អតីតនគរបាលចរាចរណ៍ឈ្មោះ ស៊ិន សុភា ដែលជាតារាសម្តែង បានសាងកំហុសល្មើសវិន័យ ជាច្រើនលើក
ភ្នំពេញ ៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញបានបញ្ជាក់ពីកំហុសរបស់ឈ្មោះ ស៊ិន សុភា អតីតមន្ត្រីការិយាល័យ នគរបាលចរាចរណ៍ចរាចរណ៍ នៃស្នងការដ្ឋាននគរបាលរាជធានីភ្នំពេញ ដែលបានសាងកំហុសល្មើសវិន័យនគរបាលជាតិ ។
ការបញ្ជាក់ពីកំហុសឆ្គងរបស់អតីតមន្ត្រីការិយាល័យនគរបាលចរាចរណ៍រូបនេះ បន្ទាប់ពីមានការផ្សព្វផ្សាយថា ឈ្មោះ ស៊ិន សុភា បានផ្ទុះការតវ៉ាចំពោះការបណ្តេញចេញពីក្របខណ្ឌនាពេលកន្លងមក ។
ចំពោះការតវ៉ានេះ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាន នគរបាលរាជធានីភ្នំពេញស្រាយបំភ្លឺថា ឈ្មោះ ស៊ិន សុភា ដែលជាតារាសម្តែង មួយរូបផងដែរនោះ បានប្រព្រឹត្តល្មើសវិន័យនគរបាលជាតិ ក្នុងពេលបម្រើការងារជាមន្រ្តីនគរបាល អនុវត្តច្បាប់ចរាចរណ៍ផ្លូវគោក ដោយបានសាងកំហុសឆ្គង ជាបន្តបន្ទាប់បង្កប៉ះពាល់កិត្តិយសសេចក្តីថ្លៃថ្នូរនគរបាលជាតិ និងធ្វើឲ្យប៉ះពាល់ផលប្រយោជន៍ប្រជាពលរដ្ឋ ស្លូតត្រង់ ដែលកន្លងមកស្នងការដ្ឋាន នគរបាលរាជធានីភ្នំពេញ ផ្តល់ឱកាសឲ្យឈ្មោះ ស៊ិន សុភា កែប្រែកំហុសឆ្គងនៅការិយាល័យបុគ្គលិកជាច្រើនដង តែឈ្មោះ ស៊ិន សុភា មិនព្រមកែខ្លួនហើយនៅតែបន្តសាងកំហុសឆ្គង។
ល្មើសវិន័យរបស់អតីតអនុសេនីយ៍ទោ ស៊ិន សុភា មន្ត្រីការិយាល័យនគរបាលចរាចរណ៍ផ្លូវគោករួមមាន ៖ កាលពីអំឡុងឆ្នាំ២០២១ ឈ្មោះ ស៊ិន សុភា ធ្លាប់ល្មើសបទវិន័យនគរបាលជាតិកម្ពុជា ដោយបានប្រើប្រាស់ឯកសណ្ឋាន សញ្ញាស័ក្ដិ បង្ហោះជាវីដេអូចម្រៀងនៅលើបណ្ដាញសង្គមហ្វេសប៊ុក និងTik Tok ដើម្បីផលប្រយោជន៍ផ្ទាល់ខ្លួន ដែលនាំឲ្យប៉ះពាល់កិត្តិយស សេចក្ដីថ្លៃថ្នូរ របស់កងកម្លាំងនគរបាលជាតិ ហើយត្រូវបានអគ្គស្នងការដ្ឋាននគរបាលជាតិ អនុវត្តទណ្ឌកម្មខាងវិន័យក្រោមរូបភាព បន្ថយឋានន្តរស័ក្ដិចំនួន១ថ្នាក់។
កាលពីអំឡុងខែកុម្ភៈ ឆ្នាំ២០២៤ ឈ្មោះ ស៊ិន សុភា យកជនស៊ីវិលឲ្យចុះអនុវត្តការងារជំនាញនៅគោលដៅរបស់ខ្លួនគ្រប់គ្រង រៀបចំឲ្យឈ្មោះ យឹម សុផាណា ផ្ទេរប្រាក់ផាកពិន័យក្លែងក្លាយទំលាក់កំហុសឲ្យមន្ត្រីនគរបាលចរាចរណ៍នៅគោលដៅស្តុបក្ដាន់ពីរ និងផ្ដើមគំនិតបង្កើតផេកក្លែងក្លាយឈ្មោះ គង់ ម៉ូលីកា បង្ហោះផ្សព្វផ្សាយព័ត៌មានមិនពិត និងដាក់កំហុសលើមន្ត្រីនគរបាលចរាចរណ៍ នៅគោលដៅស្តុបក្តាន់ពីរ ថាមានភាពអសកម្ម ដែលខ្លួនបានរៀបចំ ដែលធ្វើឲ្យសាធារណៈមតិរិៈគន់ស្ថាប័ននគរបាលជាតិ។
កាលពីថ្ងៃទី២៨ ខែធ្នូ ឆ្នាំ២០២៤ ឈ្មោះ ស៊ិន សុភា ឃាត់រថយន្ត១គ្រឿង ល្មើសភ្លើង សញ្ញាចរាចរណ៍ មិនមានបណ្ណបើកបរនៅចំណុចស្តុបអូរបែកក្អម បុគ្គលរូបនេះ បានប្រើប្រាស់ វិធានការស្របច្បាប់គំរាមទារប្រាក់ ដោយយកតួនាទីសិទ្ធអំណាចគាបសង្កត់ដើម្បីផលប្រយោជន៍។ ចាត់ចែងបញ្ជាឲ្យមន្ត្រីនាំរថយន្តចេញពីគោលដៅ ដើម្បីបិទបាំងពីមហាជន និងមានភាពងាយស្រួលដល់ការដាក់សម្ពាធក្នុងការទារប្រាក់ រហូតធ្វើឲ្យម្ចាស់រថយន្តបានឡើងតោងខាងក្រោយរថយន្ត បង្កឲ្យមានការភ្ញាក់ផ្អើលដល់ប្រជាពលរដ្ឋដែលធ្វើដំណើរលើដងផ្លូវ ថតសកម្មភាពបង្ហោះលើបណ្ដាញសង្គម។
សកម្មភាពនេះបានលាក់បាំងព័ត៌មាន មិនរាយការណ៍ជូននាយការិយាល័យ ដើម្បីមានគោលការណ៍ដោះស្រាយ មុនហេតុការណ៍មិនទាន់ផ្ទុះ លើបណ្ដាញសង្គម ហើយត្រូវបានអគ្គស្នងការដ្ឋាននគរបាលជាតិ អនុវត្តទណ្ឌកម្មខាងវិន័យក្រោមរូបភាព ព្រមានជាលាយលក្ខណ៍អក្សរ និងបន្ថយ ឋានន្តរស័ក្ដិចំនួន១ថ្នាក់។
ដោយឡែក កាលពីថ្ងៃទី៣ ខែកញ្ញា ឆ្នាំ២០២៥ ផ្ដើមចេញពីការមិនសប្បាយចិត្ត ជាមួយថ្នាក់ដឹកនាំការិយាល័យ ដែលពុំបានដាក់ឈ្មោះរូបគេ (ស៊ិន សុភា) ចុះគោលដៅ ទើបធ្វើឲ្យមានការថ្នាំងថ្នាក់ចិត្ត ឈានដល់បែកធ្លាយឯកសារផ្ទៃក្នុងអង្គភាព ឲ្យទៅសារព័ត៌មានយកបង្ហោះខ្លឹមសារ វាយប្រហារមកលើការិយាល័យ នគរបាលចរាចរណ៍ផ្លូវគោក ៕
