បរទេស ៖យោងតាមការចេញផ្សាយ របស់ RT រដ្ឋាភិបាលក្រុងវ៉ាស៊ីនតោន បានផ្ទេរប្រាក់ចំនួន៧,៥លានដុល្លារ ទៅឱ្យរដ្ឋាភិបាល នៃប្រទេស Equatorial Guinea ក្រោមកិច្ចព្រមព្រៀងទទួលយកក្រុមមនុស្ស ដែលមិនមែនពលរដ្ឋអាមេរិក ដែលត្រូវបាននិរទេស ចេញពីសហរដ្ឋអាមេរិក។ យ៉ាងណាក្តីនៅក្នុងលិខិតផ្ញើ ជូនរដ្ឋមន្ត្រីការបរទេស អាមេរិកលោក Marco Rubio កាលពីថ្ងៃចន្ទ សមាជិកសភាមួយចំនួន នៃគណៈកម្មាធិការទំនាក់ទំនងការបរទេសព្រឹទ្ធសភា បានកត់សម្គាល់ថាវាគឺជាការបង់ប្រាក់ មិនធម្មតាមួយដល់ រដ្ឋាភិបាលដែលមានកម្រិត ពុករលួយបំផុតមួយនៅក្នុងពិភពលោក ។ ក្រុមសមាជិកសភាទាំងនោះបាននិយាយថា ប្រវត្តិសាស្រ្តរបស់ប្រទេសអាហ្វ្រិកកណ្តាល គឺជាអ្នកប្រព្រឹត្តិអំពើពុករលួយ និងភាពស្មុគស្មាញដែលត្រូវបាន ចោទប្រកាន់ក្នុងការជួញដូរមនុស្ស បង្កើតឱ្យមានការព្រួយបារម្ភយ៉ាងខ្លាំង ចំពោះការប្រើប្រាស់ប្រកបដោយការទទួលខុសត្រូវ និងតម្លាភាពនៃប្រាក់ដុល្លារ ដែលប្រមូលបានពីពលរដ្ឋអ្នក ជាប់ពន្ធរបស់អាមេរិក។ ការទូទាត់ដែលបានមក ពីមូលនិធិសង្គ្រោះបន្ទាន់ផ្នែកចំណាកស្រុក និងជំនួយជនភៀសខ្លួន របស់ក្រសួងការបរទេស សហរដ្ឋអាមេរិក គឺជា ការផ្ទេរពីរដ្ឋាភិបាលទៅរដ្ឋាភិបាលលើកដំបូង ពីមូលនិធិដែលមានបំណងសម្រាប់ជនភៀសខ្លួន និងវិបត្តិមនុស្សធម៌ទូទាំងពិភពលោក។ គួរឲ្យដឹងដែរថារដ្ឋបាល ​របស់​ប្រធានាធិបតី​អាមេរិក Donald Trump បាន​បន្ត​ការ​រៀបចំ​ដ៏ចម្រូងចម្រាស​ជាមួយ​រដ្ឋ​អាហ្វ្រិក​មួយ​ចំនួន​ដើម្បី​ទទួល​ភ្ញៀវ​ចំណាកស្រុក​​ ដែល​ក្រុង​វ៉ាស៊ីនតោន​ចាត់ទុកថា​ មិនមាន​សិទ្ធិ​បន្ត​ស្នាក់នៅ​ក្នុង​សហរដ្ឋ​អាមេរិកនោះទេ៕ ប្រែសម្រួល៖ស៊ុនលី