ចិនជំរុញឱ្យមានតួនាទីអង្គការសហប្រជាជាតិខ្លាំងជាងមុន និងអំពាវនាវឱ្យមានការកែទម្រង់
ប៉េកាំង៖ អ្នកការទូតជាន់ខ្ពស់របស់ប្រទេសចិន នៅថ្ងៃសុក្រនេះ បានអំពាវនាវឱ្យមានការពង្រឹង មិនមែនការចុះខ្សោយនោះទេ ដែលជាតួនាទីរបស់អង្គការសហប្រជាជាតិ ដោយលេីកឡេីងថា កំណែទម្រង់គឺចាំបាច់ ដើម្បីជួយដល់ស្ថាប័នពិភពលោក ក្នុងការដោះស្រាយបញ្ហាប្រឈមជាសកល។
អនុរដ្ឋមន្ត្រីការបរទេសលោក Ma Zhaoxu បានប្រាប់សន្និសីទសារព័ត៌មានមួយថា “ប៉ុន្មានឆ្នាំថ្មីៗនេះបានរំលឹកយើងម្តងហើយម្តងទៀតតាមរយៈវិបត្តិធំៗថា តួនាទីរបស់អង្គការសហប្រជាជាតិត្រូវតែត្រូវបានពង្រឹង មិនត្រូវបន្ថយទេ។ ស្ថានភាពរបស់វាត្រូវតែរក្សា មិនត្រូវបានជំនួស”។
លោកបានលេីកឡេីងថា ប្រសិទ្ធភាពរបស់អង្គការសហប្រជាជាតិ គឺអាស្រ័យលើប្រទេសជាសមាជិកដែលប្រកាន់ខ្ជាប់នូវធម្មនុញ្ញអង្គការសហប្រជាជាតិ និងការគោរពច្បាប់អន្តរជាតិ និងបទដ្ឋានជាមូលដ្ឋានដែលគ្រប់គ្រងទំនាក់ទំនងអន្តរជាតិ។
លោកបានបន្ថែមថា កំណែទម្រង់គឺត្រូវការជាចាំបាច់ ដើម្បីជួយអង្គការឆ្លើយតបកាន់តែប្រសើរឡើងចំពោះបញ្ហាប្រឈមសកល ជាពិសេសតាមរយៈការជំរុញតំណាង និងសំឡេងនៃប្រទេសកំពុងអភិវឌ្ឍន៍ក្នុងកិច្ចការអន្តរជាតិ៕
ប្រែសម្រួល ឈូក បូរ៉ា
