រដ្ឋមន្ត្រី ហេង សួរ អញ្ជើញចូលរួមកិច្ចប្រជុំ ស្ដីពីការអនុវត្តគន្លងអប់រំថ្មី នៅវិទ្យាល័យទេពប្រណម្យ ស្ថិតនៅក្នុងខេត្តកណ្ដាល
កណ្ដាល៖ នាព្រឹកថ្ងៃទី២៥ ខែសីហា ឆ្នាំ២០២៥ លោកហេង សួរ រដ្ឋមន្រ្តីក្រសួងការងារ និងបណ្ដុះបណ្ដាលវិជ្ជាជីវៈ បានអញ្ជើញចូលរួមកិច្ចប្រជុំ ស្ដីពីការអនុវត្តគន្លងអប់រំថ្មី ក្រោមអធិបតីភាពដ៏ខ្ពង់ខ្ពស់ លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា នៅវិទ្យាល័យទេពប្រណម្យ ស្ថិតនៅក្នុងខេត្តកណ្ដាល។
តបតាមអនុសាសន៍ដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្រសួងការងារ និងបណ្ដុះបណ្ដាលវិជ្ជាជីវៈ និងក្រសួងអប់រំ យុវជន និងកីឡា នឹងអនុវត្តសាកល្បងគន្លងអប់រំថ្មីនេះ ក្នុងសាលាគោលដៅមួយចំនួន នៅចុងឆ្នាំ២០២៥ ។
ការអនុវត្តគន្លងអប់រំថ្មីរួមមាន គន្លងវិទ្យាសាស្រ្ត វិទ្យាសាស្រ្តសង្គម និងគន្លងវិជ្ជាជីវៈ ចាប់ពីថ្នាក់ទី១០ នៅតាមវិទ្យាល័យគោលដៅមួយចំនួន ដោយក្នុងនោះរួមមាន វិទ្យាល័យចំណេះទូទៅ និងបច្ចេកទេស វិទ្យាល័យដែលមានអគារធនធាន វិទ្យាល័យមានមជ្ឈមណ្ឌលបច្ចេកវិទ្យាឌីជីថលសហគមន៍ និងវិទ្យាល័យស្ថិតនៅក្បែរតំបន់សេដ្ឋកិច្ចពិសេស៕
