រីយ៉ូ៖ មេដឹកនាំក្រុមចំនួន 20 បានទម្លាក់ការសន្យាប្រឆាំងនឹងការគាំពារនិយម របស់ពួកគេនៅក្នុងសេចក្តីថ្លែងការណ៍មួយ ដែលបានចេញបន្ទាប់ពីកិច្ចប្រជុំលើកដំបូង របស់ពួកគេចាប់តាំងពីលោក ដូណាល់ ត្រាំ ត្រូវបានជាប់ឆ្នោតជា ប្រធានាធិបតីសហរដ្ឋអាមេរិក ខណៈដែលមេដឹកនាំពិភពលោកបានត្រៀមខ្លួន ដើម្បីទប់ទល់នឹងការគំរាមកំហែង របស់លោកក្នុងការដំឡើងពន្ធនាំចូលខ្ពស់។
ខណៈពេលដែលក្រុមចម្រុះអាចកើតឡើង ក្រោមការរិះគន់ជាថ្មីពីលោក ត្រាំ ចំពេលមានការសង្ស័យកាន់តែខ្លាំងឡើង អំពីប្រសិទ្ធភាពរបស់វាជាវេទិកា សម្រាប់ការសម្របសម្រួលគោលនយោបាយ មេដឹកនាំបាននិយាយថា បញ្ហាប្រឈមដែលសេដ្ឋកិច្ចពិភពលោក អាចដោះស្រាយបានតាមរយៈ ដំណោះស្រាយពហុភាគីប៉ុណ្ណោះ។
សេចក្តីថ្លែងការណ៍រួម ដ៏កម្រដែលបានចេញផ្សាយ នៅថ្ងៃដំបូងនៃកិច្ចប្រជុំកំពូល រយៈពេលពីរថ្ងៃនៅទីក្រុង Rio de Janeiro ប្រទេសប្រេស៊ីល បានសម្តែង “ការព្រួយបារម្ភយ៉ាងខ្លាំង” អំពីហានិភ័យភូមិសាស្ត្រនយោបាយនៅមជ្ឈិមបូព៌ា ដោយចង្អុលបង្ហាញពីការឈឺចាប់របស់មនុស្ស និងផលប៉ះពាល់អវិជ្ជមាន ផ្សេងទៀតនៃសង្គ្រាម និងជម្លោះ រួមទាំងការឈ្លានពានរបស់ រុស្ស៊ីប្រឆាំងនឹងអ៊ុយក្រែន។
ទោះបីជាលោក ត្រាំ មិនទាន់ត្រូវបានសម្ពោធចូលកាន់តំណែងក៏ដោយ ក៏ការប្រយ័ត្នប្រយែងបាន កើតមាននៅក្នុងកិច្ចប្រជុំកំពូល G20។ ការត្រឡប់មកវិញរបស់លោក ធ្វើឱ្យមានការចងចាំឡើងវិញអំពី ការសម្រេចចិត្តភ្លាមៗរបស់លោក ក្នុងការដកសហរដ្ឋអាមេរិកចេញពីកតិកាសញ្ញា ពាណិជ្ជកម្មសេរីនៃភាពជាដៃគូអន្តរប៉ាស៊ីហ្វិក និងកិច្ចព្រមព្រៀងទីក្រុងប៉ារីស ដើម្បីប្រយុទ្ធប្រឆាំងនឹងការឡើងកំដៅផែនដី។
ជាមួយនឹងភាពតានតឹង រវាងប្រទេសសេដ្ឋកិច្ចកំពូលទាំងពីរ របស់ពិភពលោកដែលកំពុងតែសម្លឹងមើល ទៅកាន់តែតានតឹងក្រោមការដឹកនាំរបស់លោក ត្រាំ ប្រធានាធិបតីចិនលោក ស៊ី ជីនពីង ដែលចូលរួមក្នុងកិច្ចប្រជុំនោះបានសម្តែងការប្រឆាំងរបស់លោក ចំពោះ “ការគាំពារនិយម និងឯកតោភាគីនិយម” ។
ដោយសំដៅដល់អង្គការពាណិជ្ជកម្មពិភពលោក G20 បានឲ្យដឹងនៅក្នុងសេចក្តីថ្លែងការណ៍ថា “យើងសង្កត់ធ្ងន់លើតម្រូវការដើម្បីធានា ឱ្យមានប្រព័ន្ធពាណិជ្ជកម្មពហុភាគីផ្អែកលើច្បាប់ មិនរើសអើង យុត្តិធម៌ បើកចំហ រួមបញ្ចូល សមធម៌ និរន្តរភាព និងតម្លាភាព ជាមួយនឹង អង្គការពាណិជ្ជកម្មអន្ដរជាតិ ជាស្នូលរបស់ខ្លួន”៕
ប្រែសម្រួល ឈូក បូរ៉ា
