ភ្នំពេញ៖ លោក ឃាង ពុទ្ធី ប្រធានក្រុមប្រឹក្សា សមាគមអ្នកជំនាញ អចលនទ្រព្យកម្ពុជា (CREA) បានលើកឡើងថា ដោយសារជំងឺកូវីដ១៩ មានការវិឌ្ឍន៍ខ្លួន ជាបន្តបន្ទាប់ ហើយចុងក្រោយ ក្លាយជាប្រភេទ Delta ដែលមានលក្ខណៈងាយឆ្លង ហើយធ្វើឱ្យអ្នកជំងឺ មានសភាពធ្ងន់ធ្ងរជាងមុន ធ្វើឱ្យសេដ្ឋកិច្ចពិភពលោក ជួបបញ្ហា និងស្ថិតនៅក្នុង ភាពមិនច្បាស់លាស់ សូម្បីតែទីផ្សារហ៊ុន ក្នុងពិភពលោក ក៏កំពុងបន្តធ្លាក់ចុះដែរ។
លោក ឃាង ពុទ្ធី បន្តថា បញ្ហានេះ ក៏បានបង្កផលប៉ះពាល់ដល់ ទីផ្សារ និងវិស័យអចលនទ្រព្យ នៅកម្ពុជាដែរ ទាំងវិនិយោគទុន និងទីផ្សារអចលនទ្រព្យ ស្ថិតនៅក្នុង ភាពមិនច្បាស់លាស់មួយ មិនដឹងថា វាឡើងរឺចុះ ខុសពីការគិតទុកមុន ថាឡើងល្អ នៅចុងឆ្នាំនេះ ។
លោក ក៏សូមអំពាវនាវឱ្យប្រជាជន អ្នកវិនិយោគទុន យុវជនទាំងអស់ ចូលរួមជាមួយរាជរដ្ឋាភិបាល ធ្វើការប្រុងប្រយ័ត្នខ្ពស់ បង្ការទប់ស្កាត់កូវីដ១៩ ដោយអនវុត្តនូវវិធានការសុខាភិបាល ឱ្យបានខ្ជាប់ខ្ជួន កុំធ្វេសប្រហែស កុំជួបជុំមនុស្សច្រើនលើសពី៥នាក់ ។
លោក ពុទ្ធី បន្ថែមថា “សូមខិតខំការពារខ្លួន និងគ្រួសារខ្លួន កុំឱ្យពាក់ព័ន្ធ ជាមួយជំងឺកូវីដ១៩។ ហើយប្រសិនបើ Delta វាយលុកប្រទេសកម្ពុជា យើងឃើញថា បញ្ហាសេដ្ឋកិច្ច និងវិស័យអចលនទ្រព្យ អាជីវកម្ម និងពាណិជ្ជកម្ម នឹងជួបការលំបាកជាក់ជា ពុំខាន ដូច្នេះ ទាំងអស់គ្នា ត្រូវចូលរួមជាមួយ រាជរដ្ឋាភិបាល” ។
