សហរដ្ឋអាមេរិក អនុម័តកញ្ចប់យន្តហោះចម្បាំង F-35 ចំនួន៤៨គ្រឿង ទៅឲ្យអារ៉ាប៊ីសាអូឌីត
បរទេស៖យោងតាមការចេញផ្សាយ របស់ទីភ្នាក់ងារចិនស៊ិនហួនៅថ្ងៃនេះ បានឲ្យដឹងថា ក្រសួងការបរទេសសហរដ្ឋអាមេរិក
បាននិយាយកាលពីថ្ងៃព្រហស្បតិ៍ថា រដ្ឋាភិបាល សហរដ្ឋអាមេរិកបានអនុម័ត ការលក់យន្តហោះចម្បាំងបំបាំងកាយ F-35
ចំនួន៤៨គ្រឿង និងឧបករណ៍ពាក់ព័ន្ធមួយចំនួនទៀត ទៅឱ្យប្រទេសអារ៉ាប៊ីសាអូឌីត។
ក្រសួងបាននិយាយនៅក្នុងសេចក្តីថ្លែងការណ៍មួយថា ការចំណាយសរុបប៉ាន់ស្មានគឺ២៤,៣ ពាន់លានដុល្លារ។
សេចក្តីថ្លែងការណ៍បាននិយាយថា អារ៉ាប៊ីសាអូឌីតបានស្នើសុំទិញយន្តហោះចម្បាំង F-35 Lightning II Joint Strike Fighter
ចំនួន៤៨គ្រឿងជាមួយនឹងការចុះចតបញ្ឈរ និងចុះចតធម្មតា និងម៉ាស៊ីន Pratt & Whitney F135-PW-100 ចំនួន៤៩គ្រឿង ដែលក្នុងនោះ៤៨គ្រឿងត្រូវបានដំឡើងក្នុងយន្តហោះ និងមួយទៀតជាគ្រឿងបន្លាស់។
យោងតាមសេចក្តីថ្លែងការណ៍ ការលក់ដែលបានស្នើឡើងនឹងធ្វើឱ្យប្រសើរឡើងនូវសមត្ថភាពរបស់អារ៉ាប៊ីសាអូឌីត ក្នុងការទប់ស្កាត់ការគំរាមកំហែង នាពេលបច្ចុប្បន្ន និងនាពេលអនាគត ដោយការពង្រឹងការការពារមាតុភូមិរបស់ខ្លួន និងការកែលម្អអន្តរប្រតិបត្តិការ ជាមួយកងកម្លាំងសហរដ្ឋអាមេរិក និងកងកម្លាំងក្នុងតំបន់ និងណាតូផ្សេងទៀត ប៉ុន្តែ នឹងមិនផ្លាស់ប្តូរតុល្យភាពយោធានៅក្នុងតំបន់។
គួរឲ្យដឹងដែរថាកន្លងមកអ៊ីស្រាអែល ត្រូវបានគេរាយការណ៍ថា ជាប្រទេសតែមួយគត់នៅមជ្ឈិមបូព៌ា ដែលបច្ចុប្បន្នប្រតិបត្តិការយន្តហោះចម្បាំង F-35 ៕
