ប៉េកាំង៖ មេដឹកនាំជាច្រើនរូបមកពីបណ្តាប្រទេសអ៊ឺរ៉ុប និងសហភាពអឺរ៉ុប បានប្រកាសនាពេលថ្មីៗនេះ ឬកំពុងរៀបចំផែនការធ្វើដំណើរទៅកាន់ប្រទេសចិន ដោយនាយករដ្ឋមន្ត្រីអេស្ប៉ាញលោក Pedro Sanchez បានប្រកាសថា លោកនឹងទៅបំពេញទស្សនកិច្ចនៅប្រទេសចិន នៅសប្តាហ៍ក្រោយ។ ប្រព័ន្ធផ្សព្វផ្សាយបានរាយការណ៍ថា ប្រធានាធិបតីបារាំងលោក អេម៉ានុយអែល ម៉ាក្រុង និងមេដឹកនាំសហភាពអឺរ៉ុបមួយចំនួនទៀត ក៏គ្រោងនឹងធ្វើទស្សនកិច្ចនៅប្រទេសចិនផងដែរ។
អ្នកជំនាញបានឲ្យដឹងថា គំរូរបស់ចិនក្នុងការដោះស្រាយវិវាទអន្តរជាតិក្នុងនាមជាអ្នកជំរុញសន្តិភាព ដែលខុសពីអាមេរិក ដែលកំពុងបន្ថែមភ្លើងឆេះ ត្រូវបានសហគមន៍អន្តរជាតិទទួលស្គាល់យ៉ាងទូលំទូលាយ និងឆ្លុះបញ្ចាំងពីភាពខ្នះខ្នែងរបស់អឺរ៉ុប ក្នុងការមើលឃើញការកើតឡើងនៃសន្តិភាព និងកិច្ចពិភាក្សាសម្រាប់វិបត្តិអ៊ុយក្រែន ដែលកំពុងបន្តបង្កបញ្ហាយ៉ាងខ្លាំងដល់ទ្វីប។
យោងតាមប្រភពព័ត៌មានបានឲ្យដឹងថា លោក Reuters Sanchez នឹងធ្វើទស្សនកិច្ចនៅប្រទេសចិននៅសប្តាហ៍ក្រោយ។ លោក Sanchez បានប្រាប់អ្នកយកព័ត៌មាននៅទីក្រុងប្រ៊ុចសែល ជាកន្លែងដែលលោក កំពុងចូលរួមកិច្ចប្រជុំកំពូលរបស់សហភាពអឺរ៉ុប កាលពីថ្ងៃព្រហស្បតិ៍ថា លោកនឹង “ស្វែងរកឱ្យឃើញដោយផ្ទាល់នូវជំហររបស់ចិន សម្រាប់សន្តិភាពនៅអ៊ុយក្រែន ហើយបញ្ជូនសារថា អ៊ុយក្រែន នឹងជាអ្នកបង្កើត លក្ខខណ្ឌសន្តិភាព”។
ដំណឹងនេះត្រូវបានបញ្ជាក់ក្រោយមកដោយរដ្ឋមន្ត្រីសម្រាប់គណៈប្រធាន Felix Bolanos ក្នុងបទសម្ភាសជាមួយស្ថានីយវិទ្យុ Cadena Ser ដោយថា “ចិនមានតួនាទីសំខាន់ក្នុងការសម្រុះសម្រួលសង្រ្គាម”។
អ្នកនាំពាក្យក្រសួងការបរទេសចិន លោក Wang Wenbin បានឲ្យដឹងកាលពីថ្ងៃព្រហស្បតិ៍ថា “ប្រទេសចិន និងអេស្ប៉ាញ រីករាយនឹងការអភិវឌ្ឍន៍ប្រកបដោយចីរភាព ស្ថិរភាព និងទំនាក់ទំនង” ។ លោកបានបន្ថែមថា “មេដឹកនាំទាំងពីររក្សាទំនាក់ទំនងល្អ”។
ប្រទេសអេស្ប៉ាញ នឹងចូលកាន់តំណែងជាប្រធានប្តូរវេននៃក្រុមប្រឹក្សាសហភាពអឺរ៉ុប ពីប្រទេសស៊ុយអែត នៅចុងឆ្នាំនេះ។ ក្នុងពេលជាមួយគ្នានោះគេហទំព័រ Politico បានរាយការណ៍ថា ប្រធានគណៈកម្មការអឺរ៉ុបលោកស្រី Ursula von der Leyen នឹងធ្វើដំណើរជាមួយប្រធានាធិបតីបារាំងលោក ម៉ាក្រុង ក្នុងដំណើរទស្សនកិច្ច ដែលបានគ្រោងទុករបស់លោក ទៅកាន់ប្រទេសចិនក្នុងខែមេសា។
ប្រធានគោលនយោបាយការបរទេសរបស់សហភាពអឺរ៉ុបលោក Josep Borrell ក៏បានប្រកាសកាលពីថ្ងៃសុក្រថា លោកនឹងទៅបំពេញទស្សនកិច្ចនៅប្រទេសចិន ក្នុងពេលឆាប់ៗនេះ បើទោះបីជាកាលបរិច្ឆេទនៅតែត្រូវបានបញ្ចប់ក៏ដោយ។
អ្នកជំនាញជឿជាក់ថា ការអភិវឌ្ឍន៍ទំនាក់ទំនងចិន-សហភាពអឺរ៉ុប គឺជាកត្តាចាំបាច់ និងជាក់ស្តែង។ នៅក្នុងយុគសម័យក្រោយជំងឺរាតត្បាត សេដ្ឋកិច្ចពិភពលោកនៅតែមានភាពយឺតយ៉ាវ ហើយអឺរ៉ុបបានដឹងថា “ការផ្ដាច់ខ្លួន” ដែលស្នើដោយសហរដ្ឋអាមេរិក មានផលប៉ះពាល់អវិជ្ជមានដល់អឺរ៉ុប៕
ប្រែសម្រួល ឈូក បូរ៉ា
