អ៊ីរ៉ង់បញ្ជាក់ថា សម្ពាធរបស់សហរដ្ឋអាមេរិក រារាំងដល់ផ្លូវការទូត ហើយព្រមានប្រឆាំងនឹងការចរចា ក្រោមការបង្ខិតបង្ខំ
តេអេរ៉ង់៖ ប្រធានាធិបតីអ៊ីរ៉ង់ លោក Masoud Pezeshkian បាននិយាយថា សម្ពាធ និងសកម្មភាពអរិភាព របស់សហរដ្ឋអាមេរិក កំពុងធ្វើឱ្យប៉ះពាល់ដល់ទំនុកចិត្ត និងធ្វើឱ្យវឌ្ឍនភាពឆ្ពោះទៅរកការចរចាឡើងវិញ កាន់តែពិបាក។
នៅក្នុងការហៅទូរស័ព្ទ កាលពីថ្ងៃសៅរ៍ជាមួយនាយករដ្ឋមន្ត្រីប៉ាគីស្ថាន លោក Shehbaz Sharif លោក Pezeshkian បានពិភាក្សាអំពីការ អភិវឌ្ឍនយោបាយ និងយោធាថ្មីៗ កិច្ចខិតខំប្រឹងប្រែង ដើម្បីគាំទ្របទឈប់បាញ់ និងគំនិតផ្តួចផ្តើមការទូតដែលកំពុងដំណើរការ។
លោក Pezeshkian បានលេីកឡេីងថា វឌ្ឍនភាពក្នុងការដោះស្រាយជម្លោះតម្រូវឱ្យមាន “ការយល់ដឹងរួម” និងលក្ខខណ្ឌសមស្រប សម្រាប់ការសន្ទនាប្រកបដោយប្រសិទ្ធភាព។
លោកបានបន្ដថា ទណ្ឌកម្មថ្មីៗរបស់សហរដ្ឋអាមេរិក ការរឹតបន្តឹងកងទ័ពជើងទឹក និងសម្ពាធយោធាគឺជាឧបសគ្គចម្បង ចំពោះការកសាងទំនុកចិត្តឡើងវិញ។
លោកបានបន្ថែមថា ទីក្រុងវ៉ាស៊ីនតោន មិនអាចបន្តការចរចាបាននោះទេ ខណៈពេលដែលកំពុងបង្កើនសម្ពាធលើអ៊ីរ៉ង់ ដោយនិយាយថា សកម្មភាពបែបនេះ “រំខានដល់បរិយាកាសចាំបាច់” សម្រាប់ការទូត។
ដោយបញ្ជាក់ជាថ្មីអំពីជំហររបស់អ៊ីរ៉ង់ លោក Pezeshkian បានឧ្យដឹងថា ទីក្រុងតេអេរ៉ង់មិនបានចាប់ផ្ដើមជម្លោះនោះទេ ហើយក៏មិនមានចំណាប់អារម្មណ៍លើអស្ថិរភាពក្នុងតំបន់ដែរ។
លោកបានបន្ថែមថា អ៊ីរ៉ង់ នឹងចូលរួមក្នុងការចរចាតែលើមូលដ្ឋាននៃការគោរពគ្នាទៅវិញទៅមក មិនមែន «ការគំរាមកំហែង សម្ពាធ និងការដាក់ទណ្ឌកម្ម» នោះទេ ហើយបានទទូចលើសិទ្ធិរបស់ខ្លួនក្រោមច្បាប់អន្តរជាតិ៕
ប្រែសម្រួល ឈូក បូរ៉ា
