ក្រុមអ្នករត់ម៉ូតូឌុប មួយក្រុមនៅប៉ាតាយ៉ា ប្រទេសថៃ វាយទាត់ធាក់ទៅលើភ្ញៀវទេសចរបរទេស ដោយសាររឿងលេងបាញ់ទឹកលេងក្នុងពិធីសង្ក្រាន្ត
បរទេស៖ ក្រុមអ្នករត់ម៉ូតូឌុបមួយក្រុមនៅក្រុងប៉ាតាយ៉ា ប្រទេសថៃ កំពុងប្រឈមមុខ នឹងការរិះគន់ពីសាធារណជន បន្ទាប់ពីវីដេអូឃ្លីបមួយ បានបង្ហាញពីពួកគេបានវាយទាត់ធាក់ ទៅលើភ្ញៀវទេសចរបរទេស បន្ទាប់ពីហេតុការណ៍លេងបាញ់ទឹកលេង ក្នុងពិធីសង្ក្រាន្តនៅយប់ថ្ងៃអាទិត្យ។
យោងតាមសារព័ត៌មាន Khaosod English ចេញផ្សាយនៅថ្ងៃទី១៣ ខែមេសា ឆ្នាំ២០២៦ថា ហេតុការណ៍នេះបានកើតឡើងនៅថ្ងៃទី១៣ ខែមេសា ឆ្នាំ២០២៦ នៅក្នុងផ្លូវ Soi 6 ឆ្នេរប៉ាតាយ៉ា ខេត្តឈុនបុរី។ នៅក្នុងវីដេអូ បុរសៗដែលពាក់អាវកាក់ពណ៌ទឹកក្រូចត្រូវបានគេឃើញកំពុងទាត់ធាក់ និងដាល់ភ្ញៀវទេសចរបរទេសម្នាក់ដែលបានដួលទៅលើដី ខណៈដែលជនបរទេសម្នាក់ទៀតបានព្យាយាមអន្តរាគមន៍ និងជួយដៃគូរបស់គាត់ក្នុងចំណោមតំបន់ដែលមានមនុស្សច្រើន។
ប៉ូលីសបាននិយាយថា ការឈ្លោះប្រកែកគ្នានេះត្រូវបានគេរាយការណ៍ថា បានចាប់ផ្តើមបន្ទាប់ពីភ្ញៀវទេសចរត្រូវបានគេឃើញ លេងទឹកជាមួយអ្នកជិះក្នុងស្រុក ហើយបានបាញ់ទឹកដាក់ក្រុម អ្នករត់ម៉ូតូឌុបដោយចៃដន្យ ដែលនាំឱ្យមានការឈ្លោះប្រកែក គ្នាដែលកើនឡើងដល់អំពើហិង្សា ។
មិនទាន់មានពាក្យបណ្តឹង ជាផ្លូវការណាមួយត្រូវបានដាក់ទៅស្ថានីយ៍ប៉ូលីសក្រុងប៉ាតាយ៉ានៅឡើយទេ ប៉ុន្តែអ្នកស៊ើបអង្កេតកំពុង ពិនិត្យមើលហេតុការណ៍នេះ និងប្រមូលភស្តុតាងដើម្បីកំណត់កាលៈទេសៈពិតប្រាកដ និងបន្តចាត់វិធានការផ្លូវច្បាប់៕
