អ៊ីរ៉ង់ ថ្កោលទោសការវាយប្រហារ របស់សហរដ្ឋអាមេរិក លើកោះភាគខាងត្បូង និងសង្កត់ធ្ងន់លើសិទ្ធិការពារខ្លួន
តេអេរ៉ង់៖ ក្រសួងការបរទេសអ៊ីរ៉ង់ បានថ្កោលទោសយ៉ាងខ្លាំង ចំពោះការវាយប្រហារដោយយោធារបស់សហរដ្ឋអាមេរិក ប្រឆាំងនឹងកោះឡារ៉ាក់ ភាគខាងត្បូងរបស់អ៊ីរ៉ង់ថាជា “ទង្វើឈ្លានពាន” ដោយសង្កត់ធ្ងន់លើសិទ្ធរបស់អ៊ីរ៉ង់ ក្នុងការការពារខ្លួន។
ក្រសួងបានឧ្យដឹងនៅក្នុងសេចក្តីថ្លែងការណ៍មួយថា “កងទ័ពអាមេរិកភេរវករ នៅយប់ថ្ងៃអាទិត្យ បានរំលោភលើអធិបតេយ្យភាព ជាតិ និងបូរណភាពទឹកដីរបស់អ៊ីរ៉ង់ម្តងទៀត” ដោយបន្ថែមថា ការវាយប្រហារនេះបានសម្លាប់ និងរបួសបុគ្គលិកយោធា និងពលរដ្ឋអ៊ីរ៉ង់មួយចំនួន និងបណ្តាលឱ្យខូចខាតដល់ទ្រព្យសម្បត្តិសាធារណៈ និងឯកជន។
ក្រសួងបានឧ្យដឹងថា ដើម្បីឆ្លើយតបទៅនឹង “ការឈ្លានពានផ្នែកយោធា” និងក្នុងការអនុវត្ត “សិទ្ធិដើម” របស់អ៊ីរ៉ង់ ក្នុងការការពារខ្លួនស្របច្បាប់ កងកម្លាំងប្រដាប់អាវុធអ៊ីរ៉ង់ បានធ្វើការវាយប្រហារ និងកំទេច ប្រឆាំងនឹងមូលដ្ឋានទ័ពអាមេរិក នៅហ្ស៊កដានី ដែលខ្លួនបានឧ្យដឹងថាត្រូវបានប្រើ ដើម្បីចាប់ផ្តើម និងគាំទ្រការវាយប្រហាររបស់សហរដ្ឋអាមេរិក។
ក្រសួងបានស្តីបន្ទោសសហរដ្ឋអាមេរិក និងអ៊ីស្រាអែល ចំពោះអសន្តិសុខនៅក្នុងផ្លូវដឹកជញ្ជូនក្នុងតំបន់ និងច្រកសមុទ្រហ័រមូស ដោយលើកឡើងពីការវាយប្រហាររបស់ពួកគេលើអ៊ីរ៉ង់ចាប់តាំងពីថ្ងៃទី២៨ ខែកុម្ភៈ និងការបិទផ្លូវកងទ័ពជើងទឹករបស់សហរដ្ឋអាមេរិក។
ក្រសួងបានឧ្យដឹងទៀតថា អ៊ីរ៉ង់ នឹងឆ្លើយតបយ៉ាងម៉ឺងម៉ាត់ ចំពោះការឈ្លានពានផ្នែកយោធា ណាមួយបន្ថែមទៀត ហើយសហរដ្ឋអាមេរិក និងភាគីដែលសហការជាមួយខ្លួននឹងទទួលខុសត្រូវ ចំពោះផលវិបាក៕
ប្រែសម្រួល ឈូក បូរ៉ា
