អ៊ីរ៉ង់ ព្រមានឆ្លើយតបប្រសិន បើសហរដ្ឋអាមេរិក បន្តការបិទផ្លូវ និងប្លន់នាវានៅក្នុងតំបន់
តេអេរ៉ង់៖ ទីបញ្ជាការយោធាសំខាន់ របស់អ៊ីរ៉ង់ គឺទីស្នាក់ការកណ្តាល Khatam al-Anbiya បានសន្យាថានឹងឆ្លើយតបប្រសិន បើសហរដ្ឋអាមេរិកបន្ត “ការបិទផ្លូវ ប្លន់ និងដេីរតួជាចោរសមុទ្រ” នៅក្នុងតំបន់អាស៊ីខាងលិច។
ខ្លួនបានធ្វើការប្រកាសនេះ នៅក្នុងសេចក្តីថ្លែងការណ៍មួយដែលផ្សាយដោយប្រព័ន្ធផ្សព្វផ្សាយអ៊ីរ៉ង់ ខណៈពេលដែលចង្អុល ទៅការបិទផ្លូវកងទ័ពជើងទឹករបស់សហរដ្ឋអាមេរិក ដែលដាក់លើច្រកសមុទ្រហ័រមូស ដែលរារាំងនាវាដែលធ្វើដំណើរទៅ និងមកពីកំពង់ផែអ៊ីរ៉ង់ ពីការឆ្លងកាត់ផ្លូវទឹក និងសកម្មភាពប្រឆាំងនឹងនាវា ដែលមានគោលដៅទៅកាន់អ៊ីរ៉ង់ ក្នុងរយៈពេលប៉ុន្មានថ្ងៃកន្លងមកនេះ។
កងកម្លាំងយោធាអាមេរិក បន្តអនុវត្តទណ្ឌកម្ម របស់សហរដ្ឋអាមេរិក និងអនុវត្តយ៉ាងពេញលេញ នូវការបិទផ្លូវប្រឆាំងនឹងកប៉ាល់ដែលចូល ឬចាកចេញពីកំពង់ផែអ៊ីរ៉ង់។
នៅក្នុងការបង្ហោះមួយនៅលើ X បញ្ជាការកណ្តាល អាមេរិកបានឧ្យដឹងថា កប៉ាល់ចំនួន ៣៧គ្រឿងត្រូវបាន ប្តូរទិសដៅចាប់តាំងពីការចាប់ផ្តើមនៃការបិទផ្លូវ ដោយកត់សម្គាល់ថា កប៉ាល់ពាណិជ្ជកម្មមួយគ្រឿងឈ្មោះ Sevan ដែលត្រូវបានស្ទាក់ចាប់នៅក្នុងសមុទ្រអារ៉ាប់កាលពីព្រឹកថ្ងៃសៅរ៍ ដោយកងកម្លាំងអាមេរិក បច្ចុប្បន្នកំពុង “គោរពតាមការណែនាំរបស់យោធាអាមេរិក ក្នុងការបង្វែរត្រឡប់ទៅអ៊ីរ៉ង់វិញក្រោមការអមដំណើរ”។
ប្រធានាធិបតីអាមេរិកលោក ដូណាល់ ត្រាំ បានប្រកាសនៅថ្ងៃទី១២ ខែមេសាថា កងទ័ពជើងទឹកអាមេរិក នឹងចាប់ផ្តើមរារាំងកប៉ាល់ដែលព្យាយាមចូល ឬចាកចេញពីច្រកសមុទ្រ ហ័រមូស។
ការសម្រេចចិត្តរបស់លោកបានកើតឡើងបន្ទាប់ពីកិច្ចចរចាជុំទីមួយរវាងសហរដ្ឋអាមេរិក និងអ៊ីរ៉ង់នៅថ្ងៃទី១១ និង១២ ខែមេសា នៅទីក្រុងអ៊ីស្លាម៉ាបាដ ប្រទេសប៉ាគីស្ថាន បានបរាជ័យក្នុងការសម្រេចបានកិច្ចព្រមព្រៀងសន្តិភាព។
ដើម្បីឆ្លើយតបទៅនឹងការប្រកាសរបស់លោក ត្រាំ ប្រធានាធិបតីអ៊ីរ៉ង់ លោក Masoud Pezeshkian បានព្រមានថា “ការគំរាមកំហែងណាមួយប្រឆាំងនឹងសន្តិសុខនៃច្រកសមុទ្រហ័រមូស នឹងមានផលវិបាកទ្រង់ទ្រាយធំ សម្រាប់ពាណិជ្ជកម្មសកល”។
នៅថ្ងៃសៅរ៍ ទីបញ្ជាការយោធា សំខាន់របស់អ៊ីរ៉ង់ គឺទីស្នាក់ការកណ្តាល Khatam al-Anbiya បានបញ្ជាក់ជាថ្មីនូវការសន្យា របស់ខ្លួនក្នុងការប្រតិកម្ម ប្រសិនបើសហរដ្ឋអាមេរិក បន្ត “ការបិទផ្លូវ ការប្លន់ និងដេីរតួជាចោរសមុទ្រ” នៅក្នុងតំបន់អាស៊ីខាងលិច៕
