បរទេស ៖ អ្នកនាំពាក្យប្រធានាធិបតីរុស្ស៊ី លោក វ្ល៉ាឌីមៀ ពូទីន បានច្រានចោល ការអះអាងដែលថា អ៊ុយក្រែនបានប៉ុនប៉ង ធ្វើឃាតប្រមុខរដ្ឋ ដោយប្រើយន្តហោះគ្មានមនុស្សបើក ។ លោក Dmitry Peskov បានច្រានចោលការ ចោទប្រកាន់នេះ ហើយថា នេះជា “ការប្រឌិត” ។
យោងតាមសារព័ត៌មាន RT ចេញផ្សាយនៅថ្ងៃទី២៨ ខែមេសា ឆ្នាំ២០២៣ បានឱ្យដឹងថា លោក Peskov បានប្រាប់អ្នកយកព័ត៌មានថា “ទេ យើងមិនដឹងចំពោះរបាយការណ៍ទាំងនេះទេ” ។ “មាន “ការប្រឌិតរឿង” បែបនេះជាច្រើនសព្វថ្ងៃនេះ។ វាគ្មានហេតុផលអ្វីដែលត្រូវបង់ចិត្តឲ្យពួកគេឡើយ»។
កាលពីថ្ងៃពុធ កាសែតអាល្លឺម៉ង់ Bild បានចុះផ្សាយរឿងមួយដែលមានចំណងជើងថា គ្រឿងផ្ទុះ ១៧ គីឡូ ដែលមានបំណងសម្លាប់លោក ពូទីន ដោយអះអាងថា យន្តហោះគ្មានមនុស្សបើកអ៊ុយក្រែន ដែលបានធ្លាក់នៅជិតទីក្រុងមូស្គូកាលពីថ្ងៃអាទិត្យ បានតម្រង់គោលដៅប្រធានាធិបតី ហើយអាជ្ញាធររុស្ស៊ីកំពុងព្យាយាមបិទបាំងវា។
កាសែត Bild បានដកស្រង់សម្តីសកម្មជនអ៊ុយក្រែន Yuri Romanenko ដែលបានអះអាងថា ចារកម្មអ៊ុយក្រែនបានបញ្ជូនយន្តហោះគ្មានមនុស្សបើក សំដៅទៅលោក ពូទីន ក្នុងអំឡុងពេលទស្សនកិច្ចរបស់គាត់ទៅកាន់សួនឧស្សាហកម្ម Rudnevo នៅខាងក្រៅទីក្រុងម៉ូស្គូ។ យន្តហោះគ្មានមនុស្សបើក (UAV) តាមសេចក្តីរាយការណ៍បានឆ្លងកាត់ប្រព័ន្ធការពារដែនអាកាសរុស្ស៊ីដោយមិនបានរកឃើញ ហើយបានធ្លាក់ “មិនឆ្ងាយ” ពីទីតាំងគោលដៅ។ ចំណែកសារព័ត៌មានរបស់អាល្លឺម៉ង់បានពណ៌នា Romanenko ថា ជាអ្នកដែលមានទំនាក់ទំនងជិតស្និទ្ធនឹងសេវាស៊ើបការណ៍សម្ងាត់របស់ទីក្រុងគៀវ៕
ប្រែសម្រួលៈ ណៃ តុលា
