ប៊ែរឡាំងៈ ក្រុមហ៊ុន​ផលិត​រថយន្ត​អាល្លឺម៉ង់ Mercedes-Benz បាន​អះអាង​ជា​ថ្មី​ម្តង​ទៀត​ការ​ប្រឆាំង​របស់​ខ្លួន ចំពោះ​ការ​ដំឡើង​ពន្ធ​របស់​សហភាព​អឺរ៉ុប លើ​រថយន្ត​អគ្គិសនី​របស់​ចិន (EVs) ដោយ​ជំរុញ​ឱ្យ​មាន​ការ​ពន្យារពេល ​ក្នុង​ការ​អនុវត្ត​វិធានការ​ដ៏ចម្រូងចម្រាស​ទាំងនេះ ដើម្បី​ចៀសវាង​ការ​ប៉ះពាល់​ ដល់​ផលប្រយោជន៍​របស់​ប្រទេស​ភាគីទាំងពីរ។ នាយកប្រតិបត្តិក្រុមហ៊ុន Mercedes-Benz លោក Ola Kaellenius បានប្រាប់សារព័ត៌មានអាល្លឺម៉ង់ Bild កាលពីថ្ងៃចន្ទថា “យើងត្រូវការពាណិជ្ជកម្មសេរីបន្ថែមទៀត មិនមែនជាឧបសគ្គបន្ថែមទេ” ។  លោកបានសង្កត់ធ្ងន់ថា ពន្ធដែលបានស្នើឡើងនឹងបរាជ័យ ក្នុងការលើកកម្ពស់ការប្រកួតប្រជែង ជាសកលរបស់សហភាពអឺរ៉ុប ដែលជាកត្តាសំខាន់សម្រាប់ការ ផ្លាស់ប្តូរដ៏ជោគជ័យរបស់ប្លុក និងកំណើនសេដ្ឋកិច្ចរយៈពេលវែង។ នៅពេលដែលថ្ងៃផុតកំណត់សម្រាប់ពន្ធ ដែលបានគ្រោងទុកកាន់តែខិតជិតមកដល់ Kaellenius បានអំពាវនាវឱ្យអឺរ៉ុប ស្វែងរកដំណោះស្រាយដែលមានតុល្យភាព ដែលផ្តល់ផលប្រយោជន៍ដល់ភាគីទាំងពីរ។ លោក​បាន​សង្កត់​ធ្ងន់​ថា ការ​ចរចា​នឹង​ត្រូវ​ការ​ពេល​វេលា ហើយ​បាន​ជំរុញ​ឱ្យ​សហភាព​អឺរ៉ុប​ បន្ត​ការ​ពិភាក្សា​ដើម្បី​ចៀសវាង​ការ​បង្កើន​ជម្លោះ។ ឧស្សាហកម្មរថយន្តអាល្លឺម៉ង់ និងរដ្ឋាភិបាលសហព័ន្ធ បានចែករំលែកកង្វល់របស់ក្រុមហ៊ុន Mercedes-Benz ។  ទាំងពីរបានសម្តែងការប្រឆាំងយ៉ាងច្បាស់ ចំពោះពន្ធការពារនិយម ដោយព្រមានថាវិធានការបែបនេះអាច បង្កឱ្យមានការឡើងថ្លៃពន្ធ ឬសូម្បីតែសង្គ្រាមពាណិជ្ជកម្ម ដែលចុងក្រោយគំរាមកំហែងដល់ ផលប្រយោជន៍សេដ្ឋកិច្ចផ្ទាល់របស់សហភាពអឺរ៉ុប ៕ ប្រែសម្រួល ឈូក បូរ៉ា