ភ្នំពេញ ៖ លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូនរបស់កម្ពុជា បានអញ្ជើញដឹកនាំគណៈប្រតិភូក្រសួង ចូលរួមកិច្ចប្រជុំកំពូល នៃវេទិកាដឹកជញ្ជូនអន្តរជាតិ International Transport Forum 2023 Summit (ITF-2023 Summit) ដែលប្រព្រឹត្តទៅនៅទីក្រុង Leipzig (ឡាពហ្សិក) ប្រទេសអាល្លឺម៉ង់ ចាប់ពីថ្ងៃទី២៤-២៦ ខែឧសភា ឆ្នាំ២០២៣។
វេទិកាដឹកជញ្ជូនអន្តរជាតិក្រោមប្រធានបទ «វិស័យដឹកជញ្ជូន ដើរតួជាគន្លឹះ ក្នុងការបង្កើតឲ្យមានចីរភាពសេដ្ឋកិច្ច» ជាឱកាសក្នុងការឆ្លុះញ្ចាំង និងចែករំលែកទស្សនៈស្តីពីតួនាទីនៃការដឹកជញ្ជូន ជំរុញកំណើនសេដ្ឋកិច្ច ស្របជាមួយការគិតគូរពីបរិស្ថាន និងសង្គម។
លោកទេសរដ្ឋមន្រ្តី បានផ្តើមបេសកកម្មការងារនៅថ្ងៃទី២៤ ខែឧសភា ឆ្នាំ២០២៣ ដោយការចូលរួមនៅក្នុងកម្មវិធីបើកកិច្ចប្រជុំពេញអង្គ (Plenary Session) ថ្នាក់រដ្ឋមន្រ្តីដឹកជញ្ជូននៃ ITF ក្រោមប្រធានបទ “វិស័យដឹកជញ្ជូន ដើរតួជាគន្លឹះ ក្នុងការបង្កើតឲ្យមានចីរភាពសេដ្ឋកិច្ច សន្តិភាព និងស្ថិរភាព នៅក្នុងដំណាក់កាលដែលមានវិបត្តិ” (Transport as an enabler of sustainable economies, peace and stability in the time crisis)។
ក្នុងកិច្ចប្រជុំពេញអង្គនេះ រដ្ឋមន្រ្តីដឹកជញ្ជូនចក្រភពអង់គ្លេស លោក Mark Harper និងជាប្រធានវិលជុំ ឆ្នាំ២០២៣ របស់ ITF បានលើកឡើងថា វិស័យដឹកជញ្ជូនគឺជាឆ្អឹងខ្នងនៃការអភិវឌ្ឍសេដ្ឋកិច្ច និងសង្គម ហើយការអភិវឌ្ឍវិស័យដឹកជញ្ជូន បៃតង (Green Transport) ក៏បានរួមចំណែកយ៉ាងសំខាន់ ក្នុងការការពារបរិស្ថាន បង្កើតឱកាសការងារ និងការអភិវឌ្ឍសេដ្ឋកិច្ច-សង្គម ប្រកបដោយចីរភាព។ ដោយយល់ឃើញអំពីសារសំខាន់ នៃការកាត់បន្ថយកាបូនក្នុងវិស័យដឹកជញ្ជូន ប្រទេសអង់គ្លេស បានធ្វើការវិនិយោគយ៉ាងច្រើន សន្ធឹកសន្ធាប់ទៅលើ ៖ ស្ថានីយបញ្ចូលថាមពលយានយន្តអគ្គិសនី , រថយន្តក្រុងដែលមិនបញ្ចេញឧស្ម័ន , រថភ្លើងល្បឿនលឿន ដោយប្រើថាមពលអគ្គិសនី , ស្ថិរភាពប្រេងសាំងយន្តហោះ , ផ្លូវសម្រាប់កង់ និងផ្លូវសម្រាប់ថ្មើជើង ហើយប្រទេសអង់គ្លេស ក៏បានកំណត់គោលដៅ Net Zero Emission នៅត្រឹមឆ្នាំ២០៥០។
អគ្គលេខាធិការវេទិកាដឹកជញ្ជូនអន្តរជាតិ ITF លោក Young Tae Kim បានលើកឡើងថា យោងតាមការព្យាករណ៍វិស័យដឹកជញ្ជូនឆ្នាំ២០២៣ ដោយ ITF (Transport Outlook 2023) តម្រូវការក្នុងការដឹកជញ្ជូន បន្តមានកំណើន សម្រាប់អ្នកដំណើរនឹងមានការកើនឡើងជិត៨០% ខ្ពស់ជាងឆ្នាំ២០៥០ ហើយសម្រាប់ទំនិញតម្រូវការ នឹងកើនឡើង២ដង ធៀបនឹងឆ្នាំ២០១៩។
អគ្គលេខាធិការសង្កត់ធ្ងន់ថា ការកាត់បន្ថយកាបូនក្នុងវិស័យដឹកជញ្ជូន នឹងធ្វើឲ្យទីក្រុងកាន់តែមានភាពងាយស្រួលក្នុងការរស់នៅ ធ្វើឲ្យការធ្វើដំណើរតាមផ្លូវថ្នល់មានសុវត្ថិភាពជាងមុន ធ្វើឲ្យគុណភាពខ្យល់ដកដង្ហើមល្អជាងមុន ធ្វើឲ្យខ្សែច្រវាក់ផ្គត់ផ្គង់កាន់តែមានប្រសិទ្ធភាព និងមានភាពស៊ាំ ក៏ដូចជាផ្តល់ជម្រើសច្រើនសម្រាប់អ្នកធ្វើដំណើរផងដែរ។ អគ្គលេខាធិការ ក៏បានអំពាវនាវប្រទេសទាំងអស់ ចាត់វិធានការ និងអនុវត្តព្រមៗគ្នានូវការកាត់បន្ថយកាបូនក្នុងវិស័យដឹកជញ្ជូន (Decarbonizing Transport)។
សូមបញ្ជាក់ថា កិច្ចប្រជុំកំពូល ITF-2023 Summit មានអ្នកចូលរួមជាង១១០០នាក់ និងរដ្ឋមន្រ្តី/អនុរដ្ឋមន្រ្តីដឹកជញ្ជូនជាង៥០នាក់ មកពីបណ្តាប្រទសជាសមាជិកនៃ ITF ទាំង ៦៤ ក្រុមហ៊ុនវិនិយោគធំៗ និងសាជីវកម្មអន្តរជាតិ , ស្ថាប័នហិរញ្ញវត្ថុអន្តរជាតិ , តំណាងអង្គការសហប្រជាតិផ្នែកសេដ្ឋកិច្ចអឺរ៉ុប UNECE (United Nations Economic Commission for Europe) និងបណ្តាប្រទេសជាអ្នកសង្កេតការណ៍។ ក្នុងកិច្ចប្រជុំពេញអង្គនេះ អ្នកចូលរួមបានផ្លាស់ប្តូរទស្សនៈ និងចែករំលែកនូវបទពិសោធន៍ ក្នុងការអភិវឌ្ឍវិស័យដឹកជញ្ជូន និងភស្តុភារកម្ម និងបានពិគ្រោះពិភាក្សាគ្នាយ៉ាងផុលផុសពីស្ថានភាពប្រឈមក្នុងពេលបច្ចុប្បន្ន និងអនាគត ព្រមទាំងឱកាសក្នុងវិស័យដឹកជញ្ជូន និងចល័តភាព (Mobility) ដើម្បីការអភិវឌ្ឍសេដ្ឋកិច្ច បរិស្ថាន និងយុត្តិធម៌សង្គម ៕
