ក្រុមហ៊ុនអាកាសចរណ៍ នៅឥណ្ឌា កំពុងស្វែងរកជំនួយពីរដ្ឋាភិបាល ក្នុងពេលដែលសាំង យន្តហោះឡើងថ្លៃ
បរទេស ៖ ក្រុមហ៊ុនអាកាសចរណ៍ ឥណ្ឌាបានស្វែងរកជំនួយពីរដ្ឋាភិបាល ខណៈដែលតម្លៃប្រេងឥន្ធនៈ សម្រាប់យន្តហោះកំពុងកើនឡើង ដែលគំរាមកំហែងដល់លទ្ធភាពពាណិជ្ជកម្ម។
យោងតាមសារព័ត៌មាន RT ចេញផ្សាយនៅថ្ងៃទី២៩ ខែមេសា ឆ្នាំ២០២៦ថា សហព័ន្ធអាកាសចរណ៍ឥណ្ឌា (FIA) – ដែលជាស្ថាប័នឧស្សាហកម្មមួយដែលតំណាងឱ្យក្រុមហ៊ុនអាកាសចរណ៍កំពូលៗ រួមទាំង Air India, IndiGo និង SpiceJet បានឱ្យដឹងនៅក្នុងលិខិតមួយថា “ការគាំទ្រជាបន្ទាន់គឺត្រូវបានទាមទារសម្រាប់ការកំណត់តម្លៃ ATF ដើម្បីបន្ត ប្រតិបត្តិការអាកាសចរណ៍។ “ឧស្សាហកម្មអាកាសចរណ៍នៅក្នុងប្រទេសឥណ្ឌាកំពុងស្ថិតនៅក្រោមភាពតានតឹងខ្លាំង ហើយជិតដល់ការបិទ ឬបញ្ឈប់ប្រតិបត្តិការរបស់ខ្លួន”តែម្តង។
សហព័ន្ធអាកាសចរណ៍ឥណ្ឌា បាននិយាយថា ការកំណត់តម្លៃប្រេងឥន្ធនៈទួរប៊ីនអាកាសចរណ៍ (ATF) បានក្លាយជា “មិនអាចទាយទុកជាមុនបាន” ដែលប៉ះពាល់ដល់ប្រតិបត្តិការក្នុងស្រុក និងអន្តរជាតិ។ “ការកំណត់តម្លៃ ATF កំពុងបង្កើតអតុល្យភាពធ្ងន់ធ្ងរនៅក្នុងប្រតិបត្តិការក្នុងស្រុក និងអន្តរជាតិ និងធ្វើឱ្យបណ្តាញអាកាសចរណ៍មិនអាចដំណើរការបាន និងមិនអាចទ្រទ្រង់បាន”។
កាលពីដើមខែនេះ ប្រទេសឥណ្ឌា បានដំឡើងតម្លៃប្រេងឥន្ធនៈសម្រាប់ជើងហោះហើរអន្តរជាតិ និងបានបង្កើនតម្លៃ ថាមពលបន្តិចបន្តួចសម្រាប់ផ្លូវហោះហើរក្នុងស្រុក។
ការកើនឡើងនៃថ្លៃដើម ATF បានបង្កើនថ្លៃ ដើមប្រតិបត្តិការអាកាសចរណ៍ពី 30%-40% ដល់ 55%-60% នេះបើយោងតាម FIA។
ទីភ្នាក់ងារព័ត៌មាន Bloomberg បានរាយការណ៍ថា ការផ្លាស់ប្តូររបស់ សហព័ន្ធអាកាសចរណ៍ឥណ្ឌា កើតឡើងចំពេលមានការរំពឹង ទុកកាន់តែខ្លាំងឡើងថា រដ្ឋាភិបាលនឹងដំឡើងថ្លៃប្រេងឥន្ធនៈ នៅពេលដែលការបោះឆ្នោត ក្នុងការបោះឆ្នោតរដ្ឋបញ្ចប់នៅថ្ងៃទី ២៩ ខែមេសា។
ប្រែសម្រួលៈ ណៃ តុលា
