អ៊ីរ៉ង់ ព្រមានឆ្លើយតបយ៉ាងម៉ឺងម៉ាត់ ចំពោះទង្វើព្យាបាទណាមួយ របស់សហរដ្ឋអាមេរិក
តេអេរ៉ង់៖ មន្ត្រីសន្តិសុខជាន់ខ្ពស់អ៊ីរ៉ង់ម្នាក់បានឧ្យដឹងថា ប្រសិនបើសហរដ្ឋអាមេរិក ប្រព្រឹត្តអំពើ «ព្យាបាទ» ណាមួយ អ៊ីរ៉ង់នឹងឆ្លើយតបយ៉ាងម៉ឺងម៉ាត់ដោយកំណត់គោលដៅផលប្រយោជន៍យោធា និងសេដ្ឋកិច្ចរបស់ខ្លួននៅក្នុងតំបន់អាស៊ីខាងលិច ដែលជាការឆ្លើយតបដែល «នឹងត្រូវបានឆ្លាក់ក្នុងប្រវត្តិសាស្ត្រ»។
លោក Mohsen Rezaei លេខាធិការក្រុមប្រឹក្សាសន្តិសុខជាតិជាន់ខ្ពស់អ៊ីរ៉ង់ បានធ្វើការកត់សម្គាល់នេះក្នុងអំឡុងពេលជួបជាមួយនាយករដ្ឋមន្ត្រី និងរដ្ឋមន្ត្រីការបរទេសកាតា Sheikh Mohammed bin Abdulrahman bin Jassim Al Thani នៅក្នុងរដ្ឋធានីអ៊ីរ៉ង់។
លោក Rezaei បានបញ្ជាក់ពីការមិនទុកចិត្តរបស់ទីក្រុងតេអេរ៉ង់ ចំពោះទីក្រុងវ៉ាស៊ីនតោន ដោយចោទប្រកាន់ទីក្រុងតេអេរ៉ង់ថា បានក្បត់ការទូត និងការចរចាម្តងហើយម្តងទៀត។
លោកបានគូសបញ្ជាក់ថា អ៊ីរ៉ង់នឹងបើកច្រកសមុទ្រហ័រមូស ឡើងវិញ លុះត្រាតែទីក្រុងវ៉ាស៊ីនតោនចាត់វិធានការជាក់ស្តែង ដើម្បីបំពេញលក្ខខណ្ឌរបស់ទីក្រុងតេអេរ៉ង់។ ចំណែកនាយករដ្ឋមន្ត្រីកាតាវិញ បានបញ្ជាក់ពីការប្តេជ្ញាចិត្តរបស់ប្រទេសលោក ក្នុងការសហការជាមួយអ៊ីរ៉ង់ ដោយលើកឡើងពីការទទួលខុសត្រូវក្នុងតំបន់។
រដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi បានប្រាប់អ្នកការទូតកំពូលរបស់ប្រទេសកាតាថា ស្ថានភាពបច្ចុប្បន្ននៅក្នុងតំបន់នេះ គឺជាផលវិបាកតែមួយគត់នៃ «ការឈ្លានពានផ្នែកយោធា» របស់សហរដ្ឋអាមេរិក និងអ៊ីស្រាអែល ប្រឆាំងនឹងអ៊ីរ៉ង់ ក៏ដូចជាការបន្ត «សកម្មភាពអន្តរាគមន៍ និងខុសច្បាប់» របស់ទីក្រុងវ៉ាស៊ីនតោន ជាពិសេសការបិទផ្លូវកងទ័ពជើងទឹក និងភេរវកម្មសេដ្ឋកិច្ចប្រឆាំងនឹងទីក្រុងតេអេរ៉ង់៕
ប្រែសម្រួល ឈូក បូរ៉ា
