តេអេរ៉ង់៖ ក្រសួងការបរទេសអ៊ីរ៉ង់បានឧ្យដឹងថា ប្រទេសនេះ បានចាត់តាំងកងទ័ពជើងទឹក និងកងទ័ពអាកាស របស់រដ្ឋសមាជិកទាំងអស់នៃសហភាពអឺរ៉ុប ជាអង្គការភេរវកម្ម។ ក្រសួងបានឧ្យដឹង នៅក្នុងសេចក្តីថ្លែងការណ៍មួយថា ចលនានេះគឺដើម្បីឆ្លើយតប ទៅនឹងការសម្រេចចិត្តថ្មីៗ របស់សហភាពអឺរ៉ុប ក្នុងការដាក់ស្លាកកងកម្លាំង ឆ្មាំបដិវត្តន៍អ៊ីស្លាម (IRGC) របស់អ៊ីរ៉ង់ជាអង្គការភេរវកម្ម។ សេចក្តីថ្លែងការណ៍នេះបានឧ្យដឹងថា ការសម្រេចចិត្តរបស់សហភាពអឺរ៉ុបគឺ “ផ្ទុយនឹងគោលការណ៍ និងច្បាប់ជាមូលដ្ឋាន នៃធម្មនុញ្ញអង្គការសហប្រជាជាតិ និងច្បាប់អន្តរជាតិ”។ ប្រភពបានបន្ថែមថា រដ្ឋាភិបាលអ៊ីរ៉ង់​ បានតបស្នងវិញដោយផ្អែកលើគោលការណ៍ ក្រោមច្បាប់ឆ្នាំ២០១៩ ដែលចែងថា “ប្រទេសទាំងអស់ដែលអនុវត្តតាម ឬគាំទ្រការសម្រេចចិត្ត របស់សហរដ្ឋអាមេរិក​ ក្នុងការប្រកាស IRGC ជាអង្គការភេរវកម្មតាមមធ្យោបាយណាមួយ នឹងត្រូវទទួលរងនូវសកម្មភាពតបស្នងវិញ”។ ក្រុមប្រឹក្សាសហភាពអឺរ៉ុប​ នៅថ្ងៃព្រហស្បតិ៍នេះ បានបន្ថែមកងកម្លាំង IRGC ជាផ្លូវការទៅក្នុងបញ្ជីភេរវកររបស់ប្លុកនេះ បន្ទាប់ពីកិច្ចព្រមព្រៀងនយោបាយមួយ​ ដែលសម្រេចបានដោយរដ្ឋមន្ត្រីការបរទេសសហភាពអឺរ៉ុប​ កាលពីខែមុន៕ប្រែសម្រួល​ ឈូក​ បូរ៉ា