បរទេស៖ សហរដ្ឋអាមេរិក តាមសេចក្តីរាយការណ៍ បានបើកការវាយប្រហារតាមផ្លូវអាកាសថ្មី សំដៅទៅលើទីក្រុងកំពង់ផែ Hodeidah ប្រទេសយេម៉ែន បន្ទាប់ពីមេដឹកនាំចលនា ហួធី លោក Sayyed Abdul Malik al-Houthi បាននិយាយសុន្ទរកថាដ៏ក្ដៅគគុកថ្កោលទោសការវាយប្រហារ និងគំរាមកំហែងដល់សកម្មភាពយោធាដោយផ្ទាល់ប្រឆាំងនឹងកងកម្លាំងជើងទឹកអាមេរិក។ យោងតាមសារព័ត៌មាន RT ចេញផ្សាយនៅថ្ងៃទី១៧ ខែមីនា ឆ្នាំ២០២៥ បានឱ្យដឹងថា ប្រធានាធិបតីអាមេរិក លោក ដូណាល់ ត្រាំ បានបញ្ជាឱ្យមន្ទីរបញ្ចកោណ អនុវត្ត “សកម្មភាពយោធាដ៏ម៉ឺងម៉ាត់ និងខ្លាំងក្លា” នៅថ្ងៃសៅរ៍ ក្នុងគោលបំណងរុះរើសមត្ថភាពរបស់ក្រុមឧទ្ទាមហួធី ក្នុងការរំខានដល់ផ្លូវដឹកជញ្ជូនសំខាន់ៗនៅក្នុងតំបន់។ ការវាយប្រហារលើកទីមួយរបស់សហរដ្ឋអាមេរិកនៅពេលយប់បានសម្លាប់មនុស្សយ៉ាងហោចណាស់ ៥៣ នាក់ និងបានធ្វើឱ្យមនុស្សជិត ១០០ នាក់រងរបួស , នេះបើយោងតាមក្រសួងសុខាភិបាលដែលគ្រប់គ្រងដោយក្រុមឧទ្ទាម ហួធី របស់ប្រទេសយេម៉ែន។ នៅក្នុងសុន្ទរកថាកាលពីថ្ងៃអាទិត្យ លោក al-Houthi បានជំរុញឱ្យប្រជាជនយេម៉ែនប្រមូលមនុស្សរាប់លាននាក់របស់ពួកគេដើម្បីប្រឈមមុខនឹង “ការកើនឡើងភាពតានតឹង” ដោយទទូចថាប្រទេសយេម៉ែននឹងមិនត្រូវបានដាក់សម្ពាធឱ្យចុះចូលឡើយ។ លោកបានប្រកាសថា “នាវាផ្ទុកយន្តហោះ និងនាវាចម្បាំងរបស់អាមេរិក នឹងក្លាយជាគោលដៅរបស់យើង ហើយការសម្រេចចិត្តហាមឃាត់ការធ្វើនាវាចរណ៍នឹងរួមបញ្ចូលសហរដ្ឋអាមេរិក ដរាបណាអាមេរិកនៅតែបន្តការឈ្លានពានរបស់ខ្លួន”៕ … Continue reading ក្រុមឧទ្ទាមហួធី គំរាមវាយប្រហារទៅលើនាវាចម្បាំងអាមេរិក ក្រោយការវាយប្រហារលើកទីមួយ របស់អាមេរិកសម្លាប់មនុស្ស យ៉ាងហោចណាស់ ៥៣ នាក់ និងជិត ១០០ នាក់រងរបួស