អ៊ីរ៉ង់ សង្កត់ធ្ងន់លើការសន្ទនា ប៉ុន្ដែរិះគន់ ស្តង់ដារពីរ របស់ទីក្រុងវ៉ាស៊ីនតោន ក្នុងការចរចា
តេអេរ៉ង់៖ ប្រធានាធិបតីអ៊ីរ៉ង់ លោក Masoud Pezeshkian បានឧ្យដឹងថា អ៊ីរ៉ង់តែងតែស្វាគមន៍ការដោះស្រាយបញ្ហាតាមរយៈការសន្ទនា និងកិច្ចព្រមព្រៀង ហើយនឹងបន្តធ្វើដូច្នេះ ប៉ុន្ដែរិះគន់ ស្តង់ដារពីរ របស់ទីក្រុងវ៉ាស៊ីនតោន ក្នុងការចរចា។
នៅក្នុងការបង្ហោះមួយ នៅលើវេទិកាប្រព័ន្ធផ្សព្វផ្សាយសង្គម X លោកបានឧ្យដឹងថា ការរំលោភលើការប្តេជ្ញាចិត្ត ការបិទផ្លូវ និងការគំរាមកំហែង គឺជាឧបសគ្គចម្បង ចំពោះការចរចាពិតប្រាកដ ដោយបន្ថែមថា «ពិភពលោកមើលឃើញវោហាសាស្ត្រលាក់ពុតគ្មានទីបញ្ចប់របស់អ្នក និងភាពផ្ទុយគ្នា រវាងការទាមទារ និងសកម្មភាព» ដោយសំដៅទៅលើសហរដ្ឋអាមេរិក។
នៅថ្ងៃពុធផងដែរ លោក Mohammad Bagher Ghalibaf ប្រធានសភាអ៊ីរ៉ង់ បានឧ្យដឹងថា បទឈប់បាញ់ដ៏ទូលំទូលាយនឹងមានអត្ថន័យ លុះត្រាតែវាមិនត្រូវបានអមដោយការបិទផ្លូវសមុទ្រ ឬអ្វីដែលលោកបានពិពណ៌នាថាជា «ការកាន់កាប់សេដ្ឋកិច្ចពិភពលោកជាចំណាប់ខ្មាំង» និងប្រសិនបើអ៊ីស្រាអែល បញ្ឈប់សកម្មភាពយោធារបស់ខ្លួននៅគ្រប់ទិសទី។
លោកបានបន្ថែមថា ការបើកច្រកសមុទ្រហ័រមូ ឡើងវិញនឹងមិនអាចទៅរួចទេ ប្រសិនបើមានការរំលោភបំពានធ្ងន់ធ្ងរលើបទឈប់បាញ់។
មុននេះបន្តិច សារព័ត៌មាន Axios ដែលដកស្រង់សម្ដីមន្ត្រីអាមេរិក បានរាយការណ៍ថា ប្រធានាធិបតីអាមេរិក ដូណាល់ ត្រាំ កំពុងផ្តល់ពេលឱ្យទីក្រុងតេអេរ៉ង់ពី ៣ ទៅ ៥ថ្ងៃ ដើម្បីរួបរួមគ្នានៅពីក្រោយ «ការផ្តល់ជូនតបតដ៏ស៊ីសង្វាក់គ្នា» ឬបទឈប់បាញ់ ដែលបានពង្រីកនៅថ្ងៃអង្គារ នឹងបញ្ចប់៕
ប្រែសម្រួល ឈូក បូរ៉ា
