បរទេស៖ រដ្ឋមន្ត្រីក្រសួងការពារជាតិ លោក Phumtham Wechayachai កាលពីថ្ងៃពុធបានអះអាងសារជាថ្មីអំពីគោលនយោបាយរបស់ប្រទេសថៃ ក្នុងការមិនទទួលស្គាល់យុត្តាធិការរបស់តុលាការយុត្តិធម៌អន្តរជាតិ (ICJ) ដើម្បីការពារអធិបតេយ្យភាពរបស់ប្រទេស។ យោងតាមសារព័ត៌មាន The Nation ចេញផ្សាយកាលពីថ្ងៃទី៤ ខែមិថុនា ឆ្នាំ២០២៥ បានឱ្យដឹងថា ទាក់ទងនឹងសេចក្តីថ្លែងការណ៍របស់រដ្ឋាភិបាលនាពេលថ្មីៗនេះ ស្តីពីការដោះស្រាយបញ្ហាព្រំដែនជាមួយកម្ពុជា តាមរយៈយន្តការបីដែលមានស្រាប់ លោក Phumtham បាននិយាយថា សេចក្តីប្រកាសនេះបានឆ្លុះបញ្ចាំងពីគោលជំហរឯកភាពរបស់ក្រុមប្រឹក្សាសន្តិសុខជាតិ (NSC) កងទ័ពភូមិន្ទថៃ និងក្រសួងការបរទេស និងតំណាងឱ្យជំហរផ្លូវការរបស់រដ្ឋាភិបាល។ សេចក្តីថ្លែងការណ៍បានអះអាងជាថ្មីអំពីអធិបតេយ្យភាពជាតិរបស់ប្រទេសថៃ ភាពមិនអាចរំលោភបំពានបាននៃបូរណភាពទឹកដី និងសិទ្ធិស្របច្បាប់របស់ខ្លួន ខណៈដែលលោកសង្កត់ធ្ងន់ថា ជម្លោះត្រូវតែដោះស្រាយដោយសន្តិវិធី និងអហិង្សា។ លោក​បាន​បន្ត​ថា រដ្ឋាភិបាល​កំពុង​ដំណើរការ​ដោយ​ផ្អែក​លើ​អង្គហេតុ និង​ពិធីការ​ដែល​ត្រូវ​បាន​បង្កើត មិនមែន​ជា​អារម្មណ៍ ឬ​សម្ពាធ​ពី​ក្រុម​ណា​មួយ​ទេ។ លោក Phumtham ក៏បានបញ្ជាក់ផងដែរថា ប្រទេសថៃកំពុងធ្វើការដើម្បីរក្សាជម្លោះ កុំឱ្យកើនឡើងដល់កម្រិតនៃតុលាការ ICJ ដោយផ្តោតលើការគ្រប់គ្រងចំណុចតានតឹង និងប្រកាន់ខ្ជាប់នូវអនុស្សរណៈនៃការយោគយល់គ្នា (MoU) ឆ្នាំ 2000 រវាងប្រទេសទាំងពីរ ដែលលោកបាននិយាយថា ផ្តល់នូវភាពស្មោះត្រង់ក្នុងការដោះស្រាយ៕ ប្រែសម្រួលៈ ណៃ តុលា