តេអេរ៉ង់៖​ អ៊ីរ៉ង់​ បានបដិសេធការរំពឹងទុកនៃការចរចាជាមួយសហរដ្ឋអាមេរិក ដរាបណាទីក្រុងវ៉ាស៊ីនតោន​ នៅតែបន្តគំរាមកំហែងសកម្មភាពយោធា បន្ទាប់ពីប្រធានាធិបតីអាមេរិក ដូណាល់ ត្រាំ បានបង្កើនវោហា សាស្ត្ររបស់លោក និងបានប្រកាសពីការ ដាក់ពង្រាយកងកម្លាំងជើងទឹកអាមេរិក បន្ថែមទៅកាន់មជ្ឈិមបូព៌ា។ យោងតាមទីភ្នាក់ងារសារព័ត៌មាន IRNA ដែលគ្រប់គ្រងដោយរដ្ឋ លោក Seyed Abbas Araghchi រដ្ឋមន្ត្រីការបរទេសអ៊ីរ៉ង់បានឧ្យដឹងថា “មិនអាចមានការចរចា ក្នុងបរិយាកាស នៃការគំរាមកំហែងបាននោះទេ”។ លោកបានេីកឡេីងថា​ “ការធ្វើការទូតតាមរយៈសម្ពាធយោធាមិនមានប្រសិទ្ធភាព ឬមានប្រយោជន៍នោះទេ។ ប្រសិនបើពួកគេចង់បានការចរចា ពួកគេត្រូវតែបោះបង់ចោលការគំរាមកំហែង ការទាមទារហួសហេតុ និងបញ្ហាមិនសមហេតុផល”។ នៅក្នុងការបង្ហោះមួយនៅលើបណ្ដាញសង្គម​ X លោក Araghchi បានបន្ថែមថា អ៊ីរ៉ង់ស្វាគមន៍កិច្ចព្រមព្រៀងថ្មីលើកម្មវិធីនុយក្លេអ៊ែររបស់ខ្លួន ប៉ុន្តែនឹងឆ្លើយតបយ៉ាងខ្លាំងក្លាចំពោះប្រតិបត្តិការយោធាណាមួយរបស់សហរដ្ឋអាមេរិក។ អ្នកការទូតអ៊ីរ៉ង់រូបនេះបានបន្ដថា “កងកម្លាំងប្រដាប់អាវុធដ៏ក្លាហានរបស់យើង​ បានត្រៀមខ្លួនរួចរាល់ហើយ ដោយម្រាមដៃរបស់ពួកគេនៅលើគន្លឹះ​ ត្រៀមចាំតែកេះកៃតែប៉ុណ្ណោះ”។ ទន្ទឹមនឹងនេះ លោក ដូណាល់​ ត្រាំ បានជំរុញឱ្យទីក្រុងតេអេរ៉ង់វិលត្រឡប់ទៅរកការចរចាលើកម្មវិធីនុយក្លេអ៊ែររបស់ខ្លួនវិញ ដោយព្រមានថា “កងនាវាដ៏ធំ” របស់មហាអំណាចអាមេរិក​ កំពុងធ្វើដំណើរឆ្ពោះទៅកាន់តំបន់នេះហេីយ៕ប្រែសម្រួល​ ឈូក​ បូរ៉ា