ភ្នំពេញ៖លោក ឃួង ស្រេង អភិបាលរាជធានីភ្នំពេញ បានលើកឡើងថា រដ្ឋបាលរាជធានីភ្នំពេញ ប្តេជ្ញានឹងខិតខំដោះស្រាយ ឲ្យបានល្អបំផុត ជាមួយប្រជាពលរដ្ឋ ជុំវិញគម្រោងផែនការវិនិយោគ ហេដ្ឋារចនាសម្ព័ន្ធប្រព័ន្ធលូ និងប្រព័ន្ធរំដោះទឹក។
ការប្តេជ្ញាចិត្តរបស់អាជ្ញាធរភ្នំពេញ ខាងលើនេះ ធ្វើឡើងក្នុងកិច្ចប្រជុំការងារដោះស្រាយ ផលប៉ះពាល់គម្រោងផែនការវិនិយោគ ហេដ្ឋារចនាសម្ព័ន្ធប្រព័ន្ធលូ និងប្រព័ន្ធរំដោះទឹក សម្រាប់បញ្ចៀសការជន់លិច នៅភូមិសាស្រ្តរាជធានីភ្នំពេញ ក្រោមអធិបតីភាព លោក ឃួង ស្រេង អភិបាលរាជធានីភ្នំពេញ និងលោកបណ្ឌិត ស្តើង សុខុម រដ្ឋលេខាធិការ និងជាប្រធានគណៈកម្មការអន្តរក្រសួង នៅរសៀលថ្ងៃទី១៨ ខែមករា ឆ្នាំ២០២៤ នៅសាលារាជធានីភ្នំពេញ។
ក្នុងនោះ លោក ឃួង ស្រេង បានឲ្យដឹងថា កិច្ចប្រជុំនេះ មានគោលដៅដោះស្រាយ ផលប៉ះពាល់ ឲ្យបានល្អ កាត់បន្ថយបាននូវការថ្នាំងថ្នាក់ ពីប្រជាពលរដ្ឋ ដែលរងផលប៉ះពាល់។
លោកអភិបាល លើកឡើងថា រាជធានីភ្នំពេញ កើតឡើងក្នុងតំបន់ទំនាប លិចទឹក ដោយទឹកហូរពីតំបន់ភ្នំ ពិសេសមកពីខេត្តកំពង់ស្ពឺ ហូរចូលមកភ្នំពេញ ដូច្នេះហើយនៅរដូវវស្សា រាជធានីភ្នំពេញ តែងប្រឈម និងបញ្ហាលិចលង់ បើទោះបីយើងប្រឹងប្រែង ក្នុងការដោះស្រាយយ៉ាងណាក្តី។
លោកបន្តថា ដោយមើលឃើញ ពីបញ្ហាប្រឈមនេះ រាជរដ្ឋាភិបាល ដឹកនាំដោយសម្ដេចធិបតី ហ៊ុន ម៉ាណែត នាយករដ្ឋមន្ត្រី បានផ្តល់ឥណទាន ដើម្បីដោះស្រាយបញ្ចប់ បញ្ហាទឹកជន់លិច នៅរាជធានីភ្នំពេញនេះ។
លោក ឃួង ស្រេង បញ្ជាក់ថា “គម្រោងនេះ មានផលប៉ះពាល់ខ្លាំង ដែលទៀមទាឲ្យយើងយកចិត្តទុកដាក់ ក្នុងការដោះស្រាយ ពិសេស ការផ្សព្វផ្សាយ និងពន្យល់ ប្រជាពលរដ្ឋ ឲ្យបានយល់ពីសារៈសំខាន់ នៃគម្រោងនេះ។ សម្រាប់ រដ្ឋបាលរាជធានីភ្នំពេញ ប្តេជ្ញាចិត្តថា នឹងខិតខំដោះស្រាយ ឲ្យបានល្អបំផុត ជាមួយប្រជាពលរដ្ឋ”។
ជាមួយគ្នានេះ លោកបណ្ឌិត ស្តើង សុខុម រដ្ឋលេខាធិការ និងជាប្រធានគណៈកម្មការអន្តរក្រសួង បានបញ្ជាក់ អំពីការបន្តគាំទ្រ សកម្មភាពរបស់អាជ្ញាធររាជធានីភ្នំពេញ ក្នុងការអភិវឌ្ឍរាជធានីបន្តទៀត។ ជាធម្មតាមានការអភិវឌ្ឍ គឺមានបញ្ហាប្រឈម ហើយរួមនឹងបញ្ហា កកស្ទះចរាចរណ៍ផងដែរ។
លោក បន្តថា ការអភិវឌ្ឍ បូករួមជាមួយការបម្រែលបម្រួលអាកាសធាតុ វាពិតជានាំមកនូវភាពលិចលង់ហើយ សូម្បីប្រទេសជឿនលឿនមួយចំនួនដូចជា នៅប្រទេសជប៉ុន និងអាមេរិកជាដើម ក៏ទទួលរងការលិចលង់ដែរ ជៀសមិនផុតទេ។
លោកអ៊ឹម សិទ្ធីរ៉ា អគ្គនាយក នៃអគ្គនាយកដ្ឋានដោះស្រាយ ផលប៉ះពាល់ បានឲ្យដឹងថា រាជរដ្ឋាភិបាល បានដាក់ចេញ នូវគោលបំណង ប្រកបដោយការប្ដេជ្ញាចិត្តខ្ពស់ សំដៅបញ្ចប់ បញ្ហាទឹកជន់លិចរាជធានីភ្នំពេញ ក្នុងរយៈពេល ៥ឆ្នាំយ៉ាងយូរ នៅរដូវភ្លៀងធម្មតា ដោយត្រូវអនុលោម តាមផែនការមេ ច្បាស់លាស់ នៃការ វិនិយោគហេដ្ឋារចនាសម្ព័ន្ធ។
លោកថា ដើម្បីសម្រេចបាន នូវគោលបំណងនេះ រាជរដ្ឋាភិបាល មានភាពចាំបាច់ ក្នុងការរៀបចំ និងអនុវត្តផែនការវិនិយោគ លើហេដ្ឋារចនាសម្ព័ន្ធប្រព័ន្ធលូ និងប្រព័ន្ធរំដោះទឹក ដោយឈរលើមូលដ្ឋានសំខាន់ៗ ចំនួន ៣ ទី១) ការបញ្ចៀស និងការគ្រប់គ្រងហានិភ័យ នៃការជន់លិច។ ២) ផែនការមេ ត្រូវមានភាពច្បាស់លាស់ គ្រប់ជ្រុងជ្រោយ ប្រទាក់ក្រឡា និងមានលំដាប់អាទិភាពច្បាស់លាស់ ព្រមទាំងមាន ភាពបំពេញឱ្យគ្នាទៅវិញទៅមក ពីគ្រប់ប្រភពហិរញ្ញប្បទាន។ ៣) ការធានានិរន្តរភាពប្រតិបត្តិការ បន្ទាប់ពីការវិនិយោគ៕
