ម៉ិកស៊ិក រិះគន់ការជ្រៀតជ្រែក របស់សហរដ្ឋអាមេរិក ក្នុងកិច្ចការផ្ទៃក្នុង និងប្ដេជ្ញាការពារអធិបតេយ្យភាពជាតិ
ម៉ិកស៊ិក ៖ ប្រធានាធិបតីម៉ិកស៊ិក លោកស្រី Claudia Sheinbaum បានបដិសេធការជ្រៀតជ្រែកពីបរទេសក្នុងកិច្ចការផ្ទៃក្នុងរបស់ប្រទេស បន្ទាប់ពីសហរដ្ឋអាមេរិក បានស្នើសុំឱ្យធ្វើបត្យាប័នអភិបាលរដ្ឋ និងមន្ត្រី៩រូបផ្សេងទៀត ដែលខ្លួនចោទប្រកាន់ពីបទជួញដូរអាវុធ និងគ្រឿងញៀន។
លោកស្រី Sheinbaum បានឧ្យដឹងក្នុងអំឡុងពេលសន្និសីទ សារព័ត៌មានប្រចាំថ្ងៃរបស់លោកស្រីថា ដោយសារតែខ្វះភស្តុតាង សមហេតុផលនៃការប្រព្រឹត្តខុស ការចោទប្រកាន់ទាំងនេះ អាចបណ្តាលមកពីហេតុផលនយោបាយ។
លោកស្រីបានលេីកឡេីងថា “ការការពារអធិបតេយ្យភាព ដូចដែលយើងបានធ្វើរហូតមកដល់ពេលនេះ និងនីតិរដ្ឋត្រូវតែផ្អែកលើភស្តុតាង” ដោយសង្កត់ធ្ងន់ថា “យើងនឹងមិនអនុញ្ញាតឱ្យរដ្ឋាភិបាលបរទេស ណាមួយមកសម្រេចចិត្តអនាគតរបស់ប្រជាជនម៉ិកស៊ិកឡើយ”។
នេះជាលើកដំបូងក្នុងប្រវត្តិសាស្ត្រ នៃទំនាក់ទំនងទ្វេភាគីម៉ិកស៊ិក-សហរដ្ឋអាមេរិក ដែលទីក្រុងវ៉ាស៊ីនតោន បានចោទប្រកាន់មន្ត្រីជាន់ខ្ពស់ម្នាក់ ដែលនៅតែកាន់តំណែងពីម៉ិកស៊ិក គឺអភិបាលរដ្ឋ Sinaloa លោក Ruben Rocha ពីបទឧក្រិដ្ឋ។
លោកស្រីបានបន្ដថា ការិយាល័យរដ្ឋអាជ្ញាម៉ិកស៊ិកបានបើកការស៊ើបអង្កេត «ស្របគ្នា» លើការចោទប្រកាន់ទាំងនេះ។ «ជំហររបស់ខ្ញុំលើព្រឹត្តិការណ៍ទាំងនេះគឺសច្ចភាព យុត្តិធម៌ និងការការពារអធិបតេយ្យភាព ប្រសិនបើគ្មានភស្តុតាងច្បាស់លាស់ទេ វាច្បាស់ណាស់ថា គោលបំណងនៃការចោទប្រកាន់ទាំងនេះដោយក្រសួងយុត្តិធម៌ សហរដ្ឋអាមេរិក គឺជារឿងនយោបាយ»៕
ប្រែសម្រួល ឈូក បូរ៉ា
