វ៉ាស៊ីនតោន៖ ប្រធានាធិបតីអាមេរិក លោក ដូណាល់​ ត្រាំ បានគំរាមវាយប្រហារអ៊ីរ៉ង់ «យ៉ាងខ្លាំង» ប្រសិនបើអាជ្ញាធររបស់ខ្លួន ចាប់ផ្តើមសម្លាប់មនុស្ស​ ដែលកំពុងតវ៉ានៅក្នុងប្រទេសមជ្ឈិមបូព៌ា។ លោក ត្រាំ បានឧ្យដឹងនៅក្នុងបទសម្ភាសន៍ ជាមួយវិទ្យុអភិរក្សនិយមមួយថា «ខ្ញុំបានឲ្យពួកគេដឹងថា ប្រសិនបើពួកគេចាប់ផ្តើមសម្លាប់មនុស្ស​ យើងនឹងវាយប្រហារពួកគេយ៉ាងខ្លាំង»។ លោក ដូណាល់​ ត្រាំ​ និងមន្ត្រីជាន់ខ្ពស់អាមេរិកផ្សេងទៀត ថ្មីៗនេះបានព្រមានជាច្រើនលើកថា ទីក្រុងវ៉ាស៊ីនតោន​ នឹងចាត់វិធានការ ប្រសិនបើអ៊ីរ៉ង់ «សម្លាប់អ្នកតវ៉ាដែលកំពុងតវ៉ាដោយសន្តិវិធី»។ កាលពីថ្ងៃពុធ ក្រសួងការបរទេសអ៊ីរ៉ង់បានថ្កោលទោសអ្វីដែលខ្លួនពិពណ៌នាថាជាការកត់សម្គាល់ «អន្តរាគមន៍ និងបោកប្រាស់» ដោយរដ្ឋបាលលោក ត្រាំ លើភាពចលាចលថ្មីៗនេះនៅក្នុងប្រទេស ដោយថា ពួកគេបានឆ្លុះបញ្ចាំងពីអរិភាពជាបន្តបន្ទាប់របស់ទីក្រុងវ៉ាស៊ីនតោន​ ចំពោះប្រជាជនអ៊ីរ៉ង់។ ក្រសួងបានឧ្យដឹងនៅក្នុងសេចក្តីថ្លែងការណ៍មួយថា ការអត្ថាធិប្បាយរបស់សហរដ្ឋអាមេរិក លើកិច្ចការផ្ទៃក្នុងរបស់អ៊ីរ៉ង់ គឺជាផ្នែកមួយ នៃគោលនយោបាយសម្ពាធ និងការជ្រៀតជ្រែកយូរអង្វែង ជាជាងការព្រួយបារម្ភពិតប្រាកដ ចំពោះសុខុមាលភាពរបស់ប្រជាជនអ៊ីរ៉ង់៕ប្រែសម្រួល​ ឈូក​ បូរ៉ា