិកខ្មែរប្រចាំអេសអឹមជី (SMG)
ទូរស័ព្ទទំនាក់ទំនង ២៤ ម៉ោងៈ +65 9842 3560
អ៊ីម៉េលៈvanessa.sophors@smg.sg
ទីស្នាក់ការអេសអឹមជី - SMG ប្រចាំនៅកម្ពុជា
ទូរស័ព្ទ ៖ 092 852 923 / 097 7 668 266
អ៊ីមែល ៖ enquiry@singaporemedical.sg
វែបសាយ៖ www.singaporemedical.sg

អ្នកនំាពាក្យ៖ កីឡាករ​ជម្រើសជាតិ មិន​មក​ប្រឡង​បាក់​ឌុប ដោយ​មិន​ជូន​ដំណឹង​មុន ត្រូវ​ធ្លាក់​ដោយ​ស្វ័យ​ប្រវត្តិ

ភ្នំពេញ៖ អ្នកនំាពាក្យក្រសួងអប់រំ យុវជននិងកីឡា លោក រស់ សាលីន បានឲ្យដឹងថា «កីឡាករជម្រើសជាតិ U-19 ដែលជាប់បំពេញបេសកកម្ម ចូលរួមប្រកួតនៅក្រៅប្រទេស តែជាប់កាតព្វកិច្ចត្រូវប្រឡងបាក់ឌុប ហើយមិនមកប្រឡង ដោយមិនបានជូនដំណឹង មកក្រសួងអប់រំជាមុននោះទេ ត្រូវធ្លាក់ដោយស្វ័យប្រវត្តិ»។

ការលើកឡើងរបស់អ្នកនំាពាក្យក្រសួងអប់រំ នៅព្រឹកថ្ងៃទី២៧ ខែសីហា ឆ្នាំ២០១៥នេះ បានធ្វើឡើងបន្ទាប់ពីមានព័ត៌មានថា កីឡាករបាល់ទាត់ជម្រើសជាតិកម្ពុជាអាយុក្រោម១៩ឆ្នាំ (U19) ចំនួន៥នាក់ ដែលកំពុងជាប់បេសកកម្ម ប្រកួតក្នុងពានរង្វាន់ AFF U19 Championship នៅក្នុងទីក្រុងវៀងច័ន្ទ ប្រទេសឡាវនោះ អត់បានប្រឡងបាក់ឌុប ។

កីឡាករ U19 ទំាង៥នាក់ ដែលគេអះអាងថា ត្រូវប្រឡងបាក់ឌុប កាលពីថ្ងៃទី២៤-២៥ ខែសីហានាកន្លងទៅថ្មីៗនេះ ហើយកំពុងជាប់លេង ឲ្យក្រុមជម្រើសជាតិនៅប្រទេសឡាវ ពីថ្ងៃទី២២ ខែសីហា ដល់ ថ្ងៃទី០៤ ខែកញ្ញា ឆ្នាំ២០១៥ នោះរួមមាន៖ កីឡាករ ម៉ែន មុន្នីរ៉ា, គីម ហាប់, ទូច រ៉ូម៉ា, ជាម រតនា និងកីឡាករ ចិន វណ្ណៈ ។

យ៉ាងណាក៍ដោយបើតាមលោក រស់ សាលីន មកដល់ព្រឹកថ្ងៃព្រហស្បតិ៍នេះ ក្រសួងអប់រំមិនទាន់ បានទទួលឈ្មោះកីឡាករខាងលើដែលថា ត្រូវប្រឡងបាក់ឌុបនោះ នៅឡើយទេ ហើយថាគោលការណ៍ ការប្រឡងថ្នាក់ជាតិមួយឆ្នាំម្តង បេក្ខជនត្រូវគោរពតាមពេលវេលា។

រដ្ឋមន្រ្តីក្រសួងអប់រំ យុវជននិងកីឡា លោកបណ្ឌិត្យ ហង់ ជួនណារ៉ុន មិនអាចទាក់ទងដើម្បីសុំ ការបញ្ជាក់បន្ថែមបានទេ នៅវេលាថ្ងៃត្រង់នេះ។ ចំណែក លោកនាយឧត្តមសេនីយ៍ សៅ សុខា ប្រធានសហព័ន្ឋកីឡាបាល់ទាត់ជាតិកម្ពុជា ក៏មិនអាចទាក់ទង ដើម្បីសុំការអត្ថាធិប្បាយបានដែរ។

គួរបញ្ជាក់ដែរថា ក្រុមយុវជន U-19 កម្ពុជាទាំងនេះ បានបំពេញការប្រកួត បានយ៉ាងល្អនៅទឹកដីឡាវ ដោយបានឆ្លងកាត់ ២ប្រកួតឈ្នះ U-19 ប្រ៊ុយណេ ៥-១ និងលេងស្មើទល់នឹងម្ចាស់ផ្ទះ U-19 ឡាវ ០-០ និងកំពុងឈរនៅលេខ២ បណ្តោះអាសន្នប្រពូល A គ្រាដែលថៃឈរនៅលេខ១ ៕

ព្រះរាជអាជ្ញារង៖ កញ្ញា សាសា មិនបានចូលបំភ្លឺ នៅតុលាការ​ ខេត្តបាត់ដំបង តាមការកោះ ហៅទេ នៅព្រឹកនេះ

បាត់ដំបង៖ ព្រះរាជអាជ្ញារងអមសាលាដំបូង ខេត្តបាត់ដំបង បានថ្លែងប្រាប់ មជ្ឈមណ្ឌលសារព័ត៌មាន ដើមអម្ពិល នៅ ព្រឹកថ្ងៃទី២៧ ខែសីហានេះថា កញ្ញា ឯក សុជាតា ហៅ សាសា អតីតពិធីការិនីទូរទស្សន៍ CTN មិនបានចូលទៅបំភ្លឺ នៅតុលាការខេត្តបាត់ដំបងទេ នៅព្រឹកថ្ងៃទី២៧ ខែសីហា ឆ្នាំ២០១៥នេះ ដើម្បីសាកសួរក្នុងសំណុំរឿង បើកបរ បង្ក គ្រោះថ្នាក់ដល់អ្នកដទៃ រងរបួសដោយអចេតនា។

លោកបានថ្លែងបន្តថា «រហូតមកដល់ម៉ោង ៩៖០០នាទីព្រឹកថ្ងៃទី២៧ ខែសីហានេះ ជាពេលកំណត់ដែលតុលាការខេត្តបាត់ដំបង ចេញដីការឲ្យ កញ្ញា សាសា ចូលបំភ្លឺនោះ កញ្ញា សាសា នៅតែមិនទាន់ឃើញចូលមកបំភ្លឺ តាមដីកាកោះហៅនោះទេ ខណៈមន្ត្រីតុលាការ កំពុងរង់ចាំនាងផងដែរ»។

គួរជម្រាបថា តុលាការខេត្តបាត់ដំបង់ បានកោះហៅកញ្ញា សាសា ឲ្យចូលបំភ្លឺនៅថ្ងៃនេះ ពាក់ព័ន្ធនឹករណីបង្ក គ្រោះថ្នាក់ចរាចរណ៍ កាលពីយប់ថ្ងៃទី២ ខែសីហា ឆ្នាំ២០១៥ កន្លងទៅ ដោយ កញ្ញា សាសា និងមិត្តភក្តិ២នាក់ទៀត បានផឹកស៊ីក្នុងហាង «តោពីរ» ក្នុងក្រុងបាត់ដំបង រួចបើករថយន្តម៉ាក Porsche ពណ៌ស ពាក់ស្លាកលេខ ភ្នំពេញ 2AD-7888 ក្នុងស្ថានភាពស្រវឹង ទៅបុកអ្នកជិះម៉ូតូសណ្ដោង រ៉ឺម៉កដឹកទឹកកក បណ្ដាលឲ្យម្ចាស់ម៉ូតូរងរបួស៕

ជំងឺរលាក ផ្លូវដង្ហើម៖ របៀបជៀសវាង និងការពារខ្លួនអ្នក

ភ្នំពេញ៖ យោងតាមអង្គការ សុខភាពពិភពលោក បានឲ្យដឹងថា ជំងឺរលាកផ្លូវដង្ហើម គឺជាជំងឺដែលប៉ះពាល់ទៅ ដល់បំពង់ខ្យល់, ដែលឆ្លងតាម រយៈច្រមុះ, ទងសួតនិងសួត។ គេរាប់ចាប់ពីការឆ្លងជំងឺ ធ្ងន់ធ្ងរដូចជាជំងឺ រលាកសួត និងជំងឺរលាកទងសួត រហូតដល់ជំងឺរ៉ាំរ៉ៃដូចជាជំងឺហឺត និងជំងឺស្ទះផ្លូវដង្ហើម រ៉ាំរ៉ៃជាដើម។

ប្រព័ន្ធដង្ហើមលាតសន្ធឹង ពីផ្នែកខាងក្រៅនៃច្រមុះនិងមាត់ តាមរយៈផ្លូវដង្ហើមពីផ្នែកក្បាលនិង បំពង់ខ្យល់ទៅកាន់ កោសិកាសាច់សួត ជាកន្លែងដែលការផ្លាស់ប្តូរឧស្ម័នផ្លូវដង្ហើមកើតឡើងរវាងកោសិកាសាច់សួត និងសរសៃឈាម តូចៗ ដែលហូរនៅជុំវិញពួកគេ។

លោកវេជ្ជបណ្ឌិត ហ៊ីង គីម នៃក្រុមហ៊ុនសាណូហ្វី កម្ពុជា បាននិយាយថា៖ «នៅកម្ពុជា យើងមានធូលី ច្រើន ជា ពិសេសនៅតាមផ្លូវសាធារណៈ និងនៅក្នុងបរិយាកាសខាងក្រៅ។ លោកបន្តទៀតថា មនុស្ស អាចមានជំងឺ ផ្លូវដង្ហើមយ៉ាងងាយស្រួលដោយគ្រាន់តែដកដង្ហើមស្រូបមកវិញជាមួយនឹងធូលី និងផ្សែង ពុលជាដើម។

លោកវេជ្ជបណ្ឌិតបាបឲ្យដឹងទៀតថា៖ «ក្រៅពីការចម្លងអស់ទាំងនេះ មនុស្សក៏អាចឆ្លងតាមរយៈការប៉ះ ពាល់ ឬក៏នៅជិតអ្នកដែលបានឆ្លងជំងឺរលាកផ្លូវដង្ហើមដែរ»។

លោកក៏បានផ្តល់ជាដំបូន្មាន ទៅកាន់ប្រជាជនជាពិសេសអ្នកដែលរស់នៅកន្លែងសំបូរ ទៅដោយធូលីដីគួរតែ ការពារ ខ្លួនដោយ៖

-ពាក់ម៉ាសការពារធូលី
-ជៀសវាងការប៉ះពាល់យ៉ាងជិតស្និតជាមួយមនុស្សដែលមានជំងឺផ្លូវដង្ហើមធ្ងន់ធ្ងរ
-លាងដៃរបស់អ្នកឱ្យបានញឹកញាប់ជាមួយសាប៊ូនិងទឹកជាពិសេសបន្ទាប់ពីមានទំនាក់ទំនងដោយផ្ទាល់ ជាមួយអ្នកដែលបានឆ្លងជំងឺរលាកផ្លូវដង្ហើមឬបរិស្ថានរបស់គាត់
- ការប្រកាន់ខ្ជាប់ទៅនឹងអនាម័យនិងសុវត្ថិភាពចំណីអាហារ។

លោកវេជ្ជបណ្ឌិត គីម ក៏ផ្តល់ជាដំបូន្មានបន្ថែមទៀតចំពោះអ្នកដែលមានជំងឹផ្លូវដង្ហើមធ្ងន់ធ្ងរ ឬកំពុងមានរោគសញ្ញា នៃជំងឺផ្លូវដង្ហើម ដែលសំបូរទៅដោយស្លេសក្នុងបំពង់ករបស់ពួកគេនោះ គួរតែមានភាពប្រុងប្រយ័ត្ន ពីព្រោះរោគ សញ្ញានេះ អាចបណ្តាលឲ្យធ្ងន់ធ្ងរជាងមុន ឬឈានដល់ការស្លាប់ជាដើម ដោយហេតុថាមនុសពិបាកដកដង្ហើម អស់កម្លាំងនៅពេលមានស្លេសក្នុងបំពង់កកើនឡើងច្រើន។ ដូចេ្នះលោកបានប៉ុន្តែមទៀតថា អ្នកដែលកំពុងជួបពី បញ្ហាជំងឺនេះគួរតែទៅពីគ្រោះជាមួយវេជ្ជបណ្ឌិតរឺ គ្រូទេព្យដែលមានជំនាញដែលនៅជិត អ្នកអោយបាន ឆាប់រហ័ស៕

ស្ថានីយទូរទស្សន៍ SEATV បើកការប្រកួតជើងឯក ខ្សែក្រវាត់ «K.CEMENT វគ្គ២»

ភ្នំពេញ៖ ស្ថានីយទូរទស្សន៍SEA-TV និងសហព័ន្ធកីឡាប្រដាល់កម្ពុជា បានសហការជាមួយ ក្រុមហ៊ុន K.CEMENT បានប្រកាសជាផ្លូវការ និងធ្វើសន្និសីទសារព័ត៌មាន ស្តីពីប្រកួតប្រដាល់ក្បាច់បុរាណគុនខ្មែរ ក្នុងប្រភេទទម្ងន់ ៦៣.៥ គីឡូក្រាម មានរហ័សនាមថា ជើងឯកខ្សែក្រវាត់ K.CEMENT វគ្គ២ របស់ខ្លួន ដែលមានកីឡាករចំនួន ៨នាក់ ដើម្បីឲ្យកក្រើកនៅសង្វៀន SEA-TV វេលាម៉ោង២រសៀល នៅថ្ងៃទី ៥ កញ្ញា នេះតទៅ។

ក្នុងពិធីសន្និសីទសារព័ត៌មាន បើកព្រឹត្តិការណ៍ខាងលើកនេះ ធ្វើឡើងនៅព្រឹកថ្ងៃទី ២៥ សីហា ឆ្នាំ ២០១៥នេះ ក្នុង ទីលានស្ថានីយទូរទស្សន៍SEATV ដោយមានការអញ្ជើញ ចូលរួមពីលោក តែម ម៉ឺន ប្រធានសហព័ន្ធ កីឡាប្រដាល់ កម្ពុជា , លោក គិត គឹមអ៊ន ប្រធានផ្នែកលក់ ក្រុមហ៊ុន K.CEMENT និងលោក ហេង សុធា នាយកទីផ្សារ និងទំនាក់ទំនង សាធារណៈស្ថានីយទូរទស្សន៍ SEATV ។

លោក ហេង សុធា នាយកទីផ្សារ និងទំនាក់ទំនងសាធារណៈស្ថានីយទូរទស្សន៍SEATV បានមានប្រសាសន៍ថា នេះជាបានបើករដូវកាលទី២នៃការប្រកួតនេះ ដែមានប្រសិទ្ធនាមថា «ជើងឯកខ្សែក្រវាត់ K.CEMENT » ដោយមាន កីឡាករ ចំនួន ៨រូប បានជ្រើសរើសយ៉ាងសម្រិតសម្រាំងបំផុត តាមបណ្តាក្លឹប និងសមាគមប្រដាល់ខេត្ត-ក្រុង ដែលមួយក្លឹបរើស យកតែកីឡាកម្នាក់គត់ ដើម្បីឲ្យពួកគេធ្វើការប្រជែងគ្នា នៅលើសង្វៀនSEATV ក្នុងការទទួល ជយលាភីម្ចាស់ ខ្សែក្រវ៉ាត់ K.CEMENT និងប្រាក់រង្វាន់ចំនួន២០លានរៀល (៥០០០ដុល្លារអាមេរិក) ។

លោកបានបន្តថា នេះក៏ជាការបើកទំព័រថ្មីរបស់ស្ថានីយទូរទស្សន៍ SEATV បន្ទាប់ពីបានទទួលការគាំទ្រយ៉ាងខ្លំាង ពីទស្សនិកជន និងអ្នកគាំទ្រស្ថានីយ ទើបបង្កើតការប្រកួតជើងឯកខ្សែក្រវាត់ K.CEMENTវគ្គ២នេះតែម្តង។

លោក តែម ម៉ឺន ប្រធានសហព័ន្ធកីឡា ប្រដាល់កម្ពុជា បានថ្លែងក្នុងឱកាសនេះថា កីឡាករទាំងអស់ ត្រូវប្រកួត ឲ្យអស់ពី សមត្ថភាពរបស់ខ្លួន ហើយលោកនឹងបង្កើត ក្រុមប្រឹក្សាវិន័យមួយ ក្នុងគណៈកម្មការបច្ចេកទេស ដើម្បីត្រួត ពិនិត្យមើលការប្រកួត ក៏ដូចជាការកាត់ក្តី និងលទ្ធផល សម្រាប់គូខ្សែក្រវាត់នេះ ។ ជាមួយគ្នានេះ លោកបានជំរុញឲ្យ មន្ត្រីបច្ចេកទេស អាជ្ញាកណ្ដាល ចៅក្រម ត្រូវតែប្រកាន់ជំហរអព្យាក្រឹត យុត្តិធម៌ ត្រឹមត្រូវក្នុងការកាត់ សេចក្ដីឈ្នះចាញ់ ។ ចំពោះកីឡាករវិញ ត្រូវតែធ្វើខ្លួនឲ្យបានល្អ គោរពឲ្យបានដាច់ខាត នូវវិន័យ សីលធម៌ ពិសេសត្រូវរក្សាទម្ងន់ របស់ខ្លួន ៦០គ.ក្រ ឲ្យបានល្អ ។

លោក គិត គឹមអ៊ន ប្រធានផ្នែកលក់ និងជាតំណាង ក្រុមហ៊ុន K.CEMENT បានបញ្ជាក់ថា ក្នុងការប្រកាស ជាផ្លូវការបើកជើងឯកខ្សែក្រវាត់ K.CEMENT វគ្គ២ ក្រោមការឧត្ថម្ភទាំងស្រុង ក្នុងកម្មវិធីប្រកួតប្រដាល់គុនខ្មែរ រដូវកាលថ្មីនេះ ដោយក្រុមហ៊ុនបានមើលឃើញ សន្ទុះនៃការគាំទ្រយ៉ាងខ្លាំង នៅស្ថានីយទូរទស្សន៍អាស៊ីអាគ្នេយ៍ តាំងពីរដូវកាលមុនមក។

លោកបានបន្តថា កម្មវិធីប្រដាល់ខាងលើនេះ ក្រុមហ៊ុនបានសម្រេចដាក់បន្ថែម ការប្រកួតលក្ខណៈ មិត្តភាព អន្តរជាតិ២ សប្តាហ៍ជារៀងរាល់ខែ ដោយមួយសប្តាហ៍ នឹងមានការប្រកួតមិត្តភាព អន្តរជាតិ២គូ ដើម្បីជាការឆ្លើយតប ចំពោះការគាំទ្ររបស់អ្នកស្នេហាវិស័យកីឡាប្រដាល់ក្បាច់ គុនបុរាណខ្មែរ ក៏ដូចជាអ្នកគាំទ្រកម្មវិធី កំពូលអ្នកប្រដាល់ ជើងឯក K.CEMENT ។

ការប្រកួតជើងឯកខ្សែក្រវាត់ K.CEMENT កីឡាករទាំង៨រូប រួមមាន ស៊ូ វណ្ណៈ , ឆៃ សារ៉ា , សល់ ពិសិដ្ឋ , តក់ សោភ័ណ្ឌ , ប្រាក់ រស្មី , ឯម លីថូ , ហេង វាសនា និងសេង ស្រឿន៕

រឿង«អណ្ដូងមរណៈ» របស់​ផលិត​​កម្ម LD មានឈុត​ឆាក​ភ័យ​រន្ធត់​ច្រើន ជាង​រឿង​មុនៗ

ភ្នំពេញ៖ ផលិតកម្ម LD Picture បានដាក់បញ្ចាំងខ្សែភាពយន្ត ដែលជាស្នាដៃទី១៣ របស់ខ្លួន មានចំណងជើងថា «អណ្ដូងមរណៈ» នៅរោងភាពយន្ត Legend TK កាលពីល្ងាចថ្ងៃទី២៤ ខែសីហា ឆ្នាំ២០១៥នេះ ក្រោមការរំពឹងខ្ពស់ នូវភាពជោគជ័យ ពីចាងហ្វាងផលិតកម្ម លោក លៀក លីដា ក្នុងការទទួលបានការគាំទ្រ ដូចបណ្ដារឿងមុនៗ ដែលតែងតែមានអ្នក ចូលទស្សនាច្រើនសន្ធឹកសន្ធាប់ ពេលផលិតកម្មរបស់លោក បញ្ចាំងម្ដងៗ។ ពិធីចាក់បញ្ចាំង ជាផ្លូវការ រឿង«អណ្ដូងមរណៈ» នេះ មានការចូលរួមពីសំណាក់ តារាសម្ដែង តារាកំប្លែងល្បីៗ និងតួអង្គសំខាន់ៗក្នុងរឿង ព្រមទាំងទស្សនិកជន ដែលទន្ទឹងរង់ចាំទស្សនា ជាច្រើននាក់។

លោក លៀក លីដា ផលិតករ និងជាចាងហ្វាងផលិតកម្ម LD Picture បានថ្លែងក្នុងពិធីចាក់បញ្ចាំងនោះថា រឿង «អណ្ដូងមរណៈ» ជាប្រភេទរឿងថ្មី ពោរពេញដោយឈុតឆាកខ្មោច ព្រាយបិសាច ភ័យរន្ធត់ លាយឡំបែបកំប្លែង និង មានលក្ខណៈខុសប្លែកពីគេ ដោយបានសម្រិតសម្រាំងឡើង យ៉ាងល្អិតល្អន់ សម្រាប់អ្នកទស្សនា និងជាស្នាដៃទី១៣ បន្ទាប់ពីរឿង «ឪ២» របស់នាយ ពាក់មី ដែលបានចាក់បញ្ចាំង កាលពីខែមុន។

លោក លៀក លីដា និយាយថា« សាច់រឿងនេះ ប្លែកពីមុនបន្តិចត្រង់ថា មានឈុតឆាកភ័យរន្ធត់ ច្រើនជាងឈុតឆាកកំប្លែង ព្រោះកន្លងមក ផលិតកម្ម LD តែងតែធ្វើរឿងកំប្លែងសុទ្ធ ហើយសាច់រឿងយ៉ាងណានោះ ខ្ញុំសូមមិនធ្វើការបកស្រាយច្រើនទេ ទុកឲ្យទស្សនិកជន បងប្អូនចូលទស្សនាចុះ..! តើល្អមើល ឬមិនល្អមើល គឺបងប្អូននឹងដឹងហើយ...!»។

ទោះបីជាយ៉ាងណា លោក លៀក លីដា បានដាក់ក្ដីសង្ឃឹមថា រឿងនេះ នឹងមានអ្នកទស្សនាច្រើន ពេលដាក់បញ្ចាំងគ្រប់រោងភាពយន្ត ទំនើបនានា ក្នុងក្រុងភ្នំពេញ ព្រោះតួសម្ដែងសុទ្ធសឹង តែជាតួល្បីៗ មានបទពិសោធន៍ និងមានការគាំទ្រពីទស្សនិកជន ហើយសាច់រឿងត្រូវបានលោកជឿជាក់ ទៅលើគុណភាព និងបច្ចេកទេសជាចំបង។ លោកគិតថា រឿង«អណ្ដូងមរណៈ» គឺជារសជាតិ និងទស្សនីយភាពថ្មីមួយទៀត សម្រាប់ទស្សនិកជន ។

សូមបញ្ជាក់ថា រឿង «អណ្ដូងមរណៈ» ចូលរួមសម្ដែងដោយ តារាល្បីៗ ក្នុងប្រទេសកម្ពុជា រួមមាន កញ្ញា ម៉ាក សែនសូនីតា, នាយចឺម, លោក សឿន វីតា, អ្នកនាង អ៊ីត, កញ្ញា ហេង ស្រីពេជ្រ លោក ងួន សុបិន ព្រមទាំងតារាកំប្លែង និងតារាសម្ដែងល្បីៗ ជាច្រើនដួងទៀត ៕

U-19 កម្ពុជា ចាប់ផ្តើមចេញដំណើរ​ ដោយប៉ះម្ចាស់ផ្ទះឡាវ នៅម៉ោង ៧យប់នេះ

ភ្នំពេញ៖ ក្រុមបាល់ទាត់ឈុតតូចជម្រើសជាតិ យុវជនអាយុក្រោម ១៩ឆ្នាំកម្ពុជា នឹងត្រូវធ្វើការប្រកួតបើកឆាកប្រចាំពូល A សន្សំពិន្ទុ ដោយត្រូវជួបម្ចាស់ផ្ទះ U-19 របស់ឡាវ នាម៉ោង ៧៖០០នាទីយប់នេះ (ម៉ោងនៅកម្ពុជា) នៃព្រឹត្តិការណ៍ ពានរង្វាន់យុវជនប្រចាំតំបន់អាស៊ាន AFF U-19 Youth Championship លើកទី១២ ឆ្នាំ២០១៥ ។

U-19 កម្ពុជា ធ្លាប់ជួប U-19 ឡាវតែម្តងគត់ និងបានបរាជ័យទាំងប្រផិតប្រផើយ ៣-២ នៅទឺកដីកណ្តាលកាលពីខែ កញ្ញា ឆ្នាំ២០១៣ កន្លងទៅ ដោយនឹងត្រូវជម្រះបញ្ជីចាស់នាយប់នេះបន្តទៀតក្នុងនាមជាក្រុម ដែលកំពុងឡើងជើងដូច គ្នា ក្រៅពីឈុតធំបានលេងស្មើ ១-១ ក្នុងមិត្តភាពកាលពីដើមខែមិថុនា ឆ្នាំ២០១៥ នៅកីឡដ្ឋានអូឡាំពិកកម្ពុជា ។

U-19 ឡាវ ជាក្រុមឧបសគ្គទី១ ក្រៅពី U-19 ថៃ ក្នុងចំណោម៥ក្រុមដែលស្ថិតក្នុងពូល A ជាមួយគ្នាមាន កម្ពុជា ឡាវ ថៃ ប្រ៊ុយណេ និងហ្វីលីពីន គ្រាដែលពូល B មានក្រុមវៀតណាម មីយ៉ាន់ម៉ា សិង្ហបុរី ទីម័រខាងកើត និងម៉ាឡេស៊ី ដើម្បី ឈ្នះកៅអីមួយឡើង ទៅវគ្គពាក់កណ្តាលផ្តាច់ព្រ័ត្រ នេះបើយោងតាមការបញ្ជាក់ឲ្យដឹង របស់លោក រិទ្ធ ឌីកា គ្រូបង្វឹក U-19 កម្ពុជាកាលពីចេញដំណើរថ្ងៃទី២០ សីហា ហើយ៣ពិន្ទុនៅរាត្រីថ្ងៃសៅរ៍ ទី២២ ខែ សីហា ឆ្នាំ២០១៥នេះសំខាន់ ណាស់សម្រាប់កម្ពុជា ដើម្បីឡើងទៅឈរនៅកំពូលតារាងបណ្តោះអាសន្ន ប្រសិនបើឈ្នះ ។

គួររំលឹកដែរថា មុនចេញដំណើរទៅឡាវ U-19 កម្ពុជា ក៏បានយកឈ្នះក្រុម U-19 មីយ៉ាន់ម៉ា ៣-១ ដែរក្នុងមិត្តភាពអន្តរ ជាតិនៅទឹកដីថៃ គ្រាដែលអ្នកស្នេហាវិស័យកីឡាជាតិ បានគាំទ្រ និងលើកទឹកចិត្តជាខ្លាំង ដើម្បីជំរុញឲ្យកីឡាករយុវជន កម្ពុជាទទួលបានជ័យជំនះត្រឡប់មកវិញផងដែរ ៕

Page 1 of 6

  •  Start 
  •  Prev 
  •  1 
  •  2 
  •  3 
  •  4 
  •  5 
  •  6 
  •  Next 
  •  End