គៀវ៖ ទីភ្នាក់ងារសារព័ត៌មាន Interfax-Ukraine បានរាយការណ៍ថា នាយករដ្ឋមន្ត្រីអ៊ុយក្រែនលោក Denys Shmyhal បានប្រកាសថា រដ្ឋាភិបាលរបស់លោកបានអនុម័តវិធានការចាំបាច់ សម្រាប់ការចុះហត្ថលេខាលើកិច្ចព្រមព្រៀង ភាពជាដៃគូផ្នែករ៉ែកម្រងជាមួយសហរដ្ឋអាមេរិក។ លោក Shmyhal បានលើកឡើងថា “ថ្ងៃនេះរដ្ឋាភិបាលកំពុងធ្វើការសម្រេចចិត្ត ចាំបាច់សម្រាប់ការចុះហត្ថលេខា លើកិច្ចព្រមព្រៀងរវាងអ៊ុយក្រែន និងសហរដ្ឋអាមេរិក” នេះបើយោងតាមការចុះផ្សាយរបស់ ទីភ្នាក់ងារសារព័ត៌មានចិនស៊ិនហួ ។ លោក Shmyhal បានបន្ដថា នៅក្រោមកិច្ចព្រមព្រៀងនេះ អ៊ុយក្រែន និងសហរដ្ឋអាមេរិក ត្រូវបានកំណត់ដើម្បីបង្កើតមូលនិធិវិនិយោគរួមមួយ ដែលនឹងត្រូវគ្រប់គ្រង និងគ្រប់គ្រងដោយរដ្ឋាភិបាលទាំងពីរ។ លោកបានសង្កត់ធ្ងន់ថា ធនធានរ៉ែអ៊ុយក្រែននឹងនៅតែជាកម្មសិទ្ធិរបស់អ៊ុយក្រែន ហើយនឹងមិនត្រូវផ្ទេរទៅជាកម្មសិទ្ធិ របស់សហរដ្ឋអាមេរិកឡើយ។ យោងតាមកិច្ចព្រមព្រៀងនេះ អ៊ុយក្រែននឹងរួមចំណែក ៥០ ភាគរយ នៃប្រាក់ចំណូលនាពេលអនាគតរបស់ខ្លួន ពីធនធានធម្មជាតិរបស់ខ្លួនទៅមូលនិធិ ខណៈដែលសហរដ្ឋអាមេរិកនឹងផ្តល់មូលនិធិ ដើម្បីគាំទ្រដល់ការស្តារឡើងវិញរបស់អ៊ុយក្រែន ៕ ប្រែសម្រួល ឈូក បូរ៉ា