បរទេស៖ ប្រទេសកូរ៉េខាងត្បូង បានរាយការណ៍ពី ករណីមេរោគកូរ៉ូណាថ្មីចំនួន៣៤ករណី នៅថ្ងៃអាទិត្យនេះ ហើយនោះគឺជាចំនួនប្រចាំថ្ងៃខ្ពស់បំផុត ក្នុងរយៈពេលមួយខែ ក្រោយមានការឆ្លងតិចតួច បានកើតមានឡើង នៅតំបន់ជុំវិញក្លិបរាត្រី ជាទីដែលអ្នកជម្ងឺបានមកលេង។
មជ្ឈមណ្ឌលទប់ស្កាត់ និងគ្រប់គ្រងជម្ងឺកូរ៉េ ហៅកាត់ថា KCDC តាមសេចក្តីរាយការណ៍ បាននិយាយប្រាប់ថា នៅក្នុងចំណោមករណីឆ្លងវីរុសកូវីដ១៩ថ្មីទាំងនោះ ២៦ករណី គឺបានឆ្លងនៅក្នុងស្រុក ហើយចំនួន៨ផ្សេងទៀត គឺជាករណីនាំចូលពីបរទេស។
គួរបញ្ជាក់ថា ការផ្ទុះឆ្លងកើនឡើងជាថ្មីនេះ បានធ្វើឲ្យទីក្រុងសេអ៊ូល ធ្វើការបិទជាបណ្ដោះអាសន្ន នូវទីតាំងកំសាន្ត ពេលរាត្រីទាំងអស់ភ្លាមៗ កាលពីថ្ងៃសៅរ៍ម្សិលមិញនេះ ទីក្រុងសេអ៊ូលបាននិយាយថា ខ្លួនកំពុងតែតាមដានរកមនុស្សប្រហែល ១.៥០០នាក់ ដែលបានទៅលេងនៅក្លិបរាត្រី និងស្នើឲ្យអ្នកដែលទើបទៅលេងកាលពីចុងសប្ដាហ៍មុន ស្នាក់នៅដាច់ដោយឡែកពីគេ សម្រាប់រយៈពេល ១៤ថ្ងៃ និងធ្វើតេស្ត៕
ប្រែសម្រួល៖ ប៉ាង កុង
