ព្រុចសែល៖ ប្រធានអង្គការណាតូ លោក Jens Stoltenberg បានជំរុញប្រទេសតួកគី កុំឱ្យសិទ្ធិវេតូ ការដេញថ្លៃរបស់ប្រទេសស៊ុយអែត ដើម្បីចូលរួមសម្ព័ន្ធភាពយោធា មុនពេលកិច្ចប្រជុំមួយក្នុងខែនេះ ដើម្បីព្យាយាមយកឈ្នះលើការជំទាស់ ដែលពន្យារពេលសមាជិកភាពរបស់ទីក្រុងស្ដុកហូម។
អគ្គលេខាធិការណាតូលោក Stoltenberg បានប្រាប់អ្នកកាសែតនៅទីក្រុងអ៊ីស្តង់ប៊ុលកាលពីថ្ងៃអាទិត្យ បន្ទាប់ពីជួបជាមួយប្រធានាធិបតីតួកគីលោក Recep Tayyip Erdogan និងរដ្ឋមន្ត្រីការបរទេស ដែលទើបតែងតាំងថ្មីរបស់លោក គឺ Hakan Fidan ដែលជាអតីតប្រធានទីភ្នាក់ងារស៊ើបការណ៍សម្ងាត់ថា “សមាជិកភាព នឹងធ្វើឱ្យស៊ុយអែតកាន់តែមានសុវត្ថិភាព ប៉ុន្តែក៏ធ្វើឱ្យអង្គការណាតូ និងតួកគីកាន់តែរឹងមាំ” ។
លោក Stoltenberg បានបន្ថែមថា “ខ្ញុំទន្ទឹងរង់ចាំបញ្ចប់ការចូលជាសមាជិករបស់ប្រទេសស៊ុយអែតឱ្យបានឆាប់តាមដែលអាចធ្វើទៅបាន” នេះបើយោងតាមការចុះផ្សាយរបស់ទីភ្នាក់ងារសារព័ត៌មាន Aljazeera។
លោក Stoltenberg បានលើកឡើងថា ក្រុមមន្ត្រីមកពីប្រទេសតួកគី ស៊ុយអែត និងហ្វាំងឡង់ នឹងជួបប្រជុំគ្នានៅសប្តាហ៍ក្រោយ ដើម្បីព្យាយាមដោះស្រាយបញ្ហា ដែលបានពន្យារពេលសមាជិកភាពរបស់អង្គការណាតូ របស់ស៊ុយអែត ដោយសំអាងលើយន្តការរួមអចិន្ត្រៃយ៍ ដែលត្រូវបានបង្កើតឡើង ដើម្បីដោះស្រាយកង្វល់របស់ប្រទេសតួកគី អំពីស៊ុយអែត និងហ្វាំងឡង់។
កាលពីខែមីនា ប្រទេសតួកគី បានផ្តល់សច្ចាប័នលើការដេញថ្លៃរបស់ប្រទេសហ្វាំងឡង់ សម្រាប់សមាជិកភាព ហើយវាបានក្លាយជាសមាជិកទី៣១ របស់ណាតូ ក្នុងខែមេសា។ ប្រទេសជាសមាជិកទាំង ៣១ ត្រូវតែផ្តល់សច្ចាប័នលើពិធីសារចូលជាសមាជិករបស់បេក្ខជន ដើម្បីចូលរួមសម្ព័ន្ធអន្តរអាត្លង់ទិក។
រដ្ឋាភិបាលរបស់ប្រទេសតួកគី បានចោទប្រកាន់ប្រទេសស៊ុយអែតថា មានភាពធូរស្រាលពេក ចំពោះអង្គការ “ភេរវករ” និងការគំរាមកំហែងផ្នែកសន្តិសុខ រួមទាំងក្រុមឃឺដ និងមនុស្សដែលមានទំនាក់ទំនងជាមួយនឹងការប៉ុនប៉ងធ្វើរដ្ឋប្រហារឆ្នាំ២០១៦។ ហុងគ្រី ក៏បានពន្យារពេលការអនុម័តរបស់ខ្លួនដែរ ប៉ុន្តែមូលហេតុមិនត្រូវបានបង្ហាញឱ្យច្បាស់លាស់ជាសាធារណៈនោះទេ។
លោក Stoltenberg បានបន្ដថា “ស៊ុយអែត បានចាត់វិធានការជាក់ស្តែងសំខាន់ៗ ដើម្បីបំពេញកង្វល់របស់តួកគី” ដោយកត់សម្គាល់ថា ប្រទេសនេះបានកែប្រែរដ្ឋធម្មនុញ្ញរបស់ខ្លួន ពង្រឹងច្បាប់ប្រឆាំងភេរវកម្ម និងដកការហាមប្រាមអាវុធលើតួកគី ចាប់តាំងពីខ្លួន បានដាក់ពាក្យចូលជាសមាជិកអង្គការណាតូ។
អង្គការណាតូ ចង់នាំប្រទេសស៊ុយអែត ចូលទៅក្នុងរង្វង់នៅពេលប្រធានាធិបតីសហរដ្ឋអាមេរិកលោក ចូ បៃដិន និងមេដឹកនាំផ្សេងទៀតជួបគ្នានៅប្រទេសលីទុយអានី នៅថ្ងៃទី១១-១២ ខែកក្កដា។
ដោយបារម្ភថា ពួកគេអាចត្រូវបានកំណត់គោលដៅដោយទីក្រុងមូស្គូ បន្ទាប់ពីរុស្ស៊ីបានឈ្លានពានអ៊ុយក្រែន កាលពីឆ្នាំមុន ស៊ុយអែត និងហ្វាំងឡង់ បានបោះបង់ចោលទីតាំងប្រពៃណីរបស់ពួកគេនៃការមិនចូលបក្សសម្ព័ន្ធ ដើម្បីស្វែងរកការការពារក្រោមឆ័ត្រសន្តិសុខរបស់អង្គការណាតូ៕ប្រែសម្រួល ឈូក បូរ៉ា
