បរទេស៖ យោងតាមការចេញផ្សាយរបស់ RT កូរ៉េ​ខាង​ជើង​បាន​ជេរ​ប្រមាថ​ជប៉ុន​បន្ទាប់​ពី​មន្ត្រី​ជាន់​ខ្ពស់​ម្នាក់​ត្រូវ​បាន​គេ​រាយការណ៍​ថា​ប្រទេសជប៉ុនគួរតែចាំបាច់ក្នុងការរៀបចំ​អាវុធ​នុយក្លេអ៊ែរផ្ទាល់ខ្លួននាពេលខាងមុខ។  នៅក្នុងសេចក្តីថ្លែងការណ៍មួយដែលត្រូវបានចេញផ្សាយដោយប្រព័ន្ធផ្សព្វផ្សាយរដ្ឋកាលពីថ្ងៃអាទិត្យ ទីក្រុងព្យុងយ៉ាងបានព្រមានថា ការអនុញ្ញាតឱ្យប្រទេសជប៉ុនទទួលបានអាវុធនុយក្លេអ៊ែរនឹងនាំឱ្យមាន គ្រោះមហន្តរាយដ៏ធំមួយ។ ការកត់សម្គាល់នេះកើតឡើងបន្ទាប់ពីភាពចម្រូងចម្រាសត្រូវបានផ្ទុះឡើងកាលពីសប្តាហ៍មុនដោយទីប្រឹក្សាជាន់ខ្ពស់របស់នាយករដ្ឋមន្ត្រីជប៉ុនលោក Sanae Takaichi ដែលបានប្រាប់អ្នកសារព័ត៌មានថាប្រទេសជប៉ុនប្រហែលជាត្រូវពិចារណាឡើងវិញនូវគោលនយោបាយគ្មាននុយក្លេអ៊ែរក្រោយសង្គ្រាមលោកលើកទី២ដោយសារការពឹងផ្អែកលើការទប់ស្កាត់នុយក្លេអ៊ែររបស់សហរដ្ឋអាមេរិកអាចនឹងលែងគ្រប់គ្រាន់ទៀតហើយ។ ការអត្ថាធិប្បាយក្រៅកំណត់ត្រា ដែលពិពណ៌នាថាជាទស្សនៈផ្ទាល់ខ្លួន បានរីករាលដាលយ៉ាងឆាប់រហ័ស ដោយបង្កើតជាសំណួរអំពីតំណែងផ្លូវការរបស់ទីក្រុងតូក្យូ។ ក្នុងនោះផងដែរអនុរដ្ឋមន្ត្រីការបរទេសរុស្ស៊ី លោក Andrey Rudenko ក៏បានព្រមានដែរថា ការបោះបង់គោលជំហរគ្មានអាវុធនុយក្លេអ៊ែររបស់ជប៉ុន នឹងធ្វើឱ្យសន្តិសុខនៅតំបន់អាស៊ីឦសានកាន់តែអាក្រក់ និងបង្កឱ្យមានការប្រឆាំងពីបណ្តាប្រទេសដែលរង ការគំរាមកំហែងដោយការធ្វើយោធានោះ។  បន្ថែមពីនោះអ្នកនាំពាក្យក្រសួងការបរទេសចិន លោក Guo Jiakun បាននិយាយថា ការកត់សម្គាល់នេះ ប្រសិនបើជាការពិត គឺធ្ងន់ធ្ងរបំផុត និង លាតត្រដាងគម្រោងដ៏គ្រោះថ្នាក់ដោយមនុស្សមួយចំនួននៅក្នុងប្រទេសជប៉ុន ដើម្បីបំពានច្បាប់អន្តរជាតិ៕ ប្រែសម្រួល៖ស៊ុនលី