ប្រធានាធិបតីម៉ិកស៊ិក ជំរុញឱ្យអ្នកនយោបាយអាមេរិក ឈប់ប្រើប្រាស់ម៉ិកស៊ិកជាបញ្ហាយុទ្ធនាការ ឃោសនាបោះឆ្នោត
ម៉ិកស៊ិក៖ ប្រធានាធិបតីម៉ិកស៊ិក លោកស្រី Claudia Sheinbaum បានអំពាវនាវដល់អ្នកនយោបាយអាមេរិកឱ្យឈប់ប្រើប្រាស់ប្រទេសម៉ិកស៊ិក ជាបញ្ហាយុទ្ធនាការឃោសនាបោះឆ្នោត ខណៈពេលដែលពួកគេកំពុងត្រៀមខ្លួន សម្រាប់ការបោះឆ្នោតពាក់កណ្តាលអាណត្តិនៅខែវិច្ឆិកា។
លោកស្រីប្រធានាធិបតីបានឧ្យដឹងនៅក្នុងសន្និសីទសារព័ត៌មានប្រចាំថ្ងៃរបស់លោកស្រីថា “ប្រទេសម៉ិកស៊ិក មិនគួរជាបញ្ហាយុទ្ធនាការឃោសនាបោះឆ្នោតនោះទេ ពីព្រោះពួកគេមានបញ្ហាផ្ទាល់ខ្លួននៅសហរដ្ឋអាមេរិក។ ប្រទេសម៉ិកស៊ិក មិនមែនជាប្រទេសរបស់នរណាម្នាក់ទេ”។
ការកត់សម្គាល់នេះបានកើតឡើងបន្ទាប់ពីសមាជិកសភាសាធារណរដ្ឋ លោក Carlos Gimenez បានចោទប្រកាន់រដ្ឋាភិបាលរបស់លោកស្រីថា បានធ្វើឱ្យខូចគោលនយោបាយ “សម្ពាធអតិបរមា” របស់រដ្ឋបាលសហរដ្ឋអាមេរិក ចំពោះប្រទេសគុយបា បន្ទាប់ពីការប្រកាសរបស់លោកស្រី អំពីការដឹកជញ្ជូនជំនួយមនុស្សធម៌ថ្មីទៅកាន់កោះនេះ។
លោកស្រី Sheinbaum បានបន្ដថា ខណៈដែលប្រទេសម៉ិកស៊ិក និងសហរដ្ឋអាមេរិក សហការគ្នាលើមូលដ្ឋាននៃ «កិច្ចសហការដោយគ្មានការចុះចូល» ប្រទេសម៉ិកស៊ិក នៅតែប្តេជ្ញាចិត្ត ចំពោះគោលនយោបាយយូរអង្វែងរបស់ខ្លួនចំពោះប្រទេសគុយបា ដោយបន្ថែមថា ជំនួយមនុស្សធម៌ ដល់កោះនេះនឹងបន្តជា «បញ្ហាអធិបតេយ្យភាព» និងមនុស្សធម៌៕
ប្រែសម្រួល ឈូក បូរ៉ា
