បរទេស៖ ការិយាល័យប្រព័ន្ធផ្សព្វផ្សាយរបស់រដ្ឋាភិបាលអាប៊ូដាប៊ី (ADMO) បាននិយាយនៅថ្ងៃសុក្រថា ប្រទេសអារ៉ាប់រួមនឹងពន្លឿនការសាងសង់បំពង់បង្ហូរប្រេងថ្មីមួយដើម្បីបង្កើនសមត្ថភាពនាំចេញរបស់ខ្លួនទ្វេដងតាមរយៈទីក្រុង Fujairah នៅឆ្នាំ ២០២៧ ដោយពង្រីកសមត្ថភាពរបស់ខ្លួនយ៉ាងខ្លាំងដើម្បីបញ្ចៀសពីការឆ្លងកាត់ច្រកសមុទ្រហ័រមូស។ យោងតាមសារព័ត៌មាន រ៉យទ័រ ចេញផ្សាយនៅថ្ងៃទី១៥ ខែឧសភា ឆ្នាំ២០២៦ថា ADMO បាននិយាយថា ព្រះអង្គម្ចាស់រាជទាយាទអាប៊ូដាប៊ី Sheikh Khaled bin ⁠Mohamed bin Zayed បានដឹកនាំក្រុមហ៊ុនប្រេងជាតិអាប៊ូដាប៊ី (ADNOC) ឲ្យពន្លឿនគម្រោងបំពង់បង្ហូរប្រេងខាងលិច-ខាងកើតក្នុងអំឡុងពេលកិច្ចប្រជុំគណៈកម្មាធិការប្រតិបត្តិ ដោយបន្ថែមថាបំពង់បង្ហូរប្រេងនេះកំពុងស្ថិតក្រោមការសាងសង់ ហើយរំពឹងថានឹងចាប់ផ្តើមដំណើរការនៅឆ្នាំ ២០២៧។ វាមិនបានបង្ហាញពេលវេលាដើមសម្រាប់គម្រោងនេះទេ។ បំពង់បង្ហូរប្រេងឆៅអាប៊ូដាប៊ី (ADCOP) ដែលមានស្រាប់របស់អារ៉ាប់រួម ដែលត្រូវបានគេស្គាល់ផងដែរថា ជាបំពង់បង្ហូរប្រេង Habshan-Fujairah គឺអាចបញ្ជូនប្រេងបានរហូតដល់ ១,៨ លានបារ៉ែលក្នុងមួយថ្ងៃ ហើយបានបង្ហាញឱ្យឃើញពីសារៈសំខាន់ ខណៈដែលប្រទេសនេះកំពុងស្វែងរកការបង្កើនប្រសិទ្ធភាពការនាំចេញដោយផ្ទាល់ពីឆ្នេរសមុទ្រអូម៉ង់។ ប្រទេស អារ៉ាប់រួម និងអារ៉ាប៊ីសាអូឌីត គឺជាអ្នកផលិតឈូងសមុទ្រតែមួយគត់ដែលមានបំពង់បង្ហូរប្រេងដែលនាំចេញប្រេងឆៅនៅខាងក្រៅច្រកសមុទ្រហ័រមូស ខណៈដែលអូម៉ង់មានឆ្នេរសមុទ្រវែងនៅលើឈូងសមុទ្រអូម៉ង់។ ប្រែសម្រួលៈ ណៃ តុលា