ប៉េកាំង៖ ប្រព័ន្ធផ្សព្វផ្សាយផ្លូវការបានរាយការណ៍ថា ប្រទេសចិន បានយល់ព្រមជាមួយសហរដ្ឋអាមេរិក ដើម្បីបង្កើតយន្តការពិគ្រោះយោបល់សេដ្ឋកិច្ច និងពាណិជ្ជកម្ម ដើម្បីពិភាក្សាអំពីបញ្ហានៃការព្រួយបារម្ភទៅវិញទៅមក បន្ទាប់ពីកិច្ចពិភាក្សាថ្នាក់រដ្ឋមន្ត្រីនៅទីក្រុងហ្សឺណែវកាលពីចុងសប្តាហ៍។ ទីក្រុងប៉េកាំង និងទីក្រុងវ៉ាស៊ីនតោន នឹងចេញសេចក្តីថ្លែងការណ៍រួមមួយនៅថ្ងៃចន្ទនេះ ដែលសង្ខេបកិច្ចប្រជុំនេះ ឧបនាយករដ្ឋមន្ត្រីចិនលោក He Lifeng ត្រូវបានដកស្រង់សម្តីដោយប្រព័ន្ធផ្សព្វផ្សាយចិន បន្ទាប់ពីបានពិភាក្សារយៈពេលពីរថ្ងៃរហូតដល់ថ្ងៃអាទិត្យជាមួយរដ្ឋមន្ត្រីក្រសួងរតនាគារសហរដ្ឋអាមេរិកលោក Scott Bessent និងតំណាងពាណិជ្ជកម្ម Jamieson Greer នៅទីក្រុងនៃប្រទេសស្វ៊ីស។ ជាមួយនឹងការបង្កើនភាពតានតឹងផ្នែកពន្ធគយចិន និងសហរដ្ឋអាមេរិក បង្កឱ្យមានការភ័យខ្លាចអំពីទស្សនវិស័យសម្រាប់សេដ្ឋកិច្ចពិភពលោក លោកបាននិយាយថា កិច្ចប្រជុំសេដ្ឋកិច្ច និងពាណិជ្ជកម្មកម្រិតខ្ពស់គឺ “ស្មោះត្រង់ ស៊ីជម្រៅ និងស្ថាបនា” នេះបើយោងតាមទីភ្នាក់ងារសារព័ត៌មានចិនស៊ិនហួ។ សារព័ត៌មានស៊ីនហួបានចុះផ្សាយថា ឧបនាយករដ្ឋមន្ត្រីបានលើកឡើងថា កិច្ចប្រជុំនេះគឺជា “ជំហានដ៏សំខាន់មួយឆ្ពោះទៅរកការដោះស្រាយភាពខុសគ្នា” និងជាមូលដ្ឋានគ្រឹះ សម្រាប់កិច្ចសហប្រតិបត្តិការឱ្យកាន់តែស៊ីជម្រៅ។ លោក Bessent បានប្រាប់អ្នកយកព័ត៌មានថា មាន “វឌ្ឍនភាពច្រើន” នៅក្នុងកិច្ចពិភាក្សា ខណៈដែលលោក Greer បានលើកឡើងថា វាមានសារៈសំខាន់ណាស់ក្នុងការយល់ដឹងថា “តើយើងអាចឈានដល់ការព្រមព្រៀងគ្នាបានលឿនប៉ុណ្ណា ដែលឆ្លុះបញ្ចាំងថា ប្រហែលជាភាពខុសគ្នាមិនធំដូចការគិតនោះទេ”៕ ប្រែសម្រួល ឈូក បូរ៉ា