បរទេស៖ រដ្ឋមន្ត្រីការបរទេសរបស់កោះតៃវ៉ាន់ លោក Lin Chia-lung បានថ្កោលទោសការទូត «អ្នកចម្បាំងចចក» របស់ចិននៅឯវេទិកាមេដឹកនាំកោះប៉ាស៊ីហ្វិកសប្តាហ៍នេះ ហើយបាននិយាយថា មន្ត្រីចិនក៏បានចូលរួមក្នុងការចារកម្ម នៅក្នុងព្រឹត្តិការណ៍នេះផងដែរ។ យោងតាមសារព័ត៌មាន រ៉យទ័រ ចេញផ្សាយនៅថ្ងៃទី៤ ខែកញ្ញា ឆ្នាំ២០២៦ថា កិច្ចប្រជុំវេទិកាកោះប៉ាស៊ីហ្វិកឆ្នាំនេះ ត្រូវបានគ្របដណ្ដប់ដោយការជំទាស់របស់ចិនចំពោះវត្តមានរបស់កោះតៃវ៉ាន់នៅឯកិច្ចប្រជុំកំពូល ដោយនិយាយថា ទីក្រុងតៃប៉ិមិនមានលក្ខណៈសម្បត្តិគ្រប់គ្រាន់ដើម្បីចូលរួម ហើយវត្តមានរបស់កោះនេះនឹងមានផលវិបាក។ ម្ចាស់ផ្ទះនៃកិច្ចប្រជុំកំពូល Palau គឺជាប្រទេសកោះប៉ាស៊ីហ្វិកមួយក្នុងចំណោមប្រទេសកោះប៉ាស៊ីហ្វិកចំនួនបីដែលមានចំណងការទូតជាផ្លូវការជាមួយកោះតៃវ៉ាន់។ ទីក្រុងប៉េកាំងនិយាយថា កោះតៃវ៉ាន់គឺជាខេត្តមួយរបស់ខ្លួន មិនមែនជាប្រទេសទេ ដែលជាទស្សនៈមួយដែលរដ្ឋាភិបាលនៅទីក្រុងតៃប៉ិបដិសេធយ៉ាងខ្លាំងក្លាទៅវិញ។ ថ្លែងទៅកាន់អ្នកយកព័ត៌មាននៅទីក្រុងតៃប៉ិកាលពីថ្ងៃសុក្រ លោក Lin បាននិយាយថា ការកត់សម្គាល់របស់ចិននៅឯកិច្ចប្រជុំកំពូលមិនត្រូវបានស្វាគមន៍ទេ។ លោកបាននិយាយថា «ការទូត «អ្នកចម្បាំងចចក» របស់ចិនប្រភេទនេះ ពិតជាធ្វើឱ្យខូចសាមគ្គីភាពប៉ាស៊ីហ្វិកយ៉ាងងាយស្រួល ហើយវាពិតជាគួរឱ្យរំខាន និងមិនចូលចិត្ត» ដោយបន្ថែមថា កោះតៃវ៉ាន់ និងចិនសុទ្ធតែជាភ្ញៀវដែលត្រូវបានអញ្ជើញ។ ប្រែសម្រួលៈ ណៃ តុលា