អ៊ីស្រាអែល រំលោភបទឈប់បាញ់ ដោយបន្តវាយប្រហារ លើក្រុមហេសបូឡា នៅភាគខាងត្បូងប្រទេសលីបង់
យេរូសាឡឹម៖ យោធាអ៊ីស្រាអែល បានឧ្យដឹងថា ខ្លួនបានបន្តវាយប្រហារគោលដៅ ហេសបូឡានៅទូទាំង ភាគខាងត្បូងប្រទេសលីបង់ ទោះបីជាមានបទឈប់បាញ់ជាបន្តបន្ទាប់ក៏ដោយ។
នៅក្នុងសេចក្តីថ្លែងការណ៍មួយ កងកម្លាំងការពារ អ៊ីស្រាអែល បានឧ្យដឹងថា ការវាយប្រហារទាំងនោះ បានវាយប្រហារទៅលើមូលដ្ឋានយោធា Radwan Force របស់ក្រុមហេសបូឡា និងទីតាំងផ្ទុកអាវុធមួយកន្លែង ដែលមានគោលបំណងលុបបំបាត់ការគំរាមកំហែងដល់កងទ័ព និងជនស៊ីវិលអ៊ីស្រាអែល។
យោងតាមសេចក្តីថ្លែងការណ៍មួយដែលចេញ ដោយការិយាល័យរបស់លោកបានឧ្យដឹងថា នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ា បានបញ្ជាឱ្យយោធាវាយប្រហារគោលដៅក្រុមហេសបូឡា នៅក្នុងប្រទេសលីបង់។
យោធាអ៊ីស្រាអែលបានឧ្យដឹងនៅក្នុងសេចក្តីថ្លែងការណ៍មួយនៅរសៀលថ្ងៃសៅរ៍ថា ខ្លួនបានសម្លាប់ពួកសកម្មប្រយុទ្ធហេសបូឡា ជាង ១៥នាក់កាលពីចុងសប្តាហ៍។
នៅក្នុងសេចក្តីថ្លែងការណ៍មួយផ្សេងទៀត IDF បានឧ្យដឹងថា ខ្លួនបានវាយប្រហារហេដ្ឋារចនាសម្ព័ន្ធក្រុមហេសបូឡា ដែលប្រើប្រាស់សម្រាប់គោលបំណងយោធានៅទូទាំងភាគខាងត្បូងប្រទេសលីបង់កាលពីព្រឹកថ្ងៃសៅរ៍ ហើយនឹងបន្តប្រតិបត្តិការយ៉ាងម៉ឺងម៉ាត់ប្រឆាំងនឹងការគំរាមកំហែងស្របតាមការណែនាំពីថ្នាក់នយោបាយ។
យោងតាមគេហទំព័រព័ត៌មានក្នុងស្រុក Lebanon Debate មនុស្សម្នាក់ត្រូវបានសម្លាប់ និងម្នាក់ទៀតរងរបួសនៅក្នុងការ វាយប្រហារតាមអាកាស របស់អ៊ីស្រាអែលលើទីក្រុង Hadatha នៅភាគខាងត្បូងប្រទេសលីបង់ កាលពីយប់ថ្ងៃសៅរ៍៕
ប្រែសម្រួល ឈូក បូរ៉ា
