បរទេស៖ យោងតាមការចេញផ្សាយរបស់ RT មន្ទីរបញ្ចកោណកំពុងរៀបចំផែនការ សម្រាប់ការដកទ័ពអាមេរិកទាំងស្រុង ចេញពីប្រទេសស៊ីរី ។ ស្ថិតនៅក្រោមរដ្ឋាភិបាលគ្រប់គ្រងដោយលោក Donald Trump ដែលលោកបានលើកឡើងថា ការចូលរួមផ្នែកយោធារបស់អាមេរិក នៅក្នុងប្រទេសនេះមិនមានគោលបំណង មានប្រយោជន៍នោះទេ។ ទាហាន​អាមេរិក​បាន​ចូលទៅ ក្នុងប្រទេស​ស៊ីរីតាំងតែពី​ក្នុង​ឆ្នាំ ២០១៤ ក្រោម​លេស​នៃ​ការ​ប្រយុទ្ធ​ប្រឆាំង​នឹង​ក្រុម​រដ្ឋ​ឥស្លាម (IS ដែល​ជា​អតីត​ក្រុម ISIS) ហើយ​បាន​រក្សា​វត្តមាន​ក្នុង​ប្រទេស​តាំង​ពី​ពេល​នោះ​មក ទោះ​បី​ជា​មិន​ដែល​ត្រូវ​បាន​ក្រុង​ដាម៉ាស​ស្នើសុំឬស្វាគមន៍ក៏ដោយ។ យោងតាមពីប្រភពរបស់ ​​NBC កាលពីថ្ងៃអង្គារ ផងដែរមន្ត្រីការពារជាតិអាមេរិក បានចាប់ផ្តើមរៀបចំផែនការដកទ័ព ដោយមានពេលវេលាកំណត់ពី៣០ទៅ ៩០ថ្ងៃ។ គួរឲ្យដឹងដែរថាប្រភពពីមន្ត្រីយោធា សុំមិនបញ្ចេញឈ្មោះចំនួន២រូប បានប្រាប់បណ្តាញថា ទីប្រឹក្សាសន្តិសុខជាតិថ្មីរបស់លោក Trump គឺលោក Mike Waltz ថាបានជួបជាមួយមេបញ្ជាការយោធាជាន់ខ្ពស់ នៅទីស្នាក់ការកណ្តាលនៃបញ្ជាការកណ្តាល របស់សហរដ្ឋអាមេរិកនៅទីក្រុង Tampa រដ្ឋហ្វ្លរីដាកាលពីថ្ងៃសុក្ររួចទៅហើយ ដែលជាកន្លែងដែលគាត់ត្រូវបានគេរាយការណ៍ថា បានសង្ខេបអំពីស្ថានភាពនៅមជ្ឈិមបូព៌ា ៕ ប្រែសម្រួល៖ ស៊ុន លី