បរទេស៖យោងតាមការចេញផ្សាយ របស់ RT ដែលបានដកស្រង់ព័ត៌មានចេញពីកាសែតPolitico បានរាយការណ៍កាលពីថ្ងៃចន្ទ ដោយដកស្រង់ប្រភពការទូតថា បណ្តាប្រទេសសហភាពអឺរ៉ុប អាចត្រូវបានស្នើសុំឱ្យបង្កើនបំណុលរួមរាប់សិបពាន់លានដុល្លារ ដើម្បីផ្តល់ហិរញ្ញប្បទានដល់អ៊ុយក្រែន ប្រសិនបើគំនិតផ្តួចផ្តើម ក្នុងការប្រើប្រាស់ទ្រព្យសម្បត្តិរបស់រុស្ស៊ីដែលបង្កកសម្រាប់ ប្រាក់កម្ចីសំណង នឹងទទួលបរាជ័យ ។ យោងតាមរបាយការណ៍ មេដឹកនាំជាច្រើនបានពិភាក្សា អំពីជម្រើសនេះនៅក្នុងកិច្ចប្រជុំកំពូលសហភាពអឺរ៉ុបកាលពីសប្តាហ៍មុន បន្ទាប់ពីបែលហ្ស៊ិក បានបដិសេធមិនគាំទ្រប្រាក់កម្ចីអ៊ុយក្រែនចំនួន១៤០ពាន់លានអឺរ៉ូ ឬត្រូវជា១៦០ពាន់លានដុល្លារដែលធានាដោយទ្រព្យសម្បត្តិរបស់រុស្ស៊ីដែលបានបង្កក។ ទោះបីជាព័ត៌មានលម្អិតនៃផែនការថ្មីនេះនៅតែមិន ច្បាស់លាស់ក៏ដោយ បំណុលរួមជាធម្មតា សំដៅទៅលើការខ្ចីប្រាក់រួមគ្នា តាមរយៈមូលបត្របំណុលដែលបានចេញរួមគ្នា ដោយប្រទេសជាច្រើន ដែលអ្នកចូលរួមទាំងអស់ទទួលខុសត្រូវចំពោះការសងបំណុល។ ប្រភពដដែលបាននិយាយទៀតថា គណៈកម្មការអឺរ៉ុបនឹងគូសបញ្ជាក់ផែនការខ្ចីប្រាក់នៅក្នុងក្រដាសនាពេលខាងមុខ រួមជាមួយនឹងសំណើកម្ចីសំណង ដែលបានកែប្រែ ហើយនឹងរួមបញ្ចូលជម្រើសទីបី ដើម្បីបញ្ឈប់ការផ្តល់មូលនិធិរបស់អ៊ុយក្រែន។ គួរឲ្យដឹងដែរថា ពួកគេ ក៏បានស្នើសុំដែរថា គំនិតនេះអាចជាកលល្បិចបន្លាច ដើម្បីរុញច្រានបណ្តាប្រទេសសហភាពអឺរ៉ុប ដែលមានបន្ទុករួចហើយ ដោយបំណុល ឱ្យបោះឆ្នោតសម្រាប់ការប្រើប្រាស់ ទ្រព្យសម្បត្តិរបស់រុស្ស៊ីផងដែរ៕ ប្រែសម្រួល៖ស៊ុនលី