រ៉ូម៖ រដ្ឋមន្ត្រីការបរទេសអ៊ីតាលី លោក Antonio Tajani បានឲ្យដឹងថា សហភាពអឺរ៉ុប ត្រៀមនឹងដាក់ពន្ធសង សឹករាប់លានអឺរ៉ូ លើទំនិញអាមេរិក ប្រសិនបើការ ចរចាពាណិជ្ជកម្ម ដែលកំពុងបន្តរវាង ភាគីទាំងពីរ បរាជ័យក្នុងការបង្កើត កិច្ចព្រមព្រៀងមួយ។
នៅក្នុងបទសម្ភាសន៍មួយដែលត្រូវបានចេញផ្សាយកាលពីថ្ងៃចន្ទ ដោយកាសែតប្រចាំថ្ងៃរបស់អ៊ីតាលី Il Messaggero លោក Tajani បានសង្កត់ធ្ងន់ថា ខណៈដែលសហភាពអឺរ៉ុប មានឧបករណ៍ដើម្បីការពារ ផលប្រយោជន៍សេដ្ឋកិច្ចរបស់ខ្លួន ការសន្ទនានៅតែជាផ្លូវដែលពេញចិត្តឆ្ពោះទៅមុខ ។ លោកបានបន្តថា «ពន្ធបានប៉ះពាល់ដល់គ្រប់ភាគី រួមទាំង សហរដ្ឋអាមេរិកផងដែរ ។ “ប្រសិនបើទីផ្សារភាគហ៊ុនធ្លាក់ចុះ នោះធ្វើឱ្យប្រាក់សោធននិវត្តន៍ និងការសន្សំរបស់ប្រជាជនអាមេរិក មានហានិភ័យដូចគ្នា”។
ការកត់សម្គាល់របស់លោក Tajani ធ្វើឡើងតាមសេចក្តីប្រកាស របស់ប្រធានាធិបតី អាមេរិកលោក ដូណាល់ ត្រាំ កាលពីថ្ងៃសៅរ៍ថា ទីក្រុងវ៉ាស៊ីនតោន នឹងដាក់ពន្ធ ៣០ ភាគរយលើការនាំចូលពីអឺរ៉ុប និងម៉ិកស៊ិកចាប់ពីថ្ងៃទី ១ ខែសីហា។ ការផ្លាស់ប្តូរនេះគឺជាការកើនឡើងចុងក្រោយបង្អស់នៅក្នុងគោលនយោបាយពន្ធដារជាបន្តបន្ទាប់ដែលណែនាំដោយរដ្ឋបាលលោក ត្រាំ ទោះបីជាមន្ត្រីអាមេរិក និងអឺរ៉ុបនៅតែធ្វើការ លើកិច្ចព្រមព្រៀងពាណិជ្ជកម្មក៏ដោយ។
នាយករដ្ឋមន្ត្រីអ៊ីតាលីលោកស្រី Giorgia Meloni ក៏បានសម្តែង ការព្រួយបារម្ភផងដែរ លើការរំពឹងទុក នៃសង្គ្រាម ពាណិជ្ជកម្មឆ្លង ដែនអាត្លង់ទិក ដោយព្រមានថា ការអភិវឌ្ឍន៍បែបនេះនឹងធ្វើឱ្យ ប៉ះពាល់ដល់ភាគីទាំងពីរ នេះបើយោងតាមការ ចុះផ្សាយរបស់ទីភ្នាក់ងារ សារព័ត៌មានចិនស៊ិនហួ។
លោកស្រី Meloni បានឲ្យដឹងនៅក្នុងសេចក្តីថ្លែងការណ៍មួយថា “រដ្ឋាភិបាលរបស់យើង មានទំនាក់ទំនង យ៉ាងជិតស្និទ្ធជាមួយគណៈកម្មការអឺរ៉ុប និងគ្រប់ភាគីពាក់ព័ន្ធក្នុងការចរចារពន្ធ” ។ “សង្រ្គាមពាណិជ្ជកម្មមួយនៅក្នុងលោកខាងលិច នឹងធ្វើឱ្យយើងទាំងអស់គ្នាចុះខ្សោយ នៅពេលប្រឈមមុខនឹងបញ្ហាសកល ដែលយើងកំពុងដោះស្រាយជាមួយគ្នា។ អឺរ៉ុបមានកម្លាំងសេដ្ឋកិច្ច ដើម្បីការពារផលប្រយោជន៍របស់ខ្លួន និងឈានដល់កិច្ចព្រមព្រៀង ដោយយុត្តិធម៌”។
ការវិភាគដោយវិទ្យាស្ថានសម្រាប់ការសិក្សានយោបាយ អន្តរជាតិដែលមានមូលដ្ឋាន នៅទីក្រុង Milan បានបង្ហាញថា ប្រទេសអ៊ីតាលីនឹងស្ថិតក្នុងចំណោមប្រទេសអឺរ៉ុប ដែលរងផលប៉ះពាល់ខ្លាំងបំផុត ដោយពន្ធរបស់សហរដ្ឋអាមេរិក។ នៅក្រោមសេណារីយ៉ូកាតព្វកិច្ច ៣០ ភាគរយ ផលិតផល ក្នុងស្រុកសរុប (GDP) របស់ប្រទេសអាល្លឺម៉ង់ នឹងធ្លាក់ចុះដោយប៉ាន់ស្មាន ០.៥ ភាគរយបើប្រៀបធៀប ទៅនឹងមូលដ្ឋានគ្មានពន្ធ ខណៈ GDP របស់ប្រទេសអ៊ីតាលី នឹងធ្លាក់ចុះប្រមាណ ០.៣៦ ភាគរយ ៕
ប្រែសម្រួល ឈូក បូរ៉ា
