អ៊ីរ៉ង់ រិះគន់សហរដ្ឋអាមេរិក ចំពោះការបកស្រាយផ្ទុយនឹងអត្ថបទ MoU ដែលទេីបចុះហត្ថលេខា
តេអេរ៉ង់៖ អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei បានអំពាវនាវឱ្យរដ្ឋាភិបាលសហរដ្ឋអាមេរិក ចៀសវាងការបកស្រាយដែល «ផ្ទុយទាំងស្រុង» ជាមួយនឹងអនុស្សរណៈនៃការយោគយល់គ្នា (MoU) អ៊ីរ៉ង់-សហរដ្ឋអាមេរិក ដែលទើបចុះហត្ថលេខាថ្មីៗនេះ។
លោកបានធ្វើការកត់សម្គាល់នេះនៅក្នុងការបង្ហោះមួយនៅលើវេទិកាប្រព័ន្ធផ្សព្វផ្សាយសង្គម X ដោយរិះគន់សេចក្តីថ្លែងការណ៍ «ផ្ទុយ» ដែលធ្វើឡើងដោយមន្ត្រីសហរដ្ឋអាមេរិក ទាក់ទងនឹងបទប្បញ្ញត្តិនៃ MoU។
លោកបានលេីកឡេីងថា ការកត់សម្គាល់អំពីការបញ្ចប់សង្គ្រាមនឹងមិនជួយកាត់បន្ថយ «ការមិនទុកចិត្តដែលប្រមូលផ្តុំ» របស់ប្រជាជនអ៊ីរ៉ង់នោះទេ ហើយនឹងគ្រាន់តែជាការរំលឹកអំពីការរំលោភលើការសន្យាកាលពីអតីតកាល។
លោក Baghaei បានសង្កត់ធ្ងន់ថា រដ្ឋាភិបាលសហរដ្ឋអាមេរិក មិនដែលបង្ហាញពីភាពស្មោះត្រង់ណាមួយក្នុងការប្រព្រឹត្តរបស់ខ្លួន ចំពោះប្រជាជាតិអ៊ីរ៉ង់នោះទេ ដោយបន្ថែមថា ទោះបីជាមានហេតុផលមិនទុកចិត្តក៏ដោយ អ៊ីរ៉ង់បានចូលរួមក្នុងដំណើរការការទូតជាមួយសហរដ្ឋអាមេរិកដោយស្មោះត្រង់ ហើយបានចុះហត្ថលេខាលើ MoU។
លោកបានបន្ដថា ប្រជាជនអ៊ីរ៉ង់ដឹងថា កំហឹងរបស់ «សត្រូវ» នឹងមិនបញ្ចប់ដោយការចុះហត្ថលេខាលើអនុស្សរណៈនៃការយោគយល់គ្នានោះទេ ដោយគិតដល់បទពិសោធន៍ក្នុងរយៈពេល ៥ទសវត្សរ៍កន្លងមក ជាពិសេសការវិវត្តន៍ក្នុងរយៈពេល ១៨ខែកន្លងមក៕
ប្រែសម្រួល ឈូក បូរ៉ា
