បរទេស៖ នាយករដ្ឋមន្ត្រីថៃ លោក សេដ្ឋា ថាវីស៊ីន កាន់កាប់ទ្រព្យសម្បត្តិដែលមានតម្លៃ ៦៥០ លានបាត រួមទាំងរថយន្តទំនើបតម្លៃ ៥០ លានបាត និងនាឡិកាចំនួន ៣៨ គ្រឿង ដែលអង្គការឃ្លាំមើលអំពើពុករលួយរបស់ថៃបានប្រកាសជាសាធារណៈកាលពីថ្ងៃព្រហស្បតិ៍។
យោងតាមសារព័ត៌មាន The Nation របស់ថៃ ចេញផ្សាយកាលពីថ្ងៃទី២៨ ខែធ្នូ ឆ្នាំ២០២៣ បានឱ្យដឹងថា ការិយាល័យគណៈកម្មាធិការជាតិប្រឆាំងអំពើពុករលួយ (NACC) កាលពីថ្ងៃព្រហស្បតិ៍បានបង្ហាញថា នាយករដ្ឋមន្ត្រីថៃ ដែលជាអតីតមហាសេដ្ឋីអចលនទ្រព្យ មានទ្រព្យសម្បត្តិសរុបចំនួន ៦៥៩.៣៩១.៦១០ បាត។
ដូចដែលបានកំណត់ដោយផ្នែកទី ១០២ នៃច្បាប់រៀបចំឆ្នាំ ២០១៨ ស្តីពីការប្រឆាំងអំពើពុករលួយ បុគ្គលដែលកាន់មុខតំណែងនយោបាយត្រូវតែប្រកាសទ្រព្យសម្បត្តិ និងបំណុល ព្រមទាំងសហព័ទ្ធរបស់ពួកគេក្នុងរយៈពេល ៦០ ថ្ងៃនៃការចូលកាន់តំណែង។
NACC បានបង្ហាញថា នាយករដ្ឋមន្ត្រីថៃមានសាច់ប្រាក់ចំនួន ១ លានបាត , ៦៨.៩៨៦.៥៥៨បាត នៅក្នុងប្រាក់បញ្ញើនៅគណនីធនាគារចំនួន៤៧ និង ប្រាក់ចំនួន ១.៣០១.៦៦៨បាត នៅក្នុងការវិនិយោគ។
លោក សេដ្ឋា ថាវីស៊ីន ក៏មានដីក្នុងទីក្រុងបាងកក ដែលមានតម្លៃ ១៥៨,៤ លានបាតផងដែរ។
នាយករដ្ឋមន្ត្រីលោក សេដ្ឋា ថាវីស៊ីន ក៏បានកាន់កាប់ទ្រព្យសម្បត្តិអគារផ្សេងទៀតដែលមានតម្លៃ ១៥៦.៤២៣.១២០ បាត។ ក្នុងចំណោមនោះមានអាផាតមិនមួយនៅតំបន់រមណីយដ្ឋាន ហួហ៊ីន ក្នុងខេត្ត Prachuap Khiri Khan និងផ្ទះបីជាន់នៅស្រុក Khlong Toei ក្នុងរដ្ឋធានីដែលមានតម្លៃ ១៨ លានបាត។
ចំណែករថយន្តវិញ លោក សេដ្ឋា មានរថយន្ត Aston Martin DB5 ដែលមានតម្លៃ ៥០ លានបាត។ លោកបានប្រាប់អ្នកសារព័ត៌មានកាលពីថ្ងៃព្រហស្បតិ៍ថា យានជំនិះនេះគឺជារថយន្តស៊េរីឆ្នាំ ១៩៦៣ ដែលបង្ហាញនៅក្នុងខ្សែភាពយន្ត James Bond ថ្មីៗបំផុតដែលត្រូវបានថតនៅប្រទេសអ៊ីតាលី។
លោកថា រថយន្តនេះជាចំណូលចិត្តរបស់លោក។ នៅពេលសួរថាតើលោកជាមេដឹកនាំថៃមានបំផុតឬអត់នោះ លោកមិនបដិសេធនោះទេ។ លោកថា លោកបានខិតខំធ្វើការអស់រយៈពេលជាច្រើនឆ្នាំមកហើយ ស្ទើរតែចូលនិវត្តន៍ ។ ប្រែសម្រួលៈ ណៃ តុលា
