បរទេស៖ តំបន់ភាគខាងត្បូងប្រទេសចិន នៅថ្ងៃពុធ កំពុងរងផលប៉ះពាល់ដោយការបំផ្លិចបំផ្លាញ និងទឹកជំនន់យ៉ាងខ្លាំង ដែលបណ្តាលមកពីភ្លៀងធ្លាក់ខ្លាំងបំផុត ពីសំណល់នៃព្យុះត្រូពិច Maysak។ យោងតាមសារព័ត៌មាន AP ចេញផ្សាយនៅថ្ងៃទី៨ ខែកក្កដា ឆ្នាំ២០២៦ថា មន្ត្រីបាននិយាយថា មនុស្សប្រាំមួយនាក់បានស្លាប់ និង ១១ នាក់ផ្សេងទៀតបានបាត់ខ្លួននៅក្នុងតំបន់ Guangxi នៅល្ងាចថ្ងៃអង្គារ។ យោងតាមការិយាល័យឃោសនាក្នុងតំបន់ អាកាសធាតុអាក្រក់បានបង្ខំឱ្យមនុស្ស ១៣០.០០០ នាក់ត្រូវជម្លៀសចេញ។ អ្នកស្រុកមួយចំនួននៅតែកំពុងរង់ចាំការជួយសង្គ្រោះ ។ លោក Lu Xiaofei ដែលធ្វើការនៅទីក្រុង Shenzhen ដែលជាមជ្ឈមណ្ឌលបច្ចេកវិទ្យាមួយ នៅជិតទីក្រុងហុងកុង បាននិយាយថា ក្រុមគ្រួសារបងប្រុសរបស់គាត់បានជាប់គាំងនៅផ្ទះរបស់គាត់នៅក្នុងភូមិ Lu ក្នុងស្រុក Qintang។ លោក Lu បានប្រាប់ The Associated Press ក្នុងបទសម្ភាសន៍តាមទូរស័ព្ទថា “ទឹកនៅក្នុងផ្ទះមានកម្ពស់លើសពីមនុស្សម្នាក់។ ពួកគេទាំងអស់គ្នាត្រូវផ្លាស់ទៅជាន់ទីពីរ។ អគ្គិសនីត្រូវបានកាត់ផ្តាច់តាំងពីព្រឹកម្សិលមិញ ហើយឥឡូវនេះពួកគេក៏មិនមានទឹកស្អាតសម្រាប់ប្រើប្រាស់ដែរ”។ប្រែសម្រួលៈ ណៃ តុលា