អ៊ីស្រាអែល អាចនឹងបន្តសកម្មភាព យោធាប្រឆាំងនឹងអ៊ីរ៉ង់ ក្នុងពេលឆាប់ៗនេះ
យេរូសាឡឹម៖ រដ្ឋមន្ត្រីក្រសួងការពារជាតិអ៊ីស្រាអែល លោក Israel Katz បានឧ្យដឹងថា អ៊ីស្រាអែល អាចនឹងត្រូវបន្តសកម្មភាពយោធាប្រឆាំងនឹងអ៊ីរ៉ង់ ក្នុងពេលឆាប់ៗនេះ។
ថ្លែងនៅក្នុងពិធីយោធាមួយ លោក Katz បានលេីកឡេីងថា អ៊ីស្រាអែលគាំទ្រ ការចរចារវាងសហរដ្ឋអាមេរិក និងអ៊ីរ៉ង់ លើកិច្ចព្រមព្រៀង ដែលអាចធ្វើទៅបាន ប៉ុន្តែអាចនឹងត្រូវការបន្តការវាយប្រហារ ដើម្បីធានាសន្តិសុខរបស់ខ្លួន។
លោកបានបន្ដថា «អ៊ីរ៉ង់បានរងការវាយប្រហារ យ៉ាងខ្លាំងក្នុងរយៈពេលមួយឆ្នាំកន្លងមក ដែលជាការវាយប្រហារ ដែលបានធ្វើឱ្យវាថយក្រោយជាច្រើនឆ្នាំ នៅគ្រប់វិស័យទាំងអស់»។
លោកបានបន្ថែមថា អ៊ីស្រាអែល នឹងបន្តការវាយលុករបស់ខ្លួនប្រឆាំងនឹងក្រុមហេសបូឡានៅលីបង់ «ដូចដែលយើងបានធ្វើនៅហ្គាហ្សា» ដោយថា យោធានឹងធ្វើសកម្មភាព ដើម្បីបំផ្លាញហេដ្ឋារចនាសម្ព័ន្ធសកម្មប្រយុទ្ធទាំងអស់នៅក្នុងអ្វីដែលខ្លួនហៅថា «ខ្សែលឿង» ដែលជាតំបន់ការពារ ដែលប្រកាសដោយអ៊ីស្រាអែល តាមបណ្តោយព្រំដែនដែលលាតសន្ធឹងដល់ទន្លេ Litani។
កងកម្លាំងអ៊ីស្រាអែលនៅតែដាក់ពង្រាយនៅភាគខាងត្បូងប្រទេសលីបង់ ដោយធ្វើការវាយប្រហារប្រចាំថ្ងៃទោះបីជាមានបទឈប់បាញ់បណ្តោះអាសន្ន ដែលបានចូលជាធរមាននៅដើមខែនេះក៏ដោយ។
ដើម្បីបង្កើតតំបន់ទ្រនាប់ កងទ័ពបានកម្ទេចអគារនៅក្នុងភូមិ និងទីប្រជុំជនលីបង់តាមបណ្តោយតំបន់ព្រំដែន ដោយបានបណ្តេញ ប្រជាជនចេញពីលំនៅឋាន៕
ប្រែសម្រួល ឈូក បូរ៉ា
