យេរ៉ូសាឡឹម៖ យោធាអ៊ីស្រាអែល និងរដ្ឋាភិបាល បានឲ្យដឹងថា កប៉ាល់ដឹកទំនិញ ដែលដំណើរការដោយក្រុមហ៊ុនជប៉ុនមួយ ត្រូវបានរឹបអូសនៅក្នុងសមុទ្រក្រហម ដោយក្រុមប្រដាប់អាវុធហួតទី ដែលគាំទ្រដោយអ៊ីរ៉ង់។
រដ្ឋាភិបាលជប៉ុន បានបញ្ជាក់ថា កប៉ាល់ដឹកទំនិញ ដែលដំណើរការដោយក្រុមហ៊ុន Nippon Yusen K.K. ដែលត្រូវបានគេស្គាល់ជាទូទៅថា NYK Line ត្រូវបានរឹបអូស ហើយបានឲ្យដឹងថា មិនមានពលរដ្ឋជប៉ុនក្នុងចំណោមនាវិករបស់ខ្លួននោះទេ។
អ្នកនាំពាក្យកំពូលរបស់ប្រទេសជប៉ុន លោក Hirokazu Matsuno បានឲ្យដឹងនៅថ្ងៃចន្ទក្នុងទីក្រុងតូក្យូថា រដ្ឋាភិបាល “ថ្កោលទោសយ៉ាងដាច់អហង្ការ ចំពោះទង្វើបែបនេះ” ដោយបន្ថែមថា ខ្លួនកំពុងធ្វើការជាមួយប្រទេសពាក់ព័ន្ធ ដើម្បីធានាការដោះលែងកប៉ាល់ និងនាវិក។
ក្រុមប្រដាប់អាវុធហួតទី បានឲ្យដឹងនៅក្នុងសេចក្តីថ្លែងការណ៍មួយថា ពួកគេបានចាប់យកកប៉ាល់អ៊ីស្រាអែលមួយគ្រឿង ហើយបានបើកវាទៅប្រទេសយេម៉ែន នេះបើយោងតាមការចុះផ្សាយរបស់ទីភ្នាក់ងារសារព័ត៌មានក្យូដូជប៉ុន។
ការិយាល័យនាយករដ្ឋមន្ត្រីអ៊ីស្រាអែលបានឲ្យដឹងថា “អ៊ីស្រាអែលថ្កោលទោសយ៉ាងខ្លាំង ចំពោះការវាយប្រហាររបស់អ៊ីរ៉ង់ ប្រឆាំងនឹងនាវាអន្តរជាតិ” ។ “កប៉ាល់ដែលជាកម្មសិទ្ធិរបស់ក្រុមហ៊ុនអង់គ្លេស និងដំណើរការដោយក្រុមហ៊ុនជប៉ុន ត្រូវបានប្លន់ដោយមានការណែនាំពីអ៊ីរ៉ង់ ដោយកងជីវពលហួតទី យេម៉ែន” ដោយបន្ថែមថា គ្មានជនជាតិអ៊ីស្រាអែល នៅលើកប៉ាល់នោះទេ។
ក្រុមហ៊ុន Nippon Yusen បានឲ្យដឹងថា ខ្លួនដំណើរការកប៉ាល់ដឹកតាមរថយន្ត ដែលមានឈ្មោះថា Galaxy Leader។ មនុស្សសរុប ២៥នាក់នៅលើយន្តហោះ ហើយនាវិកមកពីប៊ុលហ្គារី អ៊ុយក្រែន ហ្វីលីពីន ម៉ិកស៊ិក និងរ៉ូម៉ានី៕ ប្រែសម្រួល ឈូក បូរ៉ា
