អ៊ីរ៉ង់ អះអាងថា ការបន្ត ទម្លាប់បំផ្លិចបំផ្លាញ របស់សហរដ្ឋអាមេរិក កំពុងធ្វើឱ្យវឌ្ឍនភាព ការទូតយឺតយ៉ាវ
តេអេរ៉ង់៖ រដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi បានស្តីបន្ទោសវឌ្ឍនភាពយឺតយ៉ាវ នៃការទូតរវាងអ៊ីរ៉ង់ និងសហរដ្ឋអាមេរិក ទៅលើការបន្តទម្លាប់បំផ្លិចបំផ្លាញ របស់ទីក្រុងវ៉ាស៊ីនតោន។
សេចក្តីថ្លែងការណ៍មួយ ដែលចេញផ្សាយដោយក្រសួងការបរទេសអ៊ីរ៉ង់ បានឧ្យដឹងថា លោកបានធ្វើការកត់សម្គាល់នេះ នៅក្នុងកិច្ចប្រជុំជាមួយប្រធានាធិបតីរុស្ស៊ី លោក វ្លាឌីមៀ ពូទីន នៅទីក្រុង Saint Petersburg ដែលក៏មានការចូលរួមពី រដ្ឋមន្ត្រីការបរទេសរុស្ស៊ី លោក Sergei Lavrov ក្នុងចំណោមអ្នកដទៃទៀត ។
ដោយពន្យល់អំពីដំណើរការការទូត ដែលសម្របសម្រួលដោយប៉ាគីស្ថាន ដើម្បីបញ្ចប់សង្គ្រាម និងបង្កើតសន្តិភាព និងសន្តិសុខនៅក្នុងតំបន់អាស៊ីខាងលិច និងច្រកសមុទ្រហ័រមូស លោក Araghchi បានឧ្យដឹងថា «មូលហេតុចម្បង នៃវឌ្ឍនភាពយឺតយ៉ាវនៃការទូត គឺការបន្តទម្លាប់បំផ្លិចបំផ្លាញ របស់សហរដ្ឋអាមេរិក ជាពិសេសការទទូចរបស់ខ្លួន ក្នុងការដាក់ចេញនូវការទាមទារ មិនសមហេតុផល ការផ្លាស់ប្តូរជំហរជាញឹកញាប់ វោហាសាស្ត្រនៃការគំរាមកំហែង និងការបំពានការសន្យាម្តងហើយម្តងទៀត»។
លោកបានលេីកឡេីងថា អ៊ីរ៉ង់ នឹងធ្វើការសម្រេចចិត្តសមស្របមួយអំពីដំណើរការការទូតបច្ចុប្បន្ន ខណៈពេលដែលពិចារណាលើបទពិសោធន៍ពីមុនរបស់ខ្លួន «ជាពិសេសការឈ្លានពានផ្នែកយោធាពីរលើកដោយសហរដ្ឋអាមេរិក និងអ៊ីស្រាអែល ប្រឆាំងនឹងប្រទេសនេះក្នុងការចរចាការទូត ការវាយប្រហារលើរោងចក្រនុយក្លេអ៊ែរសន្តិភាពរបស់ខ្លួន ក៏ដូចជាការញៀននឹងការដាក់ទណ្ឌកម្ម និងសម្ពាធសេដ្ឋកិច្ចរបស់សហរដ្ឋអាមេរិក និងការបន្តលួចប្លន់លើនាវាពាណិជ្ជកម្មអ៊ីរ៉ង់»។
លោក ពូទីន បានសម្តែងការត្រៀមខ្លួនរបស់រុស្ស៊ីក្នុងការផ្តល់ជំនួយ ដើម្បីបញ្ចប់សង្គ្រាមទាំងស្រុង និងបង្កើតសន្តិភាពក្នុងតំបន់ ដោយបង្ហាញក្តីសង្ឃឹមថា ដំណើរការការទូតក្នុងទិសដៅនោះនឹងនាំទៅរកលទ្ធផលអំណោយផលសម្រាប់សន្តិភាព និងស្ថិរភាព។
លោក ពូទីន បានគូសបញ្ជាក់ពីការប្ដេជ្ញាចិត្តរបស់រុស្ស៊ីក្នុងការពង្រឹងទំនាក់ទំនងទ្វេភាគីបន្ថែមទៀតក្នុងគ្រប់វិស័យដែលមានផលប្រយោជន៍រួម និងពង្រីកកិច្ចសហប្រតិបត្តិការទ្វេភាគីក្នុងវិស័យផ្សេងៗ៕
